នៅថ្ងៃបិទបញ្ចប់សន្និសីទអន្តរជាតិស្តីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាកាលពីថ្ងៃព្រហស្បតិ៍ គណៈប្រតិភូមកពីរាប់សិបប្រទេសបានព្រមព្រៀងគ្នាលើកិច្ចសហប្រតិបត្តិការប្រឆាំងនឹងបណ្ដាញឆបោក និងគាំពារជនរងគ្រោះដោយការជួញដូរនៅក្នុងឧស្សាហកម្មមួយនេះ។
លោកឧបនាយករដ្ឋមន្ត្រី នេត សាវឿន បានធ្វើជាអធិបតីបិទសន្និសីទនេះ បើទោះបីជាកាលពីសប្ដាហ៍មុនប្រធានគណៈកម្មាធិការចំនួនពីររបស់សភាអាមេរិកបានអំពាវនាវឲ្យរដ្ឋបាលលោកប្រធានាធិបតី ដូណាល់ ត្រាំ ស៊ើបអង្កេតថាតើលោក នេត សាវឿន លោកឧបនាយករដ្ឋមន្ត្រី ស សុខា និងមនុស្សជាច្រើននាក់ផ្សេងទៀត គួរតែត្រូវដាក់ទណ្ឌកម្ម ឬយ៉ាងណាពាក់ព័ន្ធនឹងការចោទប្រកាន់ថាមានទំនាក់ទំនងនឹងប្រតិបត្តិការឆបោក។
លោក នេត សាវឿន មានប្រសាសន៍ក្នុងពិធីបិទសន្និសីទនោះថា៖ «មានចំណុចសំខាន់មួយដែលខ្ញុំជឿថាយើងទាំងអស់គ្នាបានទទួលស្គាល់៖ គ្មានប្រទេសណាមួយអាចប្រយុទ្ធប្រឆាំងនឹងអំពើឆបោកតាមប្រព័ន្ធបច្ចេកវិទ្យាបានជោគជ័យដោយធ្វើការតែម្នាក់ឯងនោះទេ។ កិច្ចសហប្រតិបត្តិការអន្តរជាតិ គឺជាចាំបាច់»។
យ៉ាងណាលោកមិនបានលើកឡើងពីការអំពាវនាវរបស់អ្នកតំណាងរាស្រ្តអាមេរិកនៅក្នុងសុន្ទរកឋារបស់លោកនោះទេ។ ដូចគ្នាដែរ លោក ស សុខា រដ្ឋមន្ត្រីក្រសួងមហាផ្ទៃក៏មិនបានលើកពីបញ្ហានេះដូចគ្នានៅពេលលោកចូលរួមបើកសន្និសីទនេះ។ លោក ស សុខា កន្លងមកបានបដិសេធរឿងជាប់ពាក់ព័ន្ធនឹងបណ្ដាញឆបោកតាមអនឡាញ។
លោក នេត សាវឿន អតីតអគ្គស្នងការនគរបាលជាតិ បានលើកឡើងថា គណៈប្រតិភូ រួមទាំងរដ្ឋមន្ត្រីមកពីតំបន់នានា និងមន្ត្រីជាន់ខ្ពស់មកពីស្ថាប័ន FBI អាមេរិក និងក្រសួងសន្តិសុខសាធារណៈចិន បានចែករំលែកបទពិសោធលើការឆ្លើយតបនឹងឧក្រិដ្ឋកម្មឆបោកតាមអនឡាញ។ លោកឲ្យដឹងថា គណៈប្រតិភូបានពិភាក្សាពីបញ្ហាប្រឈម និងទំនោរនៃការឆបោក សុវត្ថិភាពតាមប្រព័ន្ធអ៊ីនធឺណិត បច្ចេកវិទ្យាបញ្ញាសិប្បនិម្មិត ការស៊ើបអង្កេតហិរញ្ញវត្ថុ ហេដ្ឋារចនាសម្ព័ន្ធ និងបណ្ដាញជួញដូរមនុស្ស។
សន្និសីទនេះបានរៀបចំឡើងមួយឆ្នាំក្រោយអាជ្ញាធរបានចុះបង្ក្រាបជាទ្រង់ទ្រាយធំលើបណ្ដាញឆបោកតាមអនឡាញនៅក្នុងប្រទេសក្រោយមានការដាក់សម្ពាធខ្លាំងពីអន្តរជាតិ។ ឧស្សាហកម្មឆបោកតាមអនឡាញនេះបានរីករាលដាលខ្លាំងនៅកម្ពុជា មីយ៉ាន់ម៉ា និងឡាវនៅប៉ុន្មានឆ្នាំចុងក្រោយនេះ ដោយបានប្រមូលលុយរាប់សិបពាន់លានដុល្លារក្នុងមួយឆ្នាំៗ និងភាគច្រើនបានពីកម្លាំងពលកម្មដោយបង្ខំ។ កាលពីឆ្នាំ២០២៣ អង្គការសហប្រជាជាតិបានប៉ាន់ប្រមាណថាប្រតិបត្តិការឆបោកតាមអនឡាញនៅកម្ពុជា បានប្រើប្រាស់កម្លាំងពលកម្មបរទេសដោយបង្ខំអាចមានដល់១០ម៉ឺននាក់។
អ្នកវិភាគមួយចំនួននៅមានការសង្ស័យទៅនឹងយុទ្ធនាការបង្ក្រាមនេះ ដោយបានលើកឡើងថាបុគ្គលដែលមានឥទ្ធិពលមួយចំនួននៅតែមិនអាចប៉ះពាល់បាន រួមមាន អ្នកខ្លះទៀតត្រូវបានរងទណ្ឌកម្មពីសហរដ្ឋអាមេរិក ទាក់ទងនឹងការចោទប្រកាន់បានជាប់ពាក់ព័ន្ធនឹងប្រតិបត្តិការឆបោក។
ក្រោយចប់កិច្ចពិភាក្សាកាលពីថ្ងៃព្រហស្បតិ៍ ក្រសួងព័ត៌មានបានប្រាប់អ្នកសារព័ត៌មានមិនឲ្យស្រង់សម្ដីដោយបញ្ជាក់ឈ្មោះ ក្រសួងយុត្តិធម៌បានប្រកាសពីចំណុចសំខាន់ៗចំនួន១១ សម្រាប់ប្រទេសដែលបានចូលរួម និងអាចយកទៅអនុវត្តនៅតាមច្បាប់របស់ប្រទេសសមីដោយស្ម័គ្រចិត្ត។
ចំណុចទាំងនោះរួមមានការប្ដេជ្ញាចិត្តក្នុងការចែករំលែកព័ត៌មាន ដំណើរការបង្ក្រាបបទល្មើសឆបោក និងការគាំពារជនរងគ្រោះពីការជួញដូរជាដើម។ បុគ្គលដែលត្រូវគេបង្ខំឲ្យធ្វើការក្នុងមជ្ឈមណ្ឌឆបោកមិនគួរទទួលទោសទណ្ឌនោះទេ លើកលែងតែបុគ្គលនោះត្រឡប់ទៅកន្លែងឆបោកនោះវិញក្រោយត្រូវបានសង្គ្រោះ។
ព្រីតថេន (Britain) និងកម្ពុជាក៏បានចុះអនុស្សារណៈយោគយល់គ្នាកាលពីថ្ងៃពុធ ដើម្បីពង្រឹងកិច្ចសហប្រតិបត្តិការប្រឆាំងនឹងឧក្រិដ្ឋកម្មអនឡាញ អំពើឆបោក និងអង្គការឧក្រិដ្ឋកម្មឆ្លងដែន។
អ្នកស្រី Bryony Lau នាយិការងប្រចាំតំបន់អាស៊ីរបស់អង្គការឃ្លាំមើលសិទ្ធិមនុស្ស មានប្រសាសន៍កាលពីថ្ងៃព្រហស្បតិ៍ថា៖ «អាជ្ញាធរកម្ពុជាគួរបង្កើនការត្រួតពិនិត្យ និងកំណត់អត្តសញ្ញាណជនរងគ្រោះដោយការជួញដូរមនុស្ស ដែលត្រូវបានរំដោះពីមជ្ឈមណ្ឌលឆបោកតាមអនឡាញ និងជួយអ្នកទាំងនោះឲ្យបានវិលត្រឡប់ទៅប្រទេសកំណើតវិញ»។
អ្នកស្រីបន្តថា៖ «អាជ្ញាធរគួរតែធានាឲ្យបានថា មជ្ឈមណ្ឌលឆបោកទាំងនោះនឹងមិនកើតឡើងវិញនៅកម្ពុជា តាមរយៈការស៊ើបអង្កេតដោយឯករាជ្យ និងតម្លាភាពលើសមាជិកជាន់ខ្ពស់របស់បក្សកាន់អំណាច និងអ្នករកស៊ីដ៏មានឥទ្ធិពលផ្សេងទៀតដែលជាប់ពាក់ព័ន្ធនឹងប្រតិបត្តិការឆបោកតាមអនឡាញនេះ»។
អ្នកនាំពាក្យក្រសួងមហាផ្ទៃលោក ទូច សុខៈ លើកឡើងថា ជនបរទេសជិត៤៧០នាក់ត្រូវបានរកឃើញថារស់នៅកម្ពុជាដោយខុសច្បាប់ និងជាប់ពាក់ព័ន្ធនឹងអំពើឆបោកតាមអនឡាញ ហើយអ្នកទាំងនោះកំពុងត្រូវឃុំខ្លួនបណ្ដោះអាសន្នមុននឹងត្រូវបញ្ជូនខ្លួនត្រឡប់ទៅប្រទេសកំណើតវិញ។
ឆ្លើយតបទៅនឹងក្ដីកង្វល់របស់ក្រុមអង្គការសិទ្ធិមនុស្សអំពីការការពារលើជនរងគ្រោះដោយអំពើជួញដូរ និងត្រូវបានចាប់ខ្លួននៅក្នុងមជ្ឈមណ្ឌលឆបោក លោក កេង សុម៉ារិទ្ធ រដ្ឋលេខាធិការក្រសួងយុត្តិធម៌ មានប្រសាសន៍ថា មិនមែនតែប្រទេសកម្ពុជាទេដែលជួបការលំបាកក្នុងការកំណត់អត្តសញ្ញាណជនរងគ្រោះ ប្រទេសផ្សេងទៀតនៅក្នុងតំបន់ក៏បានឲ្យដឹងពីការលំបាកប្រហាក់ប្រហែលគ្នានេះដែរ។
លោកឲ្យដឹងថា៖ «ដើម្បីកំណត់ថានរណាម្នាក់ជាជនរងគ្រោះ ពួកគាត់ជាដំបូងត្រូវតែដាក់បណ្ដឹងប្រឆាំងនឹងជនល្មើស ឬក៏បានស្នើរកជំនួយក្នុងការស៊ើបអង្កេត និងទាមទារទ្រព្យសម្បត្តិគាត់មកវិញ។ ទើបពេលនោះយើងអាចដឹងថានរណាមួយជាជនរងគ្រោះ»។
លោកបានបដិសេធផ្ដល់ព័ត៌មានអំពីចំនួនជនរងគ្រោះដោយការជួញដូរដែលកម្ពុជាកំណត់បាននៅពេលចុះបង្ក្រាបនៅមណ្ឌលឆបោកអនឡាញ ដោយថាករណីទាំងនេះកំពុងនៅក្នុងដៃរបស់តុលាការ៕
ប្រែសម្រួលពីអត្ថបទភាសាអង់គ្លេស៖ Anti-Scam Conference Ends With Pledge as US Lawmakers Seek Sanctions Probe
