កម្ពុជា និងថៃបានឯកភាពគ្នាជាគោលការណ៍ក្នុងការបង្កើតក្រុមសម្របសម្រួល (CG) ដើម្បីបង្កើនទំនាក់ទំនងនៅគ្រប់កម្រិត រួមបញ្ជូលទាំងថ្នាក់មេបញ្ជាការ ក្រុមការងារទំនាក់ទំនងតាមព្រំដែន កងកម្លាំងឈរជើងនៅតាមតំបន់ព្រំដែន និងអង្គភាពប្រតិបត្តិការនៅតាមបណ្ដោយព្រំដែនកម្ពុជា-ថៃ ក្នុងគោលបំណងដោះស្រាយបញ្ហាដោយសន្តិវិធី និងបញ្ចៀសការប៉ះទង្គិចគ្នា។
បន្ទាប់ពីកិច្ចប្រជុំគណៈកម្មាធិការកិច្ចការព្រំដែនថ្នាក់យោធភូមិភាគ(RBC) នៅថ្ងៃទី១៦ ខែសីហា ដែលរៀបចំដោយប្រទេសថៃ ភាគីទាំងពីរបានឯកភាពរក្សាទំនាក់ទំនងជាប្រចាំរវាងគ្រប់តំបន់កងទ័ព តំបន់យោធា និងអង្គភាពនៅតាមព្រំដែន។
កម្ពុជាបានគូសបញ្ជាក់អំពីសារៈសំខាន់នៃការជៀសវាងនូវសកម្មភាពដែលអាចបង្កឱ្យមានភាពតានតឹងដោយយថាហេតុ រួមបញ្ចូលទាំងការដាក់លួសបន្លា ការបំផ្លិចបំផ្លាញហេដ្ឋារចនាសម្ព័ន្ធដែលមានស្រាប់ ជាពិសេសសំណង់លំនៅឋានស៊ីវិល និងការផ្សព្វផ្សាយព័ត៌មានក្លែងក្លាយ ឬព័ត៌មានមិនពិត ព្រោះថាការវិវឌ្ឍទាំងនេះអាចបំផ្លាញទំនុកចិត្ត និងធ្វើឱ្យប៉ះពាល់ដល់កិច្ចខិតខំប្រឹងប្រែងដើម្បីរក្សាបាននូវបរិយាកាសស្ថិរភាព និងសន្តិភាព។
សូមរំលឹកថា កម្ពុជាបានចោទប្រកាន់ថា ភាគីថៃបានព្យាយាម «ច្រើនវិធី» ដើម្បីបង្កបញ្ហានៅតាមព្រំដែន រួមមានការសាងសង់របង ការបាញ់ជំពាមកៅស៊ូ ការប្រើប្រាស់ «សង្គ្រាមផ្លូវចិត្ត» និង «បង្កើតព័ត៌មានមិនពិត»។ ហេតុការណ៍ចុងក្រោយនេះបានកើតឡើងនៅខេត្តបន្ទាយមានជ័យ ដែលយោធាថៃបានដាក់រាយលួសបន្លា និងកង់រថយន្តនៅតាមព្រំដែន។
ក្នុងជំនួបនោះ កម្ពុជាក៏បានអះអាងសារជាថ្មីអំពីសារៈសំខាន់នៃការជំរុញការដោះមីនមនុស្សធម៌ ដោយកត់សម្គាល់ថា វឌ្ឍនភាពអាស្រ័យលើការអនុវត្តទាំងស្រុងនូវបទឈប់បាញ់ និងការវិលទៅរកភាពប្រក្រតីតាមព្រំដែន។
សេចក្តីប្រកាសព័ត៌មានបានលើកឡើងថា ជាមួយនឹងការបោះបង្គោលព្រំដែនដែលកំពុងដំណើរការ ការដោះមីនអាចត្រូវបានពិចារណាលើតំបន់ដែលមានការបោះបង្គោល ឬក្នុងតំបន់មិនមានជម្លោះ ដូចដែលបានព្រមព្រៀងដោយគណៈកម្មការព្រំដែនចម្រុះ (JBC) នៃប្រទេសទាំងពីរ។
សេចក្តីប្រកាសព័ត៌មានបានបន្ថែមថា ដោយសារ (RBC) មិនមានអាណត្តិក្នុងការសម្រេចចិត្តលើការដោះមីន បញ្ហានេះគួរតែត្រូវបានដោះស្រាយនៅក្នុងកិច្ចប្រជុំរបស់គណៈកម្មាធិការព្រំដែនទូទៅ (GBC) នាពេលខាងមុខ ដែលគ្រោងនឹងធ្វើឡើងក្នុងពេលឆាប់ៗនេះ ដូចដែលបានព្រមព្រៀងគ្នារួចហើយដោយភាគីទាំងពីរ។
កម្ពុជាបានសង្កត់ធ្ងន់ថា ខ្លួនបានចាត់ទុកការឆបោកតាមប្រព័ន្ធបច្ចេកវិទ្យាជាបញ្ហាធ្ងន់ធ្ងរ រួមនឹងទម្រង់ឧក្រិដ្ឋកម្មឆ្លងដែនផ្សេងទៀត។ កម្ពុជាបានខិតខំប្រឹងប្រែងយ៉ាងសកម្មក្នុងការប្រយុទ្ធប្រឆាំងនឹងបញ្ហាទាំងអស់នេះ ដោយធ្វើការយ៉ាងជិតស្និទ្ធជាមួយអាស៊ាន និងដៃគូអន្តរជាតិដទៃទៀត ហើយទទួលបានលទ្ធផលជាក់ស្តែងផងដែរ។
កម្ពុជាបានសហការជាមួយថៃក្នុងការដោះស្រាយបញ្ហាបោកប្រាស់តាមប្រព័ន្ធបច្ចេកវិទ្យា ហើយបញ្ហានេះអាចត្រូវបានពិភាក្សាបន្ថែមនៅក្នុងកិច្ចប្រជុំ GBC នាពេលខាងមុខ ដោយសារប្រទេសទាំងពីររងផលប៉ះពាល់ដូចគ្នា។
សេចក្តីប្រកាសព័ត៌មានបន្តថា៖ «ខ្លឹមសារលម្អិតនឹងត្រូវយកទៅពិភាក្សានៅក្នុងកិច្ចប្រជុំបន្ទាប់របស់គណៈកម្មាធិការកិច្ចការព្រំដែនថ្នាក់យោធភូមិភាគ(RBC) »។សេចក្តីប្រកាសព័ត៌មានបានបន្ថែថា៖ «ភាគីទាំងពីរក៏បានឯកភាពគ្នាក្នុងការរៀបចំកិច្ចប្រជុំបន្ទាប់របស់គណៈកម្មាធិការកិច្ចការព្រំដែនថ្នាក់យោធភូមិភាគ(RBC) ក្នុងរយៈពេលមួយខែ ក្រោយពីកិច្ចប្រជុំវិសាមញ្ញនេះ ដោយប្រទេសកម្ពុជាធ្វើជាម្ចាស់ផ្ទះ»៕
ប្រែសម្រួលពីអត្ថបទភាសាអង់គ្លេស៖ Cambodia and Thailand To Establish A Coordinating Group to Strengthen Communication
