អស់រយៈពេល៤ខែមកហើយ ប៉ុន្តែពលករខ្មែរចំនួន៣០នាក់ នៅតែស្ថិតក្នុងប្រទេសអារ៉ាប៊ីសាអូឌីតនៅឡើយ ខណៈពួកគេបន្តជំរុញឱ្យរដ្ឋាភិបាលកម្ពុជា ពន្លឿនដំណើរការបញ្ជូនពួកគេត្រឡប់មកផ្ទះវិញ នេះបើយោងតាមការបង្ហោះសារនៅលើហ្វេសប៊ុករបស់ពលករម្នាក់កាលពីថ្ងៃទី២៤ ខែកក្កដា ឆ្នាំ២០២៤។
កាលពីខែមេសា ក្រសួងការងារ និងបណ្តុះបណ្តាលវិជ្ជាជីវៈ (MLVT) បានអះអាងថា ខ្លួននឹងសហការជាមួយស្ថានទូតកម្ពុជាប្រចាំនៅប្រទេសអេហ្ស៊ីប ដើម្បីជួយសង្គ្រោះ និងធ្វើមាតុភូមិនិវត្តន៍ពលករចំនួន៧៨នាក់ ដែលតាមចោទថា ត្រូវបានបង្ខំឱ្យធ្វើការច្រើនម៉ោង និងទទួលបានអាហារតិចតួចនៅក្នុងប្រទេសអារ៉ាប៊ីសាអូឌីត។
អ្នកស្រី ឯម បុប្ផា អាយុ៤៤ឆ្នាំ ដែលអះអាងថា អ្នកស្រីគឺជាជនរងគ្រោះនៅប្រទេសអារ៉ាប៊ីសាអូឌីត បានប្រាប់ខេមបូចានៅថ្ងៃទី២៤ ខែកក្កដា ឆ្នាំ២០២៤ ថា ចាប់តាំងពីថ្ងៃទី១៩ ខែមេសា រហូតមកដល់ពេលនេះ មិនទាន់មានដំណោះស្រាយច្បាស់លាស់ពីក្រសួងនៅឡើយ។ អ្នកស្រីបានពណ៌នាពីស្ថានភាពរបស់ពលករថា ពិបាក ព្រោះពួកគាត់មិនត្រូវបានអនុញ្ញាតឲ្យចេញទៅណាឡើយ «សូម្បីចេញក្រៅបន្ទប់ក៏មិនអនុញ្ញាតដែរ» ។ ពួកគាត់ក៏ត្រូវចំណាយ «ប្រាក់ច្រើន»ដើម្បីទិញរបស់ប្រើប្រាស់សម្រាប់ផ្ទាល់ខ្លួនពួកគាត់ផងដែរ។
អ្នកស្រី ឯម បុប្ផា បាននិយាយថា ពួកគាត់ទៅធ្វើការនៅប្រទេសអារ៉ាប៊ីសាអូឌីតតាមរយៈក្រុមហ៊ុន Cambodian Firm Fatina Manpower Co Ltd។ ពលករចំនួន២៦នាក់ក្នុងចំណោមពួកគេ កំពុងស្ថិតនៅក្នុងទីក្រុង Jeddah នៅឡើយ។
អ្នកស្រីបាននិយាយថា ក្រុមរបស់អ្នកស្រីជួបការលំបាកនៅពេលពួកគាត់ធ្លាក់ខ្លួនឈឺដោយសារកង្វះអាហារូបត្ថម្ភ ហើយអ៊ីនធឺណិតត្រូវបានកាត់ផ្តាច់ ហើយពួកគាត់មិនអាចទំនាក់ទំនងជាមួយក្រុមគ្រួសារនៅប្រទេសកម្ពុជា។
អ្នកស្រី ឯម បុប្ផា បាននិយាយថា៖ «ដោយសារវ៉ាយហ្វាយត្រូវបានផ្ដាច់ ខ្ញុំសុំលុយពីគ្រួសារខ្ញុំនៅកម្ពុជាដើម្បីទិញ [ទិន្នន័យ]» ដោយអ្នកស្រីបានបន្ថែមថា អ្នកស្រីបានចំណាយប្រាក់ពី ១២៥ ០០០ រៀល ទៅ ១៣៥ ០០០ រៀល ដើម្បីទិញអ៊ីនធឺណិតប្រើប្រាស់។
ខណៈទទូចឱ្យស្ថានទូតពន្លឿនការធ្វើមាតុភូមិនិវត្តន៍ អ្នកស្រីបាននិយាយថា គ្រួសាររបស់អ្នកស្រីជំពាក់ធនាគារឯកជនចំនួន ៣ ០០០ ដុល្លារ ហើយរស់នៅផ្ទះជួល។
អ្នកស្រី ឯម បុប្ផា បាននិយាយថា៖ «នៅពេលខ្ញុំមកធ្វើការនៅប្រទេសអារ៉ាប៊ីសាអូឌីត ខ្ញុំគិតថា វាជាការងារល្អ ហើយមិនដែលគិតថា ខ្ញុំត្រូវធ្វើការរហូតដល់១៦ ម៉ោងក្នុងមួយថ្ងៃនោះទេ។ ខ្ញុំក៏ធ្លាប់គិតដែរថា ខ្ញុំអាចរកប្រាក់បានច្រើន ដើម្បីសងបំណុលរបស់ខ្ញុំ និងសម្រាប់ការសិក្សារបស់កូនៗ ប៉ុន្តែ នេះគឺផ្ទុយពីអ្វីដែលខ្ញុំបានគិត»។
លោក ស៊ឹម ចាន់សម្ផស្ស ដែលជាស្វាមីរបស់អ្នកស្រី បុប្ផា បានសម្តែងការមិនពេញចិត្តចំពោះចំណាត់ការពន្យារពេលរបស់ក្រសួងការងារ ក្នុងការនាំភរិយា និងពលករផ្សេងទៀតត្រឡប់មកផ្ទះវិញ។
ក្រសួងការងារបានសន្យាថា នឹងបញ្ជូនពលករត្រឡប់មកវិញតាំងពី៣ទៅ៤ខែមុនម៉្លេះ ប៉ុន្តែរហូតមកដល់ពេលនេះ មិនទាន់មានដំណោះស្រាយនៅឡើយទេ។ លោកបានទាក់ទងទៅក្រសួងជាច្រើនលើក ដើម្បីសួរនាំអំពីបញ្ហានេះ ប៉ុន្តែត្រូវបានគេប្រាប់ឲ្យរង់ចាំដំណោះស្រាយ។ លោក ចាន់សម្ផស្ស បាននិយាយថា «សូម្បីតែក្រសួងឥឡូវលែងលើកទូរសព្ទខ្ញុំហើយ»។
ដូចគ្នានេះដែរ អ្នកស្រី ម៉ រស់ អាយុ៣៨ឆ្នាំ ជាស្ត្រីមេម៉ាយដែលមានកូនពីរនាក់អាយុ១៧ឆ្នាំ និង៤ឆ្នាំ ស្រមៃថា នៅពេលដែលអ្នកស្រីមកធ្វើការ អ្នកស្រីនឹងអាចរកប្រាក់ចំណូលបានគ្រប់គ្រាន់សម្រាប់ផ្គត់ផ្គង់កូនៗរបស់អ្នកស្រី ផ្ទុយទៅវិញអ្នកស្រីបានក្លាយជាជនរងគ្រោះនៃការធ្វើចំណាកស្រុកនៅប្រទេសអារ៉ាប៊ីសាអូឌីត។
អ្នកស្រីបារម្ភថា កូនទាំងពីររបស់អ្នកស្រីមិនមានប្រាក់គ្រប់គ្រាន់នៅកម្ពុជា។ ថ្វីត្បិតតែកូនស្រីច្បងរបស់អ្នកស្រីឡើងថ្នាក់ទី១២ក៏ដោយ ក៏កូនៗរបស់អ្នកស្រីបានបោះបង់ការសិក្សា ដោយសារពួកគេខ្វះថវិកា ដើម្បីបន្តការសិក្សា។
អ្នកស្រី ម៉ រស់ បាននិយាយថា៖ «ខ្ញុំគ្មានគ្រួសារ ដើម្បីពឹងពាក់នោះទេ។ ខ្ញុំបានបញ្ជូនកូនទៅឱ្យអ្នកផ្សេងជួយមើលថែ ប៉ុន្តែឥឡូវពួកគេមិនបានរៀនទេ»។
អ្នកស្រីបានបន្ថែមថា៖ «កូនរបស់ខ្ញុំនឹងបញ្ចប់ថ្នាក់ទី១២ នៅឆ្នាំនេះ ប៉ុន្តែលែងមានលុយសម្រាប់ឱ្យទៅរៀនទៀតហើយ។ ខ្ញុំសង្ឃឹមមកទីនេះ [អារ៉ាប៊ីសាអូឌីត] ដើម្បីរកប្រាក់ឱ្យកូនខ្ញុំ ដើម្បីឱ្យពួកគេអាចបន្តការសិក្សា»។
អ្នកស្រីបានទទូចឲ្យរដ្ឋាភិបាលពន្លឿនការបញ្ជូនពួកគាត់ត្រឡប់មកស្រុកកំណើតវិញ ដើម្បីឲ្យអ្នកស្រីបានឃើញកូនទាំងពីរនៅស្រុកកំណើត និងរកប្រាក់ដើម្បីសងកម្ចីធនាគារចំនួន ១០០០ដុល្លារ។
លោកស្រី ស៊ុន ម៉ាលីន ប្រធានផ្នែកសិទ្ធិស្ត្រី និងកុមារនៃសមាគមការពារសិទ្ធិមនុស្សអាដហុក ដែលបាននិងកំពុងតាមដានករណីពលករចំណាកស្រុកកម្ពុជានៅអារ៉ាប៊ីសាអូឌីត បានទទូចឱ្យរដ្ឋាភិបាល ជាពិសេសក្រសួងការងារនិងបណ្តុះបណ្តាលវិជ្ជាជីវៈពន្លឿនដំណើរការធ្វើមាតុភូមិនិវត្តន៍ ដើម្បីកុំឱ្យពួកគាត់មានបញ្ហាតទៅទៀត។
មុនពេលចេញទៅក្រៅប្រទេស ប្រជាជនមិនមានប្រាក់ ឬចំណូលសម្រាប់ផ្គត់ផ្គង់គ្រួសារ ការចំណាយលើការសិក្សារបស់កូនៗ និងការចំណាយលើសេវាសុខភាព ហើយត្រូវសងប្រាក់កម្ចីធនាគារ។ ដោយសារប្រឈមនឹងបញ្ហាហិរញ្ញវត្ថុ និងភាពក្រីក្រ ពួកគេបានជ្រើសរើសយកការធ្វើចំណាកស្រុក។
នៅពេលដែលពួកគេជួបប្រទះបញ្ហា រដ្ឋាភិបាល និងក្រសួងពាក់ព័ន្ធត្រូវទទួលបន្ទុកដ៏ធំនេះ។
លោកស្រីបានមានប្រសាសន៍ថា៖ «អ្វីដែលបងដឹង ទាក់ទងនឹងតម្រូវការរបស់គាត់ ទាក់ទងនឹង២០នាក់ជាងដែលត្រូវមក ចំណាយសំបុត្រយន្តហោះវាជាបន្ទុក ដែលបងគិតថាវាមិនច្រើនទេសម្រាប់រដ្ឋាភិបាល»។ ដោយទទូចឱ្យរដ្ឋាភិបាលពន្លឿនការធ្វើមាតុភូមិនិវត្តន៍ពលករចំណាកស្រុកមកកម្ពុជាវិញ។
លោក កត្តា អ៊ន អ្នកនាំពាក្យក្រសួងការងារបានប្រាប់ខេមបូចាថា ពលករខ្មែរចំនួន៧៨នាក់ នៅប្រទេសអារ៉ាប៊ីសាអូឌីត បានត្រឡប់មកកម្ពុជាវិញហើយ ខណៈចំនួន៣០នាក់ទៀត កំពុងរង់ចាំការវិលត្រឡប់មកវិញ។ ក្រសួងកំពុងធ្វើការយ៉ាងយកចិត្តទុកដាក់ ដើម្បីសម្រួលដល់ការវិលត្រឡប់មកកម្ពុជាវិញ។
លោក កត្តា អ៊ន បានមានប្រសាសន៍ថា៖ «ដោយមន្រ្តី និងភាគីពាក់ព័ន្ធបានប្រឹងប្រែងខ្លាំងណាស់ក្នុងការសម្របសម្រួលឱ្យពលករយើងបានវិលត្រឡប់មកវិញ ប៉ុន្តែយើងក៏ត្រូវគោរពបែបបទ និងនីតិវិធីរបស់ប្រទេសអារ៉ាប៊ីសាអូឌីតផងដែរ»។
លោកបានបន្ថែមថា ក្រសួងបានយកចិត្តទុកដាក់ដល់កម្មករ រួមទាំងការផ្តល់កន្លែងស្នាក់នៅ និងអាហារ ក៏ដូចជាការថែទាំសុខភាពផ្លូវចិត្តនិងផ្លូវកាយរបស់ពួកគេ។
ទាក់ទងនឹងចំណាត់ការផ្លូវច្បាប់ទៅលើក្រុមហ៊ុន Fatina Manpower លោក កត្តា អ៊ន បានមានប្រសាសន៍ថា៖«ក្រសួងបាន និងកំពុងស៊ើបអង្កេតក្រុមហ៊ុនបញ្ជូនពលករ។ នៅពេលបិទការស៊ើបអង្កេត ក្រសួងនឹងមានចំណាត់ការតាមច្បាប់ បើសិនរកឃើញថាក្រុមហ៊ុន និងអ្នកពាក់ព័ន្ធមានកំហុស»៕
ប្រែសម្រួលពីអត្ថបទភាសាអង់គ្លេស៖ Four Months On, 30 Cambodian Migrant Workers in Saudi Arabia Wait To Come Home
