សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋខេត្តបាត់ដំបងនាំគ្នាតវ៉ាឱ្យអាជ្ញាធរបញ្ឈប់គ្រឿងចក្រកាយដីស្រែពួកគាត់នៅចំណុចអាងភាសក្នុងស្រុកឯកភ្នំ

ប្រជាពលរដ្ឋជិត១០០នាក់តវ៉ាមិនឱ្យគ្រឿងចក្រក្រុមហ៊ុនឯកជនកាយអាចម៍ដីលើស្រែរបស់ពួកគាត់នៅចំណុងអាងភាស ក្នុងស្រុកឯកភ្នំ ខេត្តបាត់ដំបង។ រូបថតនៅថ្ងៃទី១៥ ខែសីហា ឆ្នាំ២០២២។ ខេមបូចា/ សុខ សាវី
ប្រជាពលរដ្ឋជិត១០០នាក់តវ៉ាមិនឱ្យគ្រឿងចក្រក្រុមហ៊ុនឯកជនកាយអាចម៍ដីលើស្រែរបស់ពួកគាត់នៅចំណុងអាងភាស ក្នុងស្រុកឯកភ្នំ ខេត្តបាត់ដំបង។ រូបថតនៅថ្ងៃទី១៥ ខែសីហា ឆ្នាំ២០២២។ ខេមបូចា/ សុខ សាវី

ប្រជាពលរដ្ឋមានដីស្រែនិងលំនៅដ្ឋាននៅចំណុចអាងភាសប្រមាណជិត១០០នាក់ក្នុង​ចំណោមជាង២០០គ្រួសារបាននាំគ្នាទៅតវ៉ាឱ្យគ្រឿងចក្របញ្ឈប់ការកាយអាចម៍ដីក្នុងស្រែ​ពួកគាត់ និងទាមទាឱ្យអាជ្ញាធរកាត់ឆ្វៀលដីឱ្យពួកគាត់បានកាន់កាប់ស្របច្បាប់នាព្រឹកថ្ងៃ​ទី១៥ ខែ​សីហា។

ខណៈពេលដែលពលរដ្ឋកំពុងនាំគ្នាតវ៉ាជាច្រើនម៉ោង ក្រុមគ្រឿងចក្រកាយដីនិងរថយន្តដឹកដី ច្រើនគ្រឿងនៅតែសម្រុកកាយនិងដឹកអាចម៍ដីចេញពីស្រែពួកគាត់នៅចំណុចអាងភាសនេះ ដោយមិនខ្វាយខ្វល់នឹងការតវ៉ាប្រជាពលរដ្ឋនោះឡើយ ។

ការតវ៉ារបស់ប្រជាពលរដ្ឋនេះក្រោយពីអាជ្ញាធរខេត្តបាត់ដំបងបានអនុញ្ញាតឱ្យក្រុមហ៊ុនចំនួនពីរចូលកាយអាចម៍ដីជំហានដំបូង លើដីស្រែប្រជាពលរដ្ឋនៅចំណុចអាងភាស ស្ថិតនៅ​ភូមិ​គោកដូង ឃុំពាមឯក ស្រុកឯកភ្នំ ខេត្តបាត់ដំបង ទំហំ១០០ហិកតា និងជម្រៅបួនម៉ែត្រ សិន​ក្នុងគម្រោងស្តារអាងភាសជាង១ពាន់ហិកតា ដើម្បីស្តុកទឹកសម្រាប់ប្រជាពលរដ្ឋ​ប្រើ​ប្រាស់​របស់ក្រសួងធនធានទឹកនិងឧត្តុនិយម។

ប្រជាពលរដ្ឋ លោក ​សោម សុភ័ណ្ឌ មានដី៤ហិកតា នៅចំណុចអាងភាសបាននិយាយថា ប្រជាពលរដ្ឋ ដែលឡើងមកតវ៉ានេះ គឺអ្នករស់នៅនិងអាស្រ័យផលនៅចំណុចអាងភាស​នេះទាំងអស់ ទាំងអ្នកមានដីស្រែ និងលំនៅដ្ឋានលើខ្នងអាងភាស និងរ៉បមាត់ស្ទឹងដែល​មានផ្ទះដីជិត២០០០ហិកតា ។

លោកបញ្ជាក់ថា ពួកគាត់ទាមទាឱ្យបញ្ឈប់ការកាយអាចម៍ដីស្រែរបស់ពួកគាត់ និងកាត់ ឆ្វៀល​ដីឱ្យពួកគាត់បានកាន់កាប់ស្របច្បាប់ដើម្បីរស់នៅនិងអាស្រ័យផលចិញ្ចឹមជីវិត។

លោក សុភ័ណ្ឌ បាននិយាយថា៖ «ដីរបស់ខ្ញុំ៤ហិកតានេះគឺខ្ញុំសន្សំលុយទិញពីអ្នកភូមិតាំង ពីឆ្នាំ១៩៩៣មកម្លេះ ហើយមានការទទួលស្គាល់ពីអាជ្ញាធរភូមិឃុំ ហើយបង្កាន់​ដៃនេះខ្ញុំ​បាន​ដាក់បញ្ចាំនៅធនាគារ១ម៉ឺនដុល្លារដើម្បីយកប្រាក់មករកស៊ីបានទៀតផង»។ លោកបន្ថែមថា៖ «មិនគួរណាមកកាយដីស្រែខ្ញុំយកទៅចាក់ឱ្យម្ចាស់ដីឡូតិ៍អញ្ចឹងទេ!»

លោក ជីវី ដែលមានដីជាង១០ហិកតាដែលទិញពីអ្នកភូមិម្នាក់កន្លះហិកតាៗ តាំងពីឆ្នាំ១៩៩៣​មកបាននិយាយថា គ្រឿងចក្រពីមុនកាយដីស្រែប្រជាពលរដ្ឋ២៣គ្រួសារស្មើជាង៣០ហិកតា តែ ដោយប្រជាពល រដ្ឋតវ៉ា គេងាកមកកាយលើដីស្រែរបស់គាត់ម្តងដែលមានព្រំប្រទល់ជាប់​គ្នាប្រហែល១០ថ្ងៃមកហើយ។

លោក ជីវី ឱ្យដឹងថា៖ «ប្រជាពលរដ្ឋមកតវ៉ានេះចំពេលគ្រឿងចក្រមកកាយដីស្រែខ្ញុំ ប្រជាពលរដ្ឋ​ឈឺឆ្អាលមកជួយតវ៉ា! ខ្ញុំដើរតែតាមប្រជាពលរដ្ឋទេ ព្រោះថាបើគេយកដីខ្ញុំបាន ដីប្រជាពលរដ្ឋផ្សេងទៀតក៏គេកាយយកដែរ »

ប្រជាពលរដ្ឋម្នាក់ទៀត លោក ហ៊ីម ហាន់ អាយុ៣៥ឆ្នាំ ដែលមានដីលំនៅដ្ឋានជាប់មាត់ស្ទឹង ក្នុងចំណោមពលរដ្ឋជាង៨០គ្រួសារ បាននិយាយថា នៅមុនថ្ងៃបោះឆ្នោតឃុំសង្កាត់មាន តំណាងស្រុកឯកភ្នំម្នាក់ចុះមកប្រាប់ប្រជាពលរដ្ឋរស់នៅទីនេះថា រស់នៅលើដីរបស់រដ្ឋពេល រដ្ឋត្រូវការប្រជាពលរដ្ឋត្រូវតែប្រគល់ឱ្យរដ្ឋយកទៅអភិវឌ្ឍន៍។

លោក ហាន់ បញ្ជាក់ថា៖ «គេថាយើងរស់នៅលើដីរដ្ឋ ពេលរដ្ឋត្រូវការត្រូវតែប្រគល់ឱ្យរដ្ឋ ហើយ​ឱ្យ ប្រជាពល រដ្ឋផ្តិតមេដៃ តែប្រជាពលរដ្ឋពេលនោះមិនព្រមផ្តិតមេដៃនោះទេ គេក៏​ចេញ​ទៅវិញ »

អ្នកស្រី រឿន រ៉ើយ អាយុ៦៤ឆ្នាំ បាននិយាយថា គាត់មានដីភូមិប្រមាណកន្លះហិកតា នៅរ៉ប​មាត់ស្ទឹង នៅចំណុចអាងភាសនេះ ដែលអាជ្ញាធរចែកឱ្យតាំងពីឆ្នាំ១៩៨០ផ្លាយមកម្លេះ ដែល​ដីនេះគឺជាដី ភូមិចាស់ របស់ដូនតាគាត់រស់នៅតជំនាន់មកហើយ។ អ្នកស្រីបញ្ជាកថា បច្ចុប្បន្ន​នេះ គាត់មានមុខរបរ រកក្តាមខ្យង ដើម្បីចិញ្ចឹមកូនបីនាក់ប្រចាំថ្ងៃ បើអាជ្ញាធរយកដី​របស់គាត់​នោះ ប្រាកដ ជាគ្មានទី ជម្រកនោះទេ ។

អ្នកស្រី រ៉ើយ ប្រាប់ថា៖ «ខ្ញុំសព្វថ្ងៃរកក្តាមខ្យងបានមួយថ្ងៃ១ម៉ឺន២ម៉ឺនរៀលគ្រាន់ចិញ្ចឹមកូន ។ ខ្ញុំមកតវ៉ានេះ ព្រួយបារម្ភខ្លាចអាជ្ញាធរបណ្តេញឱ្យរុះរើផ្ទះចេញពីដីភូមិ មិនដឹងបានអីនៅ ខ្ញុំសំណូមពរ ឱ្យពួកខ្ញុំ រស់ នៅបានស្របច្បាប់លើដីភូមិចាស់នេះផង!»

ប្រជាពលរដ្ឋជិត១០០នាក់នាំគ្នាទៅរារាំងមិនឱ្យគ្រឿងចក្រក្រុមហ៊ុនឯកជនកាយអាចម៍ដីលើ​ស្រែ​របស់ពួកគាត់នៅចំណុងអាងភាស​ ក្នុងស្រុកឯកភ្នំ ខេត្តបាត់ដំបង។ រូបថតនៅថ្ងៃទី១៥ ខែសីហា ឆ្នាំ២០២២។ ខេមបូចា/ សុខ សាវី

សូមបញ្ជាក់ថា កាលពីខែមីនា ឆ្នាំ២០២២ តំណាងប្រជាពលរដ្ឋ២៤០គ្រួសារ រស់នៅចំណុច​អាងភាស ស្ថិតនៅភូមិគោកដូង ឃុំពាមឯក ស្រុកឯកភ្នំខេត្តបាត់ដំបង  ក៏ធ្លាប់បាន​ដាក់​លិខិត​សុំអន្តារគមន៍ ពីតំណាងរាស្រ្តមណ្ឌលខេត្តបាត់ដំបង ពីអភិបាលខេត្តបាត់ដំបង ឱ្យជួយ​បញ្ឈប់​ក្រុមហ៊ុនប្រើគ្រឿងចក្រកាយអាចម៍ដីលើដីស្រែរបស់ពួកគាត់ ដែលបានកាន់កាប់និង អាស្រ័យផលតាំងពីឆ្នាំ១៩៨៣មក ។  

ប្រជាពលរដ្ឋបញ្ជាក់ថាដីចំណុចអាងភាសនេះតាំងពីជំនាន់ប៉ុលពត គឺត្រូវបានត្រៀមធ្វើជា​អាងសម្រាប់ស្តុកទឹក ក៏ប៉ុន្តែជាក់ស្តែងបន្ទាប់ពីប្រទេសជាតិត្រូវបានរំដោះគឺអាជ្ញាធរ​មូលដ្ឋាន​ភូមិឃុំបានបែងចែកឱ្យប្រជាពលរដ្ឋតាំងពីឆ្នាំ១៩៨៣ ដោយបានកាន់កាប់និង​អាស្រ័យផល​ដល់បច្ចុប្បន្ន។

ម៉្យាងទៀត នៅថ្ងៃទី២៧ ខែកក្កដា ឆ្នាំ២០២២ថ្មីៗនេះ តំណាងប្រជាពលរដ្ឋ៨នាក់ក៏បានដាក់ លិខិតទៅរដ្ឋសភាជាតិ ដើម្បីឱ្យជួយអន្តារគមន៍ដល់ក្រសួងរៀបចំដែនដី និងអាជ្ញាធរខេត្ត​បាត់ដំបង កាត់ឆ្វៀលដីជូនប្រជាពលរដ្ឋនៅចំណុចអាងភាសនេះផងដែរ ។

លោក ម៉ឹល សុផល អភិបាលស្រុកឯកភ្នំខេត្តបាត់ដំបង បានបញ្ជាក់ថា អាជ្ញាធរបានឱ្យ​ក្រុមហ៊ុនឯកជនប្រើគ្រឿងចក្រកាយតែលើដីដែលប្រជាពលរដ្ឋមិនអាស្រ័យផលតែប៉ុណ្ណោះ ចំណែកដីប្រជាពលរដ្ឋអាស្រ័យផលជាក់ស្តែង២២គ្រួសារស្មើរនឹងជាង៣០ហិកតា គឺមិនបាន​កាយនោះទេ គឺរង់ចាំដោះស្រាយពេលក្រោយ ។ ចំណែកពលរដ្ឋដែលរស់នៅលើខ្នង​អាងភាស និងរ៉បមាត់ស្ទឹងជិត២០០គ្រួសារនោះ អាជ្ញាធរមិនទាន់មានគម្រោង​ណាមួយ​ឱ្យ​ពលរដ្ឋចាកចេញនៅឡើយទេ ។

លោក ម៉ឹល សុផល ៖ «ចំពោះមុខនេះស្រុកមិនមានផែនការណាដេញប្រជាពលរដ្ឋឱ្យរុះរើ ផ្ទះសម្បែងចេញនោះទេ គាត់រស់នៅទីណារស់់នៅទីនោះសិនទៅគេមិនដេញទេ ពួកគាត់​ឡើងមកតវ៉ានេះតវ៉ារឿងអី! មានអ្នកញុះញង់ឱ្យពួកគាត់ឡើងមកតវ៉ាទើបគាត់មកដូច្នេះ»

ទោះបីយ៉ាងណាលោកអភិបាលស្រុកបានបញ្ជាក់ថា តាមគាត់ឃើញគម្រោងរបស់ ក្រសួងធនធានទឹក​នឹងមានការស្តារអភិវឌ្ឍន៍អាងភាសនេះទាំងមូល១៩០០ហិកតា តែរង់ចាំ​គម្រោងចេញសិនទើបដឹងច្បាស់ថាគេត្រូវអភិវឌ្ឍន៍យ៉ាងម៉េច? នៅពេលឆាប់ៗខាង​មុខនឹង​ដឹង​ទាំងអស់គ្នាហើយ ។

លោក សុខ លូ អភិបាលខេត្តបាត់ដំបង បានមានប្រសាសន៍ថា លោកមិន ទាន់បានទទួល​ព័ត៌មាន​ពីការតវ៉ារបស់ប្រជាពលរដ្ឋនោះទេ តែតាមលោកដឹង ដីអាងភាសនេះ ជាដីស្ថិតនៅ​ក្នុងការគ្រប់គ្រងរបស់ក្រសួងធនធានទឹក មិនមែនជាដីរបស់ប្រជាពលរដ្ឋនោះទេ ។ លោក​បញ្ជាក់​ថាចំពោះការសុំកាត់ឆ្វៀលនោះ អាជ្ញាធរមិនមានសិទ្ធិនោះទេ។

លោក សុខ លូ បានបញ្ជាក់ថា៖ «គាត់សុំឆ្វៀលចេះតែសុំទៅ តែវាជាដីរបស់រដ្ឋគ្រប់គ្រង​ដោយ​មន្ទីរធនធានទឹកផ្ទាល់ ឆ្វៀលដីជូនគាត់ម៉េចកើត វាមិនដូចដីតំបន់​ពីរតំបន់បី​ដែល​អាច​កាត់​ឆ្វៀល​បាននោះទេ វាខុសគ្នា»

លោក យិន ម៉េងលី មន្រ្តីស៊ើបអង្កេតសមាគមអាដហុកប្រចាំខេត្តបាត់ដំបងនិងប៉ៃលិន បាន​មាន​ប្រសាសន៍ថា ករណីដីអាងភាសនេះ លោកមើលឃើញមានទិដ្ឋភាពពីរ គឺតាមផ្លូវច្បាប់​និង​ការរស់នៅជាក់ស្តែង។ បើផ្លូវច្បាប់ដីអាងភាសជាដីសារធារណៈរបស់រដ្ឋ មិនអាចលក់​ទិញ​រឺជាអំណោយឱ្យទេ ទោះបីជាបុគ្គលិកហ្នឹងកាន់កាប់ប៉ុន្មានឆ្នាំក៏ដោយ។ ប៉ុន្តែបើងាកមកមើល​ការកាន់កាប់ប្រជាពលរដ្ឋតាំងពីទស្សវត្ស៨០មក គឺជិត៤០ឆ្នាំហើយ វាជារឿងមួយដែល​រដ្ឋបាល​ខេត្ត និងក្រសួងពាក់ព័ន្ធគួរពិចារណាលើការរស់នៅរបស់ពួកគាត់ដូចដែល​រដ្ឋាភិបាល ទើបតែឱ្យអាជ្ញាធរអនុវត្តលើដីតំបន់១ តំបន់២ និងតំបន់បីដែរ។

លោក ម៉េងលី ឱ្យដឹងថា៖ «ទាក់ទងការអភិវឌ្ឍអាងភាសនេះ ប្រទេសយើងត្រូវការអភិវឌ្ឍ ប៉ុន្តែការអភិវឌ្ឍហ្នឹង! កុំភ្លេចយើងអភិវឌ្ឍដើម្បីទាំងអស់គ្នា ! មិនមែនអភិវឌ្ឃដើម្បីក្រុមណា​មួយ រឺភាគីណាមួយនោះទេ»។ លោក ម៉េងលី បន្ថែមថា៖ «ទី១អាជ្ញាធររគួរសម្របសម្រួល​យ៉ាងម៉េច​ជាមួយប្រជាពលរដ្ឋដើម្បីធ្វើការអភិវឌ្ឍអាងភាសហ្នឹងឱ្យបានល្អ ទីពីរធ្វើ​យ៉ាង​ម៉េចឱ្យប្រជាពលរដ្ឋរស់នៅមានលទ្ធភាពចិញ្ចឹមជីវិតដែរ»

ដោយឡែក លោក ឡុង ផល្គុន ប្រធានមន្ទីរធនធានទឹកនិងឧត្តុនិយមខេត្តបាត់ដំបង និង​លោក អ៊ូ ដារី ប្រធានមន្ទីរដែនដីខេត្តបាត់ដំបង មិនអាចទំនាក់ទំនងតាមទូរសព្ទបានទេ៕

507 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម