កម្ពុជាបានដាក់ដំណើរការគម្រោងប្រព្រឹត្តិកម្មទឹកកខ្វក់ដែលចំណាយថវិកាចំនួន៩០លានដុល្លារនៅខេត្តកណ្ដាល នាំឱ្យចំនួនអាងប្រព្រឹត្តិកម្មទឹកកខ្វក់ទូទាំងប្រទេសមានសរុប១៤ទីតាំង។ គំនិតផ្តួចផ្តើមនេះត្រូវបានស្វាគមន៍ដោយអង្គការសង្គមស៊ីវិលដែលបានសរសើររដ្ឋាភិបាលសម្រាប់ការធានានូវនិរន្តរភាពបរិស្ថាន និងសុខភាពសាធារណៈ។
ពិធីបើកការដ្ឋានសាងសង់ប្រព័ន្ធលូក្រុងតាខ្មៅ ដែលផ្តល់ហិរញ្ញប្បទានតាមរយៈកម្ចីសម្បទានដោយរដ្ឋាភិបាលកូរ៉េក្នុងភាពជាដៃគូជាមួយប្រទេសកម្ពុជា គឺជាជំហានដ៏សំខាន់មួយឆ្ពោះទៅរកការពង្រីកហេដ្ឋារចនាសម្ព័ន្ធអនាម័យរបស់ប្រទេស។
ជុំវិញរឿងនេះ លោកនាយករដ្ឋមន្ត្រី ហ៊ុន ម៉ាណែត បានមានប្រសាសន៍ថា គោលដៅរបស់ជាតិមួយត្រូវបានកំណត់ដើម្បីកាត់បន្ថយឱ្យបាន៥០ភាគរយនូវការបញ្ចេញទឹកកខ្វក់ដែលមិនបានកែច្នៃទៅក្នុងអាងទឹកសាធារណៈ រួមទាំងបឹង ទន្លេ អូរ និងសមុទ្រត្រឹមឆ្នាំ២០៥០។
លោកលើកឡើងថា៖ «ក្រោយពីយើងបើកការដ្ឋាននៅក្នុង៣៦ខែ ដីនេះនឹងក្លាយជាកន្លែងចម្រុះទឹកមួយដែលជួយទៅដល់ ១ម៉ឺនខ្នងផ្ទះ […] កន្លែងអាងប្រព្រឹត្តិកម្មចម្រុះទឹកកខ្វក់នេះដើម្បីជួយទៅដល់សុខភាពពលរដ្ឋរាប់សែននាក់នៅពេលអនាគត»។
លោកជំរុញាអាជ្ញាធរនៅតាមបណ្តាខេត្តដែលជាប់ទន្លេ សមុទ្រ ធ្វើយ៉ាងណា ត្រូវធានាថា រោងចក្រ សហគ្រាសដែលទីតាំងនៅជិតនោះត្រូវបង្ហូរត្រូវធ្វើយ៉ាងណាឱ្យឆ្លងកាត់អាងប្រព្រឹត្តិកម្មឱ្យបានស្អាត។
កម្ចីសម្បទានរបស់រដ្ឋាភិបាលកូរ៉េនឹងគាំទ្រដល់កិច្ចខិតខំប្រឹងប្រែងបន្សុទ្ធទឹកស្អាតនៅក្នុងឃុំចំនួន៦ ក្នុងក្រុងតាខ្មៅ ដើម្បីឆ្លើយតបទៅនឹងការពន្លឿនគម្រោងអភិវឌ្ឍន៍ និងប្រជាពលរដ្ឋនៅក្នុងតំបន់។
រដ្ឋមន្ត្រីនៃក្រសួងសាធារណការ និងដឹកជញ្ជូន លោក ប៉ាន សូរស័ក្តិ មានប្រសាសន៍ថា រដ្ឋាភិបាលបានសាងសង់ប្រព័ន្ធលូចំនួន១៤កន្លែង និងកន្លែងចាក់សំរាមចំនួន១១កន្លែង រួមទាំងហេដ្ឋារចនាសម្ព័ន្ធលូក្នុងទីក្រុង និងទីប្រជុំជនជុំវិញតំបន់បឹងទន្លេសាប តំបន់ឆ្នេរ និងតំបន់ទេសចរណ៍សំខាន់ៗ។
លោកបន្តថា ការសាងសង់ស្ថានីយ៍ប្រព្រឹត្តិកម្មទឹកកខ្វក់ រួមមានកន្លែងប្រព្រឹត្តិកម្មដោយវិធីចម្រោះធម្មជាតិ (ស្រះរក្សាលំនឹងសំណល់) លើផ្ទៃដី៣០ហិកតា ដែលមានសមត្ថភាពបន្សុទ្ធទឹកកខ្វក់បាន ១២ ០០០ម៉ែត្រគូបក្នុងមួយថ្ងៃ។
គម្រោងនេះក៏រួមបញ្ចូលផងដែរនូវការសាងសង់ស្ថានីយ៍បូមទឹកកខ្វក់ចំនួន៧ និងបណ្តាញលូប្រភេទផ្សេងៗដែលមានប្រវែងសរុប ១២៥,៣គីឡូម៉ែត្រ ព្រមទាំងការងារតភ្ជាប់ទៅកាន់ប្រជាពលរដ្ឋចំនួន១ម៉ឺនគ្រួសារគ្របដណ្ដប់ចំនួន៦ឃុំ ដើម្បីបញ្ជូនទឹកកខ្វក់ចូលទៅក្នុងប្រព័ន្ធប្រព្រឹត្តកម្ម។
គម្រោងប្រព្រឹត្តិកម្មទឹកនេះកើតឡើងចំពេលមានការព្រួយបារម្ភកាន់តែខ្លាំងឡើងលើការបង្កើនការបំពុលទឹកពីរោងចក្រ និងអាជីវកម្ម ខណៈដែលក្រសួងបរិស្ថានបានរាយការណ៍ថា រោងចក្រ និងក្រុមហ៊ុនចំនួន២៨ បានបញ្ចេញកាកសំណល់ទៅក្នុងអាងទឹកសាធារណៈ។.
លោក សាន់ ម៉ាឡា ប្រធានកម្មវិធីបណ្តាញ និងតស៊ូមតិនៃអង្គការភាពជាដៃគូដើម្បីបរិស្ថាន និងកាអភិវឌ្ឍបានកោតសរសើររដ្ឋាភិបាលចំពោះការពង្រីកហេដ្ឋារចនាសម្ព័ន្ធកែច្នៃទឹកកខ្វក់ស្របតាមការអភិវឌ្ឍដែលកំពុងបន្តរបស់កម្ពុជា។
លោកបានបន្តថា៖ «វិស័យទេសចរណ៍គឺជាផ្នែកមួយនៃសេដ្ឋកិច្ចរបស់ប្រទេសកម្ពុជា ប៉ុន្តែប្រសិនបើប្រភពទឹកក្នុងតំបន់ទេសចរណ៍សំខាន់ៗត្រូវបានបំពុល វានឹងបញ្ឈប់ភ្ញៀវទេសចរមិនឱ្យមកប្រទេសរបស់យើង»។
លោក ម៉ាឡា បានកត់សម្គាល់ថា វាពិតជាមានសារៈសំខាន់ណាស់ក្នុងការថែរក្សាបឹងធម្មជាតិ។ ក្នុងនោះលោកជំរុញរដ្ឋាភិបាលកុំឱ្យបំពេញ ឬផ្ទេរដីទៅឱ្យវិស័យឯកជនដើម្បីធ្វើការអភិវឌ្ឍ។
លោក ម៉ាឡា បានមានប្រសាសន៍ថា៖ «បឹងធម្មជាតិទាំងនេះ ជាមួយនឹងជីវៈចម្រុះរបស់វា បានដើរតួនាទីយ៉ាងសំខាន់ក្នុងការចម្រោះជាតិពុល ដោយសារកម្ពុជានៅតែខ្វះខាតកន្លែងប្រព្រឹត្តិកម្មទឹកកខ្វក់ដ៏ទូលំទូលាយ»។
ដោយឡែកលោកក៏បានកត់សម្គាល់ដែរថា កិច្ចខិតខំប្រឹងប្រែងរបស់រដ្ឋាភិបាលក្នុងការបញ្ឈប់ការបញ្ចេញទឹកកខ្វក់ដែលមិនបានកែច្នៃចូលសមុទ្រ បានកើតឡើងដោយសារតែសកម្មភាពនិងការតស៊ូមតិពីសកម្មជនបរិស្ថាននៃអង្គការមាតាធម្មជាតិកម្ពុជា៕
ប្រែសម្រួលពីអត្ថបទភាសាអង់គ្លេស៖ Fourteen Wastewater Treatment Plants Under Construction Nationwide, As Activist Rep Calls for Preservation of Natural Lakes
