សមាគមសម្ព័ន្ធអ្នកសារព័ត៌មានកម្ពុជា

កម្មកររោងចក្រ ឃែនធើរេន ដេកយាមមុខរោងចក្រជិត៤ខែស្នើក្រសួងការងារជួយដោះស្រាយបញ្ចប់វិវាទ

កម្មកររោងចក្រ ឃែនធើរេន អឹភែរឹល បោះតង់ដេកយាមនៅមុខរោងចក្រ ដើម្បីស្វែងរកដំណោះស្រាយ រាជធានីភ្នំពេញ។ រូបថតថ្ងៃទី៣១ ខែសីហា ឆ្នាំ២០២២។ ខេមបូចា/ ព្រីង សំរាំង
កម្មកររោងចក្រ ឃែនធើរេន អឹភែរឹល បោះតង់ដេកយាមនៅមុខរោងចក្រ ដើម្បីស្វែងរកដំណោះស្រាយ រាជធានីភ្នំពេញ។ រូបថតថ្ងៃទី៣១ ខែសីហា ឆ្នាំ២០២២។ ខេមបូចា/ ព្រីង សំរាំង

កម្មកររោងចក្រ ឃែនធើរេន ដែលធ្វើការតវ៉ាដាក់ញត្តិនៅតាមស្ថាប័នរដ្ឋនានាព្រមទាំង​ដេកយាមមុខរោងចក្រជារៀងរាល់យប់អស់រយៈពេលជិត៤ខែមកនេះ ស្នើឱ្យ​ក្រសួង​ការងារ​​ដោះស្រាយបញ្ចប់វិវាទ បន្ទាប់ពីថៅកែរោងចក្របិទទ្វារ។ 

កម្មករម្នាក់ផ្នែកពិនិត្យខោអាវ លោក សារឿន ចាន់ឃិន អាយុ៣៦ឆ្នាំ ដែលដេកយាមមុខ​រោងចក្រ​ជារៀងរាល់យប់លើកឡើងថា រាល់ថ្ងៃនេះលោកសង្ឃឹមថា ក្រសួងការងារនឹងស្វែង​រកថៅកែរោងចក្រដែលរត់ចោលកម្មករទៅបើករោងចក្រផ្សេងនោះឱ្យមកដោះស្រាយជាមួយកម្មករ ហើយលោកក៏ព្រួយបារម្ភដែរថាអាចនឹងមាននរណាម្នាក់ជួលមនុស្ស​ឱ្យធ្វើបាបលោក​នៅពេលដេកយប់ឡើង។

លោក ចាន់ឃិន បន្តថា កម្មករដេកយាមមុខរោងចក្រចន្លោះពី១០ទៅ១២នាក់បាត់ទូរសព្ទ ចំនួនពីរគ្រឿង​និងកាបូប​លុយ​មួយដែលដាក់លើ​ក្បាលដំណេក។

កម្មករធ្វើការអស់រយៈពេល៧ឆ្នាំរូបនេះ និយាយថា៖«មានសង្ឃឹម[បានពីរចំណុច]លុះត្រាតែ​មន្ត្រី​ក្រសួង​គាត់វែកមុខពួកថៅកែ»។ លោក បន្ថែមថា៖ «ខ្លាចជនមិនស្គាល់មុខគេជួល​អីយប់​ឡើងសម្រាន្តលក់អត់ដឹង»

លោក ចាន់ឃិន ឱ្យដឹងទៀតថា ជារៀងរាល់យប់សំឡេងឡានធំៗបើកតាមផ្លូវលាន់ឮ​ខ្លាំង​រំខានដល់ដំណេកកម្មករដែលដេកយាមខាងមុខរោងចក្រ។ លោកបន្តលើកឡើងពី​ផល​ពិបាក​ថា រាល់យប់នៅពេលមានភ្លៀងធ្លាក់ម្ដងៗតង់ធ្លុះធ្លាយសាចទឹក​ បណ្ដាលឱ្យ​កម្មករ​ពុំអាច​ដេក​បានឡើយ។

លោក ចាន់ឃិន បញ្ជាក់ថា៖ «ជួបបញ្ហាធំបំផុតគឺទឹកលិចសើមមុងសើមភួយទាំងអស់ ដេកមិន​បានយប់ឡើង អង្គុយទាល់ៗភ្លឺ តង់យើងធ្លុះធ្លាយអស់។ ទឹកលិចចាល់ពី​ក្នុង​រោងចក្រ​អីផង ស្មើនឹងអាគ្រែយើងដេក។ លោក បន្ថែមថា៖ «ឈឺជាធម្មតាត្រូវទឹកភ្លៀង ផ្ដាសាយ​អី កត្តាដែលយើងខ្លាំងបំផុតគឺអត់បានដេក អត់ងងុយរឹតតែឈឺហ្មង»។

កម្មកររោងចក្រ ឃែនធើរេន អឹភែរឹល បោះតង់ដេកយាមនៅមុខរោងចក្រ ដើម្បីស្វែងរកដំណោះស្រាយ រាជធានីភ្នំពេញ។ រូបថតថ្ងៃទី៣១ ខែសីហា ឆ្នាំ២០២២។ ខេមបូចា/ ព្រីង សំរាំង

កម្មករស្រីម្នាក់ទៀតផ្នែកតុកាត់ អ្នកស្រី ឆុន ស្រីម៉ាប់ អាយុ៣៣ឆ្នាំ ដែលអង្គុយយាមនៅ​មុខ​រោងចក្រតាំងពីព្រឹករហូតដល់ល្ងាចនិងជាអ្នកធ្វើម្ហូបដាំបាយឱ្យកម្មករដេកយាម ប្រាប់ថា រាល់ថ្ងៃត្រូវចំណាយប្រាក់៦ម៉ឺនរៀលសម្រាប់ម្ហូបក្នុងមួយថ្ងៃ ដោយប្រាក់ទាំងនោះបាន​មកពី​ការ​រៃអង្គាសគ្នា។

អ្នកស្រី ស្រីម៉ាប់ បន្តថា អាហារថ្ងៃត្រង់និងល្ងាចចំណាយមួយពេល៣ម៉ឺនរៀល និងអាហារ​ពេលព្រឹកក្រុមកម្មករអាចរកអ្វីហូបដោយខ្លួនឯង ខណៈអង្ករដាំ២គីឡូកន្លះក្នុងមួយថ្ងៃ។

កម្មករធ្វើការ១២ឆ្នាំនៅរោងចក្រឃែនធើរេនរូបនេះ ឱ្យដឹងថា គាត់ទទួលបាន​ប្រាក់​៨០០ដុល្លារ ពីការផ្ដល់សំណងបីចំណុចរបស់ក្រសួងការងារ ខណៈគាត់គិតថា​បើបន្ថែម​ពីរចំណុចទៀតប្រហែលបាន៣ពាន់ដុល្លារ។

អ្នកស្រី ស្រីម៉ាប់ ដែលឱ្យកូនអាយុ៦ឆ្នាំឈប់រៀនពីសាលាឯកជន ដោយប្ដូរទៅសាលារដ្ឋវិញ លើក​ឡើង​ពីបញ្ហាថវិកាអំឡុងពេលយាមមុខរោងចក្រ ដោយសារពុំមានការងារធ្វើ ខណៈ​អ្នកស្រីថា នឹងនៅយាមមុខរោងចក្ររហូតទាល់តែមានដំណោះស្រាយ។

អ្នកស្រី ស្រីម៉ាប់ និយាយថា៖ «ប៉ះពាល់ខ្លាំងជាងគេគឺថវិកា ព្រោះយើងត្រូវការបង់បន្ទប់ជួល ធនាគា ទឹកដោះគោកូន សាលាកូន បង់ថ្លៃទឹកភ្លើង។ កាលខ្ញុំនៅធ្វើការអាអស់ហ្នឹង​ខ្ញុំអ្នក​រាប់​រង លូវយើងខ្ចីគេហែៗរហូត»។

អ្នកស្រីបន្ថែមថា៖ «បញ្ឈប់ពីសាលាឯកជនទៅសាលារដ្ឋ បីខែហ្នឹងកាត់ចូលសាលារដ្ឋ ឯកជន​សាលាមីគីវ៉េ ថ្នាក់មត្តេយ្យ៣៣ដុល្លារ រៀនរដ្ឋអត់អស់លុយទេ»។

កម្មករោងចក្រឃែនធើរេនដែលភាគច្រើនជាកម្មករវ័យចាស់ដែលធ្វើការអស់រយៈពេលជាច្រើនឆ្នាំ បានធ្វើការតវ៉ានិងដេកយាមខាងមុខរោងចក្រចាប់ពីថ្ងៃទី០៩ ខែឧសភា ឆ្នាំ២០២២ បន្ទាប់​ពី​ថៅកែរត់ចោល។

កាលពីថ្ងៃទី១៧ ខែសីហា ឆ្នាំ២០២២ បន្ទាប់ពីមានការណែនាំពីលោក នាយករដ្ឋមន្រ្តី ហ៊ុន សែន ក្រសួងការងារ បានចេញសេចក្ដីជូនដំណឹងមួយដល់កម្មកររោងចក្រឃែនធើរេន ទាក់ទិន​នឹងការដោះស្រាយបីចំណុច ក្រោយថៅកែរត់ចោល ដោយប្រើថវិកាបុរេប្រទាន​របស់រដ្ឋាភិបាលដែលមានដូចជា ១-ប្រាក់ឈ្នួលខែចុងក្រោយដែលមិនទាន់បានបើក ២-ប្រាក់បំណាច់ជួសការឈប់សម្រាកប្រចាំឆ្នាំដែលនៅសល់ ៣-ប្រាក់បំណាច់អតីតភាព​ការងារថ្មី​ក្នុងឆ្នាំ និងប្រាក់រំលឹកប្រាក់បំណាច់អតីតភាពការងារ​ដែល​មានមុនឆ្នាំ២០១៩។

ទោះជាយ៉ាងណាបើតាមក្រុមកម្មករ ពួកគេតវ៉ា​ទាមទារ​ចំនួន៥ចំណុច ដោយពីរចំណុច​មិនទាន់ទទួលបាននោះរួមមាន ប្រាក់ជូនដំណឹងជាមុន និងប្រាក់សងជំងឺចិត្ត ហើយ​ពួកគេចាត់ទុកថាបានខាតបង់យ៉ាងធ្ងន់ធ្ងរប្រសិនបើបាត់ពីរចំណុចនេះ។

យោងតាមច្បាប់ស្ដីពីការងារ មានត្រា៩១ ឱ្យដឹងថា ការរំលាយកិច្ចសន្យាការងារតាមឆន្ទៈ​ផ្ទាល់​នៃភាគីណាមួយ ដោយគ្មានហេតុផលត្រឹមត្រូវនោះ អាចបើកសិទ្ធិឱ្យភាគីម្ខាងទៀត​ទារសងសោហ៊ុយជម្ងឺចិត្តបាន។

មាត្រានេះបានគូសបញ្ជាក់ថា សោហ៊ុយជម្ងឺចិត្តនេះ មិនត្រូវច្រឡំគ្នាជាមួយនឹងប្រាក់បំណាច់​ទូទៅជួសការឱ្យដំណឹងមុនឬជាមួយនឹងប្រាក់បំណាច់បណ្ដេញចេញទេ។

កម្មករនិយោជិតអាចទាមទារប្រាក់បំណាច់បើកផ្ដាច់មួយ ដែលមានចំនួនស្មើនឹងប្រាក់បំណាច់​បណ្ដេញចេញ។ ក្នុងករណីនេះ កម្មករនិយោជិតត្រូវបានរួចពីកាតព្វកិច្ចដែលត្រូវផ្ដល់ភ័ស្ដុតាង​បញ្ជាក់ពីការខូចខាតរបស់ខ្លួន។

ចំណែកមាត្រា៧៧ ឱ្យដឹងទៀតថា ការរំលាយកិច្ចសន្យាការងារតាមឆន្ទៈនៃនិយោកជកតែ​ឯក​ឯង​គ្មានឱ្យដំណឹងមុន ឬមិនគោរពតាមរយៈពេលនៃការឱ្យដំណឹងមុន តម្រូវឱ្យនិយោជកចេញ​ប្រាក់ទូទាត់ដល់ កម្មករនិយោជិតមានចំនួនស្មើគ្នានឹងប្រាក់ឈ្នួល ហើយនិងអត្ថប្រយោជន៍​គ្រប់ប្រភេទដែលកម្មករនិយោជិតត្រូវបានក្នុងរយៈពេលឱ្យដំណឹងមុនដែលគេមិនបានគោរពត្រឹមត្រូវ។

កម្មកររោងចក្រ ឃែនធើរេន ពីរនាក់កំពុងលាងចាននៅមុខរោងចក្រ នៅភូមិត្រពាំងថ្លឹង៣ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ។ រូបថតនៅថ្ងៃទី៣០ ខែសីហា ឆ្នាំ ២០២២។ ខេមបូចា/ វ៉ា សុភានុត

អ្នកស្រី សាន់ សុផា ប្រធានសហជីពចលនាកម្មករប្រចាំរោងចក្រឃែនធើរេន ថ្លែងថា ក្រុម​កម្មករប្រមាណ១៥០នាក់នៅបន្តតាមទាមទារពីរចំណុចបន្ថែមទៀតពីថៅកែដោយធ្វើការដេកយាមនៅខាងមុខរោងចក្រ។

អ្នកស្រី សុផា បន្ថែមថា រាល់ថ្ងៃកម្មករប្រមូលថវិកាដោយស្ម័គ្រចិត្ត​ដើម្បីឧបត្ថម្ភដល់អ្នកដេក​យាមយប់។

អ្នកស្រី និយាយថា៖ «ពួកខ្ញុំធ្វើការ២០ឆ្នាំ អត្ថប្រយោជន៍បានប៉ុណ្ណឹងវាខាតខ្លាំងបីចំណុច វា​ខាត​សឹងពាក់កណ្ដាល ហើយពួកខ្ញុំតស៊ូ ខ្ញុំធ្វើការឱ្យរោងចក្រនេះ២០ឆ្នាំជាងហើយ ចឹងការ​ចំណេញរោងចក្រនេះវាច្រើន។ [កម្មករ]ពួកគាត់ខ្លះក៏មិនបានទៅធ្វើការ ខ្លះធ្វើការ​យកប្រាក់​ខែ​ហ្នឹង ឧបមា៥ទៅ៦ដុល្លារទៅ[ក្នុងមួយខែ] ដើម្បីឧបត្ថម្ភអ្នកដេកយប់ដែលគាត់អត់​ទៅ​រកការងារធ្វើ»។

ប្រធាន​សហព័ន្ធសហជីពចលនាកម្ម​ករ​ លោក ប៉ាវ ស៊ីណា  យល់ឃើញថា នេះគឺជាសិទ្ធិ​របស់​កម្មករ​ក្នុងការទាមទារឱ្យថៅកែរោងចក្រដែលបិទទ្វារទុកកម្មករចោលឱ្យដោះស្រាយ។

លោក ស៊ីណា ថ្លែងថា៖«ខ្ញុំគិតថាពួកគាត់អាចនឹងមានការដង្ហែក្បូនឬតវ៉ាបន្ថែមទៀត​ជាមួយ​ផ្ទះសម្ដេចអីមិនដឹង ដើម្បីស្នើសុំកិច្ចអន្តរាគមន៍ពីសម្ដេច ព្រោះពួកគាត់មិននៅស្ងៀមទេ»។

ក្រុមកម្មករតវ៉ាដែលមានគ្នាសរុបជាង៣០០នាក់​ ត្រូវបែកជាពីរ​ក្រុម ដោយមួយក្រុមធ្វើការតវ៉ា​ដេកយាមមុខរោងចក្រ និងមួយក្រុមទៀតដាក់លិខិតទាមទារទុកនៅក្រសួងការងារឱ្យ​ជួយ​ដោះ​ស្រាយ។

កម្មករនីម្នាក់ដែលពុំចូលរួមតវ៉ាដោយដេកយាមមុខរោងចក្រ អ្នកស្រី នៅ ហាន លើកឡើងថា ក្រុមកម្មករអ្នកស្រីដែលមានគ្នាជាង១០០នាក់ ក៏មានបំណងក្នុងការដេកយាមមុខ​រោងចក្រ​ប៉ុន្តែមិនដឹងថាតវ៉ាជាមួយអ្នកណា ព្រោះថៅកែមិនព្រមចេញមុខដោះស្រាយ។

កម្មករវ័យ៥២ឆ្នាំរូបនេះ និយាយថា៖«យើងនៅធ្វើទៀត​តែយើងយកពាក្យដាក់នៅក្រសួង​ហើយៗ ដាក់ពាក្យសូមក្រសួងសុំអី(ក្រសួង)គាត់ថានឹងដោះស្រាយឱ្យ គាត់នឹងរកមើល​ថៅកែឱ្យ»។

លោក អាត់ ធន់ ប្រធានសហភាពការងារកម្ពុជា លើកឡើងថា វិវាទការងារនេះអាចនឹងដោះ​ស្រាយ​ចប់យ៉ាងឆាប់រហ័ស ក្រោយមានការណែនាំពីលោកនាយករដ្ឋមន្រ្តីហ៊ុនសែន។

លោក ធន់ និយាយថា៖« ដូចជាមិនមានឧបសគ្គអីទៀតទេដោយថាខាងនាយករដ្ឋមន្រ្តីក៏បាន​ស្នើឱ្យក្រសួងដោះស្រាយ។ ខ្ញុំគិតថាវាកាន់តែលឿនហើយព្រោះកន្លងមក មានការយឺតយ៉ាវ​ដោយសារខាងក្រសួងចេះតែនីតិវិធីនេះនិតិវិធីនោះអាចនឹងវែងឥលូវដូចជាមិនមានអីយូរ​ទៀតទេតាមមើល»។

ក្រៅពីការដាក់ញត្តិតាមស្ថាប័នរដ្ឋនានា ក្រុមកម្មករទាំងនោះក៏បានដើរដាក់ញត្តិ​តាមបណ្ដា​ស្ថានទូតបរទេសមួយចំនួនប្រចាំប្រទេសកម្ពុជាផងដែរ។

យោងតាមលិខិតរបស់កម្មករសុំអន្តរាគមន៍ពីឯកអគ្គរដ្ឋទូតអាមេរិកប្រចាំកម្ពុជា ឱ្យដឹងថា ក្រុម​កម្មករស្នើឱ្យអន្តរាគមន៍ទៅកាន់ក្រុមហ៊ុនបញ្ជាទិញ Wai-Mart  និង Primark ឱ្យចូលរួម​ទទួល​ខុសត្រូវក្នុងការទូទាត់ប្រាក់ឈ្នួលនិងអត្ថប្រយោជន៍ផ្សេងៗរបស់កម្មករឱ្យស្របតាមច្បាប់ស្ដីពីការងារ។

ចំណែកលិខិតរបស់កម្មករសុំអន្តរាគមន៍ពីរដ្ឋមន្រ្តីក្រសួងការងារ លោក អ៊ិត សំហេង បានឱ្យ​ដឹង​ថា ជនជាតិមាឡេស៊ី ឈ្មោះ Yap Fung Kong ជាថៅកែរោងចក្រឃែនធើរេន ដែលមាន​ទី​តាំង​នៅភូមិត្រពាំងថ្លឹង៣ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ រត់ចោល​កម្មករចំនួន៣២០នាក់ដែលមានកិច្ចសន្យាការងារមានថិរវេលាមិនកំណត់។

កម្មកររោងចក្រ ឃែនធើរេន អង្គុយនិយាយគ្នាក្រោមតង់ដេកយាមខាងមុខរោងចក្រ ខណៈកម្មការិនីម្នាក់ទៀតកំពុងចម្អិនម្ហូប ក្នុងសង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ។ រូបថតនៅថ្ងៃទី៣០ ខែសីហា ឆ្នាំ២០២២។ ខេមបូចា/វ៉ា សុភានុត

ដោយឡែក ប្រធានរដ្ឋបាលរោងចក្រលោក Chhoong Weipiau បានលាឈប់នៅថ្ងៃទី៣​ ខែឧសភា ឆ្នាំ២០២២ ទាំងមិនទាន់ទូទាត់ប្រាក់ឈ្នួលនិងអត្ថប្រយោជន៍ផ្សេងៗ​ស្របតាម​ច្បាប់​ស្ដីពីការងារជូនកម្មករនៅឡើយ។

ប្រភពដដែលបន្តថា ក្រុមហ៊ុនកាត់ដេរឃែនធើរេន អឹភែរឹល និងក្រុមហ៊ុនកាត់ដេរ ខ្វលីធី តេក្សស្ទីល គឺជាក្រុមហ៊ុនតែមួយ ដោយមានលោក Chhoong Weipiau ជាប្រធានរដ្ឋបាល​តាំងពីដើមមក ហើយមុនលោក Chhoong Weipiau លាឈប់ពីការងារ ក្រុមហ៊ុនកាត់ដេរ ឃែនធើរេន បានដឹកជញ្ជូនសម្ភារៈមានតម្លៃជាច្រើនដូចជា ម៉ាស៊ីនភ្លើង ម៉ាស៊ីនដេរថ្មីៗ និងសម្ភារៈអាចប្រើប្រាស់បានជាច្រើនទៀត ព្រមទាំងនិងបញ្ជូនកម្មករ​មួយចំនួនទៅ​កាន់​ក្រុមហ៊ុន​កាត់ដេរ ខ្វលីធី ដែលសព្វថ្ងៃកំពុងដំណើរការជាធម្មតា។

អគ្គលេខាធិការរងគណៈកម្មការដោះស្រាយកូដកម្មបាតុកម្មគ្រប់មុខសញ្ញា​ នៃក្រសួងការងារ និងបណ្ដុះ​​បណ្ដាល​​វិជ្ជា​ជីវៈ​ លោក វង្ស សុវណ្ណ ប្រាប់ថា នោះគឺជាសិទ្ធិរបស់កម្មករក្នុងការតវ៉ា​ទាមទារ ខណៈលោកថា ក្រសួងការងារពុំមានសម្ថកិច្ចនាំថៅកែរោងចក្រឱ្យចូលមកដោះ​ស្រាយ​​ឡើយ។

លោក ថ្លែងថា៖«ដោយសារគាត់មានការប្ដឹងតុលាការអីដែរ ខាងក្រសួងមាន​ដែនសម្ថកិច្ច​របស់យើង។ ដល់ណុងគឺគាត់អាចទៅតុលាកាអីហើយ ការចុះឆែកឆេរតាមរកថៅកែ​ជា​សម្ថកិច្ចហួសដែនយើង(ក្រសួងការងារ)»។

លោក​ សុវណ្ណ បន្តថា​ សម្រាប់អីវ៉ាន់ក្នុងរោងចក្រដែលកម្មករកំពុងដេកយាមនេះ មន្ត្រីក្រសួង​នឹងពិនិត្យថាតើគួរបង្វិលថវិកាសងរដ្ឋវិញនូវប្រាក់បុរេប្រទានដែលរដ្ឋបានផ្ដល់ជូនកម្មករ ឬត្រូវ​ចែកគ្នាជាមួយកម្មករ។ 

លោក បានបន្ថែមថា៖«យើងត្រូវបង្វិលថវិកាសងរដ្ឋវិញ អ្វីដែលជាទ្រព្យសល់តិចតួច​ខាង​រោងចក្រ (ប៉ុន្តែ)គោលការណ៍គឺយើងត្រូវឆ្លងថ្នាក់ដឹកនាំទៀតអត់អាចបញ្ជាក់ភ្លាមៗ​តាម​ហ្នឹងបានទេ»

ប្រធានសហជីពចលនាកម្មករប្រចាំរោងចក្រឃែនធើរេន អ្នកស្រី សាន់ សុផា និយាយថា ក្រុម​កម្មករ​បានប្ដឹងឱ្យតុលាការនាំខ្លួនថៅកែរោងចក្រមកដោះស្រាយជាមួយកម្មករ ព្រមទាំងចេញ​ដីកាការពារទ្រព្យសម្បត្តិ អគារនិងដីជាបណ្ដោះអាសន្នរហូតទាល់តែមានដំណោះស្រាយ។

តែយ៉ាងណា អ្នកស្រី សុផា ប្រាប់ថាចៅក្រមសាលាដំបូងចេញដីកាត្រឹមរក្សាការពារ​តែទ្រព្យ​សម្បត្តិ​ក្នុងរោងចក្រប៉ុណ្ណោះ។

អ្នកស្រី សុផា បញ្ជាក់ថា៖ «ប្ដឹងឱ្យរកថៅកែរោងចក្រឃែនធើរេនមកដោះស្រាយ​ទូទាត់​សំណង​​តាមផ្លូវច្បាប់ជូនពួកខ្ញុំ  និងបិទជួលឬដូរអគារទាំងដីសូមបណ្ដោះអាសន្ន​ក្នុង​ករណី​ដែរយើងកំពុងមានវិវាទ។ ចៅក្រមគេឱ្យយើងរឹបអូសតែបណ្ដោះអាសន្ននូវអីវ៉ាន់ខាងក្នុង។  តែពួកខ្ញុំអត់សុខចិត្ត ព្រោះអីវ៉ាន់ខាងក្នុងអគាររបស់អេតចាយ សាខាមួយទៀត​វារើទៅ​អស់​ហើយ ម៉ាស៊ីនទំនើបៗគេយកទៅសាខាមួយទៀតអស់ហើយ»

អ្នកស្រី សុផា បានបន្ថែមទៀតថា ក្រុមកម្មករកំពុងត្រៀមឯកសារប្ដឹង​តុលាការទាមទារយកពីរ​ចំណុចផងដែរ៕

636 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម