ព្រះរាជអាជ្ញារងសាលាដំបូងខេត្តព្រៃវែង លោក ចាន់ វណ្ណៈ បានឱ្យដឹងថា សមាជិកគណបក្សភ្លើងទៀនចំនួនបួននាក់ ដោយមានពីរនាក់ជាសមាជិកក្រុមប្រឹក្សាឃុំ-សង្កាត់ផង ត្រូវបានចាប់ខ្លួន និងឃុំខ្លួនបណ្ដោះអាសន្នទាក់ទងនឹងបទចោទក្លែងបន្លំឯកសារពាក់ព័ន្ធនឹងការបោះឆ្នោតឃុំ-សង្កាត់កាលពីឆ្នាំ២០២២។
លោក វណ្ណៈ ប្រាប់ខេមបូចាថា៖ «[យើង] បានអនុវត្តនីតិវិធីច្បាប់របស់ចៅក្រមស៊ើបសួរ»។
ចៅក្រមស៊ើបសួរបានបញ្ជាឱ្យឃុំខ្លួនសមាជិកទាំងបួននាក់ មានលោក អៀង ជា លោក ហេង សំអឿន លោកស្រី សេង វិសាល និងលោក ប៊ិន ជឹង។ អ្នកទាំងបួនប្រឈមនឹងការចោទប្រកាន់ពីបទក្លែងបន្លំឯកសារ និងប្រើប្រាស់ឯកសារក្លែងក្លាយ តាមមាត្រា២០៤ និង២០៥នៃក្រមព្រហ្មទណ្ឌ។ នេះបើតាមសេចក្ដីថ្លែងការណ៍របស់សាលាដំបូងខេត្តព្រៃវែងចុះផ្សាយកាលពីថ្ងៃពុធ។ សម្រាប់លោក អៀង ជា និងលោក ហេង សំអឿន ប្រឈមនឹងបទចោទបន្ថែមទៀតពីបទសមគំនិតក្នុងអំពើក្លែងបន្លំ។
ស្នងការខេត្តព្រៃវែង លោក ឈឿន ប៊ុនឆន មានប្រសាសន៍ថា ក្រុមប្រឹក្សាឃុំកន្សោមអក លោក អៀង ជា និងសមាជិកក្រុមប្រឹក្សាស្រុកកំពង់ត្របែក លោក ហេង សំអឿន ត្រូវបានចាប់ខ្លូនកាលពីថ្ងៃទី១២ ខែមេសា តាមដីការរបស់តុលាការ។
ចំណែកប្រធានផ្នែកហិរញ្ញវត្ថុខេត្តព្រៃវែងរបស់គណបក្សភ្លើងទៀនលោក សេង វិសាល និងក្រុមប្រឹក្សាឃុំលោក ប៊ិន ជឹង ត្រូវបានកោះហៅមកសាកសួរនៅថ្ងៃពុធ និងត្រូវបានចាប់ខ្លូន និងឃុំខ្លួននៅពេលបន្ទាប់នោះដែរ។
អ្នកដែលត្រូវចាប់ខ្លួនទាំងនេះសុទ្ធតែពាក់ព័ន្ធនឹងការរៀបចំបញ្ជីបេក្ខជនសម្រាប់ការបោះឆ្នោតកាលពីឆ្នាំ២០២២។ នេះបើតាមការឱ្យដឹងពីលោក សំ សុគង់ មេធាវីការពារក្ដីឱ្យអ្នកទាំងបួន។
អ្នកនាំពាក្យគណបក្សភ្លើងទៀន លោក គឹមសួរ ភិរិទ្ធ មានប្រសាសន៍ថា ការចាប់ខ្លួនសមាជិកបក្សនេះ គឺជាការគំរាមកំហែងដល់ស្មារតីសកម្មជន និងអ្នកគាំទ្រគណបក្សមុនការបោះឆ្នោតជាតិនាខែកក្កដា ខាងមុខ។
លោកបញ្ជាក់ថា៖ «ពួកគេមិនបានស៊ើបអង្កេតថាតើវាពិតឬអត់ ពេលមានអ្នកប្ដឹងថាបានយកឈ្មោះពួកគេដាក់ក្នុងបញ្ជីឈ្មោះ[បេក្ខជន]»។
លោកថ្លែងទៀតថា៖ «បើសិនជាករណីនេះកើតឡើងពិតមែន [ការស៊ើបអង្កេត និងការចាប់ខ្លួន] គួរតែធ្វើឡើងតាំងពីការបោះឆ្នោតឆ្នាំមុនមកម្លេះ ហេតុអ្វីបានជាពួកគេទើបតែមកចាត់វិធានការពេលនេះ វានឹងធ្វើឱ្យបរិយាកាសនយោបាយអាប់អួ»។ លោកបន្តថា៖ «នេះជាសកម្មភាពដែលបំពានទាំងទៅលើផ្លូវកាយ និងចិត្តទៅលើអ្នកគាំទ្រ និងសកម្មជនគណបក្ស រួមទាំងអ្នកបោះឆ្នោតផងដែរ»។
សភាសហភាពអ៊ឺរ៉ុបកាលពីខែមីនា បានព្រមានពីការដាក់ទណ្ឌកម្មបន្ថែមទៀតលើកម្ពុជា បើសិនជាការធ្វើទុក្ខបុកម្នេញលើសកម្មជននិងសមាជិកគណបក្សប្រឆាំងនៅតែបន្តមាន។
អ្នកនាំពាក្យគណបក្សប្រជាជនកម្ពុជាលោក សុខ ឥសាន បានច្រានចោលថា គណបក្សកាន់អំណាចធ្វើទុក្ខបុកម្នេញលើសមាជិកគណបក្សប្រឆាំង។ លោកថាច្បាប់គួរតែត្រូវបានអនុវត្តលើអ្នកដែលបានប្រព្រឹត្តខុស។ លោកមានប្រសាសន៍ថា៖ «ពេលពួកគេធ្វើខុស វាមិនមែនជាការធ្វើទុក្ខបុកម្នេញទេ»។ លោកថា៖ «វាជាការអនុវត្តច្បាប់ចំពោះអ្នកដែលបំពានច្បាប់»៕
ប្រែសម្រួលពីអត្ថបទភាសាអង់គ្លេស៖ Four Candlelight Party Members Arrested, Detained on Forgery Allegations