សមាគមសម្ព័ន្ធអ្នកសារព័ត៌មានកម្ពុជា

ភ្លៀងធ្លាក់ខ្លាំងនៅដើមរដូវវស្សាបណ្តាលឲ្យជន់លិចស្រែ និងធ្វើឲ្យការដាំដុះស្រូវពន្យាពេល

ទឹកដក់ពេញស្រែបន្ទាប់ពីភ្លៀងធ្លាក់ខ្លាំង នៅក្នុងស្រុកក្រឡាញ់ ខេត្តសៀមរាប កាលពីថ្ងៃទី២១ ខែមិថុនា ឆ្នាំ២០២២។ រូបភាពផ្តល់ឲ្យ
ទឹកដក់ពេញស្រែបន្ទាប់ពីភ្លៀងធ្លាក់ខ្លាំង នៅក្នុងស្រុកក្រឡាញ់ ខេត្តសៀមរាប កាលពីថ្ងៃទី២១ ខែមិថុនា ឆ្នាំ២០២២។ រូបភាពផ្តល់ឲ្យ

លោក អ៊ុក  ឆន អាយុ ៦០ឆ្នាំ ជាកសិករនៅខេត្តសៀមរាប កំពុងប្រឈមនឹងគ្រោះមហន្តរាយក្នុងរដូវដាំដុះនេះ។  មិនត្រឹមតែទឹកជន់លិចពូជស្រូវដែលបានព្រោះហើយអស់នោះទេ ប៉ុន្តែភ្លៀងខ្លាំងធ្លាក់មកជាបន្តបន្ទាប់ និងតម្លៃជីហក់ឡើងថ្លៃខ្ពស់ រឹតតែធ្វើឱ្យលោក ឆន ប្រឈមនឹងបញ្ហាថែមទៀត។

លោក ឆន ដែលរស់នៅភូមិកំពង់ត្រយ៉ង ស្រុកពួក បានមានប្រសាសន៍ថា ភ្លៀងធ្លាក់មកលឿនដោយមិននឹកស្មានដល់នៅឆ្នាំនេះ។  លោកបន្ថែមថាដោយសារឆ្នាំមុនទិន្នផលស្រូវទទួលបានមិនគ្រប់គ្រាន់ផងនោះ ធ្វើឱ្យលោកខ្វះពូជក្នុងការសាបព្រោះ។

លោក​បាន​បន្ត​ថា​៖ «​ខ្ញុំ​មានដី​ស្រែ ៣ហិកតា ហើយ​ខ្ញុំ​បាន​​ព្រោះរួចរាល់​ហើយកាលពី​ខែ​ឧសភា ប៉ុន្តែ​វា​ខូច​អស់​ជាង​មួយ​ហិកតា​​​ដោយ​សារ​ទឹកជន់​លិច» លោកបានឱ្យដឹងថាលោកគ្មានលទ្ធភាពព្រោះម្តងទៀតទេ។

លោក​បាន​និយាយ​ថា លោក​បាន​បាច​ជី​លើ​ស្រូវ​របស់​លោករួច​ហើយ ដែល​ជីមានតម្លៃរហូត​ដល់​ទៅ ២៥០ ០០០ រៀល (ប្រហែល ៦១ ដុល្លារ) ក្នុង​មួយ​បាវ។ នៅទូទាំងពិភពលោក តម្លៃជីក៏ឡើងថ្លៃផងដែរ ដោយសារតែការដាក់ទណ្ឌកម្មលើប្រទេសរុស្ស៊ី ដែលជាប្រទេសមួយក្នុងចំណោមប្រទេសនាំចេញទំនិញដ៏ធំបំផុតរបស់ពិភពលោក។

លោក ឆន បានបន្ថែមថា ទោះបីជាកសិករធ្លាប់ជជែកជាមួយអាជ្ញាធរមូលដ្ឋានពីបញ្ហាទឹកជំនន់ដែលប៉ះពាល់ដល់ផលដំណាំរបស់ពួកគេហើយក៏ដោយ ប៉ុន្តែលោកពុំទាន់ឃើញអាជ្ញាធរចាត់វិធានការណាមួយដើម្បីជួយអ្នកភូមិនៅឡើយទេ។

ក្នុងខែនេះ ក្រសួងកសិកម្មបានព្រមានថារដូវវស្សាឆ្នាំនេះនឹងមានភ្លៀងធ្លាក់ច្រើនដែលធ្វើឱ្យប៉ះពាល់ដល់ការដាំដុះស្រូវ ជាពិសេសនៅតំបន់ទំនាបកណ្តាល ដែលកសិករបានសាបព្រោះស្រូវមុនកាលកំណត់។

លោក អែម រាត្រី កសិករ​ វ័យ ​២៦​ឆ្នាំ​ នៅ​ភូមិ​ជ្រាស់ ស្រុក​ពួក ក៏​មាន​បញ្ហា​ស្រដៀង​គ្នា​នឹង​លោក ឆន ដែរ។

លោក​បាន​ប្រាប់​ថា​៖ «​​​ឆ្នាំ​មុន មានការយឺតយ៉ាវ [នៅ​ក្នុង​ការ​ធ្វើ​ស្រែ​ចម្ការ​] ពីព្រោះ​អ្នក​ភូមិ​បាន​ព្រោះស្រូវហើយ ប៉ុន្តែគ្មាន​ភ្លៀង​ធ្លាក់​សោះ។ តែ​ឆ្នាំ​នេះលោកថាផ្ទុយស្រលះពីឆ្នាំមុនដោយសារ​មាន​ទឹក​ច្រើន ដែលធ្វើកសិករមិនអាច​សាប​ព្រោះ​បាន​»​

លោក រាត្រី បានព្រោះស្រូវក្នុងស្រែរបស់លោកកាលពីចុងខែមេសា ប៉ុន្តែវាត្រូវបានបំផ្លាញទាំងស្រុងដោយសារតែភ្លៀង។ ប៉ុន្តែលោកថាលោកនឹងព្រោះម្តងទៀត ដែលវាត្រូវចំណាយយ៉ាងច្រើន។

លោក​បាន​បន្ថែម​ថា​៖ «​វា​ក៏​ពិបាក​ដែរ ​ព្រោះ​ថ្លៃ​ជី​ខ្ពស់​ហើយ​ជួល​ត្រាក់ទ័រភ្ជួររាស់ក៏ថ្លៃ»។

កសិករម្នាក់ទៀតឈ្មោះ ភូង សិទ្ធ អាយុ ៤៣ឆ្នាំ រស់នៅស្រុកជីក្រែង ខេត្តសៀមរាប បានប្រាប់ខេមបូចាថា លោកនិងអ្នកភូមិដទៃទៀតមិនទាន់បានដាំដុះស្រូវនៅឡើយទេ ដោយសារទឹកជំនន់។

លោកបានបន្តថា៖«ខ្ញុំ​មិន​ដឹង​ថា​តើ​ខ្ញុំ​អាច​ព្រោះ​បាន​នៅ​ដើម​ខែ​កក្កដា ឬ​ចុង​ខែ​កក្កដា​នោះ​ទេ។ កាល​ពី​ឆ្នាំ​មុន​ខ្ញុំ​ធ្វើ​រួច​ហើយដល់ខែនេះនោះ»

ទឹកលិចវាលស្រែបន្ទាប់ពីភ្លៀងធ្លាក់បន្តបន្ទាប់ក្នុងខេត្តកំពង់ស្ពឺ កាលពីខែមេសា ឆ្នាំ២០២២។ ខេមបូចា

លោក ទា គឹមសុទ្ធ ប្រធានមន្ទីរកសិកម្មខេត្តសៀមរាប មានប្រសាសន៍ថា លោកបានចុះពិនិត្យទីតាំងជន់លិចរួចហើយ ដោយថាតំបន់ដែលរងផលប៉ះពាល់ខ្លាំងជាងគេ គឺ ឃុំក្តីរុន ស្រុកពួក។

លោក គឹមសុទ្ធ មានប្រសាសន៍ថា៖ «នៅក្នុងឃុំក្ដីរុន គឺលិច និងខូចខាតទាំងស្រុងអស់ប្រហែលជាង ១៣០ ហិកតាទេ។ ក្រៅពីហ្នឹង លិចហើយ ក៏ទឹកស្រកទៅវិញ ហើយកន្លែងដែលទីទួលមួយចំនួន [ស្រូវ] ក៏អាចរស់ឡើងវិញបាន។»។

ទោះយ៉ាងណាក៏ដោយ លោកថាកសិករ​នៅ​តំបន់​ខ្លះនឹងភ្ជួរហើយព្រោះម្តងទៀត។

លោក គឹមសុទ្ធ បានបន្ថែមថា៖ «មកទល់ពេលនេះ ប្រជាពលរដ្ឋប្រមាណ តែ២០% ប៉ុណ្ណោះដែលបានដាំដុះស្រូវរួចរាល់ បើធៀបនឹងឆ្នាំមុន កសិករនៅសៀមរាបនេះ ៦០% ទៅ ៧០% បានព្រោះហើយ»។

លោក​ថា ជា​រៀង​រាល់​ឆ្នាំ អាជ្ញាធរ​ជួយ​ផ្តល់​ពូជ​ស្រូវ​ដល់​កសិករ​ក្នុង​ខេត្ត ប៉ុន្តែ​ឆ្នាំ​នេះ​មាន​ភាព​យឺតយ៉ាវជាងឆ្នាំមុន។

​លោក វេ​ង សាខុន រដ្ឋមន្ត្រី​ក្រសួងកសិកម្ម​បាន​មានប្រសាសន៍ថា មានតែ​ខេត្ត​​៤​ប៉ុណ្ណោះ​ដែលបាន​បង្កបង្កើនផលលឿន​ជាង​ឆ្នាំមុន​ ដែលខេត្តទាំងនោះរួមមានរតនគិរី មណ្ឌលគិរី ក្រចេះ និង​ស្ទឹងត្រែង​។ ដោយឡែក​ខេត្ត​ជាង​២០​ផ្សេង​ទៀត ការ​ដាំដុះ​មានភាពយឺតយ៉ាវ​ព្រោះ​មិន​មាន​រដូវប្រាំង​នៅ​ឆ្នាំ​នេះ ហើយ​ទឹក​ជំនន់​បាន​ធ្វើ​ឱ្យ​កសិករ​មិន​អាច​ភ្ជួរ​រាស់​បាន។

លោក​បាន​បន្ត​ថា​៖ «​ពួកគាត់ [​កសិករ​] ប្រញាប់​ប្រញាល់​ចាប់ផ្តើម​ភ្ជួរ​រាស់និងសាបព្រោះ​ជាបន្តបន្ទាប់ហើយ​»។

លោកបានបន្ថែមថា៖ «ក្រសួងក៏បានស្នើសុំមន្ទីរកសិកម្ម រុក្ខាប្រមាញ់ និងនេសាទខេត្ត សហការជាមួយអាជ្ញាធរមូលដ្ឋាន ដើម្បីដាក់សំណើទៅគណៈកម្មការស្ដីពីការត្រៀមស្បៀងបំរុង ដែលដឹកនាំដោយក្រសួងសេដ្ឋកិច្ច និងហិរញ្ញវត្ថុ»

លោក​ក៏​បាន​ត្អូញត្អែរផងដែរពីនិតិវិធីផ្តល់ជំនួយបន្ទាន់ដល់កសិករ ព្រោះ​ពីមុន​ក្រសួង​របស់​លោក​អាច​ចែកចាយ​គ្រាប់ពូជ​ដោយ​ផ្ទាល់​ដល់​កសិករ ប៉ុន្តែ​ពេលបច្ចុប្បន្នដំណើរការនេះ​​ត្រូវ​ឆ្លងកាត់​ក្រសួង​សេដ្ឋកិច្ច និង​ហិរញ្ញវត្ថុ។

លោកបានថ្លែងថា៖ «ទោះបីជាខ្ញុំទៅដល់ទីណា ក៏ដោយខ្ញុំមិនអាចយកគ្រាប់ពូជចែកបានទេ។ វាទាមទារឱ្យពួកគាត់[កសិករ] រៀបចំសំណើទៅក្រសួងហិរញ្ញវត្ថុដើម្បីផ្តល់គ្រាប់ពូជឱ្យប្រជាជន» លោកបានបន្ថែមថាដំណើរនេះប្រហែលជាត្រូវចាយពេលវេលាខ្លះ។

ប៉ុន្តែ លោក សាន ស៊ីណា មន្ត្រីបច្ចេកទេសនៃលេខាធិការដ្ឋានគណៈកម្មាធិការគ្រប់គ្រងប្រព័ន្ធស្បៀងបម្រុងកម្ពុជា (ប.ស.ប.ក) នៃក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា ក្រសួងកំពុងដោះស្រាយបញ្ហានេះ។

លោកបានប្រាប់ថា៖ «ក្រុមការងារលេខាធិការដ្ឋានកំពុងធ្វើការយ៉ាងជិតស្និទ្ធជាមួយអាជ្ញាធរថ្នាក់ក្រោមជាតិដើម្បីពិនិត្យមើលកសិករឲ្យស្របទៅនឹងលក្ខណៈវិនិច្ឆ័យដែលមានសិទ្ធិទទួលគ្រាប់ពូជស្រូវ»។

លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា បានពន្យល់ថាបម្រែបម្រួលអាកាសធាតុជាដើមចមនៃបញ្ហាទាំងនេះ។

លោក​បាន​បន្ត​ថា៖ «ទោះ​បី​ជា​រដូវ​វស្សា​ចាប់​ផ្ដើម​នៅ​លឿននៅ​ឆ្នាំ​នេះ​ក៏​ដោយ ប៉ុន្តែ​អ្វី​ដែល​យើង​ព្រួយ​បារម្ភ​គឺ​នៅ​ចុង​ឆ្នាំ​នេះ​នឹង​មិន​មាន​ភ្លៀង​ធ្លាក់​។ ​ វានឹងបណ្តាលឱ្យការធ្វើកសិកម្មប្រជាពលរដ្ឋ​ប្រឈម​នឹង​ការ​ខ្វះ​ខាតទឹក និង​ខូច​ខាត​ដំណាំ»

លោកបានបន្ថែម​ថា វា​ពិបាក​សម្រាប់​ប្រជាជន​ក្នុង​ការ​សម្រប​ខ្លួន​ទៅនឹង​ការ​ប្រែប្រួល​អាកាសធាតុ ហើយលោក​បាន​អំពាវនាវ​ឱ្យ​រដ្ឋាភិបាល​ផ្សព្វផ្សាយការអប់រំទៅដល់ពលរដ្ឋអំ​ពីការរៀបចំ និង​ឆ្លើយតប​ទៅនឹង​វិបត្តិ​ដូចជា​គ្រោះរាំងស្ងួត និង​ទឹកជំនន់ជាដើម​។

លោកបានលើកឡើថា៖ «ក្រសួង និងអាជ្ញាធរត្រូវចាត់វិធានការដោយស្រាវជ្រាវថាតើពូជដំណាំណាដែលក្នុងរយៈពេលខ្លីអាចជួយប្រជាជនប្រមូលផលបានលឿន ហើយថាតើគ្រាប់ពូជហ្នឹងធន់នឹងអាកាសធាតុដែរឬអត់ ទើបកសិករអាចប្រើប្រាស់បាន ទោះបីជាអាកាសធាតុប្រែប្រួលក៏ដោយ»

ប្រែសម្រួលពីអត្ថបទភាសាអង់គ្លេស៖ Early rainy season, floods delay rice planting season

80 views

ព័ត៌មានថ្មី

អត្ថបទពេញនិយម