សមាគមសម្ព័ន្ធអ្នកសារព័ត៌មានកម្ពុជា

ប្រឈមនឹងសំណងជំងឺចិត្ត១លានដុល្លារ លោក សុន ឆ័យ មេដឹកនាំបក្សភ្លើងទៀនប្រយ័ត្នប្រយែង ប៉ុន្តែប្តេជ្ញាចិត្តចូលរួមការបោះឆ្នោត

លោក សុន ឆ័យ អនុប្រធានគណបក្សភ្លើងទៀន ថ្លែងអំឡុងបទសម្ភាសន៍ជាមួយខេមបូចា នៅការិយាល័យរបស់លោកក្នុងរាជធានីភ្នំពេញ ថ្ងៃទី១៩ ខែធ្នូ ឆ្នាំ២០២២។ ខេមបូចា /ព្រីង សំរាំង
លោក សុន ឆ័យ អនុប្រធានគណបក្សភ្លើងទៀន ថ្លែងអំឡុងបទសម្ភាសន៍ជាមួយខេមបូចា នៅការិយាល័យរបស់លោកក្នុងរាជធានីភ្នំពេញ ថ្ងៃទី១៩ ខែធ្នូ ឆ្នាំ២០២២។ ខេមបូចា /ព្រីង សំរាំង

ដោយ​ប្រឈម​មុខ​នឹង​ការ​រឹបអូសទ្រព្យសម្បត្តិ​​​ បន្ទាប់ពី​ចាញ់​ក្តី​ក្នុងបណ្តឹងបរិហារកេរ្តិ៍​​របស់​គណបក្ស​ប្រជាជន​កម្ពុជា ​ដែលទារសំណងជំងឺ​ចិត្ត​១លាន​ដុល្លារ​ លោក សុន ឆ័យ បាន​កាត់បន្ថយ​វោហារសាស្ត្រនយោបាយ និងកាន់តែមាន​ភាព​ប្រយ័ត្នប្រយែង​ជាងមុនដែល​លោក​ធ្លាប់បានធ្វើ​នៅក្នុង​អាជីព​នយោបាយ​ច្រើន​ទសវត្សរ៍​មក​នេះ​តាមរយៈការ​បញ្ចេញ​ទស្សន​របស់​លោក​។

ក្នុង​បទសម្ភាសជាមួយ​ខេមបូចា លោក សុន ឆ័យ និយាយថា៖ «​ពីមុន ខ្ញុំ​អាចនិយាយអ្វីៗដោយ​សេរី​ក្នុងនាមជា​តំណាងរាស្ត្រ​ម្នាក់ ប៉ុន្តែនៅពេលនេះ វាផ្សេង​។ ខ្ញុំ​ត្រូវ​តែ​ប្រយ័ត្ន​ប្រយែង​ក្នុងការនិយាយ​​ជា​សាធារណៈ ពិសេស​ការនិយាយ​ជាមួយ​សារព័ត៌មាន​»។

ប៉ុន្តែ​នោះមិនមែនមានន័យថា លោក​​​បិទមាត់មិននិយាយអ្វីនោះទេ ខណៈ​ពេល​លោក​ដឹកនាំ​គណបក្ស​ភ្លើងទៀន​ដោយ​ប្រយ័ត្ន​ប្រយែង​ដើម្បី​ឆ្ពោះ​ទៅ​រក​ការ​បោះឆ្នោត​ជាតិ​នៅ​ខែ​កក្ក​ដា ឆ្នាំ ២០២៣។

ជា​អនុប្រធាន​គណបក្ស​ប្រឆាំង​ឈាន​មុខ​គេ​នៅកម្ពុជា​ លោក សុន ឆ័យ វ័យ៦៦ឆ្នាំ​ បាន​ជួប​ប្រទះឆ្នាំ​ដ៏ច្របូក​ច្របល់​មួយ​​ បន្ទាប់ពី​ត្រូវ​គណបក្ស​កាន់អំណាច ​និង​គណៈកម្មាធិការ​ជាតិ​រៀប​ចំការ​បោះឆ្នោត (គ.ជ.ប)​ ប្តឹងដោយ​សារតែ​ធ្វើ​ការ​អត្ថាធិប្បាយ​​ជា​សាធារណៈថា គ.ជ.ប មាន​ភាព​លម្អៀងទៅ​​គណបក្ស​ទៅគណបក្សប្រជាជន​​នៅក្នុង​ការ​បោះឆ្នោត​ឃុំ​សង្កាត់​កាល​ពីថ្ងៃទី​៥ ខែមិថុនា​។​

គណបក្ស​កាន់អំណាច​ឈ្នះអាសនៈមេឃុំឬចៅសង្កាត់​ទាំង​អស់លើ​កលែងតែ​បួន​អាសនៈ ​ដែល​ដណ្តើម​បាន​ដោយ​គណបក្ស​ភ្លើងទៀន ​នៅ​ក្នុង​ការ​បោះ​ឆ្នោត​ឃុំសង្កាត់​។

សាលាឧទ្ធរណ៍បាន​តម្កល់​សេចក្តីសម្រេច​របស់​តុលាការដំបូង និង​បាន​​បង្កើន​សំណងជំងឺចិត្ត​ដោយ​បង្គាប់​ឲ្យ​លោក សុន ឆ័យ​ បង់ជំងឺចិត្ត​១លាន​ដុល្លារទៅ​ឲ្យ​គណបក្ស​ប្រជាជនកម្ពុជា​។

ប៉ុន្តែ​មកដល់ពេល​នេះ​លោក សុន ឆ័យ​ បដិសេធ​មិន​ព្រម​បង់​ដែល​​​តុលាការអាចនឹង​ចេញ​ដី​កា​បង្គាប់​ឲ្យ​អាជ្ញា​ធរ​រឹបអូស​ផ្ទះរបស់​លោកពីរ​កន្លែង​នៅក្នុងទីក្រុងភ្នំពេញ​និង​នៅខេត្តសៀម​រាប បន្ទាប់ពី​គណបក្សប្រជាជន​បានស្នើឲ្យ​តុលាការ​បង្កកទ្រព្យលោកសុន ឆ័យ សម្រាប់​យក​មក​ទូទាត់សំណង។​

លោក​បាន​ប្តឹងសារទុក្ខទៅ​តុលាការកំពូល​ហើយ​គេមិន​ទាន់​ច្បាស់​ថា តើតុលាការកំពូល​នឹង​សម្រេចនៅ​ពេល​ណានោះទេ។

លោក សុន ឆ័យ ថ្លែងថា៖ «ខ្ញុំ​មិន​បាន​ធ្វើ​អ្វីខុស​នោះទេ ហើយ​ខ្ញុំ​នឹង​បន្ត​ការ​តស៊ូ​មតិទៅ​តុលាការ​កំពូល ​និង​បន្ត​យន្តការអង្គការសហប្រជាជាតិផ្អែកលើការគោរព​សិទ្ធិសេរីភាព​នៃការ​បញ្ចេញ​មតិ។ ខ្ញុំ​ពិតជា​មិន​យល់​ថា ហេតុអ្វី​បាន​ជា​ ​[CPP] ទាមទារ​សំណងពីខ្ញុំច្រើន​បែប​នេះ តើ​​គេមាន​បំណងអ្វី?»។

លោក សុន ឆ័យ អនុ​ប្រធាន​គណបក្ស​​ភ្លើងទៀន​ថ្លែង​ប្រាប់​អ្នក​កាសែត​ក្រោយ​សវនាការ​នៅ​សាលា​ដំបូង​រាជធានី ​ថ្ងៃ​ទី​៧ ខែ​តុលា ឆ្នាំ​២០២២។ ខេមបូចា​ / ព្រីង សំរាំង

សមាជិកសហភាព​អឺរ៉ុប​មួយចំនួន​បាន​ចេញសេចក្តី​ថ្លែង​ការណ៍​ជា​សាធារណៈកាល​ពីថ្ងៃទី​១៣ ខែធ្នូ​ ដោយ​សម្តែង​ការ​ព្រួយ​បារម្ភ​ចំពោះ​ការ​គាបសង្កត់​នយោបាយ​នៅ​ក្នុង​ប្រទេសកម្ពុជា​ ដោយ​អំពាវនាវឲ្យ​សហភាពអឺរ៉ុប​តាម​ឃ្លាំមើល​ឲ្យ​បាន​ដិត​ដល់​ពីស្ថានភាពនៅក្នុង​ប្រទេសកម្ពុជា​ ដើម្បី​ធ្វើ​ឲ្យ​ប្រាកដថា គណបក្ស​ភ្លើងទៀន​នឹង​មិន​ត្រូវ​បាន​រំលាយ​នៅក្នុងរយៈពេល​ប៉ុន្មាន​ខែ​មុន​ការ​បោះ​ឆ្នោត​ជាតិ​នៅ​ខែកក្កដា​នេះទេ​។

នៅពេលសួរ​ថា តើ​លោក​ចាត់ទុកថា បណ្តឹងបរិហាកេរ្តិ៍នេះ​ជា​ការ​គាបសង្កត់​ផ្នែក​នយោបាយ​ឬយ៉ាងណា​ លោក សុន ឆ័យ បាន​ឆ្លើយ​តបថា៖ «ខ្ញុំមិនអាច​ឆ្លើយ​ចំណុច​នេះទេ​ ប៉ុន្តែ​វាកំពុងតែ​រំខាន​ការ​ងារ​របស់ខ្ញុំ​ក្នុងការ​ជួយ​គណបក្ស​ក្នុងឋានៈ​ជា​មេដឹកនាំ​​​ម្នាក់​នៅ​ក្នុង​គណបក្ស​»។

លោក សុន ឆ័យ មាន​ប្រសាសន៍ថា លោក​មិនអាចទស្សទាយ​បានទេ​ថា តើ​គណបក្ស​ភ្លើងទៀន​នឹង​ត្រូវ​រំលាយ​នាពេល​អនាគត​ឬយ៉ាងណា ខណៈផ្លូវ​​ឆ្ពោះទៅ​កាន់ការ​បោះឆ្នោត​ពោរពេញដោយ​គ្រាប់មីន​។​ លោក ហ៊ុន សែន បាន​ព្រ​បាន​មាន​​ថា គណបក្ស​នេះនឹងត្រូវ​រំលាយ​ប្រសិន​បើ​រក​ឃើញ​មាន​​ការជាប់ពាក់ព័ន្ធ​ណាមួយ​ជាមួយ​នឹង​មេដឹកនាំបក្ស​ប្រឆាំង​និរទេស​ខ្លួន​ សម រង្ស៊ី​។

លោក សុន ឆ័យ មាន​ប្រសាសន៍ថា៖ «យើង​មិន​ត្រូវ​ធ្វើ​អ្វី​ដែល​បង្កើត​ជា​ភស្តុតាង​សម្រាប់គណបក្ស​កាន់អំណាច​ប្រើ​ប្រាស់​ ដើម្បី​រំលាយ​ [គណបក្ស​ភ្លើងទៀន] នោះទេ។ ការ​ប្រយ័ត្នប្រយែង​នឹង​ការពារ​​បក្ស​ពីការរំលាយ​ដូចដែល​ធ្លាប់កើត​មាន​ចំពោះ​គណបក្ស​សង្គ្រោះជាតិ​»។

លោក សុន ឆ័យ ជា​មន្ត្រីម្នាក់​ក្នុងចំណោម​មន្ត្រី​១១៨​រូប​ដែល​ត្រូវ​បាន​ហាម​មិន​ឲ្យ​ធ្វើ​នយោបាយ​ បន្ទាប់ពីតុលាការកំពូល​រំលាយ​គណបក្ស​ប្រឆាំង​ដ៏មាន​ប្រជាប្រិយ​ភាព​​កាលពី​ខែវិច្ឆិកា ឆ្នាំ​២០១៧ បាន​ដាក់​ពាក្យ​សុំសិទ្ធិធ្វើនយោបាយ​ឡើងវិញដើម្បី​វិលត្រឡប់​ចូល​នយោបាយ​កាលពីឆ្នាំ​២០២០​។

លោក​បាន​ដឹកនាំ​​គណបក្ស​ភ្លើងទៀន​ជាមួយ​និង​សមាជិក​សេសសល់​មកពី​គណបក្ស​សម រង្ស៊ី​ ប៉ុន្តែ​ដំបូង​ឡើយ​លោក​រងការរិះគន់​​ពី​សកម្មជន​នយោបាយកំពុងនិរទេសខ្លួន​ ​ដែល​ស្មោះ​ត្រង់ជាមួយ​នឹង​គណបក្ស​សង្គ្រោះជាតិ​។

ខណៈ​ពេល​​ស្វាគមន៍​យ៉ាងកក់ក្តៅ​ចំពោះ​លោក សុន ឆ័យ ក្នុងការ​​វិលត្រឡប់​ចូល​​ឆាកនយោបាយ​វិញ​កាល​ពីឆ្នាំ​២០២០​ លោក សុខ ឥសាន អ្នក​នាំពាក្យ​គណបក្ស​ប្រជាជន​កម្ពុជា​នៅពេលនេះ​បាន​ហៅ​លោក សុន ឆ័យ ថា គ្រាន់តែជា​អ្នក​ដើរ​តាម​នយោបាយ​ប៉ុណ្ណោះ។ ​ 

លោកថ្លែង​ថា៖ «​គាត់គ្រាន់តែជា​អ្នក​ធ្វើ​តាម​មេដឹកនាំ​នយោបាយ​ ហើយ​ការ​សម្រេចចិត្ត​ទាំង​អស់​មិនមែនធ្វើ​ដោយ​ឆន្ទៈផ្ទាល់របស់​គាត់​ទេ។ គាត់​គ្រាន់តែធ្វើ​តាម​ចៅហ្វាយ​របស់គាត់​» ដោយ​លោកនិយាយសំដៅ​ដល់​លោក សម រង្ស៊ី។

ទោះបីជា​យ៉ាងណា លោក សុន ឆ័យ មាន​ជំហរ​ឯករាជ្យ​យូរមកហើយ ដោយ​បង្ហាញ​ភាព​ប្រយ័ត្ន​ប្រយែងជុំវិញ​ការ​ពឹងផ្អែក​របស់​គណបក្ស​សង្គ្រោះជាតិ​លើ​លោក សម រង្ស៊ី និង​លោក កឹម សុខា។ លោកសង្ឃឹមថា នឹង​ធ្វើ​​វិមជ្ឈការ​អំណាច​នៅក្នុងគណបក្ស​ភ្លើងទៀន​។

លោកបន្ត​ថា៖ «​ខ្ញុំ​ចង់​ធ្វើ​ឲ្យគណបក្ស​ប្រឆាំងមួយ​មាន​រចនាសម្ព័ន្ធរឹងមាំ​ដោយ​មិន​ពឹងផ្អែក​លើ​បុគ្គលជាក់លាក់ណាមួយទេ»។ 

ការតស៊ូមតិ​រយៈ​ពេល​ជាង​ពីរ​ទសវត្សរ៍  

កើត​នៅ​ឆ្នាំ​១៩៥៦ ជាកូន​ទី​៣​នៅ​ក្នុងចំណោម​បងប្អូន​១១នាក់​​នៅ​​ខេត្តសៀម​រាប លោក សុន ឆ័យ បាន​ក្លាយ​ជា​សកម្មជន​សង្គម​កាលលោកនៅ​ជា​សិស្ស​វិទ្យាល័យដោយ​បាន​​ដឹកនាំ​ការ​តវ៉ា​ប្រឆាំនឹងតម្លៃ​ទំនិញ​ឡើង​ថ្លៃនៅ​ក្នុងខេត្ត​កាល​ពីដើមទសវត្សរ៍៧០​។​​ 

បន្ទាប់​ពី​បាត់បង់ឪពុក​ និង​បងប្អូន​បង្កើត​ពីរ​នាក់​នៅក្នុងរបបខ្មែរក្រហម​ លោក ឆ័យ​ បាន​ទៅ​រស់នៅ​ប្រទេស​អូស្ត្រាលី​នៅក្នុងឆ្នាំ​១៩៨០​ និង​ធ្វើ​ការ​ងារជា​គ្រូបង្រៀន​​គណិតវិទ្យា​មុន​ពេល​លោកវិលត្រឡប់​មក​ប្រទេសកម្ពុជា​វិញនិង​ចូល​រួម​ការ​បោះ​ឆ្នោតជាតិ​ដែល​គាំទ្រដោយ​អង្គការសហប្រជាជាតិ​កាលពីឆ្នាំ​១៩៩៣។

លោក​បាន​ជាប់​ឆ្នោត​ជា​តំណាងរាស្ត្រប្រចាំ​ខេត្ត​សៀម​រាប​របស់​គណបក្ស​សេរីនិយម​ព្រះពុទ្ធសាសនា​ ដែល​ប្រឆាំង​កុម្មុយនីស្ត ហើយ​ក្រោយ​មក​លោក​បាន​ចូល​រួម​ជាមួយ​គណបក្ស​ជាតិ​ខ្មែរកាល​ពីឆ្នាំ​១៩៩៥ ​មុន​ប្តូរមក​គណបក្ស​ភ្លើងទៀន​។

លោក​បាន​ក្លាយ​ជាតួអង្គលេចធ្លោជាងមុន​នៅលើ​ឆាកនយោបាយ​ជាតិ​ បន្ទាប់ពី​រដ្ឋប្រហារដឹកនាំអ្នក​ស្មោះត្រង់​នឹង​គណបក្ស​ប្រជាជនកម្ពុជា​កាល​ពីឆ្នាំ​១៩៩៧ ដែល​បណ្តេញ​គណបក្ស​ហ្វុនស៊ីនប៉ិច​ដែល​ដឹកនាំ​ដោយ​ព្រះអង្គម្ចាស់ នរោត្តម​ រណឫទ្ធិ ពីការ​រៀបចំបែងចែក​អំណាច។

ឥស្សរជន​បក្សប្រឆាំង​រួម​ទាំង​លោក សុន ឆ័យ ផងបាន​គេចខ្លួន​ទៅ​ប្រទេសថៃ​ ប៉ុន្តែ​លោក ឆ័យ បាន​វិលត្រឡប់​មកវិញ ហើយ​ព្យាយាម​ធ្វើ​ឲ្យ​ជម្លោះថម​ថយ​ ដោយ​ជំរុញ​ឲ្យ​មាន​ការ​បោះឆ្នោត​ថ្មី​កាល​ពីឆ្នាំ​១៩៩៨។

លោក គង់​ គាំ ដែលជា​អ្នក​នយោបាយ​ជើងចាស់​បច្ចុប្បន្ន​ជា​ឧត្តមទីប្រឹក្សា​របស់​គណបក្ស​ភ្លើងទៀន​បាន​មាន​ប្រសាសន៍ថា លោក សុន ឆ័យ គឺជា​អ្នក​សម្របសម្រួល​នយោបាយ​និង​មាន​បំណងលើកស្ទួយ​លទ្ធិប្រជាធិបតេយ្យ។

លោក​មាន​ប្រសាសន៍ថា៖ «សុន ឆ័យ គឺជា​មនុស្សម្នាក់ក្នុងចំណោម​អ្នក​ដំបូង​គេដែល​វិលត្រឡប់​មក​ប្រទេស ដើម្បី​សម្របសម្រួល​រវាង​ភាគី​ទាំង​ពីរ​ស្វែង​រក​ការ​បោះឆ្នោតឡើងវិញ​។ លោក​សុន ឆ័យ ធ្វើ​បេសសកម្មផ្ទាល់ខ្លួន​»។

លោក សុន ឆ័យ មាន​ប្រសាសន៍ថា លោក​មិនមែនជាមនុស្សដែលមាន​ឥទ្ធិពល​នោះទេនៅពេលនោះ ប៉ុន្តែ​មាន​ទឹកចិត្ត​ក្នុងការ​ស្វែង​រក​ការ​ផ្សៈផ្សាជាតិ​។ 

លោក​មាន​ប្រសាសន៍ថា៖ «នៅពេលនោះ ខ្ញុំបាន​ជួប​ជាមួយ​សម្តេចតា [នរោត្តម សីហនុ] និង​លោក​នាយករដ្ឋមន្ត្រី ហ៊ុន សែន​ ជជែកអំពី​ការ​រៀប​ចំការ​បោះ​ឆ្នោត​។ ខ្ញុំ​មិនដឹងថា កិច្ច​ប្រឹងប្រែង​របស់ខ្ញុំ​នាំ​មក​នូវការ​បោះឆ្នោត​សកល​កាលពីឆ្នាំ​១៩៩៨​នោះទេ ប៉ុន្តែ​ខ្ញុំ​បាន​ធ្វើ​ការ​ងារនេះ»។

លោក កែវ ភីរម្យ អតីត​តំណាងរាស្ត្រគណបក្ស​សង្គ្រោះជាតិ​មកពីខេត្ត​ក្រចេះ​ និង​ ជា​សហសេវិកម្នាក់ក្នុងចំណោម​សហសេវិក​ជិតស្និទ្ធម្នាក់​របស់​លោក​ សុន ឆ័យ ហើយ​បាន​និយាយថា កម្លាំងនយោបាយ​របស់​លោក សុន ឆ័យ គឺភាពស្មោះត្រង់និង​សេចក្តីថ្លៃថ្នូរ​របស់​លោក។

លោក​ថ្លែង​ថា៖ «លោក​មាន​ទំនាក់ទំនង​ល្អ​ជាមួយ​អ្នក​ផ្សេងក្នុងគណបក្ស​ ប៉ុន្តែ​គាត់គឺជា​មនុស្ស​ដែល​ចូលចិត្ត​ធ្វើ​ការ​ម្នាក់ឯង ដោយ​គ្មាន​បក្សពួកនិយម​នៅក្នុងគណបក្ស​។ គាត់គឺជា​តំណាងរាស្ត្រដែលហ៊ាន​និយាយ ​ហ៊ាន​ទាមទាររកយុត្តិធម៌​។ គាត់គឺជា​អ្នក​ការពារ​យុត្តិធម៌សង្គមម្នាក់​​ដោយ​មិន​បារម្ភ​ពី​សុវត្ថិភាព​ខ្លួនឯង»។

លោក សុន ឆ័យ មាន​ប្រសាសន៍ថា លោក ហ៊ុន សែន​ ធ្លាប់ចង់​ឲ្យ​លោក​ចូល​រួម​ជាមួយ​គណបក្ស​ប្រជា​ជនកម្ពុជា​កាលពីឆ្នាំ​១៩៩៨​ ប៉ុន្តែ​លោក​បដិសេធ​និង​បាន​ក្លាយជា​ផ្នែក​មួយនៃគណបក្ស​ប្រឆាំង​ដែល​ដឹកនាំ​ដោយ​លោក សម រង្ស៊ី​។  បន្ទាប់ពី​គណបក្ស ​សម រង្ស៊ី ច្របាច់បញ្ចូល​ជាមួយ​គណបក្ស​សិទ្ធិ​មនុស្ស​របស់​លោក​ កឹម សុខា ដើម្បី​បង្កើត​ជា​គណបក្ស​សង្គ្រោះជាតិ​កាល​ពីឆ្នាំ​២០១២​ លោក សុន ឆ័យ ត្រូវ​បានជ្រើសរើស​ជាប្រធានក្រុម​តំណាង​រាស្ត្រ​របស់​គណបក្ស​សង្គ្រោះជាតិ​។

លោក សុន ឆ័យ អតីត​តំណាងរាស្ត្រ​គណបក្សប្រឆាំង (ទី២រាប់ពីឆ្វេង)​ ចូលរួម​កិច្ច​ប្រជុំនៅ​រដ្ឋសភា​ កាល​ពីថ្ងៃទី​៧​ ខែ​ធ្នូ​ ឆ្នាំ​២០១៦។ ខេមបូចា / ព្រីង សំរាំង​

អំឡុង​ពេល​ជាងពីរទសវត្សរ៍​ក្នុងឋានៈ​ជា​តំណាងរាស្ត្រគណបក្ស​ប្រឆាំង​ លោក សុន ឆ័យ មាន​ឈ្មោះ​បោះសំឡេងដោយ​សារតែ​ការតស៊ូ​មតិរបស់​លោក​នៅ​​រដ្ឋសភា។ លោក​ជាតំណាងរាស្ត្រប្រឆាំងដំបូង​ដែលបាន​ស្នើ​សេចក្តីព្រាងច្បាប់​​​ប្រឆាំង​អំពើពុករលួយ​​កាលពីឆ្នាំ​១៩៩៥ និង​​ច្បាប់​​ប្រកាសទ្រព្យសម្បត្តិ​ ដែល​ត្រូវបាន​អនុម័ត​​១៥​ឆ្នាំ​ក្រោយមក។

ក្នុងឋានៈ​ជា​អនុប្រធាន​នៃគណៈកម្មាធិការ​ហិរញ្ញវត្ថុ​របស់​រដ្ឋសភា​ពីឆ្នាំ​២០១៤​ដល់​ឆ្នាំ​២០១៧ លោក សុន ឆ័យ​ មាន​អំណាច​ឃ្លាំមើល​ការ​ចំណាយ​របស់​រដ្ឋាភិបាល​និង​មិន​ខ្លាចនឹងលាតត្រដាងពី​អំពើពុករលួយ ដែលសង្ស័យរបស់មន្ត្រី​ផ្សេងទៀត​។ ​ស្មារតី​មោះមុត​របស់​លោក​កម្រទទួលបាន​ការពេញចិត្ត​ពីសមាជិកផ្សេងទៀតនៅ​ក្នុងរដ្ឋសភា​ណាស់​។

កាល​ពីខែវិច្ឆិកា​ ឆ្នាំ​២០១៤ លោក សុន ឆ័យ បាន​ដាក់ពាក្យ​បណ្តឹង​ទៅ​ប្រធាន​រដ្ឋសភា​ ដែល​រៀបរាប់លម្អិត​អំពី​បក្សពួកនិយម​នៅក្នុងចំណោម​បុគ្គលិក​រដ្ឋសភា​ដោយគូសបញ្ជាក់ថា មន្ត្រីរដ្ឋបាលម្នាក់នៅរដ្ឋសភាមាន​សាច់ញាតិ​១៤​នាក់ធ្វើ​ការ​ងារនៅ​ទីនោះ​។ លោក​រំឭកថា គ្មាន​ការ​ចាត់វិធានការ​ណាមួយទេ។

នៅ​ក្នុងករណី​មួយផ្សេងទៀត លោក ឆ័យ បាន​រកឃើញ​ថា លេខាធិការដ្ឋានរដ្ឋសភាបាន​ចំណាយ​ប្រាក់​៣៥.០០០​ដុល្លារ​សម្រាប់​បង្គោលដងទង់ជាតិ​មួយ​ដើម​និង​ចំណាយ​ប្រាក់​៥០.០០០​ដុល្លារ​សម្រាប់​ធ្វើ​ទ្វាររបង​រដ្ឋសភា​។​ លោក​ទទូច​ឲ្យ​មាន​ការ​ស៊ើប​អង្កេត​ ប៉ុន្តែ​មិនដែល​មាន​ការស៊ើបអង្កតណាមួយទេ។

បើទោះបីជា​ខ្វះការ​ឆ្លើយតប​ច្បាស់លាស់​ជាញឹកញាប់​ចំពោះ​ការ​ស៊ើបអង្កេត​របស់​លោក​លើ​ថវិកាជាតិ​និង​សំណើច្បាប់​ច្រើន​ឆ្នាំ​មកនេះ លោក សុន ឆ័យ មាន​ប្រសាសន៍ថា លោក​នៅតែផ្តោតលើ​ការ​កសាង​បក្សប្រឆាំង​ប្រកបដោយទំនុកចិត្ត​និង​រឹងមាំ​មួយ​ ដើម្បី​កែលម្អស្ថាប័នរដ្ឋ​ និង​សង្គមស៊ីវិល​។

លោកបានមានប្រសាសន៍ថា៖ «យុត្តិធម៌សង្គម និងលទ្ធិប្រជាធិបតេយ្យ នៅក្នុងប្រទេសកម្ពុជាគឺជារឿងសំខាន់។ បើគ្មានយុត្តិធម៌សង្គម គឺគ្មានសន្តិភាពពិតប្រាកដនោះទេ។ ដូច្នេះ ខ្ញុំត្រូវបន្តទាមទារយុត្តិធម៌សង្គម»។

បក្សប្រឆាំង​ស្ថិតក្រោម​ការ​គំរាម​កំហែង

ថ្លែងនៅក្នុងពិធី​សម្ពោធផ្លូវ​នៅ​ខេត្តព្រះសីហនុ​កាល​ពីថ្ងៃទី​២២ ខែ​ធ្នូ លោក ហ៊ុន សែន បានព្រមាន​ថា នរណាដែល​ចោទ​គណបក្ស​ប្រជាជន​កម្ពុជា​ថា លួច​សន្លឹកឆ្នោត​នៅក្នុងការ​បោះឆ្នោត​នាពេលខាងមុខ​នឹងប្រឈម​ការប្តឹង។

លោក​ ហ៊ុន សែន ថ្លែងថា៖ «បន្ទាប់ពីការ​បោះឆ្នោត​ ពួកគេតែង​តែ​ចោទ​ [ CPP] ថា ជា​ចោរ​ នេះមិន​មែនជា​សេរីភាព​នៃការ​បញ្ចេញមតិ​ទេ។ ចាប់ពីពេលនេះតទៅ អ្នកណាដែល​ចោទ​គណបក្ស​ប្រជាជនកម្ពុជា​ថា ជា​ចោរ​ ពួកគេនឹងត្រូវ​ប្តឹង»។

ខណៈ​​ដែល​លោក​នាយករដ្ឋមន្ត្រី​និង​គណបក្ស​កាន់អំណាច​ការ​ពារ​កិត្តិយស​របស់ខ្លួន​នៅ​ក្នុងការ​បោះឆ្នោត​ឃុំ​សង្កាត់​នោះ របាយ​ការណ៍​ពី​ក្រុម​អ្នក​ឃ្លាំមើល​ការ​បោះ​ឆ្នោត​ឯករាជ្យ​បាន​រកឃើញ​វត្តមាន​របស់​កម្លាំង​ប្រដាប់អាវុធ​នៅតាម​មណ្ឌលបោះឆ្នោត ​និង​ការ​ស្រង់ឈ្មោះអ្នក​បោះឆ្នោតពីសំណាក់​អាជ្ញាធរ​មូលដ្ឋាន។

មន្ត្រី​បោះ​ឆ្នោត​មួយចំនួន​រួម​ទាំង​អ្នក​ដែល​ពាក់ព័ន្ធការ​រាប់សន្លឹកឆ្នោត​គឺជា​សកម្មជនគណបក្ស​កាន់អំណាច។ នេះបើយោងតាម​គណៈកម្មាធិការ​ដើម្បី​ការ​បោះឆ្នោត​ដោយសេរី​និងយុត្តិធម៌នៅកម្ពុជា (ខុមហ្វ្រេល)​។

លោក ហ៊ុន សែន បានអះអាងថា សំណងជំងឺចិត្ត​ដ៏ច្រើនដែល​តុលាការបានបង្គាប់​ទៅ​លើ​លោក សុន ឆ័យ គឺជា​វិធានការមួយ ដើម្បី​លុបបំបាត់​វប្បធម៌លាភពណ៌ បន្ទាប់ពី​ការ​បោះ​ឆ្នោត​ និង​បានព្រមាន​​ឲ្យ​ដាក់​ដេញថ្លៃលក់​អចលនទ្រព្យរបស់​លោកផងដែរ។

លោក គង់ គាំ ទីប្រឹក្សា​គណបក្ស​ភ្លើងទៀន​បាន​អះអាងថា ការ​អត្ថាធិប្បាយ​របស់​​លោក សុន ឆ័យ ស្តីពី​ការ​បោះឆ្នោត​ឃុំសង្កាត់​កាលពីថ្ងៃទី​៥ ខែ​មិថុនា ​ពិតមានលក្ខណៈ​ជាការបរិហារ ប៉ុន្តែ​ថា សំណងជំងឺចិត្ត​នេះគឺវាហួសហេតុ។

លោកថ្លែង​ថា៖ «ខ្ញុំគិតថា ទាំង​បក្ស​ប្រឆាំង​ និង​គណបក្ស​ប្រជាជនកម្ពុជា​ដែល​កំពុង​កាន់អំណាចមាន​មនុស្ស​​​ជ្រុលនិយម​ដូចគ្នា  ដូច្នេះ​យើង​គួរ​ស្វែង​រកមធ្យោបាយ​បញ្ឈប់ការវាយប្រហារ និងការចោទប្រកាន់គ្នា​ទៅវិញទៅមក។​ ខ្ញុំគិតថា វានឹង​មិន​ជា​បញ្ហា​ចំពោះគណបក្ស​ភ្លើងទៀន​ទេ ប៉ុន្តែ​វាអាចជា​ឧបសគ្គ​មួយចំពោះ​ជីវិតនយោបាយ​របស់​លោក សុន ឆ័យ ដោយសារតែ​តុលាការ​មិន​លើក​លែង​ចំពោះគណបក្ស​ប្រឆាំង»។

ប្រសិន​បើ​តុលាការកំពូល​សម្រេចឲ្យគាត់​ចាញ់ លោក សុន ឆ័យ នឹង​ក្លាយ​ជា​អ្នក​នយោបាយ​ប្រឆាំងទី​២ បន្ទាប់ពី​លោក សម រង្ស៊ី  ដែល​ត្រូវ​បាន​រឹបអូស​​ទ្រព្យ​ ដើម្បី​សងសំណងជំងឺចិត្ត​ក្នុង​បណ្តឹង​បរិហារកេរ្តិ៍។

ទីស្នាក់ការគណបក្ស​សង្គ្រោះជាតិ​នៅរាជធានីភ្នំពេញ​ជា​ផ្ទះរបស់​លោក សម រង្ស៊ី ត្រូវ​បាន​លក់​ក្នុងតម្លៃ​១,៦លាន​ដុល្លារ​កាល​ពីឆ្នាំ​មុន​ ដើម្បី​សងសំណងជំងឺចិត្ត​ក្នុងសំណុំរឿងបរិហារកេរ្តិ៍ដែលប្តឹងដោយ​លោក ហ៊ុន សែន និង​មន្ត្រីកំពូល​គណបក្ស​កាន់អំណាចពីររូប​ផ្សេងទៀត។

ដោយ​មិន​បង្ហាញនូវក្តីបារម្ភ​ លោក​ សុន ឆ័យ បានពន្យល់ថា នេះមិនមែនជា​លើកទី​១​ទេ ដែល​ទ្រព្យរបស់លោក​រងការ​គំរាម​កំហែង​ ដោយ​លោក​គូសបញ្ជាក់ថា កាលពីឆ្នាំ​២០១០ អាជ្ញាធរ​បានយក​​​ដីបីហិកតានៅខេត្តសៀមរាប ដោយ​អះអាងថា ជាដី​របស់​អាជ្ញាធរអប្សរា។​ ប៉ុន្តែក្រោយមក​ដីនោះត្រូវបានប្រគល់​ឲ្យ​ក្រុមហ៊ុន សុខា របស់​លោក សុខ គង់ ដើម្បី​អភិវឌ្ឍន៍ជាសណ្ឋាគារ។

ប៉ុន្តែ​លោក សុន ឆ័យ ដែលភរិយា និងកូន​ទាំង​៥​របស់​លោក​រស់នៅ​ប្រទេស​អូស្ត្រាលី​បាន​ឲ្យ​ដឹង​ថា លោកមិនខ្វល់ពីការបាត់បង់ទ្រព្យសម្បត្តិទេ ហើយ​ថាការបារម្ភពីទ្រព្យសម្បត្តិនឹងរារាំងជីវិតនយោបាយរបស់លោក។​

លោក សុន ឆ័យ ថ្លែងថា៖ «វាមិនមែនជាផលប្រយោជន៍ផ្ទាល់ខ្លួន​របស់ខ្ញុំទ និង​ជា​​អ្វីដែល​ខ្ញុំ​បារម្ភនោះទេ។​ ប្រសិនបើ​ខ្ញុំបារម្ភពី​ទ្រព្យសម្បត្តិ ខ្ញុំមិន​អាច​បន្ត​ជួយ​គណបក្ស​បានទេ​»

ប្រែសម្រួលពីអត្ថបទភាសាអង់គ្លេស៖ Facing $1 million lawsuit, Candlelight Leader Son Chhay Cautious But Intent On Reaching Elections

968 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម