សមាគមសម្ព័ន្ធអ្នកសារព័ត៌មានកម្ពុជា

កសិករដាំពោតតាមព្រំដែនខេត្តបាត់ដំបងស្នើឱ្យមន្រ្តីក្រសួងសាធារណការឈប់ដាក់ជញ្ជីងចល័តនៅក្បែរកន្លែងប្រមូលកសិផល

អ្នកស្រី ឈួយ សារឿង កសិកររស់នៅស្រុកភ្នំព្រឹក ជាម្ចាស់ចំការពោតមួយកន្លែងកំពុងប្រមូលពោតដាក់ការ៉ុង។ រូបថតថ្ងៃទី៦ ខែកក្កដា ឆ្នាំ២០២២។ ខេមបូចា/ សុខ សាវី
អ្នកស្រី ឈួយ សារឿង កសិកររស់នៅស្រុកភ្នំព្រឹក ជាម្ចាស់ចំការពោតមួយកន្លែងកំពុងប្រមូលពោតដាក់ការ៉ុង។ រូបថតថ្ងៃទី៦ ខែកក្កដា ឆ្នាំ២០២២។ ខេមបូចា/ សុខ សាវី

ក្រុមកសិករដាំពោត និងឈ្មួញកណ្តាលនៅតាមស្រុកជាប់ព្រំដែនខេត្តបាត់ដំបងបានប្រតិកម្ម នឹងក្រុមមន្រ្តីជញ្ជីងចល័តរបស់ក្រសួងសាធារណការ និងដឹកជញ្ជូនដែលមកដាក់​ផាក​ពិន័យ​រថយន្តដឹកពោតលើសទម្ងន់ចំពេលដែលពួកគាត់ប្រមូលនិងទិញកសិផលដែលពួក​គាត់អះ​អាងថា វានាំឱ្យប៉ះពាល់ដល់ការលក់ដូរនិងតម្លៃកសិផលរបស់ពួកគាត់។

ការប្រតិកម្មរបស់ប្រជាពលរដ្ឋនិងឈ្មួញកណ្តាលនេះ ខណៈដែលមន្រ្តីជញ្ជីងចល័តរបស់​ក្រសួងសាធារណការនឹងដឹកជញ្ជូន បានបោះទីតាំងផាកពិន័យលើផ្លូវជាតិលេខ៥៩ ក្នុង​មូលដ្ឋាន​ស្រុក​ភ្នំព្រឹកដោយបានឃាត់និងផាកពិន័យលើរថយន្តសណ្តោងដឹកពោតរបស់ឈ្មួញ​ថៃ​បី​គ្រឿង​ដែលដឹកលើសទម្ងន់ឆ្លងកាត់កំណាត់ផ្លូវនេះ បម្រុងចូលទៅទឹកដីថៃកាលពីថ្ងៃទី៥ ខែកក្កដា ឆ្នាំ២០២២ ។

អ្នកស្រី ឈួយ សាវឿង អាយុ៣២ឆ្នាំ រស់នៅស្រុកភ្នំព្រឹកដែលកំពុងប្រមូលផលពោតបានឱ្យដឹងថាតម្លៃពោតធ្លាក់ថ្លៃជាច្រើនថ្ងៃហើយ ក្រោយពីក្រុមជញ្ជីងចល័តចាប់រថយន្ត ថៃដឹកពោតលើសទម្ងន់ គឺធ្លាក់ពីរមួយគីឡូ ៦,១បាត មកត្រឹម៥,៥ បាតប៉ុណ្ណោះ ។

អ្នកស្រី សារឿង ប្រាប់ថា៖ «បន្ទាប់ពីចាប់រថយន្តថៃដឹកលើទម្ងន់មកខាងឡានថៃគេមិនចូល មកដឹកទៀត ធ្វើឲ្យ[ម្ចាស់ឃ្លាំង]ផ្អាកទិញមួយថ្ងៃ តែថ្ងៃនេះគេបើកទិញវិញ តែទិញ​តម្លៃ​ថោក»

កសិករខាងលើឱ្យដឹងថា បើតម្លៃធ្លាក់ថ្លៃដូច្នេះ គាត់ប្រាកដជាខាតដើមហើយ ព្រោះចំណាយ លើថ្លៃ ជួលដីគេ ថ្លៃពូជ ថ្លៃជី ដែលសុទ្ធតែឡើងថ្លៃគ្រប់មុខ ។ សារឿងបន្តថា គាត់ចំណាយ​ដើមសរុបប្រមាណ២០០០ដុល្លារហើយ នេះមិនទាន់គិតថ្លៃឈ្នួលកម្លាំងពលកម្មកាច់ពោត​នៅឡើយទេ ខណៈ ដែលគាត់ប្រមូល ផលពោតបាន ពាក់កណ្តាល ហើយលក់ទើបតែ​បាន​ជាង៣ម៉ឺនបាត ដែលមិនទាន់ បានមួយពាន់ដុល្លារផងនោះ ។

អ្នកស្រី សារឿង បន្ថែមថា៖ «ខ្ញុំឆ្នាំនេះទិញពូជដាំពីថៃប៉ះចំពូជមិនសូវល្អផង ហើយថ្លៃដើម​ឡើងថ្លៃគ្រប់មុខ បើបន្តធ្លាក់ថ្លៃប្រកដជាខាតច្រើនហើយ។ ខ្ញុំសំណូមពរឱ្យអាជ្ញាធរ​ជួយសម្រួលដោះស្រាយធ្វើយ៉ាង ណា ឱ្យតម្លៃកសិផលបានថ្លៃវិញផង»

លោក ភត្រា អាយុ៣៣ឆ្នាំ ជាកសិករដាំពោត៥ហិកតានៅភូមិនិងឃុំពេជ្រចិន្តា ស្រុកភ្នំព្រឹក​ដែរនោះបាននិយាយថា មន្រ្តីចុះមកដាក់ជញ្ជីងផាកពិន័យចំពេលដែលកសិករ​ប្រមូលផល​នេះ វាធ្វើអោយតម្លៃកសិផលធ្លាក់ថ្លៃខ្លាំង។ លោកបន្ថែមថា ឈ្មួញថៃ គេលែងហ៊ានយករថយន្ត​របស់គេចូលមកដឹកកសិផលទៀតហើយ វាធ្វើឱ្យឈ្មួញកណ្តាលដែលចាំ​ទិញ​ពោត​ស្តុកលក់​ឱ្យថៃធ្លាក់ថ្លៃពី៦បាតមកជាង៥បាត ។

លោក ភក្តា បានបញ្ជាក់ថា៖ «ឆ្នាំនេះថ្លៃសាំង ថ្លៃម៉ាស៊ូត ថ្លៃពូជជី សុទ្ធតែឡើងថ្លៃ ហើយដំបូង​ពោតគេទិញថ្លៃគួរសម្យ តែឥឡូវធ្លាក់ថ្លៃហើយ ពោតយើងវាទុំដល់ពេលប្រមូលផល បើមិន​ប្រមូលលក់វាខូច ទោះបីថោករឺថ្លៃក៏ដោយ»។  លោក​ ភក្រ្តា បន្ថែមថា៖ «ខ្ញុំសំណូមពរ​ដល់​រាជរដ្ឋាភិបាលជួយមើលកសិករតាមព្រំដែនផង សូមជួយបន្ធូរបន្ថយយ៉ាងណា​ដើម្បីឱ្យ​កសិផល​​ឡើងថ្លៃវិញ»

លោក ជូ ង៉ា ជាកម្មករទម្លាក់ពោតក្នុងឃ្លាំងមួយក្នុងស្រុកភ្នំព្រឹកក្នុងចំណោមកម្មករជាច្រើន​ទៀត បាននិយាយថា រាល់ថ្ងៃពួកគាត់៨នាក់ធ្លាប់ទម្លាក់ពោតពីឡានបាន១០០ទៅ២០០តោន​ដែរ បានកម្រៃចែកគ្នា៤ទៅ៥ម៉ឺនរៀលក្នុងម្នាក់។ លោក ង៉ា ត្អូញត្អែរថា ថ្ងៃនេះ[០៦កក្កដា២២]​ស្ងាត់ឈឹងមិនទាន់បានពោតទម្លាក់មួយតោននោះទេ ។

លោក ង៉ា បានឱ្យដឹងថា៖ ​«​ជញ្ជីងគេចុះមកចាប់ទៅ ឡានថៃគេអត់ចូលមកទិញ ចឹងខ្ញុំ​អត់​មានអីទម្លាក់ទេ ស្ងាត់ឈឹង នាំគ្នាអង្គុយលែងមើលមុខគ្នា។ ខ្ញុំចង់ឱ្យ​ឡានថៃចូលដឹកវិញ តម្លៃពោតឡើងថ្លៃវិញ ខ្ញុំកម្មករក៏មានការងារធ្វើដែរ»

ម្ចាស់ឃ្លាំងធំមួយនៅស្រុកភ្នំព្រឹកឈ្មោះ ប៉ែន គឹមលី  បាននិយាយថា ចាប់តាំងពីក្រុម​ជញ្ជីង​ចល័ត​ចុះមកចាប់រថយន្តថៃបីគ្រឿង ហើយពិន័យអស់មួយគ្រឿង១៥លានរៀល និងពីរគ្រឿង​ទៀតអស់មួយគ្រឿង១២លានរៀលមក ខាងឈ្មួញថៃគេលែងឱ្យរថយន្ត​គេចូលមក​ដឹកទៀត​ហើយ ព្រោះគេខាត។ ម្ចាស់ឃ្លាំងបន្ថែមថា ឈ្មួញថៃគេបង់ក្បាលឡានឱ្យ​ភាស៊ីថៃ​អស់ជាង​មួយ​ម៉ឺនបាតនិងភាស៊ីខ្មែរប៉ុន្មានម៉ឺនរៀលទៀត ក្នុងមួយក្បាលឡានទើបអាចចូលដឹក​ក្នុង​ទឹកដី​កម្ពុជាបាន ដូច្នេះដើម្បីចំណេញគេត្រូវដឹកដាក់ឱ្យពេញ៥០តោនរឺ៥៥តោនអី ទើប​រត់រួច។

ម្ចាស់ឃ្លាំង គឹមលី ថ្លែងថា៖ ​«បច្ចុបប្បន្ននេះមានតែឈ្មួញថៃទេ គេមកទិញ បើថៃមិនចូល​ទិញ​តើលក់ឱ្យនរណាឥឡូវនេះ? យើងដឹកចូលស៊ីភីនៅអូរអិលនៅច្រកព្រំអី គេអត់ទាន់បើក​ទិញ​ទេ ងាប់ប្រជាជនអស់ហើយ! ជួយអោយលឺដល់សម្តេចផង!»។ ម្ចាស់ឃ្លាំងបន្តថា៖ «គេយក​ជញ្ជីង​មកដាក់ពេលណាមិនដាក់ មកដាក់ក្នុងខែកាច់ពោត  គេថាដឹកលើសនាំអោយខូចផ្លូវ តែរថយន្តថៃវាចូលដឹកចម្ងាយ១គីឡូ ពីរគីឡូទេ វាមិនខូចផ្លូវអីទេ»

លោក គឹមលី បន្តទៀតថា បច្ចុប្បន្ននេះដោយសារអាណិតកសិករ ដូច្នេះគាត់នៅតែប្រមូល​ទិញ​ពោតស្តុកបន្តទៀត ព្រោះពោតកសិករទុំដល់ពេលប្រមូលផលហើយ ដើម្បីពួកគាត់លក់ បានលុយទៅបង់ធនាគារ ចំណាយលើជី ពូជ និងប្រញ៉ាប់ធ្វើដីដាំបន្តទៀត ។

លោក​ គឹមលី បន្ថែមថា៖ «​ឆ្នាំនេះពោតបានថ្លៃល្អផង មុនដំបូងពោតស្នូលមួយគីឡូ​ទិញ៦បាត​៣កាក់ ពោតកិនគ្រាប់បាន៧បាតពីរកាក់  តែក្រោយពីគេដាក់ជញ្ជីងចាប់ពោតធ្លាក់ថ្លៃ ត្រឹម​៥បាតកន្លះដល់៥បាត៨កាក់តាមសំណើមប៉ុណ្ណោះ»

សកម្មភាពកិនគ្រាប់ពោតដោយម៉ាស៊ីននៅឃ្លាំងរបស់លោក ប៉ែន គឹមលី នៅស្រុកភ្នំព្រឹក ខេត្តបាត់ដំបង។ រូបថតថ្ងៃទី៦ ខែកក្កដា ឆ្នាំ២០២២។ ខេមបូចា/ សុខសាវី

លោក នូវ រិទ្ធី អភិបាលស្រុកភ្នំព្រឹក បានឱ្យដឹងថា ជញ្ជីងចល័តនេះគេដាក់តាមបណ្តា​ស្រុក​នៅ​ជាប់ព្រំដែនខេត្តបាត់ដំបងនេះ គេបានដាក់នៅស្រុកកំរៀង ស្រុកសំពៅលូន តែទើប​មាន​ប្រតិកម្មពីកសិករដាំពោតនៅស្រុកភ្នំព្រឹកនេះ។ លោកបញ្ជាក់ថា អាជ្ញាធរមិនបានដឹងថា​ក្រុម​ជញ្ជីងចល័តនោះមកពីខាងណានោះទេ គ្រាន់តែដឹងថាខាងក្រសួងជំនាញ។

លោក រិទ្ធី មានប្រសាសន៍ថា៖​ «ខ្ញុំអោយនាយករដ្ឋបាលឆែកមើលលិខិត អត់ឃើញមាន​លិខិត​អោយអាជ្ញាធរសហការទេ ហើយសួរព័ត៌មានពីសមត្ថកិច្ចប៉ូលិសអីអត់មានដូចគ្នាដែរ។ ការចុះ​មកនេះអាជ្ញាធរក្តាប់អត់បានទេ អញ្ចឹងពលរដ្ឋគាត់មិនដឹងខាងណា គាត់មានតែមក​រកអាជ្ញាធរ​ហ្នឹងឯងជួយដោះស្រាយ»

លោក រិទ្ធីបន្តថា ក្នុងនាមអាជ្ញាធរ លោកបានយកសំណូមពររបស់កសិករដែលស្នើទៅ​ឱ្យ​មន្រ្តី​ជំនាញដែលចុះទៅដាក់ជញ្ជីងផាកពិន័យនេះ ទីមួយគឺដើមរដូវប្រមូលផលនេះគាត់​ចង់ឱ្យ​មាន​ការ​បន្ធូរបន្ថយ បើចុះមកចាប់ដូច្នេះធ្វើឱ្យ​ឈ្មួញថៃលែងហ៊ាន​យករថយន្ត​ចូលមក​ដឹក និងទីពីរ ការដាក់ជញ្ជឹងនេះធ្វើអោយតម្លៃពោត ធ្លាក់ថ្លៃច្រើនពីរថ្ងៃមកនេះ។ លោកបញ្ជាក់​ថា អាជ្ញាធរ​នៅរង់ចាំចម្លើយពីខាងមន្រ្តីជំនាញពីការសំណូមពររបស់ពលរដ្ឋនេះ ហើយខាង​អាជ្ញាធ​រ​ចង់​បាន​ដំណោះស្រាយឈ្នះៗទាំងអស់គ្នាប៉ុណ្ណោះ ។

លោក នូវ រិទ្ធី បន្ថែមថា៖​ ​«គេចុះមកដាក់ជញ្ជីងកំណត់ការដឹកលើសទម្ងន់នេះវាត្រឹមត្រូវហើយ តែ​កសិករ​នៅតំបន់ព្រំដែននេះគាត់ពឹងទាំងស្រុងលើកសិកម្ម ពិសេសពោតនិងដំឡូងហ្នឹងឯង ដល់ពេលប្រមូលផលគាត់មានបញ្ហារឿងតម្លៃដូច្នេះ វាមិនមែនជិះឥទ្ធិពលលើមន្រ្តីជំនាញ រឺ នរណាម្នាក់នោះទេ វាជះឥទ្ធិលរួមគ្នា»

លោកអភិបាលស្រុកភ្នំព្រឹកបានបន្ថែមថា បច្ចុប្បន្ននេះស្រុកភ្នំព្រឹកទើបតែប្រមូលផលពោត​ដើម​រដូវប៉ុណ្ណោះ ដែលមានប្រហែល៣ពាន់ហិកតា និងមានពោតត្រូវប្រមូលផលខែបន្ទាប់​រាប់ពាន់ហិកតាទៀតតាមរដូវរបស់វាដែលពលរដ្ឋគាត់ដាំបន្តបន្ទាប់គ្នា ។

ទាក់ទងប្រតិកម្មខាងលើនេះ ខេមបូចា មិនអាចទំនាក់ទំនង ក្រុមមន្រ្តីជញ្ជីងចល័ត​ខាង​លើបាននៅឡើយទេ។ តែទោះបីយ៉ាងណា លោក ហេង ប៊ុនលី ប្រធានការិយាល័យដឹក​ជញ្ជូន​នៃមន្ទីរសាធារណការនិងដឹកជញ្ជូនខេត្តបាត់ដំបង បានឱ្យដឹងថា ក្រុមជញ្ជីងចល័ត​របស់ក្រសួងសាធារណការមានសិទ្ធិចុះត្រួតពិនិត្យលើផ្លូវថ្នល់តាមបណ្តាស្រុកនានាទូទាំង​រាជធានីខេត្តក្នុងប្រទេសកម្ពុជា ។

លោក ប៊ុនលី បញ្ជាក់ថា បច្ចុប្បន្ននេះខាងជញ្ជីងចល័តក្រសួងបានចុះមកត្រួតពិនិត្យ​រថយន្ត​ដឹក​​លើស​ទម្ងន់ទូទៅ នៅបណ្តាស្រុកជាប់ព្រំដែន ខេត្តបាត់ដំបង ដោយសហការ​ជាមួយ​ក្រុម​ស្ថាននីយ​ជញ្ជីងខេត្តបាត់ដំបង និង ជំនាញអធិការស្រុកនៅមូលដ្ឋាន។ លោកឱ្យដឹងថា ការ​ចុះ​ត្រួត​ពិនិត្យនេះ​ បានរកឃើញរថយន្តថៃបីគ្រឿង ដឹកជញ្ជូនកសិផលលើសទម្ងន់ដែលដឹក​ឆ្លងកាត់​ផ្លូវស្រុកភ្នំព្រឹកចូលទៅប្រទេសថៃតាមច្រកតំបន់អូររំដួល។

លោក ប៊ុនលី លើកឡើងថា៖ «រថយន្តថៃបីគ្រឿងនេះ ដឹកលើសទម្ងន់កម្រិតធ្ងន់ធ្ងរ ដែលដឹក​ដល់៧៥តោន ៧៨តោន នឹង៩០តោន តាមច្បាប់ឱ្យដឹកតែ៤០តោនទេ ចំពោះរថយន្តភ្លៅ៥ (វ៉េអង) គឺត្រូវផាកពិន័យ១តោន៣០ម៉ឺនរៀល»។ លោក ប៊ុនលី បន្ថែមថា៖ «ម្ចាស់រថយន្ត​ទាំងបី​គ្រឿងយល់ព្រមទទួលកំហុស ហើយយល់ព្រមតាមការផាកពិន័យតាមច្បាប់ និងធ្វើ​កិច្ចសន្យា​ឈប់ដឹកលើសទម្ងន់តទៅទៀត  បើនៅដឹកលើសទម្ងន់ទៀត គេសុខចិត្តឱ្យ​មន្រ្តីជំនាញ​ធ្វើការ​ផាកពិន័យនិងអនុវត្តតាមច្បាប់ជាធរមានមិនលើកលែងឡើយ»

ចំពោះការប្រតិកម្មរបស់ប្រជាពលរដ្ឋនិងឈ្មួញកណ្តាល លោក ប៊ុនលី បានឆ្លើយតបថា ការផាកពិន័យលើរថយន្តដឹកលើសទម្ងន់វាមិនប៉ះពាល់ដល់តម្លៃទីផ្សារនោះទេ ព្រោះតម្លៃ​ទីផ្សារ វាស្ថិតលើឈ្មួញ និងកសិករ ដែលជាម្ចាស់កសិផលប៉ុណ្ណោះ។ លោកបន្តថា ពលរដ្ឋ​និងឈ្មួញកណ្តាល គាត់មិនយល់ច្បាស់ពីច្បាប់កំណត់ស្តីពីផ្លូវថ្នល់នៅស្រុកខ្មែរ គឺកំណត់​ឱ្យ​ដឹកត្រឹមតែ៤០តោនប៉ុណ្ណោះ  ហើយច្បាប់នៅប្រទេសថៃក៏គេកំណត់ដូចគ្នាដែរ គេក៏មិន​អនុញ្ញាតឲ្យដឹករហូតដល់៧០តោន ៨០តោន និង៩០តោនដែរ ។

លោក ប៊ុនលី បានបញ្ជាក់ថា «​ពួកគាត់យកហេតុផលដទៃមកទម្លាក់កំហុសលើក្រសួងយើង ហើយ​ថា​ធ្វើបាបប្រជាពលរដ្ឋអី! វាមិនត្រឹមត្រូវទេកន្លែងហ្នឹង! ប្រហែលជាគាត់​មិនទាន់​យល់​ច្បាស់​ការ​ដឹកជញ្ជូនហ្នឹងវាបានបំផ្លាញផ្លូវថ្នល់ ហើយការកសាងផ្លូវនីមួយៗ​គឺចំណាយ​លុយ​ច្រើន​​ណាស់»

លោកបន្ថែមដោយលើកឧទាហរណ៍ថា៖ «យើងអនុគ្រោះឱ្យគាត់ហ្នឹងមួយ វាមិនមែន​បំផ្លាញ​ផ្លូវថ្នល់ត្រង់តែកំណាត់ផ្លូវស្រុកភ្នំព្រឹកមួយនោះទេ បើបើកឱ្យគាត់ដឹកចូលតាម​ច្រកហ្នឹងបាន គាត់ដឹកតាំងពីខេត្តណាខេត្តណីមក សម្រុកមកផ្លូវហ្នឹង វាបំផ្លាញផ្លូវរាប់រយ​គីឡូម៉ែត្រ»

197 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម