សាលាឧទ្ធរណ៍កាលពីថ្ងៃព្រហស្បតិ៍បានបដិសេធសំណើសុំនៅក្រៅឃុំរបស់លោក ថាច់ សេដ្ឋា អនុប្រធានគណបក្សភ្លើងទៀន ដែលបានស្នើឲ្យដោះលែងដោយសារមានបញ្ហាជំងឺបេះដូង។
លោក សេដ្ឋា ត្រូវបានចាប់ខ្លួនកាលពីថ្ងៃទី១៦ ខែមករា ដែលតាមចោទថា បានចេញសែកស្អុយចំនួន៥សន្លឹកនៅក្នុងឆ្នាំ២០១៩ និងខកខានមិនបានបង្ហាញខ្លួនសម្រាប់ការសាកសួរនៅតុលាការក្នុងឆ្នាំ២០២១។
លោក ប្លង់ សំណាង អ្នកនាំពាក្យសាលាឧទ្ធរណ៍បានបញ្ជាក់ថា លោក ឃុន លាងម៉េង ប្រធានក្រុមប្រឹក្សាជំនុំជម្រះបានបដិសេធសំណើសុំនៅក្រៅឃុំ។
លោកបានមានប្រសាសន៍ថា៖ «សភាស៊ើបសួរសាលាឧទ្ធរណ៍បានសម្រេចតម្កល់ដីកាឃុំខ្លួនដែលបដិសេធមិនដោះលែងជនជាប់ចោទឲ្យនៅក្រៅឃុំទេ»។
លោក ប្លង់ សំណាង មានប្រសាសន៍បន្ថែមថា៖ «ហេតុផលគឺ ទី១ ដើម្បីទប់ស្កាត់កុំឲ្យមានបទល្មើសថ្មីកើតឡើង។ ទីពីរ ដើម្បីធានាថា ជនជាប់ចោទមិនដាក់សម្ពាធលើដើមបណ្តឹងរដ្ឋប្បវេណី ហើយទី៣ ដើម្បីធានាថា ជនជាប់ចោទបង្ហាញខ្លួននៅតុលាការសម្រាប់ការជំនុំជម្រះនៅពេលខាងមុខ»។
មេធាវីការពារក្តីលោក ជូង ជូងី មានប្រសាសន៍ថា លោកមានការខកចិត្តចំពោះការបដិសេធសំណើរសុំដោះលែងនៅក្រៅឃុំបណ្តោះអាសន្ន ដោយកត់សម្គាល់ថា លោក សេដ្ឋា មានបញ្ហាសុខភាពធ្ងន់ធ្ងរ ហើយលោកនិងកូនក្តីបានផ្តល់ប្រាក់ធានាច្រើនសម្រាប់ការនៅក្រៅឃុំបណ្តោះអាសន្នដល់តុលាការ។
លោកបានមានប្រសាសន៍ថា៖ «យើងបានស្នើសុំតម្កល់ប្រាក់៣ម៉ឺនដុល្លារដើម្បីធានាការនៅក្រៅឃុំរបស់គាត់ ប៉ុន្តែពួកគាត់ [តុលាការ] បានបដិសេធមិនទទួលប្រាក់និងមិនដោះលែងគាត់»។
លោក ជូង ជូងី បានមានប្រសាសន៍ថា៖ «ខ្ញុំគិតថា វាមិនត្រឹមត្រូវទេ»។
ករណីនេះកើតឡើងពីកម្ចី ១៨ ០០០ដុល្លារដែលលោក សេដ្ឋា ទទួលបានកាលពីឆ្នាំ២០១៦ ពីហាងបញ្ចាំ រិន ឆាយ ដែលលោកបានយកបណ្ណកម្មសិទ្ធិផ្ទាល់ខ្លួនរបស់លោកទៅដាក់បញ្ចាំ។
មេធាវីរបស់ហាងបញ្ចាំនេះបានអះអាងថា មូលប្បទានប័ត្រមួយចំនួនដែលលោក សេដ្ឋា បានចេញគឺមានការក្លែងបន្លំ ដោយសារតែមិនមានថវិកាគ្រប់គ្រាន់នៅក្នុងគណនីរបស់លោក ជាការអះអាងដែលក្រុមមេធាវីការពាររបស់លោក សេដ្ឋា បដិសេធ ដោយកត់សំគាល់ថា មូលប្បទានប័ត្រទាំងនោះត្រូវបានបញ្ចាំត្រឹមត្រូវ និងបានដោះស្រាយក្នុងសំណុំរឿងតុលាការមុនរួចហើយ។
លោក គឹម សួរភារិទ្ធ អ្នកនាំពាក្យគណបក្សភ្លើងទៀន មានប្រសាសន៍ថា ការបដិសេធមិនឲ្យលោក សេដ្ឋា នៅក្រៅឃុំ គឺជាហេតុផលនយោបាយ និងមានគោលបំណងបន្តឃុំខ្លួនលោក ថាច់ សេដ្ឋា នៅមុនការបោះឆ្នោតខែកក្កដា។
លោកបានមានប្រសាសន៍ថា៖ «យើងអាចនិយាយបានថា បញ្ហានេះត្រូវបានចាត់ទុកថា ជាបញ្ហានយោបាយ ព្រោះលោក ថាច់ សេដ្ឋា គឺជាថ្នាក់ដឹកនាំគណបក្សភ្លើងទៀន»។
លោក គឹម សួរភារិទ្ធ បានមានប្រសាសន៍ថា៖ «យើងខកចិត្តខ្លាំងណាស់ ហើយយើងនឹងព្យាយាមឲ្យអស់ពីសមត្ថភាព ដើម្បីធានានូវសេរីភាពរបស់គាត់ ហើយគាត់អាចចូលរួមប្រកួតក្នុងការបោះឆ្នោតបាន»។
លោកបានបន្តថា ប្រសិនបើករណីនោះគ្រាន់តែជាការទាមទារប្រាក់ តុលាការនឹងទទួលយកកិច្ចព្រមព្រៀងដែលស្នើដោយភាគីម្ខាងដើម្បីសងដើមបណ្តឹង ព្រមទាំងប្រាក់ធានានៅក្រៅឃុំចំនួន៣ម៉ឺនដុល្លារ៕
ប្រែសម្រួលពីអត្ថបទភាសាអង់គ្លេស៖ Court of Appeal Denies Thach Setha Bail Request