បន្ទាប់ពីបានបើកសម័យប្រជុំពេញអង្គលើកទី១ តាមកាលកំណត់ក្រោមព្រះរាជាធិបតីភាព នៃអង្គព្រះមហាក្សត្រ ព្រះបាទសម្ដេចព្រះបរមនាថ នរោត្តម សីហមុនី កាលពីព្រឹកថ្ងៃចន្ទ ទី២១ ខែសីហា រដ្ឋសភាបានបោះឆ្នោតផ្ដល់ទំនុកចិត្តនិងគាំទ្ររដ្ឋាភិបាលថ្មីនីតិកាលទី៧ ដើម្បីដំណើរការគណៈរដ្ឋមន្ត្រីរបស់ខ្លួន ។

បន្ទាប់ពីបញ្ចប់ដំណើរការបោះឆ្នោតនៅល្ងាចថ្ងៃអាទិត្យ លទ្ធផលក្រៅផ្លូវការបានបង្ហាញថាគណក្សប្រជាជនកម្ពុជា ដែលជាគណបក្សកាន់អំណាចទទួលបានជ័យជម្នះយ៉ាងភ្លូកទឹកភ្លូកដី ហើយប្រទេសចិននិងរុស្ស៊ីបានផ្ញើសារអបអរសារទរ ខណៈបណ្តាប្រទេសមួយចំនួន រួមទាំងសហរដ្ឋអាមេរិកផង សម្តែងការខកចិត្ត ដ្បិតអវត្តមានគណបក្សប្រឆាំង ដែលជាគូប្រកួតដ៏ធំមិនបានចូលរួមក្នុងការបោះឆ្នោត ។

គណបក្សនយោបាយទាំង១៨ ដែលទទួលបានការអនុញ្ញាតដោយគណៈកម្មាធិការជាតិរៀបចំការបោះឆ្នោត( គ.ជ.ប ) ឱ្យចូលរួមប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រនីតិកាលទី៧ បានធ្វើយុទ្ធនាការឃោសនារកសំឡេងឆ្នោតតាមសក្ដានុពលនិង ធនធានរៀងៗខ្លួន ចាប់តាំងពីថ្ងៃ ទី១ រហូតដល់ថ្ងៃទី២១ ខែកក្កដា ខណៈសមាជិកគណបក្សប្រឆាំងមួយចំនួនត្រូវបានចាប់ខ្លួន និងកាត់ទោសមិនឱ្យឈរឈ្មោះបោះឆ្នោតយ៉ាងតិច២០ឆ្នាំ ក្រោមបទចោទថាបានធ្វើសកម្មភាពប្រឆាំង នឹងការបោះឆ្នោត ។