នគរបាលជាតិកម្ពុជាបានឆ្មក់ចូលឆែកឆេរពីរទីតាំងក្នុងក្រុងប៉ោយប៉ែត ខេត្តបន្ទាយមានជ័យ និងបានរកឃើញជនបរទេសចំនួន ២៣០ នាក់ ក្នុងនោះមានស្ត្រី ៦៨ នាក់ ដែលជាប់ពាក់ព័ន្ធនឹងប្រតិបត្តិការឆបោកតាមអនឡាញ។
ការបង្រ្កាបរយៈពេលពីរថ្ងៃគឺថ្ងៃទី២២ និង២៣ ខែកុម្ភៈ ឆ្នាំ២០២៥ បានធ្វើឡើងបន្ទាប់ពីការស៊ើបអង្កេតអស់រយៈពេលជាង៣ខែ និងបានរកឃើញជនបរទេសដែលក្នុងនោះ ១២៣នាក់ជាជនជាតិថៃ។ ពួកគេត្រូវបាននាំខ្លួនទៅសាកសួរ។
ប៉ូលិសបាននិយាយកាលពីថ្ងៃច័ន្ទថា៖ «ជនបរទេសទាំងនោះកំពុងសំងំលាក់ខ្លួនលួចលាក់ធ្វើប្រតិបត្តិការអនឡាញខុសច្បាប់ ដោយមានមេក្លោងជាជនជាតិចិន» ប៉ូលិសបន្តថា អ្នកបោកប្រាស់ត្រូវបានគេចោទប្រកាន់ថារស់នៅ «រស់នៅធម្មតា» និង«ស្ម័គ្រចិត្ត» ទទួលយកការងារខុសច្បាប់។
ប៉ូលិសបានលើកឡើងទៀតថា នគរបាលជាតិកម្ពុជានឹងស្នើសុំកិច្ចសហការជាមួយនគរបាលថៃ ដើម្បីបន្តនីតិវិធីច្បាប់ពាក់ព័ន្ធនឹងជនជាតិថៃ ក៏ដូចជាការចាប់ខ្លួនជនសង្ស័យផ្សេងទៀត។
កាលពីពេលថ្មីៗនេះ អាជ្ញាធរថៃបានកាត់ផ្តាច់សេវាទូរគមនាគមន៍លើមជ្ឈមណ្ឌលឆបោកដែលសង្ស័យថានៅក្នុងក្រុងប៉ោយប៉ែត ដែលល្បីថាជាមជ្ឈមណ្ឌលឆបោកតាមអនឡាញ ក្នុងការផ្លាស់ប្តូរឆ្លងព្រំដែនចុងក្រោយបង្អស់ប្រឆាំងនឹងឧស្សាហកម្មខុសច្បាប់ បន្ទាប់ពីជនរងគ្រោះជនជាតិចិនដែលមានកេរ្តិ៍ឈ្មោះខ្ពស់ត្រូវបានជួញដូរពីប្រទេសថៃទៅកាន់កន្លែងឆបោកនៅប្រទេសមីយ៉ាន់ម៉ាកាលពីដើមឆ្នាំនេះ។
នៅពេលនោះ ប៉ូលិសកម្ពុជាបានលើកឡើងថា ប៉ូលិសថៃ «មិនបានស្នើសុំកិច្ចសហប្រតិបត្តិការទេ»។
ទោះបីជាយ៉ាងណាក៏ដោយ ប្រព័ន្ធផ្សព្វផ្សាយថៃបានរាយការណ៍ថា អ្នកនាំពាក្យរដ្ឋាភិបាលរបស់ពួកគេ លោក Jirayu Houngsub បានថ្លែងថា ប្រទេសថៃបានជួយសង្គ្រោះ «ជនរងគ្រោះ» ចំនួន ២១៥ នាក់។ ក្នុងនោះមានពលរដ្ឋថៃ ១០៩នាក់ រួមជាមួយជនជាតិប៉ាគីស្ថាន ៥០នាក់ ឥណ្ឌា ៤៨នាក់ និងឥណ្ឌូនេស៊ី ៣នាក់។
ក្នុងការឆ្មក់ចូលឆែកឆេរចុងក្រោយនេះ ប៉ូលិសថៃបានសម្របសម្រួលជាមួយប៉ូលិសកម្ពុជា ដើម្បីសម្រុកចូលអគារកម្ពស់បីជាន់ក្នុងបរិវេណផ្លាហ្សាក្នុងក្រុងប៉ោយប៉ែត កាត់ផ្សាររ៉ុងគ្លឿ ក្នុងស្រុកអារញ្ញ ខេត្តស្រះកែវ។
ប្រភពមួយបានបង្ហាញថា អាជ្ញាធរថៃត្រូវបានគេជូនដំណឹងជាលើកដំបូងចំពោះការឆបោកនៅពេលពួកគេបានទទួលអ៊ីម៉ែលពីជនរងគ្រោះដែលស្វែងរកជំនួយ។ ប្រភពដដែលបន្តថា ក្រោយការស៊ើបអង្កេត ពួកគេបានរកឃើញ «ទីតាំងក្រុមប្រព្រឹត្តបទល្មើស» ហើយបានសហការជាមួយប៉ូលិសកម្ពុជា ដើម្បីបង្ក្រាបប្រតិបត្តិការនេះ។
អនុប្រធានគណៈកម្មាធិការជាតិប្រឆាំងការជួញដូរមនុស្ស លោកស្រី ជូ ប៊ុនអេង មានប្រសាសន៍ថា លោកស្រីបានទទួលព័ត៌មានអំពីការបង្ក្រាបនេះ ហើយប៉ូលិសកម្ពុជាកំពុងធ្វើការលើបញ្ហានេះ។
លោកស្រី ប៊ុនអេង បានថ្លែងថា៖ «ប្រសិនបើពួកគេរកឃើញថា វាពាក់ព័ន្ធនឹងការជួញដូរមនុស្ស ពួកគេនឹងត្រូវបញ្ជូនទៅនាយកដ្ឋានប្រឆាំងការជួញដូរមនុស្ស។ ប្រសិនបើពួកគេកំណត់ថាវាជាបញ្ហាឆបោកតាមអនឡាញ យើងនឹងកាត់ទោសតាមច្បាប់ព្រហ្មទណ្ឌ»។
កម្ពុជាមិនចាត់ទុកបញ្ហាឆបោកទាំងអស់ថាពាក់ព័ន្ធនឹងបញ្ហាជួញដូរមនុស្សនោះទេ។
លោក សិទ្ធិ ឡោះ ស្នងការនគរបាលខេត្តបន្ទាយមានជ័យ មិនអាចទាក់ទងសុំការបំភ្លឺបានទេ។
ដូចគ្នានេះដែរ កិច្ចខិតខំប្រឹងប្រែងដើម្បីទទួលបានព័ត៌មានបន្ថែមពីនគរបាលភូមិន្ទថៃ និងនគរបាលខេត្តភូមិភាគ២ ស្ថានទូតឥណ្ឌា និងប៉ាគីស្ថានប្រចាំនៅកម្ពុជា គឺគ្មានប្រយោជន៍ទេ ដោយសារពួកគេមិនបានឆ្លើយតបតាមអ៊ីមែលនៅពេលបោះពុម្ពផ្សាយ៕
ប្រែសម្រួលពីអត្ថបទភាសាអង់គ្លេស៖ Cambodian Police Raid Scam Centers in Poipet, Discover Over 200 Foreigners
