មេដឹកនាំសហជីពមួយចំនួនបន្តជាប់បណ្តឹងនៅតុលាការ

មេដឹកនាំសហជីពលោក ប៉ាវ ស៊ីណា ថ្លែងទៅកាន់អ្នកសារព័ត៌មាននៅខាងក្រៅសាលាដំបូងរាជធានីភ្នំពេញ។ រូបថតកាលពីថ្ងៃទី២១ ខែមេសា ឆ្នាំ២០១៦។ ខេមបូចា/បញ្ញា ឆព័ណ្ណ
មេដឹកនាំសហជីពលោក ប៉ាវ ស៊ីណា ថ្លែងទៅកាន់អ្នកសារព័ត៌មាននៅខាងក្រៅសាលាដំបូងរាជធានីភ្នំពេញ។ រូបថតកាលពីថ្ងៃទី២១ ខែមេសា ឆ្នាំ២០១៦។ ខេមបូចា/បញ្ញា ឆព័ណ្ណ

មេដឹកនាំ​សហជីព​មួយ​ចំនួន​បាន​ត្អូញត្អែរ​ពី​ការ​បន្ត​ជាប់​បណ្តឹង​ផ្លូវច្បាប់ ទោះ​បី​ជា​មាន​បទបញ្ជាពី​លោក​នាយករដ្ឋមន្រ្តី​ ហ៊ុន សែន​ ឲ្យ​មាន​ការ​ជំនុំជម្រះ​ក្នុង​សវនាការ ឬ​ទម្លាក់​បទចោទប្រកាន់​នាពេលកន្លងមកក៏ដោយ។

កាល​ពី​សប្តាហ៍​មុន ក្រសួង​ការងារ​បាន​បញ្ជូន​លិខិត​មួយ​ទៅ​កាន់​សហជីព​និង​សហព័ន្ធ​កម្មករ​ចំនួន​ ១៨ ដោយ​ស្នើ​ឲ្យ​ពួកគេ​បញ្ជូន​របាយការណ៍​ពាក់ព័ន្ធ​នឹង​បច្ចុប្បន្នភាព​ករណី​ផ្លូវច្បាប់​ប្រឆាំង​នឹង​មន្រ្តី​សហជីព​មួយ​ចំនួន។ លិខិត​នោះ​បាន​សំដៅ​ទៅ​ករណី​បណ្តឹង​រដ្ឋប្បវេណី និង​ព្រហ្មទណ្ឌ​ចំនួន៩៩ ប្រឆាំង​នឹង​មេដឹកនាំ​សហជីព​នានា ដែល​ករណី​មួយ​ចំនួន​ត្រូវ​បាន​រាយការណ៍​ថា ​ត្រូវ​បាន​ដោះស្រាយ​រួចរាល់​ហើយ។ ​

កាល​ពី​ខែ​វិច្ឆិកា ឆ្នាំ​២០១៨ លោក​នាយករដ្ឋមន្រ្តី​ ហ៊ុន សែន បាន​ថ្លែង​ជា​សាធារណៈ​ថា រឿងក្តី​ផ្លូវ​ច្បាប់​ប្រឆាំង​នឹង​មេដឹកនាំ​សហជីព​ត្រូវ​តែ​បញ្ជូន​ទៅ​សវនាការ​ជា​បន្ទាន់ ឬ​បទចោទប្រកាន់​ផ្សេងៗ​ត្រូវ​តែ​ទម្លាក់​ចោល។ ការ​លើកឡើង​ដូចនេះ​ពី​សំណាក់​​លោក​នាយករដ្ឋមន្រ្តី​ត្រូវ​បាន​ធ្វើឡើង​ បន្ទាប់​ពី​មេដឹកនាំ​សហជីព​មួយ​ចំនួន​បាន​និយាយ​ជា​ចំហ​អំពី​នីតិវិធី​ផ្លូវ​ច្បាប់​អូស​បន្លាយ​ពេល​យូរ​ដែល​បាន​ប៉ះពាល់​ការងារ​របស់​ពួកគេ។

មេដឹកនាំ​មន្រ្តី​សហជីព​ឯករាជ្យ​ចំនួន​ ១៨ រួម​មាន​ លោក ជា មុន្នី លោក​ អាត ធន់ លោក​ស្រី យ៉ាង សុភ័ណ្ឌ និង​លោក ប៉ាវ ស៊ីណា ត្រូវ​បាន​ម្ចាស់​រោងចក្រ និង​មន្រ្តី​រដ្ឋាភិបាល​ប្តឹង ដោយ​ចោទប្រកាន់​ពី​បទ​ញុះញង់ និង​មាន​ចេតនា​បង្ក​ការ​ខូចខាត​អំឡុងពេល​កូដកម្ម​ទូទាំង​ប្រទេស​ពាក់ព័ន្ធ​នឹង​ប្រាក់ឈ្នួល​អប្បបរមា​កាល​ពី​ឆ្នាំ២០១៣ និងឆ្នាំ​២០១៧។

លោក​ អាត ធន់ ប្រធាន​សហភាព​ការងារ​កម្ពុជា បាន​និយាយ​ថា លោក​កំពុង​តែ​ពិនិត្យ​រឿងក្តី​ផ្លូវ​ច្បាប់​ដែល​បាន​ចែង​នៅ​ក្នុង​លិខិត​ខាង​លើ ហើយ​នឹង​បញ្ជូន​របាយការណ៍​បច្ចុប្បន្ន​ភាពទៅ​កាន់​ក្រសួង​ការងារ​ពាក់ព័ន្ធ​នឹង​រឿងក្តី​ទាំង​នោះ​កាន់​តែ​ឆាប់​តាម​តែ​អាច​ធ្វើ​ទៅ​បាន។

​លោក​បាន​ថ្លែង​ថា៖ «បណ្តឹង​ព្រហ្មទណ្ឌ​ ១៤​ ក្នុង​ចំណោម​ ៥៨ ត្រូវ​បាន​ទម្លាក់​បទ​ចោទប្រកាន់ ហើយ​បណ្តឹង​រដ្ឋប្បវេណី​ចំនួន ៤១​ករណី​នៅ​មិន​ទាន់​ដោះស្រាយ​នៅ​ឡើយ»។

លោក​អាត ធន់​បាន​ថ្លែង​ប្រាប់ ខេមបូចា ថាមេដឹកនាំ​សហជីព​ដែល​ធ្វើការ​តាម​រោងចក្រ​កាត់ដេរ​នានា​ ត្រូវ​បន្ត​ប្រឈម​នឹង​ការ​ធ្វើ​ទុក្ខបុកម្នេញ​កាល​ពី​ប៉ុន្មាន​ឆ្នាំ​មក​នេះ ​រួម​មាន​ការ​រើសអើង​នៅ​កន្លែង​ធ្វើការ ហើយ​ពេលខ្លះ​ត្រូវ​បណ្តេញ​ចេញ​ពី​ការងារ​ដោយសារ​សកម្មភាព​សហជីព​របស់​ពួកគេ។ ​

​លោក​ប៉ាវ ស៊ីណា ប្រធាន​សម្ព័ន្ធ​សហជីព​ចលនាកម្មករ​កម្ពុជា បាន​និយាយ​ថា លោក​មាន​ការ​ភ្ញាក់ផ្អើល​នៅ​ពេល​ឃើញ​បណ្តឹង​តាំង​ពី​ឆ្នាំ២០១៣ នៅ​ក្នុង​លិខិត​ខាង​លើ ដែល​បាន​ចោទប្រកាន់​រូប​លោក​ពី​បទ​​ចេតនា​បង្ក​ការ​ខូចខាត​ទ្រព្យសម្បត្តិ​ ជាមួយ​នឹង​អតីត​មេដឹកនាំ​បក្ស​ប្រឆាំង​លោក​ សម រង្ស៊ី។ បទ​ចោទប្រកាន់​នេះ​ត្រូវ​បាន​ធ្វើ​ឡើង​ដោយ​ម្ចាស់​រោងចក្រ​កាត់ដេរ​ម៉េតហាតធេន។

​លោក​បាន​ថ្លែង​ថា៖ «ខ្ញុំ​មិនដែល​បាន​ដឹង​ពី​បណ្តឹង​នោះ​ទេ ពីព្រោះ​ចាប់តាំង​ពី​ឆ្នាំ​២០១៣​មក ខ្ញុំ​មិន​ធ្លាប់​បាន​ទទួល​ដីកា​តុលាការ​ពាក់ព័ន្ធ​នឹង​រឿងក្តី​នេះ​នោះ​ទេ»។

អ្នកនាំពាក្យ​រោងចក្រ​ខាង​លើ​នេះ​មិន​អាច​ទាក់ទង​សុំ​ការ​អត្ថាធិប្បាយ​បាន​នោះ​ទេ។​

លោក​ស៊ីណា​បាន​ថ្លែង​ប្រាប់​ ខេមបូចា ថាលោក​ទទួល​បាន​ពាក្យ​បណ្តឹង​ចំនួន​ប្រាំពីរ ឬ​ប្រាំបី​ប្រឆាំង​នឹង​រូបលោក​ និង​សហការី បន្ទាប់​ពី​មាន​ការ​អំពាវនាវ​ពី​សំណាក់​លោក​នាយករដ្ឋមន្រ្តី​ឲ្យ​មាន​ការ​ដោះស្រាយ​ករណី​ប្តឹងផ្តល់​ទាំង​នេះ​កាល​ពី​ឆ្នាំ​២០១៨។ ករណី​ភាគច្រើន​គឺ​ជាប់ពាក់ព័ន្ធ​នឹង​បទចោទប្រកាន់​ញុះញង់ រួម​មាន​ បទ​ញុះញង់​ឲ្យ​ប្រពឹត្ត​អំពើហិង្សា និង​​ចេតនា​បង្ក​ឲ្យ​ការ​ខូចខាត​ទ្រព្យ​សម្បត្តិ។ លោក​បាន​បន្ត​ថា នៅ​ក្នុង​ករណី​ប្តឹង​មួយ​ចំនួន​ដែល​បាន​ចែង​ក្នុង​លិខិត លោក​ត្រូវ​បាន​កាត់​ទោស​កំបាំងមុខ​រួច​ទៅ​ហើយ ឬ​បទចោទប្រកាន់​ត្រូវ​បាន​ទម្លាក់។ គ្រប់​ទោសទណ្ឌ​ប្រឆាំង​នឹង​រូប​លោក​ត្រូវ​បាន​ព្យួរ។

លោក ​ប៉ាវ ស៊ីណា បាន​បដិសេធ​បទចោទប្រកាន់​ដែល​ធ្វើឡើង​ពី​សំណាក់​ម្ចាស់​រោងចក្រម៉េតហាតធេន ដោយ​និយាយ​ថា លោក​មិនមាន​ការ​ពាក់ព័ន្ធ​ជាមួយ​នឹង​អតីត​មេដឹកនាំ​បក្ស​ប្រឆាំង​លោក​ សម រង្ស៊ី​នោះ​ទេ។

លោក​បាន​និយាយ​ថា៖ «នេះ​ជា​ករណី​ថ្មី​សម្រាប់​ខ្ញុំ​ ដែល​ខ្ញុំ​មិន​ធ្លាប់​បាន​ឮ​ពី​មុន​មក​នោះ​ទេ។ ខ្ញុំ​មាន​ការ​ភ្ញាក់ផ្អើល​នៅ​ពេល​ដែល​ពួកគេ [ក្រសួង​ការងារ] និយាយ​ថា [ពួកគេ​នឹង​កំណត់​] ថា​តើ​នឹង​បញ្ចប់​រឿងក្តី​នោះ​ឬ​ទេ… ពីព្រោះ​ខ្ញុំ​ព្រួយបារម្ភ​ថា តុលាការ​នឹង​ធ្វើ​សវនាការ និង​ដាក់​ទោស​ខ្ញុំ»។ លោក​បាន​បន្ត​ថា លោក​មិន​ដឹង​ថា ហេតុអ្វី​បាន​ជា​លិខិត​នោះ​ត្រូវ​បាន​បញ្ជូន​មក​មេដឹកនាំ​សហជីព​នា​ពេល​ឥឡូវ​នេះ​នោះ​ទេ។

អ្នកនាំពាក្យ​ក្រសួង​ការងារ​លោក​ ហេង សួរ មិន​អាច​ទាក់ទង​សុំ​យោបល់​បាន​នោះ​ទេ។

លោក​ ឌិន ពុទ្ធី ប្រធាន​សមាគម​ពង្រឹង​សេដ្ឋកិច្ច​ក្រៅ​ប្រព័ន្ធ​កម្ពុជា ដែល​ស្ថិត​នៅ​ក្នុង​ចំណោម​ក្រុម​បុគ្គល​ស្នើ​ឲ្យ​បញ្ជូន​របាយការណ៍​បច្ចុប្បន្ន​ភាព​ទៅ​កាន់​ក្រសួង​ការងារ​ បាន​បង្ហាញ​ក្តី​អស់សង្ឃឹម​ដែល​​លោក​នៅ​បន្ត​ជាប់​បណ្តឹង​តុលាការ។

លោក​បាន​ថ្លែង​ថា៖ «យើង​​មាន​ការ​ព្រួយបារម្ភ​ ពីព្រោះ​ប្រសិន​បើ​យើង​ត្រូវ​បាន​រក​ឃើញ​ថា មាន​ទោស ឬ​មាន​កំណត់ត្រា​បទ​ព្រហ្មទណ្ឌ​ យើង​មិន​អាច​កាន់​តំណែង​នៅ​ក្នុង​សមាគម​ ដើម្បី​ជួយ​ប្រជាជន​ និង​សង្គម​បាន​ទេ»។

លោក​ពុទ្ធី​បាន​និយាយ​ថា លោក​ជាប់​ក្នុង​បណ្តឹង​មួយ​នា​ពេល​បច្ចុប្បន្ន​នៅ​សាលាឧទ្ធរណ៍​ បន្ទាប់​ពី​លោក​ទទួល​បាន​ការ​ព្យួរ​ទោស​ជាប់ពន្ធនាគារ​មួយ​ឆ្នាំ​ពី​បទចោទប្រកាន់​ប្រព្រឹត្ត​អំពើ​ហិង្សា​ប្រឆាំង​នឹង​មន្រ្តី​ប៉ូលិស​ក្រុង​ប៉ោយប៉ែត ​លោក​ ឈាន ពិសិដ្ឋ កាល​ពី​ឆ្នាំ​ ២០១៦។ សាធារណជន​បាន​បង្ហាញ​ការ​មិន​ជឿ​ពាក់ព័ន្ធ​នឹង​បទចោទប្រកាន់​នេះ បន្ទាប់​ពី​មាន​វីដេអូ​ចែកចាយ​តាម​បណ្តាញ​សង្គម ដោយ​បង្ហាញ​លោក​ពិសិដ្ឋ​​ហាក់​ដូចជា​ធ្វើ​ដួល​នៅ​ខាង​មុខ​រថយន្ត​របស់​លោក​ពុទ្ធី។ ​

​លោក​ពុទ្ធី​បាន​ថ្លែង​ប្រាប់ ខេមបូចា ថាលោក​ទទួល​បាន​ការ​លើកលែង​បទចោទ​ចំពោះ​ករណី​បណ្តឹង​ចំនួន​ពីរ​កាល​ពី​ឆ្នាំ២០១៨ ដែល​កើត​ចេញ​ពី​កូដកម្ម​ដែល​លោក​បាន​ដឹកនាំ​តាម​បណ្តោយ​ព្រំដែន​កម្ពុជា​ថៃ​កាល​ពី​ឆ្នាំ​២០១៥ ពាក់ព័ន្ធ​នឹង​ពន្ធ​នាំចូល និង​ការ​បង់ប្រាក់​ឲ្យ​មន្រ្តី​ប៉ូលិស​ព្រំដែន ដែល​លោក​បាន​និយាយ​ថា បាន​ប៉ះពាល់​ដល់​ជីវភាព​របស់​កម្មករ​យ៉ាង​ខ្លាំង និង​ពី​​ការ​ធ្វើបាតុកម្ម​កាល​ពី​ឆ្នាំ​ ២០១៤ ពាក់ព័ន្ធ​នឹង​ការ​បំផ្លាញ​ផ្ទះ​ប្រជាជន​នៅ​ក្រុង​ប៉ោយប៉ែត។

លោក​ មឿន តុលា នាយក​ប្រតិបត្តិ​មជ្ឈមណ្ឌល​សម្ព័ន្ធភាព​ការងារ​និង​សិទ្ធិ​មនុស្ស (សង់ត្រាល់) បាន​និយាយ​ថា ការ​បន្ត​ធ្វើ​ទុក្ខ​បុក​ម្នេញ​មក​លើ​មេដឹកនាំ​សហជីព​អាច​ធ្វើ​ឲ្យ​ប៉ះពាល់​ដល់​សេដ្ឋកិច្ច​ជាតិ ដែល​ពឹង​ផ្អែក​យ៉ាងខ្លាំង​លើ​ផលិតកម្ម​សម្លៀកបំពាក់ និង​វាយនភណ្ឌ។

​លោក​បាន​ថ្លែង​ថា៖ «ខ្ញុំ​មាន​ការ​ព្រួយបារម្ភ​ពី​ផលប៉ះពាល់​មក​ទៅ​ទីផ្សារ​កម្ពុជា​ពាក់ព័ន្ធ​នឹង​វិស័យ​សម្លៀកបំពាក់និង​ស្បែកជើង»។  លោក​បាន​បន្ថែម​ថា សភា​អាមេរិក​កំពុង​តែ​ពិនិត្យ​ឡើងវិញ​លើ​ប្រព័ន្ធ​អនុគ្រោះពន្ធ​ GSP ដែល​មិន​យក​ពន្ធ​លើ​ទំនិញ​ពី​កម្ពុជា​ទៅ​កាន់​​ទីផ្សារសហរដ្ឋអាមេរិក។ កម្ពុជា​ត្រូវ​បង់​ពន្ធ ២០ភាគរយ​ចំពោះ​ការ​នាំចេញ​ទៅ​កាន់​សហភាព​អឺរ៉ុប​ បន្ទាប់​ពី​មាន​ការ​ដក​ដោយ​ផ្នែក​លើ​ប្រព័ន្ធ​អនុគ្រោះ​ពន្ធ​លើ​គ្រប់​ទំនិញ​លើកលែង​តែ​សព្វាវុធ។ នៅ​ពេល​សេចក្តីសម្រេច​នេះ​ត្រូវ​បាន​ប្រកាស​គណៈកម្មាការ​អឺរ៉ុប​បាន​លើកឡើង​ពី «ព្រួយបារម្ភ​ធ្ងន់ធ្ងរ​និង​ជា​ប្រព័ន្ធ​ពាក់ព័ន្ធ​នឹង​សិទ្ធិ​មនុស្ស» ជា​ហេតុផល​នៅ​ពី​ក្រោយ​ការ​ដក​ប្រព័ន្ធ​អនុគ្រោះ​ពន្ធ​ដោយ​ផ្នែក​នេះ»។

លោក អ៊ី រិន​ អ្នកនាំពាក្យ​សាលាដំបូង​រាជធានី​ភ្នំពេញ និង​មន្រ្តី​​​អ្នកនាំពាក្យ​ក្រសួង​យុត្តិធម៌​មិន​អាច​ទាក់ទង​សុំ​ការ​អត្ថាធិប្បាយ​បាន​នោះ​ទេ៕

ប្រែសម្រួលពីអត្ថបទភាសាអង់គ្លេស៖ Court cases continue to hang over union leaders’ heads

222 views
ព័ត៌មានថ្មីៗ »
អត្ថបទពេញនិយម »