សកម្មជនចំនួន១៤នាក់ដែលត្រូវបានចាប់ខ្លួន និងរត់គេចខ្លួនកាលពីឆ្នាំមុនពីបទរៀបចំការតវ៉ាគាំទ្រលោក រ៉ុង ឈុន មេដឹកនាំសហជីពដែលជាប់ពន្ធនាគារត្រូវបានផ្តន្ទាទោសកាលពីថ្ងៃអង្គារពីបទញុះញង់។
សាលាដំបូងរាជធានីភ្នំពេញបានសម្រេចលើកលែងការចោទប្រកាន់លើលោក ហុង លីម អតីតតំណាងរាស្រ្តរដ្ឋវិទ័ររៀ ដែលរស់នៅក្នុងប្រទេសអូស្ត្រាលី ប៉ុន្តែលោកចៅក្រម ទិត សុទ្ធី បូរ៉ាឆាត បានរកឃើញជនជាប់ចោទផ្សេងទៀតមានពិរុទ្ធភាព ហើយបានពិន័យនិងផ្តន្ទាទោសពួកគេឲ្យជាប់ពន្ធនាគារពី ២០ខែទៅ២ឆ្នាំ។
ក្រុមសកម្មជននេះ ត្រូវបានចាប់ខ្លួនកាលពីខែសីហានិងខែកញ្ញា ឆ្នាំ២០២០។ លើក លែងតែអតីតតំណាងរាស្រ្តគណបក្សសង្រ្គោះជាតិចំនួនបីរូប ដែលកំពុងនិរទេសខ្លួននៅក្រៅប្រទេសនោះ សកម្មជនដែលពាក់ព័ន្ធទាំងនេះ ត្រូវបានឃុំខ្លួននៅក្នុងពន្ធនា គារចាប់តាំងពីពួកគេត្រូវបានចាប់ខ្លួនកាលពីឆ្នាំមុន។
លោកចៅក្រម ទិត សុទ្ធី បូរ៉ាឆាត កាលពីថ្ងៃអង្គារ បានកាត់ទោសជនជាប់ចោទ១០ នាក់ឲ្យជាប់ពន្ធនាគារ២០ខែនិងបង្គាប់ឲ្យបង់ប្រាក់ពិន័យចំនួន៥០០ដុល្លារក្នុងម្នាក់ៗ។ ទោះបីជាយ៉ាងណា ដោយបានចំណាយពេលក្នុងពន្ធនាគារជាងមួយឆ្នាំរួចហើយ តុលាការបានសម្រេចព្យួរទោសនៅសល់ពី៥ខែទៅ៦ខែរបស់ជនជាប់ចោទទាំងនេះផងដែរ។
ជនជាប់ចោទទាំងនេះរួមមានសកម្មជនយុវជនប្រាំពីររូបគឺ ហ៊ុន វណ្ណៈ ឈឿន ដារ៉ាវី អេង ម៉ាឡៃ កើត សារ៉ាយ និង ថា ឡាវី ដែលមានទំនាក់ទំនងជាមួយក្រុមខ្មែរថាវរៈ ព្រមទាំងយុវជន មាន ព្រំមុន្នី និង មួង សុភ័ក្រ ដែលជាសមាជិករបស់សមាគមសម្ព័ន្ធនិស្សិតបញ្ញាវន្តខ្មែរ។
លោក គង់ សំអាន លោក ជុំ ពុទ្ធី និងលោក ឈួរ ផេង អតីតមន្ត្រីគណបក្សសង្គ្រោះជាតិក៏ត្រូវបានផ្តន្ទាទោសដូចគ្នាដែរ ហើយនឹងត្រូវព្យួរទោសរយៈពេលប៉ុន្មានខែចុងក្រោយរបស់ខ្លួនផងដែរ។
ជនជាប់ចោទ៤នាក់ទៀតគឺអតីតតំណាងរាស្ត្រគណបក្សសង្គ្រោះជាតិនិងសកម្មជនដែលកំពុងនិរទេសខ្លួនហើយដែលត្រូវបានចោទប្រកាន់ពីបទរៀបចំបាតុកម្មគាំទ្រលោក រ៉ុង ឈុន។ អ្នកទាំង៤ ត្រូវបានកាត់ទោសកំបាំងមុខ។ លោកចៅក្រម បូរ៉ាឆាត បានផ្ដន្ទាទោសធ្ងន់លើលោក ហូ វ៉ាន់ លោក អ៊ូ ច័ន្ទរិទ្ធ លោក គង់ សភា និងលោក សេង ប៊ុនរ៉ុង ដោយកាត់ឲ្យជាប់ពន្ធនាគាររយៈពេល២ឆ្នាំនិងពិន័យជាប្រាក់១.០០០ដុល្លារក្នុងម្នាក់ៗ។
តុលាការបានសម្រេចលើកលែងការចោទប្រកាន់លើជនជាប់ចោទចុងក្រោយ គឺលោក ហុង លីម អតីតសមាជិកសភា ដែលសព្វថ្ងៃរស់នៅប្រទេសអូស្ត្រាលី។
លោកចៅក្រម បូរ៉ាឆាត បាននិយាយថា អ្នកដែលត្រូវបានកាត់ទោសនិងកំពុងរស់នៅក្នុងប្រទេសកម្ពុជានឹងស្ថិតនៅក្រោមការត្រួតពិនិត្យរបស់តុលាការរយៈពេលពីរឆ្នាំ ទៀត ហើយតម្រូវឲ្យរាយការណ៍ទៅព្រះរាជអាជ្ញា ប្រសិនបើពួកគេផ្លាស់ប្តររអាសយដ្ឋាន ការងារ ឬចង់ទៅក្រៅប្រទេស។ ពួកគេក៏ត្រូវបានហាមឃាត់មិនឲ្យទាក់ទងទៅជនជាប់ចោទក្នុងសំណុំរឿងជាមួយគ្នានេះផងដែរ។
ជនជាប់ចោទមួយចំនួនក្នុងចំណោមជនជាប់ចោទទាំង១០នាក់ដែលបង្ហាញខ្លួននៅតុ លាការមានអារម្មណ៍សប្បាយរីករាយខ្លាំងដោយរំពឹងថា នឹងទទួលបានសេរីភាពឡើង វិញ។ ទោះជាយ៉ាងណា អ្នកខ្លះទៀតមិនពេញចិត្តនឹងសាលក្រមផ្តន្ទាទោសចំពោះអ្វីដែលពួកគេនិយាយថា វាគឺជាការសម្តែងមតិនោះ។
សកម្មជនយុវជន ឈឿន ដារ៉ាវី បាននិយាយបន្ទាប់ពីដើរចេញពីបន្ទប់សវនាការថា៖ « នៅតែគ្មានយុត្តិធម៌»។
លោក សំ ចំរើន មេធាវីការពារក្តីសកម្មជនយុវជនទាំង៧នាក់ក៏បានសម្តែងការខកចិត្តចំពោះសាលក្រមផ្តន្ទាទោសនេះដែរ។
លោកបានថ្លែងថា៖ «យើងមិនអាចទទួលយកការផ្តន្ទាទោសនេះបានទេព្រោះពួកគាត់បានអះអាងថាពួកគាត់គ្មានកំហុស»។ សកម្មជនទាំងនេះមិនទាន់ត្រូវបានដោះលែងនៅឡើយទេ ប៉ុន្តែអ្នកដែលអនុវត្តទោសរយៈពេល១៤ខែរំពឹងថា នឹងត្រូវបានដោះ លែងនៅប៉ុន្មានសប្តាហ៍ខាងមុខនេះ។
លោក យី សុខសាន្ត មន្ត្រីស៊ើបអង្កេតជាន់ខ្ពស់នៃសមាគមការពារសិទ្ធិមនុស្សអាដហុក ដែលបានចូលរួមតាមដាននីតិវិធីរបស់តុលាការបានថ្កោលទោសការផ្តន្ទាទោសសកម្មជនយុវជនថា ជារឿងអយុត្តិធម៌។
លោក យី សុខសាន្ត បានមានប្រសាសន៍ថា៖ «សម្រាប់ការយល់ឃើញរបស់ខ្ញុំ ពួកគាត់ក្រាន់តែអនុវត្តការសម្តែងមតិរបស់គាត់ប៉ុណ្ណោះ» ដោយលោកសរសើរការងាររបស់ក្រុមយុវជនទាំងនេះ ទាក់ទងនឹងសកម្មភាពរបស់ពួកគេជុំវិញការការពារធនធានធម្មជាតិ។
អ្នកស្រី សូ សម្បត្តិ អាយុ៤៨ឆ្នាំជាម្តាយរបស់ជនជាប់ចោទឈ្មោះ មួង សុភ័ក្រ នៅតែអះអាងថា កូនប្រុសរបស់អ្នកស្រីមិនបានប្រព្រឹត្តបទញុះញង់នោះទេ។ អ្នកស្រី សម្បត្តិ បាននិយាយថា៖ «វាមិនសមហេតុផលទេ ព្រោះកូនប្រុសខ្ញុំគ្រាន់តែអនុវត្តសិទ្ធិរបស់គាត់។ ខ្ញុំគិតថា ការផ្តន្ទាទោសនេះនឹងបំបាក់ស្មារតីរបស់ពលរដ្ឋ ដូច្នេះពួកគាត់នឹងមិនហ៊ានចូលរួម ដើម្បីប្រយោជន៍សាធារណៈទេ» ដោយបន្ថែមថា អ្នកស្រីនៅតែគាំទ្រសកម្មភាពកូនប្រុសរបស់អ្នកស្រី៕
ប្រែសម្រួលពីអត្ថបទភាសាអង់គ្លេស៖ Court sentences 14 youth activists and ex-CNRP officials of incitement
