សហជីពនៃសហព័ន្ធសហជីពសេរីឯករាជ្យ(FUFI) ចំនួន៥នាក់ បានត្រឡប់ចូលធ្វើការនៅរោងចក្រវិញ នៅថ្ងៃទី២១ ខែមេសា បន្ទាប់ពីអ្នកបញ្ជាទិញបរទេសបានអន្តរាគមន៍ករណីរបស់ពួកគេ ក្រោយពេលពួកគេត្រូវបានបញ្ឈប់ពីការងារអស់រយៈពេលជាច្រើនខែ។ យ៉ាងណាក៏ដោយ សមាជិក FUFI ផ្សេងទៀតមិនទាន់ទទួលបានដំណោះស្រាយណាមួយពីរោងចក្រនៅឡើយទេ។
បុគ្គលដែលត្រូវបានបណ្តេញចេញនោះរួមមានប្រធានសហជីពតំណាងរោងចក្រលោក ខុន វិនិត អនុប្រធានសហជីព លេខាធិការ មន្ត្រីហិរញ្ញវត្ថុ និងសកម្មជនកម្មករពីរនាក់។ ពួកគេត្រូវបានបញ្ចប់ការងារនៅចន្លោះខែសីហា និងខែវិច្ឆិកាឆ្នាំមុន ពីក្រុមហ៊ុន SSH CB Sustainable Fashion Co Ltd ក្នុងខេត្តកំពង់ស្ពឺ។
បើតាមការឱ្យដឹងពីសហជីព និងអង្គការក្រៅរដ្ឋាភិបាលមួយ រោងចក្រដែលមានម្ចាស់ជាជនជាតិចិននេះ ផលិតខោអាវក្រៅសម្រាប់នាំចេញទៅអឺរ៉ុប កាណាដា ជប៉ុន និងសហរដ្ឋអាមេរិក។ ហើយការសម្រេចចិត្តឱ្យពួកគេចូលធ្វើការវិញបន្ទាប់ពីមានការចរចារជាបន្តបន្ទាប់រវាងម៉ាកយីហោអេស្ប៉ាញInditex និយោជក សហជីព និងអង្គការក្រៅរដ្ឋាភិបាលដែលពាក់ព័ន្ធ។
លោក សយ ចន្ធូ ប្រធានសហព័ន្ធសហជីពសេរីឯករាជ្យ បានស្វាគមន៍ការវិលត្រលប់មកវិញរបស់សមាជិកសហជីពរបស់លោកនៅរោងចក្រនេះ ដោយមានការព្រមព្រៀងគ្នារវាងអ្នកបញ្ជាទិញ និងម្ចាស់រោងចក្រ។
ទោះជាយ៉ាងណា លោកបានបន្តបង្ហាញការព្រួយបារម្ភថាការបណ្តេញចេញនេះបាន«ផ្ដើមចេញពីការរើសអើងលើសកម្មភាពសហជីព»។
លោក ចន្ធូ បានមានប្រសាសន៍ថា៖ «វាគឺជាការរើសអើង ពីព្រោះពួកគេត្រូវបានគេបណ្តេញចេញដោយសារតែមានការចូលរួមជាមួយនឹងសហជីពរបស់យើង»។ លោកបន្តថា៖ «សមាជិកមួយចំនួនរបស់យើងត្រូវបានបង្ខំឱ្យចាកចេញពី FUFI ខណៈពេលដែលអ្នកផ្សេងទៀតត្រូវបានដំឡើងឋានៈបន្ទាប់ពីចាកចេញ»។
លោកបានបន្ថែមថា៖ «សហជីពរបស់យើងការពារផលប្រយោជន៍របស់កម្មករ និងសហការជាមួយរោងចក្រ។ យើងមានបំណងដោះស្រាយបញ្ហាស្របតាមច្បាប់ ហើយនេះមិនមែនមានន័យថាយើងលើកទឹកចិត្តកម្មករឱ្យមានការបះបោរនោះទេ»។
លោក ភឿន ភក្តី ជាកម្មករម្នាក់ក្នុងចំណោមកម្មករផ្សេងទៀតដែលត្រូវបានបញ្ចប់ការងារ បាននិយាយថា លោកត្រូវបានគេបញ្ឈប់ពីការងារក្នុងខែសីហា។ លោកថា រោងចក្របានអះអាងថា ការបណ្តេញចេញនេះគឺដោយសារតែខ្វះការបញ្ជាទិញ និងដើម្បីរក្សាប្រតិបត្តិការ។ ទោះជាយ៉ាងណា លោកបដិសេធមិនចុះហត្ថលេខាលើលិខិតលាឈប់នោះទេ រួចហើយក៏ធ្វើការតវ៉ា។
លោកបាននិយាយថា៖ «ហេតុផលដែលក្រុមហ៊ុនផ្តល់ឱ្យគឺមិនសមហេតុផលទេ»។ លោកបានកត់សម្គាល់ថា វាទាក់ទងនឹងបរិយាកាសការងាររបស់ពួកគេ។ លោកបន្តថា៖ «តាមពិតទៅ កម្មករកំពុងធ្វើការថែមម៉ោង ហើយរោងចក្រនៅតែមានការបញ្ជាទិញគ្រប់គ្រាន់ដើម្បី [បន្ត] ប្រតិបត្តិការ»។
លោក ភក្តី បានបន្ថែមថា៖ «តាមគំនិតរបស់ខ្ញុំ ហេតុផលពិតប្រាកដនៃការបញ្ឈប់រូបខ្ញុំគឺដោយសារតែខ្ញុំបានចូលរួមជាមួយសហជីពឯករាជ្យ FUFI ។ ពេលនោះហើយដែលការយាយីបានចាប់ផ្តើម»។
លោកបានចែករំលែកថា ក្នុងអំឡុងពេលអត់ការងារធ្វើ លោកបានទៅធ្វើការនៅរោងចក្រមួយទៀត ដែលលោកអាចទទួលបានប្រាក់ឈ្នួលប្រចាំសប្តាហ៍។ លោកនិយាយថា៖ «ខ្ញុំរីករាយដែលភាគីពាក់ព័ន្ធបានដោះស្រាយបញ្ហានេះ ហើយបានអនុញ្ញាតឱ្យខ្ញុំចូលធ្វើការដូចធម្មតាវិញ»។
អ្នកគ្រប់គ្រងកម្មវិធីរបស់មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) លោក ឃុន ថារ៉ូ បានបញ្ជាក់ថា កត្តាដែលធ្វើឱ្យពួកគេបានចូលធ្វើការវិញ គឺជាកិច្ចខិតខំប្រឹងប្រែងរួមគ្នារបស់អ្នកបញ្ជាទិញ និងភាគីពាក់ព័ន្ធ ប៉ុន្តែលោកបានបដិសេធមិនបញ្ជាក់លម្អិតនោះទេ ដោយសារវាជា«ការសម្ងាត់» ខណៈពេលដែលមានការសាទរចំពោះការវិលត្រឡប់របស់កម្មករនិយោជិតឱ្យចូលធ្វើការធម្មតាវិញ។
លោក ថារ៉ូ បានមានប្រសាសន៍ថា៖ «យើងសង្ឃឹមថា និយោជក និងសហជីពនឹងបន្តធ្វើការរួមគ្នាដោយមានការយោគយល់ និងលើកកម្ពស់ការអនុវត្តសេរីភាព និងសិទ្ធិរបស់សហជីព» ។
សារព័ត៌មានខេមបូចា មិនអាចទាក់ទងសុំការឆ្លើយតបពីក្រុមហ៊ុន SSH CB Sustainable Fashion បាននៅឡើយ។
ក្នុងករណីដាច់ដោយឡែក តំណាងសហជីពមកពី FUFI ត្រូវបានបញ្ឈប់ពីការងារដោយសារកិច្ចសន្យារយៈពេលខ្លី
តំណាងសហជីពនៃសហព័ន្ធសហជីពសេរីឯករាជ្យ(FUFI) លោក វេង សាវឿន និងសកម្មជនផ្សេងទៀត ត្រូវបានបញ្ចប់កិច្ចសន្យាជាមួយក្រុមហ៊ុន Suxingmax Garment (Cambodia)។
លោក សាវឿន បាននិយាយថា គាត់ត្រូវបានគេបញ្ឈប់ពីរដងហើយ។ ទីមួយគឺនៅក្នុងខែមីនា ឆ្នាំ២០២៤ ប៉ុន្តែត្រូវបានឱ្យចូលធ្វើការឡើងវិញ បន្ទាប់ពីគាត់បានតវ៉ា និងចរចាជាមួយអ្នកគ្រប់គ្រង។
ចំណែកឯលើកទី២ គឺនៅថ្ងៃទី២៩ ខែមីនា ឆ្នាំ២០២៥ ដែលរោងចក្រអះអាងថា បណ្តាលមកពីលោក«អវត្តមានញឹកញាប់ពីការងារ ដោយមិនមានការអនុញ្ញាត»។
លោកបន្តថា៖ «ខ្ញុំបានសុំការអនុញ្ញាតឈប់សម្រាកច្រើនថ្ងៃស្របតាមនីតិវិធី។ ខណៈពេលដែលកម្មករផ្សេងទៀតមិនមានបញ្ហាអ្វីទេ ហេតុអ្វីមានតែខ្ញុំ?»។
លោក សាវឿន ជឿជាក់ថា ការបញ្ចប់ការងាររបស់លោក គឺទាក់ទងនឹងសកម្មភាពសហជីព ដោយសារតែរដ្ឋបាលរោងចក្រលើកឡើងថា «សហជីពពីរមិនត្រូវបានអនុញ្ញាត» ឱ្យមាននៅក្នុងរោងចក្រតែមួយ។ លោកបានចាត់ទុកថា៖ «នេះជាការរើសអើង»។
លោកត្រូវបានជ្រើសរើសឱ្យធ្វើជាអ្នកបង្កើតតំណាងសហជីពនៅក្នុងរោងចក្រកាលពីខែវិច្ឆិកា ឆ្នាំ២០២៤ ប៉ុន្តែម្ចាស់រោងចក្រមិនបានទទួលស្គាល់វាជាផ្លូវការនោះទេ។
លោក សាំង សុជាតិ រដ្ឋបាលនៃរោងចក្រ បានច្រានចោលការយល់ឃើញដែលថាការបញ្ចប់ការងាររបស់ លោក សាវឿន គឺដោយសារតែសកម្មភាពសហជីព ផ្ទុយទៅវិញគឺដោយសារតែកិច្ចសន្យារបស់គាត់បានផុតកំណត់។
លោកបានថ្លែងថា៖ «គាត់ត្រូវបានគេបញ្ឈប់ដោយសារកុងត្រារបស់គាត់ដល់កាលកំណត់។ រោងចក្រមិនបន្តឱ្យទៀតទេ»។
លោក សុជាតិ បានបញ្ជាក់ថា៖ «ទីពីរ យើងបានរំឭកគាត់ជាច្រើនដងហើយពីការឈប់សម្រាកជាច្រើនថ្ងៃដោយគ្មានការអនុញ្ញាត [..] គាត់បានបរាជ័យក្នុងដំណាក់កាលវាយតម្លៃដោយថ្នាក់គ្រប់គ្រង ដូច្នេះហើយទើបក្រុមហ៊ុនសម្រេចចិត្តមិនបន្តកិច្ចសន្យា[របស់គាត់]នោះទេ»។
លោកបន្ថែមថា រោងចក្រមិនបានហាមឃាត់កម្មករណាមួយមិនឱ្យបង្កើតសហជីព ឬមានការរើសអើងសហជីពឡើយ។
លោក សុជាតិ បាននិយាយថា៖ «គាត់មិនត្រូវបានគេបញ្ឈប់ពីការងារដោយសារគាត់ឈរឈ្មោះជាតំណាងសហជីពនោះទេ»។
លោកបានទទួលស្គាល់ថា រោងចក្រទទួលបានព័ត៌មានពីការជាប់ឆ្នោតរបស់លោក សាវឿន ប៉ុន្តែមិនមានលិខិតផ្លូវការណាមួយទាក់ទងនឹងការចុះបញ្ជីការសហជីពពីក្រសួងការងារ និងបណ្តុះបណ្តាលវិជ្ជាជីវៈទេ។
លោក សុជាតិ បន្ថែមថា រោងចក្របានផ្តល់កិច្ចសន្យារយៈពេលខ្លីប្រមាណបីខែទៅកាន់បុគ្គលិក ហើយកិច្ចសន្យាការងាររបស់លោក សាវឿន បានបញ្ចប់នៅថ្ងៃទី២៩ ខែមីនា ឆ្នាំ២០២៥។
អ្នកនាំពាក្យក្រសួងការងារ លោក កត្តា អន មិនអាចទាក់ទងដើម្បីសុំការបំភ្លឺបានទេ៕
ប្រែសម្រួលពីអត្ថបទភាសាអង់គ្លេស៖ Five Unionists Reinstated After Buyers Intervene, Others Await Solution
