កម្ពុជាបានសម្រេចជាចុងក្រោយ ក្នុងការបញ្ជូនប្រតិភូកីឡារបស់ខ្លួនចំនួន ២១ ប្រភេទ ឱ្យទៅចូលរួមការប្រកួតកីឡាស៊ីហ្គេម លើកទី៣៣ ឆ្នាំ២០២៥ ដែលប្រទេសថៃ ធ្វើជាម្ចាស់ផ្ទះ ពីថ្ងៃទី៩ ដល់ទី២០ ខែធ្នូ ប៉ុន្តែសហព័ន្ធកីឡាប្រដាល់គុនខ្មែរ និងសហព័ន្ធកីឡាប៊ីកម្ពុជា បានពហិការមិនចូលរួមទេ ព្រោះនៅតែបារម្ភពីបញ្ហាអសន្តិសុខ និងសុវត្ថិភាព។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានឱ្យដឹងថា កម្ពុជានឹងបញ្ជូនប្រតិភូកីឡាសរុប៣៣២នាក់ ក្នុងនោះមានកីឡាករ កីឡាការិនី ២២២នាក់ ដោយពួកគេ នឹងត្រូវប្រកួតប្រជែង នៅលើប្រភេទកីឡាចំនួន២១ រួមមានកីឡាអត្តពលកម្ម ហែលទឹក ជិះសេះ គុនដាវ កាយសម្ព័ន្ធ យូដូ តេក្វាន់ដូ(WT) ទ្រីយ៉ាត្លុង បាល់ទះ បាល់ទាត់ ចំបាប់ បញ្ចស៊ីឡាត់ ឃីកបុកស៊ីង ប៉េតង់ សីដក់ ម៉ូតូទឹក ការ៉ាតេ ជឺជីតស៊ូ វូស៊ូ បាល់ទាត់លើតុ និងកីឡាអេឡិចត្រូនិក។
យ៉ាងណាក៏ដោយ ចំពោះដំណឹងនៃការសម្រេចបញ្ជូនប្រតិភូកីឡាកម្ពុជា ទៅចូលរួមការប្រកួតស៊ីហ្គេម នៅប្រទេសថៃនេះ បានក្លាយជាប្រធានបទក្តៅ ដែលត្រូវបានប្រជាពលរដ្ឋកម្ពុជា និងមជ្ឈដ្ឋានទូទៅ លើកយកមកវែងញែកខ្លាំង ព្រោះពួកគេ នៅតែបារម្ភទៅលើបញ្ហាសុវត្ថិភាព និងសន្តិសុខ ដែលអាចកើតមានឡើង ចំពោះកីឡាករ កីឡាការិនី គ្រូបង្វឹក និងប្រតិភូកីឡាកម្ពុជា ដោយសារបញ្ហាជម្លោះព្រំដែនកម្ពុជា-ថៃ នៅតែមិនទាន់មានភាពធូរស្រាលនៅឡើយ ហើយប្រជាជនថៃ ក៏កាន់តែមានកំហឹងមកលើកម្ពុជាផងដែរ។
តែទោះបីជាយ៉ាងណា ជុំវិញបញ្ហា និងក្តីបារម្ភនេះ លោក វ៉ាត់ ចំរើន បានអះអាងថា ការបញ្ជូនប្រតិភូកីឡាចំនួន២១ប្រភេទទៅចូលរួមការប្រកួតស៊ីហ្គេមលើកនេះ គឺធ្វើទៅតាមបទបញ្ញាត្តិកីឡា ក្រោមការអនុញ្ញាតរបស់រាជរដ្ឋាភិបាល ហើយម្ចាស់ផ្ទះថៃ ក៏ដូចជាគណៈកម្មាធិការអូឡាំពិកថៃ ក៏បានធានា ផ្តល់សុខសុវត្ថិភាពដល់ប្រតិភូកម្ពុជាផងដែរ។
លោកបានប្រាប់កាលពីថ្ងៃសុក្រថា៖ «យើងអត់មានការបារម្ភអ្វីទេ ដោយសារម្ចាស់ផ្ទះ ក៏ដូចជាអូឡាំពិកថៃ គឺបានរៀបចំរក្សាសុវត្ថិភាព និងពង្រឹងសន្តិសុខឱ្យប្រតិភូកម្ពុជា ចូលរួមការប្រកួតហ្នឹង ហើយក៏ដូចជាអប់រំប្រជាពលរដ្ឋគេដែរ អ៊ីចឹងក្នុងកម្រិតជាកីឡា យើងគោរពតាមបទបញ្ញាត្តិកីឡាជាតិ និងអន្តរជាតិឱ្យបានល្អទាំងអស់គ្នា»។
លោកបន្ថែមថា៖ «ការចូលរួមនេះ ជាការបង្ហាញនូវឆន្ទៈ និងសាមគ្គីភាព មិត្តភាពរបស់យើងក្នុងវិស័យកីឡា និងពង្រឹងកាទូតកីឡាជាមួយប្រទេសនៅក្នុងតំបន់អាស៊ាន ក៏ដូចជាម្ចាស់ផ្ទះដែរ គឺយើងត្រូវធ្វើការរួមគ្នា អ៊ីចឹងរាជរដ្ឋាភិបាល បានផ្តល់ភាពកក់ក្តៅ និងការអនុញ្ញាតឱ្យចូលរួម ហេតុនេះយើងត្រូវតែថែរក្សានូវជំហរនៃការផ្តល់ភាពកក់ក្តៅនេះទាំងអស់គ្នា»។
យ៉ាងណាក៏ដោយ សម្រាប់ការសម្រេចជាចុងក្រោយ ក្នុងការបញ្ជូនប្រតិភូកីឡា ទៅចូលរួមការប្រកួត ស៊ីហ្គេម លើកទី៣៣ ឆ្នាំ២០២៥នេះ កម្ពុជាបានកាត់បន្ថយចំនួនប្រតិភូកីឡាពីចំនួនជាង ៦០០នាក់ ពេលចុះឈ្មោះដំបូង មកសល់ត្រឹម ៣៣២នាក់ ហើយពួកគេ នឹងត្រូវដាក់ឱ្យស្នាក់នៅជុំគ្នា នៅសណ្ឋាគារតែមួយ ក្នុងក្រុងបាងកក ដើម្បីងាយស្រួលគ្រប់គ្រង និងការពារសុខសុវត្ថិភាព។
នៅត្រង់ចំណុចនេះ លោក វ៉ាត់ ចំរើន បានបញ្ជាក់ថា៖ «ដំបូង យើងត្រៀមចុះឈ្មោះជាង ៦០០នាក់ ប៉ុន្ដែក្រោយមក យើងបានចម្រាញ់ និងរៀបចំ យកតែកីឡាណា ដែលមានសក្ដានុពល និងមិនមានហានិភ័យខ្លាំង។ យើងយកកីឡាណា ដែលយើងមានប្រៀបទៅលើការងារប្រកួត និងការងារ ដែលធ្លាប់មានស្នាដៃល្អនៅក្នុងការប្រកួតស៊ីហ្គេម ២០២៣ ដែលកម្ពុជា ធ្វើជាម្ចាស់ផ្ទះ»។
ជាមួយគ្នានេះ លោក វ៉ាត់ ចំរើន ដែលជារដ្ឋលេខាធិការក្រសួងអប់រំ យុវជន និងកីឡា ផងនោះ បានឱ្យដឹងថា កម្ពុជា ត្រូវតែបញ្ជូនប្រតិភូកីឡារបស់ខ្លួន ទៅចូលរួមការប្រកួតព្រឹត្តិការណ៍ស៊ីហ្គេម នេះ ដោយសារតែ កម្ពុជា ជាសមាជិកកីឡាអាស៊ីអាគ្នេយ៍ ហេតុនេះ កម្ពុជាត្រូវទៅចូលរួមប្រកួត ដើម្បីឱ្យស្របតាមច្បាប់ និងធម្មនុញ្ញកីឡាអន្ដរជាតិ ក្នុងនាមជាសមាជិកសហព័ន្ធកីឡាអាស៊ីអាគ្នេយ៍។ ប៉ុន្ដែ ករណីដែលអាចបង្កជាអសន្ដិសុខខ្ពស់ ឬហានិភ័យខ្ពស់ កម្ពុជាក៏មានសិទ្ធិបដិសេធមិនចូលរួមផងដែរ។
លោកបញ្ជាក់ថា៖ «យោងទៅតាមច្បាប់កីឡាអន្ដរជាតិ ក្នុងនាមជាសមាជិករបស់សហព័ន្ធកីឡាអាស៊ីអាគ្នេយ៍ យើងត្រូវទៅចូលរួមការប្រកួតកីឡាស៊ីហ្គេម ដែលរៀបចំ២ឆ្នាំម្តងនេះ ព្រោះនេះជាច្បាប់ អ៊ីចឹងយើង ត្រូវតែបំពេញកាតព្វកិច្ច ក្នុងនាមជាសមាជិក។ លើកលែង តែក្នុងករណីដែលអសន្ដិសុខខ្ពស់ ឬហានិភ័យខ្ពស់ សម្រាប់យើង ទើបយើងមិនចូលរួម»។
តែទោះបីជាយ៉ាងណា សហព័ន្ធកីឡាប្រដាល់គុនខ្មែរ បានធ្វើពហិការមិនចូលរួមការប្រកួតស៊ីហ្គេម ឆ្នាំ២០២៥ ដែលថៃធ្វើជាម្ចាស់ផ្ទះនេះទេ ហើយលោក ខូវ ឆាយ ជាប្រធានសហព័ន្ធ បានអះអាងថា ការពហិការនេះ គឺជាការសម្រេចចិត្តត្រឹមត្រូវ ព្រោះកាលស៊ីហ្គេម លើកទី៣២ ឆ្នាំ២០២៣ នៅកម្ពុជា ថៃ ក៏បានពហិការមិនចូលរួមប្រកួតគុនខ្មែរដូចគ្នា។
លោក ខូវ ឆាយ បានលើកឡើងទៀតថា សហព័ន្ធកីឡាប្រដាល់គុនខ្មែរ មិនមែនជា មួយថៃ (Muay Thai) ឡើយ ហើយកម្ពុជាក៏មិនមានសហព័ន្ធកីឡាមួយថៃ នោះដែរ ហេតុនេះការធ្វើពហិការនេះ មិនខុសទៅនឹងចលនាអូឡាំពិកនោះទេ។
លោក ខូវ ឆាយ បានប្រាប់ប្រព័ន្ធផ្សព្វផ្សាយថា៖ «ការពហិការនេះ មិនពាក់ព័ន្ធជាមួយចលនាអូឡាំពិកទេ ដោយសារយើងទៅប្រកួតនេះ មិនមែនប្រកួតក្នុងកីឡាគុនខ្មែរឡើយ គឺគេប្រកួតកីឡា Muay Thai ហើយយើង មិនមែនជាសមាជិករបស់កីឡាមួយហ្នឹងទេ ហេតុនេះយើងចូលរួម ឬមិនចូលរួម ជាសិទ្ធិរបស់យើង ព្រោះកាលយើងរៀបចំគុនខ្មែរ ក៏គេមិនមកដែរ អ៊ីចឹងឥឡូវគេរៀបចំកីឡា Muay Thai វិញ ក៏យើងមិនទៅដែរ»។
ជាមួយគ្នានេះ លោក ខូវ ឆាយ បានអះអាងថា ក្នុងកាលៈទេសៈ ដែលប្រទេសកម្ពុជា និងថៃ កំពុងមានជម្លោះបញ្ហាព្រំដែនបែបនេះ ការបញ្ជូនអត្ដពលិកគុនខ្មែរ ទៅប្រកួតស៊ីហ្គេម នៅថៃច្បាស់ជាអាចបង្កហានិភ័យណាមួយកើតឡើង ដោយក្រុមពួកថៃជាតិនិយមជ្រុល ហេតុនេះការពហិការមិនប្រកួត គឺដើម្បីការពារដល់សុវត្ថិភាពអត្ដពលិក ព្រោះកន្លងមកកីឡាអត្ដសញ្ញាណជាតិ របស់ប្រទេសទាំង២នេះ តែងមានការប្រទាំងប្រទើសគ្នាខ្លាំង និងប្រឈមបង្កហិង្សាកើតឡើង។
ប្រធានសហព័ន្ធកីឡាប្រដាល់គុនខ្មែររូបនេះ បានសង្កត់ធ្ងន់ថា៖ «យើងមិនបានគិតពីរឿងនយោបាយទេ ប៉ុន្ដែយើងគិតពីសុវត្ថិភាពអត្ដពលិករបស់យើង។ យើងឃើញថា ស្ថានការណ៍នៅទីនោះ មិនអាចផ្ដល់ទំនុកចិត្តផ្នែកសុវត្ថិភាព និងភាពកក់ក្ដៅទៅដល់យើងបានទេ។ យើងមិនជឿជាក់លើការសន្យា(របស់ថៃ)នេះបានទេ»។
«គុនខ្មែរ និង Muaythai មានពាក់ព័ន្ធគ្នានឹងរឿងវប្បធម៌ ហើយកន្លងមក យើងមានការប៉ះទង្គិចគ្នា។ យើងមានស្នាម និងរឿងអាស្រូវជាមួយគ្នាយូរណាស់ហើយ ដូច្នេះវាងាយនឹងបង្កើតជាបញ្ហា តែប្រភេទកីឡាផ្សេង មិនអីទេ»។ លោក ខូវ ឆាយ បានបញ្ជាក់បន្ថែម។
ដូចគ្នានេះ សហព័ន្ធកីឡាប៊ីយ៉ាកម្ពុជា បានសម្រេចជាឯកច្ឆន្ទ ពហិការមិនបញ្ជូនក្រុមប្រតិភូ អត្តពលិក និងមន្ត្រីពាក់ព័ន្ធទាំងអស់ ទៅចូលរួមការប្រកួតកីឡាស៊ីហ្គេម លើកទី៣៣ ឆ្នាំ២០២៥ នៅប្រទេសថៃដែរ ហើយសហព័ន្ធនេះ ក៏នឹងមិនចូលរួមព្រឹត្តិការណ៍ផ្សេងៗទៀត នៅប្រទេសថៃដែរ។
តាមសេចក្តីថ្លែងការណ៍ផ្លូវការរបស់សហព័ន្ធកីឡាប៊ីយ៉ាកម្ពុជា កាលពីថ្ងៃទី១៨ ខែវិច្ឆិកា បានបញ្ជាក់ថា ការធ្វើការពហិការ មិនចូលរួមការប្រកួតស៊ីហ្គេម និងព្រឹត្តិការណ៍កីឡាផ្សេងៗ នៅប្រទេសថៃ ក្នុងឆ្នាំ២០២៥នេះ គឺជាការសម្រេចចិត្តដ៏លំបាក ដោយផ្អែកលើហេតុផលចម្បងៗចំនួន២ ទី១ កង្វល់ធ្ងន់ធ្ងរផ្នែកសុវត្ថិភាព និងសន្តិសុខ និងទី២ បញ្ហាស្មារតី និងតម្លៃជាតិ។
លោក ជុំ កុសល ប្រធានសហព័ន្ធកីឡាប៊ីយ៉ាកម្ពុជា បានអះអាងតាមរយៈសេចក្តីថ្លែងការណ៍ថា កាលៈទេសៈបច្ចុប្បន្ន រវាងព្រះរាជាណាចក្រកម្ពុជា និងព្រះរាជាណាចក្រថៃ ពុំទាន់មានលក្ខខណ្ឌអំណោយផលគ្រប់គ្រាន់ សម្រាប់ធានាសុវត្ថិភាព ជូនដល់ប្រតិភូកីឡាកម្ពុជាឡើយ។
លោកបញ្ជាក់ថា៖ «ជាមួយនឹងជម្លោះព្រំដែន ដែលនៅតែបន្ត និងការបន្តបិទច្រកព្រំដែននានា ព្រមទាំងករណីអសន្តិសុខ ដែលបានកើតឡើង ដោយការបាញ់ប្រហារលើប្រជាជនកម្ពុជាពីសំណាក់កងកម្លាំងយោធាថៃ ដែលជាទង្វើផ្ទុយពីស្មារតីមនុស្សធម៌ និងកិច្ចព្រមព្រៀងសន្តិភាព គឺបានបង្កការព្រួយបារម្ភយ៉ាងខ្លាំងក្លា ចំពោះសុខសុវត្ថិភាពរបស់ក្រុមប្រតិភូយើងខ្ញុំ»។
លោកបានសង្កត់ធ្ងន់ថា៖ «ក្នុងនាមជាអ្នកតំណាងឱ្យជាតិ និងប្រជាជនកម្ពុជា ការចូលរួមប្រកួតនៅក្រោមស្ថានភាព ដែលពលរដ្ឋខ្មែរមួយចំនួនកំពុងទទួលរងនូវការឈឺចាប់ និងការបាត់បង់ជីវិត ដោយសារតែសកម្មភាព នៅតាមបណ្ដោយព្រំដែន គឺជារឿង ដែលមិនអាចទទួលយកបាន ទាំងផ្នែកសីលធម៌ និងស្មារតីជាតិ។ ការចូលរួមប្រកួតកីឡានៅពេលនេះ អាចចាត់ទុកជាការមើលរំលងនូវការឈឺចាប់របស់ប្រជាជាតិទាំងមូល»។
បន្ថែមលើនេះ សហព័ន្ធ បានធ្វើការព្រមាន និងមិនទទួលខុសត្រូវ ចំពោះអ្នកចង់ទៅចូលរួម ដោយអះអាងថា ទោះបីជាកីឡាករ កីឡាការិនីរបស់សហព័ន្ធ ឬបុគ្គលជាជនជាតិខ្មែរណាផ្សេងទៀត ដែលមានចំណេះដឹងខាងលេងកីឡាប៊ីយ៉ា សម្រេចចិត្តចូលរួមប្រកួតណាមួយនៅលើទឹកដីប្រទេសថៃ ដោយខ្លួនឯង ហើយមិនមែនជាការបញ្ជូនជាផ្លូវការរបស់សហព័ន្ធទេ នោះសហព័ន្ធ នឹងមិនទទួលខុសត្រូវ ឬដឹងឮ ចំពោះសុវត្ថិភាព ឬសកម្មភាពរបស់បុគ្គលនោះឡើយ។
«បុគ្គលដែលចូលរួមដោយឯកឯងទាំងនោះ មិនតំណាងឱ្យកម្ពុជា ឬសហព័ន្ធកីឡាប៊ីយ៉ាកម្ពុជា ជាផ្លូវការឡើយ»។ សហព័ន្ធកីឡាប៊ីយ៉ាកម្ពុជា បានបញ្ជាក់នៅក្នុងសេចក្តីថ្លែងការណ៍របស់ខ្លួន។
ចំណែក លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជា បានអះអាងថា ការសម្រេចចិត្តបញ្ជូនប្រភេទកីឡាកាយសម្ព័ន្ធកម្ពុជា ទៅចូលរួមការប្រកួតស៊ីហ្គេម ឆ្នាំ២០២៥ នៅប្រទេសថៃនេះ គឺសហព័ន្ធ ក្រោមការដឹកនាំរបស់លោកទេសរដ្ឋមន្រ្តី ថោង ខុន បានពិនិត្យយ៉ាងគ្រប់ជ្រុងជ្រោយ ពាក់ព័ន្ធទៅនឹងលក្ខន្តិកៈ និងបទដ្ឋានផ្លូវច្បាប់នានា គឺធ្វើយ៉ាងណាឱ្យស្របតាមលក្ខន្តិកៈរបស់សហព័ន្ធកីឡាកាយសម្ព័ន្ធអន្តរជាតិ ក្នុងនាមយើងជាសមាជិកពេញសិទ្ធិ។
លោកបានបញ្ជាក់ថា៖ «យើងខ្ញុំ បានពិនិត្យគ្រប់ជ្រុងជ្រោយទៅលើការងារមួយនេះ ដោយសារនៅក្នុងលក្ខន្តិកៈ គេបានចែងច្បាស់ថា ត្រូវប្រឆាំងដាច់ខាត រាល់ការរើសអើងពាក់ព័ន្ធនឹងនិន្នាការនយោបាយ ជាតិសាសន៍ សាសនា ពណ៌សម្បុរ និងសារធាតុហាមឃាត់ អ៊ីចឹងការចូលរួមរបស់យើងនេះ អនុវត្តទៅតាមស្មារតីកីឡាពិត សាមគ្គីភាព មិត្តភាព គឺកីឡាជាវេទិកាសន្តិភាព ប្រកួតប្រជែងគ្នា ដោយភាពអត់ធ្មត់ មិនបង្កបញ្ហា អ៊ីចឹងនេះជាចំណុច ដែលយើងបានអនុវត្តទៅតាមលក្ខន្តិកៈ ក៏ដូចជាបទដ្ឋាននានារបស់សហព័ន្ធអន្តរជាតិ គឺរាល់ព្រឹត្តិការណ៍យើងត្រូវទៅចូលរួមការប្រកួត»។
ជាមួយគ្នានេះ លោក ណយ ផាណា បានឱ្យដឹងថា ការប្រកួតស៊ីហ្គេម មិនមែនជាបុព្វសិទ្ធិផ្តាច់មុខរបស់ប្រទេសណាមួយនោះទេ តែជាបុព្វសិទ្ធិរបស់សហព័ន្ធកីឡាអាស៊ីអាគ្នេយ៍ ទាំង១១ប្រទេស គ្រប់គ្រងដឹកនាំ រីឯម្ចាស់ផ្ទះ ជាអ្នករៀបចំទៅតាមសេចក្តីសម្រេចរបស់ក្រុមប្រឹក្សាសហព័ន្ធកីឡាអាស៊ីអាគ្នេយ៍ (SEAGF Council) ទាំង១១ប្រទេស។
លោកថ្លែងថា៖ «ស៊ីហ្គេម ជាព្រឹត្តិការណ៍២ឆ្នាំមានម្តងរបស់ប្រទេសនីមួយៗ ដែលត្រូវទទួលលេខរៀងធ្វើម្ចាស់ផ្ទះ ជាបន្តបន្ទាប់គ្នា អ៊ីចឹងលទ្ធផលជាមេដាយ មិនមែនជាមេដាយ និងបំពាក់មេដាយរបស់ម្ចាស់ផ្ទះថៃនោះទេ ប៉ុន្តែជាមេដាយរបស់គណៈកម្មការរៀបចំហ្គេម ហេតុនេះយើងមើលឃើញថា ការចូលរួមនេះ វាសមស្របទៅនឹងលក្ខន្តិកៈ និងបច្ចេកទេសរបស់ហ្គេម ក៏ដូចជាលក្ខន្តិកៈរបស់សហព័ន្ធកីឡាជាតិផ្ទាល់ និងសហព័ន្ធអន្តរជាតិ»។
ទន្ទឹមនឹងនេះ លោក ណយ ផាណា ក៏បានមើលឃើញពីការលើកឡើងរបស់មហាជនជាច្រើន ដែលបានសម្តែងការបារម្ភទៅលើក្រុមប្រតិភូកីឡាកម្ពុជា សម្រាប់ការសម្រេចចិត្តចូលរួមការប្រកកួតស៊ីហ្គេម នៅប្រទេសថៃ នាពេលខាងមុខនេះ ព្រោះពួកគាត់ ខ្លាចប្រតិភូកីឡាកម្ពុជា គ្មានសុវត្ថិភាព។
ចំពោះបញ្ហានេះ លោក ផាណា បានសង្កត់ធ្ងន់ថា៖ «ពួកយើង ពិតជាសូមអរគុណចំពោះការព្រួយបារម្ភរបស់មហាជន ប៉ុន្តែអ្វីដែលយើងចូលរួមស៊ីហ្គេមនេះ គឺអនុវត្តទៅតាមមូលដ្ឋានគ្រឹះនៃច្បាប់កីឡាជាសាកល និងច្បាប់កីឡាអន្តរជាតិ ក៏ដូចជាសហព័ន្ធកីឡាកាយសម្ព័ន្ធអន្តរជាតិ ក្រោមការឯកភាព និងអនុញ្ញាតពីគណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា ផងដែរ»។
គួរបញ្ជាក់ថា សម្រាប់ការប្រកួតស៊ីហ្គេម លើកទី៣២ ឆ្នាំ២០២៣ ម្ចាស់ផ្ទះកម្ពុជា ដណ្តើមបានមេដាយមាស៨១ ប្រាក់៧៤ និង សំរឹទ្ធ១២៧ សរុបចំនួន ២៨២ ហើយឈរនៅចំណាត់ថ្នាក់លេខ៤ ក្នុងចំណោម ១១ប្រទេស ចំណែកស៊ីហ្គេម លើកទី៣៣ ឆ្នាំ២០២៥ នៅប្រទេសថៃនេះ ក្រសួងអប់រំ យុវជន និងកីឡា បានអនុញ្ញាតឱ្យប្រភេទកីឡាចំនួន៣៩ ប្រមូលផ្តុំហ្វឹកហាត់ ត្រៀមការប្រកួតនេះ និងព្រឹត្តិការណ៍អន្តរជាតិផ្សេងៗទៀត ប៉ុន្តែចុងក្រោយមានតែប្រភេទកីឡាចំនួន២១ទេ ត្រូវបានសម្រេចបញ្ជូនឱ្យទៅចូលរួមការប្រកួតស៊ីហ្គេម លើកនេះ៕
