សាលាដំបូងខេត្តសៀមរាបបានផ្តន្ទាទោសកម្មករកាប់ឈើខុសច្បាប់ម្នាក់ឈ្មោះ ស៊ី លឿយ ឱ្យជាប់ពន្ធនាគាររយៈពេល១២ឆ្នាំ ពីបទបាញ់សម្លាប់អ្នកសារព័ត៌មានបរិស្ថាន គឺលោក ឈឿង ឈឹង កាលពីខែធ្នូ ឆ្នាំ២០២៤កន្លងទៅ។ សាលក្រមនេះត្រូវបានប្រកាសកាលពីថ្ងៃទី២៨ ខែឧសភា ប៉ុន្តែមិនធ្លាប់បានរាយការណ៍នៅឡើយ។
បន្ថែមលើការដាក់ពន្ធនាគារនេះ លោក លឿយ មានអាយុ ៤០ឆ្នាំ ក៏ត្រូវបានបង្គាប់ឱ្យសងសំណងការខូចខាត និងជំងឺចិត្តជាប្រាក់ចំនួន ១៣ ៥០០ដុល្លារដល់គ្រួសារជនរងគ្រោះផងដែរ។
លោក ឈឿង ឈឹង មានអាយុ ៦៣ឆ្នាំ ជាអ្នករាយការណ៍ព័ត៌មានយូរឆ្នាំនៃគេហទំព័រព័ត៌មានឌីជីថលកម្ពុជាអភិវឌ្ឍន៍ ត្រូវបានបាញ់សម្លាប់ដោយលោក លឿយ កាលពីថ្ងៃទី៤ ខែធ្នូ ខណៈពេលកំពុងស៊ើបអង្កេតបទល្មើសព្រៃឈើនៅស្រុកមួយនៅភាគខាងលិចខេត្តសៀមរាប។
លោកបានស្លាប់នៅរយៈពេលបីថ្ងៃក្រោយពីរងការបាញ់ប្រហារ។
ឃាតកបានសារភាពចំពោះការបាញ់ប្រហារនេះ ដោយប្រាប់តុលាការថា លោក ឈឹង បានទារលុយជាថ្នូរនឹងការមិនផ្សព្វផ្សាយរូបភាពដែលប៉ះពាល់ខ្លួន ឬរាយការណ៍ប្រាប់សមត្ថកិច្ច។ លោកបានអះអាងថា លោកគ្មានចេតនាសម្លាប់អ្នកសារព័ត៌មាននោះទេ នេះបើតាមច្បាប់ចម្លងនៃសាលក្រមដែលសារព័ត៌មានខេមបូចា បានឃើញ។
ករណីនេះជាការសម្លាប់អ្នកសារព័ត៌មានលើកដំបូងនៅកម្ពុជាក្នុងរយៈពេលជាងមួយទសវត្សរ៍ចុងក្រោយ។ កាលពីឆ្នាំ២០១៤ អ្នកយកព័ត៌មានស៊ើបអង្កេតលោក តាំង ទ្រី ត្រូវបានគេបាញ់សម្លាប់ នៅអំឡុងចុះប្រមូលព័ត៌មានជុំវិញករណីកាប់ឈើខុសច្បាប់។ អ្នករាយការណ៍បរិស្ថានម្នាក់ទៀតក៏ត្រូវបានសម្លាប់នៅឆ្នាំនោះដែរ។
នាយកប្រតិបត្តិអង្គការជំនួយផ្នែកច្បាប់នៃកម្ពុជា លោក រុន សារ៉ាយ ដែលផ្តល់មេធាវីសម្រាប់គ្រួសាររបស់ លោក ឈឹង បាននិយាយថា សវនាការបានចាប់ផ្តើមនៅថ្ងៃទី២២ ខែឧសភា ដោយសម្រេចបានសាលក្រមក្នុងរយៈពេល៦ថ្ងៃក្រោយមក។
ភរិយារបស់លោក ឈឹង គឺអ្នកស្រី ជៀវ ចាប ឱ្យដឹងថា ការកាត់ទោសនេះមិនបានឆ្លុះបញ្ចាំងពីការបាត់បង់ស្វាមីរបស់គាត់ទេ។
អ្នកស្រីនិយាយថា៖ «ជាប់[ពន្ធនាគារ] ១២ ឆ្នាំ វាស្រាលណាស់ វាមិនទាន់ធ្ងន់ទេ»។ អ្នកស្រីបន្តថា៖ «វានៅស្រាល ព្រោះម្នាក់រស់ ម្នាក់ស្លាប់»។
ស្ត្រីមេម៉ាយរូបនេះ បានបន្តថា សំណងនេះនឹងជួយសម្រួលកម្ចីរបស់ធនាគារ ដោយសារគ្រួសារអ្នកស្រីកំពុងជួបការលំបាកផ្នែកហិរញ្ញវត្ថុ ជាពិសេសចាប់តាំងពីគាត់ឈឺ និងមិនអាចធ្វើការបាន។ ក្នុងចំណោមកូនបួននាក់របស់ពួកគេ មានបីនាក់ជាមនុស្សពេញវ័យ ហើយម្នាក់ទៀតកំពុងរស់នៅក្នុងបន្ទុក។
យ៉ាងណាមេធាវីការពារក្ដីជនជាប់ចោទ លោក នាង សុភាក់ ចាត់ទុកថា ការផ្តន្ទាទោស និងប្រាក់សំណងគឺធ្ងន់ធ្ងរ ហើយលោកថានឹងទៅនិយាយជាមួយក្រុមគ្រួសាររបស់លោក លឿយ ថាតើត្រូវប្តឹងឧទ្ធរណ៍ ឬយ៉ាងណា។
នាយកប្រតិបត្តិនៃសមាគមសម្ព័ន្ធអ្នកសារព័ត៌មានកម្ពុជា លោក ណុប វី បានស្វាគមន៍ចំពោះសេចក្តីសម្រេចរបស់តុលាការដោយនិយាយថា ការដាក់ទណ្ឌកម្មយ៉ាងតឹងរឹងគឺចាំបាច់ដើម្បីរារាំងការវាយប្រហារមកលើអ្នកសារព័ត៌មាន។
លោកមានប្រសាសន៍ថា៖ «ករណីនេះវាគួរតែពិន័យផ្ដន្ទាទោសកម្រិតខ្ពស់ ដើម្បីធានាថាអ្នកផ្សេងទៀតគឺរាងចាល មិនហ៊ានអនុវត្ត ឬប្រព្រឹត្តអំពើល្មើសយ៉ាងដូច្នេះទៀត»។
ប៉ុន្តែលោកបានជំរុញឱ្យអាជ្ញាធរបន្តស៊ើបអង្កេត ជាពិសេសអ្នកពាក់ព័ន្ធដែលនៅពីក្រោយការកាប់ឈើខុសច្បាប់ និងការទន្ទ្រានយកដី។
លោកបន្តថា៖ «ជនល្មើសទាំងអស់ គឺមិនដែលពេញចិត្តនឹងទង្វើរបស់អ្នកសារព័ត៌មានដែលរាយការណ៍ពីការកាប់បំផ្លាញ រុករាន ទន្រ្ទានយកដីទាំងអស់នោះទេ»។ លោកបន្ថែមថា៖ «យើងស្នើឱ្យមានការស៊ើបអង្កេត វែកមុខចាប់យកជនល្មើសដែលមិនមែនជាជនល្មើសសម្លាប់លោក ឈឿង ឈឹង ផ្ទាល់ក៏ដោយ ប៉ុន្តែជនល្មើសដែលពាក់ព័ន្ធជាមួយនឹងការចាប់បំផ្លាញ ការរុករានទន្ទ្រានយកនូវព្រៃឈើ តំបន់អភិរក្សរបស់សហគមន៍ទាំងអស់នោះ»។
អ្នកនាំពាក្យក្រសួងព័ត៌មាន លោក ទេព អស្នារិទ្ធ មានប្រសាសន៍ថា លោកមិនបានដឹងពីសាលក្រមនោះទេ ប៉ុន្តែបានសង្កត់ធ្ងន់ថា អាជ្ញាធរបានចាត់វិធានការយ៉ាងឆាប់រហ័សដើម្បីស្វែងរកយុត្តិធម៌។ លោកក៏បានជំរុញឱ្យអ្នកសារព័ត៌មានធ្វើតាមច្បាប់ និងបទដ្ឋានវិជ្ជាជីវៈ និង«សហការជាមួយអាជ្ញាធរពាក់ព័ន្ធ» ពេលរាយការណ៍អំពីបញ្ហារសើប។
ការរឹតបន្តឹងមិនច្បាស់លាស់ និងក្រៅផ្លូវការជុំវិញតំបន់អភិរក្សត្រូវបានកត់សម្គាល់កាន់តែខ្លាំងឡើងក្នុងអំឡុងពេលឃុំខ្លួនសកម្មជន និងអ្នកសារព័ត៌មានស៊ើបអង្កេតបទល្មើសព្រៃឈើ។ កាលពីខែវិច្ឆិកា អ្នកការពារបរិស្ថានប្រាំមួយនាក់ត្រូវបានចាប់ខ្លួនក្នុងព្រៃអភិរក្សខេត្តស្ទឹងត្រែង ខណៈពួកគេចុះទៅស៊ើបអង្កេតពីការកាប់ឈើខុសច្បាប់។ ក្រោយមកពួកគេត្រូវបានដោះលែងវិញ។
កាលពីពេលថ្មីៗនេះ អ្នកសារព័ត៌មានបរិស្ថានមួយរូបទៀតគឺ លោក អ៊ុក ម៉ៅ ត្រូវបានចោទប្រកាន់ពីបទញុះញង់ ដែលជាករណីចុងក្រោយបង្អស់ប្រឆាំងនឹងរូបគាត់ បន្ទាប់ពីធ្លាប់ត្រូវបានចោទប្រកាន់ពីបទល្មើសព្រៃឈើដូចគ្នាដែលលោកបានរាយការណ៍មក។ បច្ចុប្បន្ន លោកត្រូវបានអនុញ្ញាតឱ្យនៅក្រៅឃុំ។
សាលក្រមក្នុងសំណុំរឿងរបស់លោក ឈឹង បានទាញការចាប់អារម្មណ៍ពីក្រុមអ្នកតស៊ូមតិផងដែរ។
អ្នកគ្រប់គ្រងផ្នែកតស៊ូមតិនៃអង្គការអ្នកសារព័ត៌មានគ្មានព្រំដែនប្រចាំតំបន់អាស៊ីប៉ាស៊ីហ្វិក (RSF) លោកស្រី Aleksandra Bielakowska បានមានប្រសាសន៍ថា៖ «RSF ស្វាគមន៍ការកាត់ទោសដាក់ពន្ធនាគាររយៈពេល១២ឆ្នាំ ដល់ឃាតកសម្លាប់លោក ឈឿង ឈឹង»។ ដោយបន្ថែមថា៖ «សេចក្តីសម្រេចរបស់តុលាការនេះជាការក្រើនរំឭកថា អ្នកដែលយកជីវិតអ្នកសារព័ត៌មានត្រូវតែទទួលខុសត្រូវ»។
លោកស្រីបានមានប្រសាសន៍ថា៖ «សោកនាដកម្មនេះត្រូវតែសម្គាល់ចំណុចរបត់មួយ និងនាំទៅរកការកែទម្រង់ក្នុងគោលបំណងបញ្ចប់អំពើហិង្សាដែលប្រឈមមុខដោយអ្នកសារព័ត៌មាននៅក្នុងប្រទេសកម្ពុជា ជាពិសេសអ្នកសារព័ត៌មានបរិស្ថាន»៕
ប្រែសម្រួលពីអត្ថបទភាសាអង់គ្លេស៖ Environmental Journalist Chhoeung Chhoeng’s Killer Gets 12 Years
