UPDATES:
ម៉ោង ៩:០៥ យប់៖ គិតត្រឹមម៉ោង ៦:០០ ល្ងាច ថ្ងៃទី១៣ ខែធ្នូ គ្រួសារសរុបចំនួន ១១២ ៦៤៨គ្រួសារ ដែលតំណាងឱ្យមនុស្ស ៣៧៩ ០៤៧នាក់ ត្រូវបានភៀសសឹកទៅកាន់ចំនួនប្រាំពីរ រួមមាន ខេត្តព្រះវិហារ ឧត្តរមានជ័យ បន្ទាយមានជ័យ បាត់ដំបន់ ពោធិ៍សាត់ កោះកុង និងសៀមរាប។ នេះបើយោងតាមក្រសួងមហាផ្ទៃ។ ក្នុ្ងងចំណោមជនសឹកទាំងនោះ មានជិត៧៧ភាគរយ គឺជាស្ត្រី និងកុមារ។
ម៉ោង ៦:១៧ ល្ងាច៖ បន្ទាប់ពីការអំពាវនាវឱ្យមានបទឈប់បាញ់ដោយប្រធានអាស៊ាន និងសហរដ្ឋអាមេរិក នាយករដ្ឋមន្ត្រីថៃ លោក អនុទីន ឆានវីរៈគុល បានប្រកាសនៅរសៀលថ្ងៃសៅរ៍ថា ប្រទេសថៃ «លែងស្តាប់អ្នកណាទៀតហើយ»។
លោកបានសួរថាតើប្រទេសថៃនឹងមានពេលវេលាដើម្បីការពារអធិបតេយ្យភាពរបស់ខ្លួន និងការពារសុវត្ថិភាពពលរដ្ឋដែរឬទេ ប្រសិនបើប្រទេសថៃបន្តស្តាប់ភាគីខាងក្រៅ។
ម៉ោង ៥:២៧ ល្ងាច៖ ក្រសួងការពារជាតិបានបញ្ជាក់ថា នៅម៉ោង ៤:១០ រសៀល កងកម្លាំងយោធាថៃបានប្រើប្រាស់យន្តហោះចម្បាំង F-16 មួយគ្រឿង ដើម្បីទម្លាក់គ្រាប់បែកចំនួនពីរគ្រាប់ ទៅលើតំបន់ភ្នំខ្នែងពោធិ៍ ឃុំស្លក្រាម ស្រុកស្វាយចេក ខេត្តបន្ទាយមានជ័យ។
ម៉ោង ៥:២៥ ល្ងាច៖ រដ្ឋមន្ត្រីក្រសួងការពារជាតិថៃ បានថ្លែងថា រដ្ឋាភិបាលរបស់លោកមិនទាន់បានចេញបទបញ្ជាឈប់បាញ់ដល់យោធារបស់ខ្លួននៅឡើយទេ ហើយបានបញ្ជាក់ថា នឹងគ្មានការឈប់បាញ់ណាមួយនឹងកើតឡើងទេ រហូតដល់កម្ពុជាបញ្ចប់សកម្មភាពអរិភាពរបស់ខ្លួនយ៉ាងច្បាស់លាស់។ លោកបានថ្លែងបែបនេះ ទោះបីជាប្រធានអាស៊ាន លោក អាន់វ៉ា អ៊ីប្រាហ៊ីម បានជំរុញឱ្យកម្ពុជា និងថៃ អនុវត្តបទឈប់បាញ់នៅម៉ោង ១០:០០ យប់ថ្ងៃនេះ ក្នុងអំឡុងពេលនៃការហៅទូរសព្ទរបស់លោកជាមួយមេដឹកនាំទាំងពីរក៏ដោយ។
ម៉ោង ៤:៥២ រសៀល៖ ស្ពានមេទឹក ដែលត្រូវបានគេស្គាល់ផងដែរថាជាស្ពានជ័យជម្នះ ក្នុងស្រុកថ្មដា ខេត្តពោធិ៍សាត់ ឥឡូវនេះត្រូវបានបំផ្លាញទាំងស្រុង បន្ទាប់ពីត្រូវបានទម្លាក់គ្រាប់បែកជាបន្តបន្ទាប់ដោយយន្តហោះចម្បាំង F-16 របស់ថៃ នៅរសៀលថ្ងៃទី១៣ ខែធ្នូ ឆ្នាំ២០២៥ បន្ទាប់ពីការវាយប្រហារកាលពីព្រឹកមិញជាច្រើនដងហើយ។ នេះបើយោងតាមលោក នេត្រ ភក្ត្រា រដ្ឋមន្ត្រីក្រសួងព័ត៌មាន។
ម៉ោង ៤:២៥ រសៀល៖ ក្រសួងការពារជាតិបានបញ្ជាក់ថា ចន្លោះពីម៉ោង ៣:៣០ រសៀល ដល់ម៉ោង ៣:៤៤ រសៀល ថ្ងៃទី១៣ ខែធ្នូ យន្តហោះចម្បាំង F-16 របស់ថៃបានទម្លាក់គ្រាប់បែកលើស្ពានមេទឹក ដែលត្រូវបានគេស្គាល់ផងដែរថា ជាស្ពានជ័យជម្នះ ក្នុងស្រុកថ្មដា ខេត្តពោធិ៍សាត់ ចំនួនបួនដង។
ម៉ោង ៣:៥៥ រសៀល៖ ដើម្បីឆ្លើយតបទៅនឹងនាយករដ្ឋមន្ត្រីម៉ាឡេស៊ី និងជាប្រធានអាស៊ាន លោក អាន់វ៉ា អ៊ីប្រាហ៊ីម កម្ពុជាបានស្វាគមន៍ និងគាំទ្រគំនិតផ្តួចផ្តើមរបស់លោកសម្រាប់បទឈប់បាញ់នៅវេលាម៉ោង ១០:០០ យប់នេះ ដែលនឹងត្រូវបានត្រួតពិនិត្យដោយក្រុមអ្នកសង្កេតការណ៍អាស៊ាន (AOT) ដោយមានការចូលរួមពីសហរដ្ឋអាមេរិក។ នេះបើយោងតាមការលើកឡើងរបស់នាយករដ្ឋមន្ត្រី ហ៊ុន ម៉ាណែត។
ម៉ោង ៣:២០ រសៀល៖ បន្ទាប់ពីកិច្ចពិភាក្សាជាមួយប្រធានាធិបតីអាមេរិក ដូណាល់ ត្រាំ ប្រធានអាស៊ាន លោក អាន់វ៉ា អ៊ីប្រាហ៊ីម បានធ្វើការហៅទូរសព្ទដាច់ដោយឡែកជាមួយនាយករដ្ឋមន្ត្រី ហ៊ុន ម៉ាណែត និងនាយករដ្ឋមន្ត្រីថៃ អនុទីន ឆានវីរៈគុល ដោយជំរុញឱ្យប្រទេសទាំងពីរអនុវត្តបទឈប់បាញ់ដែលមានប្រសិទ្ធភាពចាប់ពីម៉ោង ១០:០០ យប់ថ្ងៃទី១៣ ខែធ្នូ ឆ្នាំ២០២៥។
ដើម្បីគាំទ្រដល់ការបន្ធូរបន្ថយភាពតានតឹង និងលើកកម្ពស់តម្លាភាព លោកក៏បានស្នើសុំការដាក់ពង្រាយក្រុមអ្នកសង្កេតការណ៍អាស៊ាន (AOT) ដែលដឹកនាំដោយអគ្គមេបញ្ជាការកងកម្លាំងការពារជាតិម៉ាឡេស៊ី ដើម្បីតាមដានការវិវឌ្ឍនៅនឹងកន្លែង។ បេសកកម្មនេះនឹងត្រូវបានបំពេញបន្ថែមដោយសមត្ថភាពត្រួតពិនិត្យផ្កាយរណបដែលផ្តល់ដោយរដ្ឋាភិបាលសហរដ្ឋអាមេរិក ដោយចាប់ផ្តើមក្នុងពេលតែមួយ។
លោកបានមានប្រសាសន៍ថា៖ «ការរកឃើញពីការតាមដានផ្កាយរណប និងការសង្កេតនៅនឹងកន្លែងនឹងត្រូវបានចងក្រងដោយ AOT ហើយបង្ហាញនៅក្នុងកិច្ចប្រជុំរដ្ឋមន្ត្រីការបរទេសអាស៊ាននៅថ្ងៃទី១៦ ខែធ្នូ»។ លោកបានបន្ថែមទៀតថា៖ «របាយការណ៍នេះនឹងផ្តល់នូវការពន្យល់អំពីស្ថានភាពជាក់ស្តែង រួមទាំងជំហររបស់ភាគីទាំងពីរក្នុងផលប្រយោជន៍នៃការទទួលខុសត្រូវ ការកសាងទំនុកចិត្ត និងការរក្សាសន្តិភាព និងស្ថិរភាពនៅក្នុងតំបន់»។
ម៉ោង ២:៥០ រសៀល៖ ប្រធានព្រឹទ្ធសភា លោក ហ៊ុន សែន បានថ្កោលទោសការបាញ់ប្រហាររបស់ថៃ ដោយលើកឡើងថា កងទ័ពថៃបានវាយប្រហារ និងសម្លាប់ប្រជាជនដោយគ្មានរើសមុខ ខណៈដែលកាំភ្លើងធំ និងយន្តហោះបានបំផ្លាញស្ពាន ផ្លូវថ្នល់ សាលារៀន និងវត្តអារាម។ លោកក៏បានអះអាងផងដែរថា ផ្សែងពុលគ្រាប់បែកចង្កោមត្រូវបានប្រើប្រាស់ជាច្រើនកន្លែងរាប់ទាំងកន្លែងដែលមានពលរដ្ឋថៃរស់នៅ និងធ្វើការនៅក្នុងទឹកដីកម្ពុជាផងដែរ។
លោកបានស្នើឱ្យផ្អាកការធ្វើដំណើរឆ្លងកាត់ព្រំដែនទាំងអស់សម្រាប់ប្រជាជនកម្ពុជា និងថៃ រហូតដល់បទឈប់បាញ់ត្រូវបានអនុវត្តយ៉ាងពេញលេញ។ លោកបានបន្តថា ពលរដ្ឋកម្ពុជាដែលកំពុងស្ថិតក្នុងប្រទេសថៃត្រូវបន្តរស់នៅនិងធ្វើការនៅក្នុងប្រទេសថៃ និងពលរដ្ឋថៃដែលកំពុងរស់នៅនិងធ្វើការនៅកម្ពុជាត្រូវបន្តស្ថិតនៅកម្ពុជារហូតបទឈប់បាញ់ត្រូវបានអនុវត្តពេញលេញ។
លោកបានមានប្រសាសន៍ថា៖ «វិធានការនេះគឺដើម្បីធានាសុវត្ថិភាពប្រជាជនកម្ពុជានិងប្រជាជនថៃកុំឲ្យមានគ្រោះថ្នាក់ពេលធ្វើដំណើរ ពិសេសពេលធ្វើដំណើរឆ្លងកាត់ព្រំដែន»។ លោកបានបន្តថា «សូមរាជរដ្ឋាភិបាលកម្ពុជាជួយការពារសុវត្ថិភាពប្រជាជនថៃដែលកំពុងរស់នៅកម្ពុជាកុំឲ្យពួកគេរងគ្រោះដោយសារគ្រាប់កាំភ្លើងឬគ្រាប់បែកឬផ្សែងពុលរបស់ថៃ»៕
ម៉ោង ២:២5 រសៀល៖ ក្រសួងការពារជាតិបានរាយការណ៍ពីការវិវត្តជាបន្តបន្ទាប់តាមបណ្តោយព្រំដែនកម្ពុជា-ថៃ។
- ម៉ោង ៦:៥០ ព្រឹក៖ យោធាថៃបានបាញ់ផ្លោងតំបន់អូរស្មាច់ដោយកាំភ្លើងធំធុនធ្ងន់។
- ម៉ោង ៧:៤០ ព្រឹក៖ ការបាញ់ផ្លោងកាំភ្លើងធំធុនធ្ងន់នៅជិតប្រាសាទតាក្របី។
- ម៉ោង ៨:៣១ ព្រឹក៖ កងកម្លាំងថៃបានរុលទៅមុខជាមួយរថក្រោះ និងបានបាញ់ប្រហារយ៉ាងខ្លាំង ដោយកំណត់គោលដៅនៅតំបន់ភ្នំខ្មោច ចំការកៅស៊ូ បុស្បូវ-ជាំតែ និងផ្ទះតាម៉ុក។
- ម៉ោង ៩:០៥ ព្រឹក៖ កងកម្លាំងយោធាថៃបានប្រើប្រាស់យន្តហោះគ្មានមនុស្សបើកដើម្បីទម្លាក់គ្រាប់បែកនៅតំបន់ជប់គគីរ។
ម៉ោង ២:១០ រសៀល៖ ក្រសួងការពារជាតិបានរាយការណ៍ពីការវិវត្តជាបន្តបន្ទាប់តាមបណ្តោយព្រំដែនកម្ពុជា-ថៃ។
- ម៉ោង ៨:០៥ ព្រឹក៖ កងកម្លាំងថ្មើរជើងថៃ ដោយមានការគាំទ្រពីរថក្រោះ បានរុលចូលទៅក្នុងតំបន់ភូមិព្រៃចាន់។
- ម៉ោង ៨:៤៧ ព្រឹក ដល់ម៉ោង ១១:៥៣ ព្រឹក កងកម្លាំងយោធាថៃបានបន្តបាញ់ផ្លោងចូលទៅក្នុងភូមិព្រៃចាន់។
ម៉ោង ១២:៤០ រសៀល៖ កងទ័ពជើងទឹកភូមិន្ទថៃបានទទួលស្គាល់ថា ខ្លួនបានបើកការវាយប្រហារលើកោះយ៉រក្នុងខេត្តកោះកុងនៅថ្ងៃទី១៣ ខែធ្នូ ដោយបញ្ជាក់ថា តំបន់នោះមានទីតាំងកាំភ្លើងធំទំហំ ១៣០មីលីម៉ែត្រចំនួនពីរកន្លែង ដែលបង្កការគំរាមកំហែងដល់កងកម្លាំងជើងទឹកថៃដែលកំពុងប្រតិបត្តិការនៅក្បែរនោះ។
ជាលទ្ធផល យោធាថៃបានធ្វើប្រតិបត្តិការមួយដើម្បីកំណត់គោលដៅ និងបំផ្លាញទីតាំងនានានៅលើកោះយ៉រ។ កងទ័ពជើងទឹកបានបន្តថា កងកម្លាំងរបស់ខ្លួននឹងចូលមកដល់នៅថ្ងៃនេះ ដើម្បីធ្វើការវាយតម្លៃការខូចខាត។
ម៉ោង ១២:២៥ រសៀល៖ ក្រសួងសាធារណការ និងដឹកជញ្ជូន បានត្រៀមខ្លួនរួចរាល់ហើយ ដើម្បីជួសជុលស្ពានជ័យជម្នះ (ដែលត្រូវបានគេស្គាល់ផងដែរថាជាស្ពានមេទឹក) នៅក្នុងខេត្តពោធិ៍សាត់ ដែលត្រូវបានខូចខាតដោយការវាយប្រហារដោយយន្តហោះ F-16 ពីកងទ័ពថៃនៅព្រឹកព្រលឹមថ្ងៃទី១៣ ខែធ្នូ។ ក្រសួងកំពុងរង់ចាំការអនុញ្ញាតពីជួរមុខ ដើម្បីវាយតម្លៃការខូចខាត និងចាប់ផ្តើមជួសជុល។ ពួកគេនឹងផ្តល់ព័ត៌មានទាក់ទងនឹងការបើកស្ពានឡើងវិញសម្រាប់ចរាចរ នៅពេលដែលវារួចរាល់។
ម៉ោង ១១:១៥ ព្រឹក៖ ក្រសួងការបរទេសឥណ្ឌាបានលើកឡើងថា វាជារឿង «គួរឱ្យសោកស្ដាយ» និងជាបញ្ហាគួរឲ្យព្រួយបារម្ភ ដែលកន្លែងអភិរក្ស និងកិច្ចខិតខំប្រឹងប្រែងជួសជុលឡើងវិញនៅតំបន់បេតិកភណ្ឌពិភពលោករបស់អង្គការយូណេស្កូ គឺប្រាសាទព្រះវិហារ ដែលជាកិច្ចសហប្រតិបត្តិការរវាងកម្ពុជា និងឥណ្ឌា ត្រូវបានខូចខាតក្នុងអំឡុងពេលនៃការប៉ះទង្គិចគ្នាតាមព្រំដែនដែលកំពុងបន្ត។
ក្រសួងការបរទេសឥណ្ឌាបានបញ្ជាក់ថា៖ «ឥណ្ឌាបានចូលរួមយ៉ាងជិតស្និទ្ធក្នុងការអភិរក្សរបស់ខ្លួន។ យើងសង្ឃឹមយ៉ាងមុតមាំថា វិធានការទាំងអស់នឹងត្រូវធ្វើឡើងដើម្បីការពារទីតាំង និងកន្លែងអភិរក្សដែលពាក់ព័ន្ធឱ្យបានពេញលេញ»។
ក្រសួងបានបន្តទៀតថា៖ «យើងសូមបញ្ជាក់ជាថ្មីនូវការអំពាវនាវរបស់យើងចំពោះភាគីទាំងពីរ ឱ្យមានការអត់ធ្មត់ និងចាត់វិធានការដើម្បីបញ្ឈប់អរិភាព និងទប់ស្កាត់ការកើនឡើងបន្ថែមទៀត។ យើងជំរុញពួកគេឲ្យវិលត្រឡប់ទៅរកមាគ៌ានៃការសន្ទនា និងសន្តិភាពវិញ»។
ម៉ោង ១០:១៥ ព្រឹក៖ បន្ទាប់ពីការសន្ទនាជាមួយប្រធានាធិបតីអាមេរិក ដូណាល់ ត្រាំ លោកនាយករដ្ឋមន្ត្រីបានលើកឡើងថា ការទម្លាក់គ្រាប់បែកតាមដងផ្លូវដែលបានសម្លាប់ និងរបួសទាហានថៃជាច្រើននាក់គឺជាឧបទ្ទវហេតុមួយ។ នាយករដ្ឋមន្ត្រីថៃ អនុទីន ឆានវីរៈគុល បានសរសេរនៅក្នុងហ្វេសប៊ុកថា ការប៉ះទង្គិចគ្នាទាំងនេះ «ពិតជាមិនមែន» ជាលទ្ធផលនៃឧបទ្ទវហេតុតាមដងផ្លូវនោះទេ។ លោកបានបន្ថែមថា ប្រទេសថៃនឹងបន្តប្រតិបត្តិការយោធារហូតដល់ប្រទេសនេះលែងយល់ឃើញពីការគំរាមកំហែងដល់ទឹកដី ឬប្រជាជនរបស់ខ្លួនតទៀត។
លោកបានបន្ថែមថា៖ «ខ្ញុំចង់បញ្ជាក់ឱ្យច្បាស់។ សកម្មភាពរបស់យើងនៅព្រឹកនេះបានបង្ហាញរួចហើយ»។
ម៉ោង ៩:៥០ ព្រឹក៖ អ្នកនាំពាក្យក្រសួងការពារជាតិ លោកស្រី ម៉ាលី សុជាតា បានថ្លែងក្នុងសន្និសីទសារព័ត៌មានថា ការបាញ់ប្រហារតាមបណ្តោយព្រំដែនកម្ពុជា-ថៃ កំពុងបន្តរហូតដល់ម៉ោង ៨:០០ ព្រឹក ថ្ងៃទី១៣ ខែធ្នូ។
លោកស្រីបានរាយការណ៍ថា នៅម៉ោង ២:៣០ ព្រឹក កងទ័ពជើងទឹកថៃបានបើកការបាញ់ប្រហារពីនាវាកងទ័ពជើងទឹកមួយគ្រឿង ដោយបាញ់គ្រាប់កាំភ្លើងធំចំនួន ២០គ្រាប់ចូលទៅក្នុងខេត្តកោះកុង។ ទោះជាយ៉ាងណាក៏ដោយ នៅម៉ោង ៨:០០ ព្រឹក ស្ថានភាពនៅខេត្តកោះកុងបានស្ងប់ស្ងាត់ទៅវិញ។
របាយការណ៍អំពីហេតុការណ៍បន្ថែមទៀតនៅតាមទីតាំងជាច្រើន៖
ម៉ោង ៨:០០ ព្រឹក៖ យោធាថៃបានបើកការបាញ់ប្រហារម្តងទៀតនៅភូមិព្រៃចាន់។
ម៉ោង ១:៣៤ ព្រឹក៖ យោធាថៃបានបើកការបាញ់ប្រហារលើភូមិជោគជ័យ។
ម៉ោង ១:៤៥ ព្រឹក៖ យោធាថៃបានបើកការបាញ់ប្រហារលើភូមិព្រៃចាន់។
ម៉ោង ២:៥៦ ព្រឹក៖ យោធាថៃបានបាញ់គ្រាប់កាំភ្លើងធំចំនួនពីរគ្រាប់ចូលទៅក្នុងថ្មដា។
ម៉ោង ៥:៤៥ ព្រឹក៖ យោធាថៃបានប្រើប្រាស់គ្រាប់កាំភ្លើងធំ និងគ្រាប់បែកចង្កោមនៅជិតតំបន់ប្រាសាទព្រះវិហារ។
ម៉ោង ៥:៥០ ព្រឹក៖ យោធាថៃបានបាញ់ប្រហារ និងបំផ្លាញអគារសណ្ឋាគារមួយនៅថ្មដា។
ម៉ោង ៥:៥៥ ព្រឹក៖ ការវាយប្រហារលើកទីពីរបានវាយប្រហារអគារសណ្ឋាគារដដែលនៅថ្មដា។
ម៉ោង ៥:៥៦ ព្រឹក៖ យោធាថៃបានដាក់ពង្រាយយន្តហោះចម្បាំង F-16 ដោយទម្លាក់គ្រាប់បែកចំនួនប្រាំពីរគ្រាប់ទៅលើថ្មដា។
ម៉ោង ៦:០២ ព្រឹក៖ ការទម្លាក់គ្រាប់បែកបានបំផ្លាញស្ពានជ័យជម្នះ។
ម៉ោង ៦:០៦ ព្រឹក៖ ការវាយប្រហារលើកទីពីរបានវាយប្រហារស្ពានជ័យជម្នះ។
ម៉ោង ៦:១២ ព្រឹក៖ យោធាថៃបានទម្លាក់គ្រាប់បែកលើស្ពានជ័យជម្នះចាស់។
ម៉ោង ៦:៣៥ ព្រឹក៖ យោថាថៃបានបើកការបាញ់ប្រហារម្តងទៀតនៅភូមិជោគជ័យ។
ម៉ោង ៧:០៦ ព្រឹក៖ យោធាថៃបានបើកការបាញ់ប្រហារលើភូមិព្រៃចាន់ និងភូមិជោគជ័យ។
កងទ័ពថៃបានបន្តបាញ់ចូលទៅក្នុងទឹកដីកម្ពុជានៅព្រឹកថ្ងៃសៅរ៍ ដោយពង្រីកដល់កោះយ៉រ ក្នុងខេត្តកោះកុង និងបង្ខំឱ្យប្រជាពលរដ្ឋរត់គេចខ្លួនទៅកាន់ក្រុងខេមរភូមិន្ទនៅម៉ោងប្រហែល ២:៣០ ព្រឹក នេះបើយោងតាមក្រសួងការពារជាតិ និងអភិបាលខេត្តកោះកុង។ ការរាលដាលនេះបានកើតឡើងត្រឹមតែប៉ុន្មានម៉ោង បន្ទាប់ពីប្រធានាធិបតីអាមេរិក ដូណាល់ ត្រាំ បានថ្លែងថា លោកទទួលបានកិច្ចព្រមព្រៀងពីភាគីទាំងពីរ ដើម្បីវិលត្រឡប់ទៅរកបទឈប់បាញ់វិញ។
វីដេអូដែលបានផ្សាយនៅលើប្រព័ន្ធផ្សព្វផ្សាយសង្គមបង្ហាញពីប្រជាពលរដ្ឋខេត្តកោះកុងរាប់សិបនាក់កំពុងជម្លៀសចេញនៅព្រឹកព្រលឹម ខណៈដែលសំឡេងកាំភ្លើងត្រូវបានឮនៅក្បែរនោះ។ ក្រសួងបានបញ្ជាក់ថា នៅម៉ោងប្រហែល ៣:០០ ព្រឹក ថ្ងៃទី១៣ ខែធ្នូ កងកម្លាំងថៃបានដាក់ពង្រាយយន្តហោះចម្បាំង F-16 ចំនួនពីរគ្រឿង និងទម្លាក់គ្រាប់បែកចំនួនប្រាំពីរគ្រាប់លើគោលដៅជាច្រើននៅថ្មដា រួមទាំងអគារសណ្ឋាគារ និងស្ពានជ័យជំនះ។ ការទម្លាក់គ្រាប់បែកដោយយន្តហោះយោធាមិនបានឈប់នៅពេលសារព័ត៌មានបានផ្សាយនោះទេ។
ការវាយប្រហារឡើងវិញបានកើតឡើងប្រហែលពីរម៉ោង បន្ទាប់ពីលោក Trump បានប្រកាសថាលោកបានថ្លែងជាមួយនាយករដ្ឋមន្ត្រី ហ៊ុន ម៉ាណែត និងនាយករដ្ឋមន្ត្រីថៃ អនុទីន ឆានវីរៈគុល ដោយអះអាងថា ភាគីទាំងពីរបានយល់ព្រម «បញ្ឈប់ការបាញ់ប្រហារទាំងអស់នៅល្ងាចនេះ» ហើយត្រឡប់ទៅរក «កិច្ចព្រមព្រៀងសន្តិភាព» ដែលលោកបានលើកឡើងថា ត្រូវបានសម្របសម្រួលជាមួយនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម។
លោកបានមានប្រសាសន៍ថា៖ «ប្រទេសទាំងពីរបានត្រៀមខ្លួនរួចជាស្រេចសម្រាប់សន្តិភាព និងការបន្តធ្វើពាណិជ្ជកម្មជាមួយសហរដ្ឋអាមេរិក»។ លោកបន្តថា៖ «វាជាកិត្តិយសរបស់ខ្ញុំក្នុងការធ្វើការជាមួយអនុទីន និងលោក ហ៊ុន ក្នុងការដោះស្រាយអ្វីដែលអាចវិវត្តទៅជាសង្គ្រាមដ៏ធំមួយរវាងប្រទេសពីរដ៏អស្ចារ្យ និងរីកចម្រើន!»។
ក្រោយមក លោក ហ៊ុន ម៉ាណែត បានបង្ហោះនៅលើហ្វេសប៊ុកដោយថ្លែងអំណរគុណដល់លោក Trump និងលោក អាន់វ៉ា ចំពោះកិច្ចខិតខំប្រឹងប្រែងរបស់ពួកគេ និងបានបញ្ជាក់ជាថ្មីនូវការប្តេជ្ញាចិត្តរបស់កម្ពុជាក្នុងការដោះស្រាយជម្លោះដោយសន្តិវិធីក្រោមសេចក្តីប្រកាសរួមទីក្រុងគូឡាឡាំពួ។ លោកបានស្នើឱ្យទីភ្នាក់ងារសហរដ្ឋអាមេរិក និងម៉ាឡេស៊ីប្រើប្រាស់រូបភាពផ្កាយរណបចាប់ពីថ្ងៃនៃការប៉ះទង្គិចគ្នាលើកដំបូង និង ២៤ ម៉ោងបន្ទាប់ ដើម្បីកំណត់ថាភាគីណាបានបើកការបាញ់ប្រហារមុនគេ ដោយនិយាយថា កម្ពុជាត្រៀមខ្លួនរួចជាស្រេចដើម្បីសហការយ៉ាងពេញលេញ។
លោកបានមានប្រសាសន៍ថា៖ «វិធីសាស្រ្តនេះអាចជាវិធីសាស្ត្រងាយស្រួល និងមានតម្លាភាពបំផុត ក្នុងការផ្ទៀងផ្ទាត់ហេតុការណ៍នេះ។ កម្ពុជាត្រៀមខ្លួនសហការ ក្នុងករណីមានតម្រូវការ»។
ទន្ទឹមនឹងនេះ ប្រទេសថៃបានប្រាប់លោក Trump ថា ប្រទេសកម្ពុជាទទួលខុសត្រូវចំពោះការកើតឡើងនៃអំពើហិង្សានេះ ដោយទទូចថាសកម្មភាពរបស់ខ្លួនគឺជាការការពារខ្លួន។ រដ្ឋាភិបាលថៃបានលើកឡើងថា លោក Trump បានទទួលស្គាល់ជំហររបស់ពួកគេ និងបានបើកបណ្តាញទំនាក់ទំនងដោយផ្ទាល់ជាមួយសមភាគីអាមេរិក។
ទីក្រុងបាងកកបានអះអាងថា បទឈប់បាញ់ណាមួយត្រូវតែចាប់ផ្តើមដោយកម្ពុជាដកកងកម្លាំង និងដោះមីនដែលត្រូវបានគេចោទប្រកាន់ថាបានដាក់នៅតាមព្រំដែន។
ការប៉ះទង្គិចគ្នាឡើងវិញរវាងកម្ពុជា និងថៃបានចូលដល់ថ្ងៃទីប្រាំពីរ ដោយបានធ្វើឱ្យជនស៊ីវិលយ៉ាងហោចណាស់ ១១នាក់ស្លាប់ ៥៩នាក់រងរបួស និង ៩៨ ៥៩៨គ្រួសារ ស្មើនឹង ៣៣១ ១៥៨ នាក់ ត្រូវបានភៀសសឹកគិតត្រឹមថ្ងៃទី១២ ខែធ្នូ៕
ប្រែសម្រួលពីអត្ថបទភាសាអង់គ្លេស៖ Clashes Expand to Koh Kong While Thai Jets Continue to Strike After Ceasefire Talks
