សាលាដំបូងរាជធានីភ្នំពេញនៅថ្ងៃអង្គារនេះ បានបន្តសវនាការលើបទចោទក្បត់ជាតិប្រឆាំងនឹងអតីតមេបក្សប្រឆាំង លោក កឹម សុខា ដោយផ្ដោតសំខាន់លើខ្សែអាត់វីដេអូខ្លីៗ ដែលខាងព្រះរាជអាជ្ញាចោទថាជាភស្តុតាងបញ្ជាក់ថាអ្នកនយោបាយមានចេតនាផ្ដួលរំលំរដ្ឋាភិបាល។
សវនាការរយៈពេលបីម៉ោងនៅថ្ងៃអង្គារនេះ តុលាការបានចាក់ខ្សែអាត់វីដេអូ ដែលថាជាភស្តុតាងបញ្ជាក់ថាលោក កឹម សុខា បានសមគំនិតជាមួយបរទេស ដើម្បីដណ្ដើមអំណាចបន្ទាប់ពីការបោះឆ្នោតឆ្នាំ២០១៣។ ខ្សែអាត់វីដេអូមួយៗមានរយៈពេលចន្លោះពីមួយទៅប្រាំនាទី អំពីលោក កឹម សុខា នៅកន្លែង និងកម្មវិធីផ្សេងៗគ្នា ដែលភាគច្រើននិយាយពីសមត្ថភាពរបស់លោកក្នុងនាមជាអ្នកនយោបាយបក្សប្រឆាំង។
ក្នុងខ្សែអាត់វីដេអូមួយថតសម្ដីរបស់ លោក កឹម សុខា និងលោក សម រង្ស៊ី ក្នុងបាតុកម្មមួយនៅទីលានប្រជាធិបតេយ្យ ដែលលោក កឹម សុខា ប្រកាសទាមទារប្រាក់ឈ្នួលគោលអប្បបរមាសម្រាប់កម្មករក្នុងខេត្តកំពង់ចាម។
តាមរយៈវីដេអូឃ្លីបថតក្នុងការប្រមូលផ្ដុំមួយនៅថ្ងៃទី២៧ ខែធ្នូ ឆ្នាំ២០១៣ នៅទីលានប្រជាធិបតេយ្យលោក កឹម សុខា ថ្លែងថា៖ «ខ្ញុំបានជួបជាមួយទូតប្រទេសមហាអំណាច…យើងមិនឯកោទេ ពួកគេគាំទ្រដល់កម្មករ[ដែល]បានចូលរួមបាតុកម្មជាមួយគណបក្សសង្គ្រោះជាតិ»។
វីដេអូឃ្លីបមួយផ្សេងទៀត ថតពីរថ្ងៃបន្ទាប់នៅទីលានប្រជាធិបតេយ្យដែរ បានបង្ហាញពីលោក សម រង្ស៊ី និយាយដល់ការប្រមូលផ្ដុំមនុស្ស ១លាននាក់នៅទីក្រុងភ្នំពេញ រួមមានទាំងកងកម្លាំងប្រដាប់អាវុធផង ក្នុងចលនាដ៏ធំមួយទាមទារឲ្យ «លោក ហ៊ុន សែន ចុះចេញពីតំណែង»។
ព្រះរាជអាជ្ញារង លោក ប្លង់ សុផល លើកឡើងក្នុងសវនាការថ្ងៃអង្គារនេះថា៖ «វីដេអូឃ្លីបបង្ហាញថាជនជាប់ចោទ កឹម សុខា បានសមគំនិតជាមួយបរទេស ដែលនេះជាសកម្មភាពគ្រោះថ្នាក់សម្រាប់ប្រទេសជាតិ»។
លោក កឹម សុខា គឺជាអតីតប្រធានអតីតគណបក្សសង្គ្រោះជាតិ ត្រូវបានចាប់ខ្លួនកាលពីថ្ងៃទី៣ ខែកញ្ញា ឆ្នាំ២០១៧ និងបានចោទប្រកាន់ថាបានសមគំនិតជាមួយប្រទេសមហាអំណាច ដែលសំដៅដល់ការធ្វើការជាមួយនឹងសហរដ្ឋអាមេរិក ថាមានគំនិតធ្វើបដិវត្តន៍ពណ៌ផ្ដួលរំលំរដ្ឋាភិបាលដឹកនាំដោយគណបក្សប្រជាជនកម្ពុជា។
លោក កឹម សុខា បានបន្តរក្សាជំហររបស់ខ្លួន ដោយថាអ្វីដែលខ្លួនធ្វើគ្រាន់តែអនុវត្តទៅតាមច្បាប់ និងមានតម្លាភាពក្នុងការដណ្ដើមជ័យជម្នះក្នុងការបោះឆ្នោត។
គណបក្សសង្គ្រោះជាតិ ត្រូវបានរំលាយនៅឆ្នាំ២០១៧ ដោយតុលាការកំពូល ព្រមទាំងមានសមាជិកគណបក្សជាច្រើនរូបទៀតត្រូវចាប់ខ្លួន ដែលគេជឿជាទូទៅថាជាបទចោទរឿងនយោបាយ។ មេដឹកនាំគណបក្សកំពូលៗបាននិរទេសខ្លួនទៅក្រៅប្រទេស ហើយមានសមាជិកជាង ១០០នាក់ត្រូវបានហាមឃាត់ធ្វើនយោបាយសម្រាប់រយៈពេលប្រាំឆ្នាំ។
សហមេធាវីការពារក្ដីឲ្យលោក កឹម សុខា គឺលោក ចាន់ ចេន មានប្រសាសន៍ថាវីដេអូឃ្លីបដែលបានចាក់ក្នុងបន្ទប់សវនាការនៅថ្ងៃអង្គារនេះ គឺធ្លាប់បានចាក់ម្តងរួចមកហើយ ចំណែកលោក កឹម សុខា ក៏បានបញ្ជាក់រួចហើយដែរ។
លោក ចាន់ ចេន មានប្រសាសន៍ថា៖ «[ពួកគាត់]គ្រាន់តែបង្ហាញពីទស្សនៈ និងអនុញ្ញាតដោយច្បាប់»។
លោក ចាន់ ចេន បានឲ្យដឹងទៀតថា លោកមានការសោកស្ដាយដែលតុលាការមិនបើកសវនាការឲ្យបានទៀងទាត់ពីថ្ងៃចន្ទ ដល់ថ្ងៃសុក្រ ដោយលោកថាកាលវិភាគសវនាការមួយសប្ដាហ៍ម្ដងមិនអាចជំរុញសវនាការទៅមុខលឿនបានទេ ហើយវាក៏ប៉ះពាល់ដល់ការងារកូនក្ដីរបស់លោកក្នុងការធ្វើកិច្ចការនយោបាយ។
ប្រធានអង្គជំនុំជម្រះ លោក កុយ សៅ បានឆ្លើយតបថា តុលាការសម្រេចតាមកាលវិភាគសវនាការរបស់ខ្លួន ព្រោះមន្ត្រីតុលាការក៏ជាប់រវល់នឹងសំណុំរឿងផ្សេងទៀត។ លោកចៅក្រមក៏បានលើកឡើងទៀតថា សំណុំរឿងក្បត់ជាតិមានភាពស្មុគស្មាញ និងពាក់ព័ន្ធនឹងសន្តិសុខជាតិ ដែលមានន័យថា វាទាមទារពេលវេលាដើម្បីដំណើរការសវនាការ។
លោក សឹង សែនករុណា មន្ត្រីស៊ើបអង្កេតជាន់ខ្ពស់របស់សមាគមសិទ្ធិមនុស្សអាដហុក ដែលបានចូលរួមក្នុងសវនាការថ្ងៃអង្គារនេះដែរនោះ មានប្រសាសន៍ថា សវនាការមិនដំណើរការទៅមុខច្រើនទេ។ លោកថា វីដេអូ ដែលចាក់ផ្សាយនៅក្នុងសវនាការ គឺធ្លាប់បានពិភាក្សាកាលសវនកាលើកមុនរួចហើយ។
លោកមានប្រសាសន៍ថា៖ «ដូចដែលយើងបានលើកឡើងហើយ បើសិនជាមិនមានដំណោះស្រាយផ្នែកនយោបាយទេ សំណុំរឿងនេះនឹងត្រូវនៅបន្តវែងឆ្ងាយទៀត»។ លោកបន្ថែមថា៖ «ទាក់ទងនឹងភស្តុតាង[វីដេអូ] វិញគឺពិបាកនឹងចោទប្រកាន់លោក កឹម សុខា ពីព្រោះវីដេអូឃ្លីបទាំងនោះ មិនបានបង្ហាញថារដ្ឋបរទេសមួយណាដែលជាប់ពាក់ព័ន្ធជាមួយលោក កឹម សុខា»។
សវនាការនឹងបន្តជាថ្មីទៀតនៅថ្ងៃទី២ ខែកុម្ភៈ ៕
ប្រែសម្រួលពីអត្ថបទភាសាអង់គ្លេស៖ Court replays video footage of Kem Sokha in treason trial
