រដ្ឋាភិបាលចោទប្រកាន់អ្នកសារព័ត៌មានមួយចំនួនប្រព្រឹត្តខុសវិជ្ជាជីវៈ និងអនុញ្ញាតឲ្យមានចំណាត់ការផ្លូវច្បាប់

ក្រសួងព័ត៌មានកាលពីថ្ងៃចន្ទកន្លងបានជំរុញឲ្យមានចំណាត់ការផ្លូវច្បាប់ប្រឆាំងនឹងអ្នកសារព័ត៌មាន ដែលខ្លួនអះអាងថា ចែកចាយព័ត៌មានក្លែង ឬមិនប្រព្រឹត្តតាមក្រមសីលធម៌។ បញ្ញា ឆព័ណ្ណ
ក្រសួងព័ត៌មានកាលពីថ្ងៃចន្ទកន្លងបានជំរុញឲ្យមានចំណាត់ការផ្លូវច្បាប់ប្រឆាំងនឹងអ្នកសារព័ត៌មាន ដែលខ្លួនអះអាងថា ចែកចាយព័ត៌មានក្លែង ឬមិនប្រព្រឹត្តតាមក្រមសីលធម៌។ បញ្ញា ឆព័ណ្ណ
Share on facebook
Share on twitter
Share on linkedin
Share on telegram
Share on whatsapp

ក្រសួង​ព័ត៌មាន​ព្រមាន​​ប្រើ​ចំណាត់ការ​ផ្លូវ​ច្បាប់​ប្រឆាំង​នឹង​អ្នកសារព័ត៌មាន​រូប​ណា​ ដែល​ខ្លួន​អះអាង​ថា ចែកចាយ​ព័ត៌មាន​ក្លែងក្លាយ ឬ​ប្រព្រឹត្ត​ខុស​ពី​ក្រម​សីលធម៌​អំឡុងពេល​ការ​រាតត្បាត​ជំងឺ​កូវីដ១៩។ ការ​ព្រមាន​នេះ​ត្រូវ​បាន​ធ្វើ​ឡើង​ ខណៈពេល​មាន​ការ​ធ្វើទុក្ខបុកម្នេញ​ជា​បន្តបន្ទាប់​មក​លើ​អ្នកសារព័ត៌មាន​នៅ​ក្នុង​ប្រទេស។ ​​

ក្រសួង​បាន​លើកឡើង​ថា ខ្លួន​បាន​សង្កេត​ឃើញ​មាន «អ្នកសារព័ត៌មាន​មួយ​ក្រុម​តូច» ដែល​មិន​បាន​​រាយការណ៍​​ត្រឹមត្រូវ​ពី​កិច្ចប្រឹងប្រែង​របស់​រដ្ឋាភិបាល​ដើម្បី​ប្រយុទ្ធប្រឆាំង​នឹង​ការ​រាតត្បាត​ជំងឺ​កូវីដ១៩ ឬ​កំពុង​ចែកចាយ​ព័ត៌មាន​ក្លែងក្លាយ ដោយ​បង្ក​ឲ្យ​មាន​ការ​ព្រួយបារម្ភ និង​​ការ​យល់ខុស​ក្នុង​ចំណោម​ប្រជាពលរដ្ឋ​ ឬ​បង្ក​ឲ្យ​មាន​ការ​សង្ស័យ​មក​លើ​ក្រុម​អាជ្ញាធរ។

​សេចក្តីជូនដំណឹង​ចេញ​ដោយ​ក្រសួងព័ត៌មាន​កាល​ពី​ថ្ងៃ​ចន្ទ​បាន​សរសេរ​ថា៖ «ក្នុង​ករណី​បុគ្គលណា​ដែល​រង​ផលប៉ះពាល់​ពី​បញ្ហា​ដូច​មាន​ជម្រាបជូន​ខាង​លើ អគ្គនាយកដ្ឋាន​ព័ត៌មាន​ និង​សោតទស្សន៍​នៃ​ក្រសួងព័ត៌មាន​ស្នើ​ឲ្យ​អាជ្ញាធរ​មាន​សមត្ថកិច្ច​ចាត់វិធានការ​ច្បាប់ ដោយ​មិន​បាច់​ជូន​ដំណឹង​មក​ក្រសួង​ព័ត៌មាន​ជា​មុន​ឡើយ»

សេចក្តីជូនដំណឹង​ខាង​លើ​មិន​បាន​បញ្ជាក់​លម្អិត​ថា​ ក្រុម​អ្នកសារព័ត៌មាន​មួយ​ចំនួន​​តូច​ណា​មួយ​នោះ​ទេ ប៉ុន្តែ​បាន​អះអាង​ថា មាន​អ្នកសារព័ត៌មាន​ដែល​ជំរិត​ទារ​ប្រាក់​​ជា​ថ្នូរ​ពី​ប្រជាពលរដ្ឋ​ និង​បង្ក​ការ​ប៉ះពាល់​​ដល់​សណ្តាប់ធ្នាប់​សារធារណៈ និង​ថា អំពើ​ដូចនេះ​គឺ​ មិនអាច​ទទួល​យក​បាន​នោះ​ទេ។​

យោងទៅ​តាម​អង្គការ​គាំពារ​សិទ្ធិ​មនុស្ស​​ ​រដ្ឋាភិបាល​​កម្ពុជា​បាន​ចាត់​គោលដៅ​មក​លើ​អ្នកសារព័ត៌មាន និង​សេរីភាព​ក្នុង​ការ​បញ្ចេញ​មតិ​មុន​ពេល​ និង​អំឡុងពេល​មាន​ការ​រាតត្បាត​ជំងឺ​កូវីដ១៩។ រដ្ឋាភិបាល​បាន​ចាប់ខ្លួន​អ្នកសារព័ត៌មាន​មួយ​ចំនួន​ពាក់ព័ន្ធ​នឹង​ការ​រាយការណ៍​ព័ត៌មាន និង​ចោទប្រកាន់​ពី​បទ​​​ប្រព្រឹត្ត​សកម្មភាព​ខុស​ច្បាប់​ប្រឆាំង​នឹង​អ្នកសារព័ត៌មាន​មួយ​ចំនួន​ទៀត។ ​

នៅ​ក្នុង​សន្ទស្សន៍​សេរីភាព​សារព័ត៌មាន​ពិភពលោក​ឆ្នាំ ២០២០ អង្គការ​អ្នកសារព័ត៌មាន​គ្មាន​ព្រំដែន​ «Reporters Without Borders» បាន​បញ្ជាក់​លម្អិត​ពី​បែបផែន​ដែល​​រដ្ឋាភិបាល​ប្រើប្រាស់​វិបត្តិ​ការ​រាតត្បាត​ជំងឺ​ដើម្បី​បំបិទ​សំឡេង​ក្រុម​អ្នក​រិះគន់ និង​អង្គភាព​ព័ត៌មាន ដោយ​រដ្ឋាភិបាល​នៅ​ប្រទេស​មួយ​ចំនួន​បាន​ព្យាយាម​រឹតត្បិត​​លើ​ការ​រាយការណ៍​ទាក់ទិន​នឹង​ការ​ឆ្លើយតប​របស់​រដ្ឋាភិបាល​ទៅ​នឹង​ការ​រីករាលដាល​ជំងឺ។

លោក​ មាស សុភ័ណ្ឌ​ អ្នកនាំពាក្យ​ក្រសួង​ព័ត៌មាន​ បានមានប្រសាសន៍​កាល​ពី​ថ្ងៃ​អង្គារ​ថា ក្រសួង​បាន​ចុះ​នូវ​សេចក្តីថ្លែងការណ៍​ដើម្បី​ក្រើន​រំឭក​ដល់​អ្នកសារព័ត៌មាន​គ្រប់រូប​ឲ្យ​គោរព​ច្បាប់ និង​ចៀសវាង​ពី​ការ​ប្រព្រឹត្ត​អំពើ​ពុករលួយ ដូចជា ជំរិត​​ទារ​ប្រាក់​ដើម្បី​បំបិទ​ព័ត៌មានជាដើម។ ​

លោក មាស ​សុភ័ណ្ឌ​ បាន​មាន​ប្រសាសន៍​ថា៖ «សេចក្តីជូនដំណឹង គឺ​ដើម្បី​​ក្រើន​រំឭក​ដល់​អ្នកសារព័ត៌មាន​មួយ​ក្រុម​តូច ដែល​បាន​ប្រព្រឹត្ត​អ្វី​មួយ​ខុសច្បាប់ និង​ខុស​វិជ្ជាជីវៈ​សារព័ត៌មាន និង​ឲ្យ​ត្រឡប់​មក​បំពេញ​តួនាទី​របស់​ខ្លួន​ឲ្យ​បាន​សមស្រប និង​ផ្អែក​លើ​ច្បាប់​ ក្រមសីលធម៌ និង​វិជ្ជាជីវៈ»

មាន​ការ​ចាប់ខ្លួន និង​ការ​កាត់ទោស​អ្នកសារព័ត៌មាន​​មួយ​ចំនួន​ផង​ដែរ​នា​ឆ្នាំ​នេះ ដែល​រួម​មាន​ការ​បង្ខំ​ឲ្យ​ស្ថានប័ន​​បោះពុម្ព​សារព័ត៌មាន​​ខ្លះ​បិទទ្វារ​ក្នុង​រយៈពេល​បី​ឆ្នាំ​ចុងក្រោយ​នេះ។ ​​​

លោក សុវណ្ណ រិទ្ធី ដែល​ដឹកនាំ​បណ្តាញ​ព័ត៌មាន​ល្បី​ឈ្មោះ​តាម​បណ្តាញ​សង្គម​ហ្វេសប៊ុក​ឈ្មោះ​ថា TVFB ទទួល​បាន​ការ​ព្យួរ​ទោស​​ជាប់​ពន្ធនាគារ​រយៈពេល​១៨​ខែ​កាល​ពី​ខែ​តុលា ជុំវិញ​​ការ​រាយការណ៍​ឡើងវិញ​នូវ​សម្តីដើម​​របស់​លោក​នាយករដ្ឋមន្រ្តី​ ហ៊ុន សែន។ ចាងហ្វាង​កាសែត​លោក រស់ សុឃិត ត្រូវ​បាន​ផ្តន្ទាទោស​ឲ្យ​ជាប់ពន្ធនាគារ​រយៈពេល​ ១៨​ខែ​​ពី​ពាក់ព័ន្ធ​នឹង​ការ​សរសេរ​បង្ហោះ​ចំណងជើង​​បែប​បន្ថែម​ទម្ងន់​លើ​អត្ថបទ​ព័ត៌មាន​នៅ​តាម​​បណ្តាញ​សង្គម​ហ្វេសប៊ុក ហើយ​កំពុង​ជាប់​នៅ​​ក្នុង​ពន្ធនាគារ​ព្រៃស។ ​

ចាងហ្វាង​វិទ្យុ​ លោក សុខ ឧត្តម ​កំពុង​រង់ចាំ​សាលក្រម​ពី​បទ​ញុះញង់ ដែល​លោក​ត្រូវ​បាន​ចោទប្រកាន់​ពី​បទ​ញុះញង់​ឲ្យ​អ្នកភូមិ​ប្រឆាំង​នឹង​យោធា​ពាក់ព័ន្ធ​នឹង​ករណី​​ជម្លោះ​ដីធ្លី។

អ្នកសារព័ត៌មាន​អនឡាញ​ប្រចាំ​ការ​តាម​ខេត្ត​ចំនួន​បី​រូប​ត្រូវ​បាន​ចាប់ខ្លួន​កាល​ពី​សប្តាហ៍​មុន​ពី​បទ​ជំរិត​ទារប្រាក់ និង​ក្លែងបន្លំ។ អាជ្ញាធរ​មិន​បាន​បញ្ជាក់​លម្អិត​ពី​ករណី​នេះ​​នោះ​ទេ ដែល​ពាក់ព័ន្ធ​នឹង​អ្នកសារព័ត៌មាន​ទាំង​បី​រូប​​នេះ​សន្យា​មិន​រាយការណ៍​ពីកាប់​ឆ្ការព្រៃ​យក​ដី​ខុស​ច្បាប់​នៅ​ខេត្ត​ក្រចេះ​ ជា​ថ្នូរ​នឹង​ប្រាក់។

កាល​ពី​ឆ្នាំ ២០១៧ កាសែត The Cambodia Daily ត្រូវ​បាន​បង្ខំ​ឲ្យ​បិទទ្វារ បន្ទាប់​ពី​បដិសេធ​មិន​បង់​​ពន្ធ​ដ៏​ច្រើន​លើសលប់។ ប៉ុន្មាន​សប្តាហ៍​ក្រោយ​មក​ វិទ្យុអាស៊ីសេរី​បាន​ប្រកាស​បិទ​ការិយាល័យ​របស់​ខ្លួន​នៅ​​ក្រុង​ភ្នំពេញ​ពាក់ព័ន្ធ​នឹង​ការ​ព្រួយបារម្ភ​ពី​សន្តិសុខ និង​បញ្ហា​ពន្ធ​ផង​ដែរ។ សារព័ត៌មាន The Phnom Penh Post ត្រូវ​បាន​លក់​កាល​ពី​ខែ​ឧសភា ឆ្នាំ​២០១៨។

 ទៅ​កាន់​អ្នកវិនិយោគ​មួយ​រូប​​ពី​ម៉ាឡេស៊ី។

លោក​ ខៀវ កូឡា អ្នក​នាំពាក្យ​ក្លឹប​អ្នកសារព័ត៌មាន​កម្ពុជា​ បាន​មានប្រសាសន៍​ថា លោក​គាំទ្រ​សេចក្តីជូនដំណឹង​របស់​ក្រសួង​ព័ត៌មាន​ ដោយ​លើកឡើង​ថា បណ្តាញ​ផ្សព្វផ្សាយ​ព័ត៌មាន​មួយ​ចំនួន​បាន​ធ្វើ​សកម្មភាព​ប៉ះពាល់ដល់ការអនុវត្តច្បាប់របស់អាជ្ញាធរមានសមត្ថកិច្ច។​

លោក​ ខៀវ កូឡា ​បាន​ញែក​ជា​បញ្ហា​ប្រឈម​ពីរ​ចំពោះ​អ្នកសារព័ត៌មាន៖ កំហុស​ធ្វើ​ឡើង​ពី​ការ​ចុះ​ផ្សាយ​ព័ត៌មាន និង​​អ្នក​សារព័ត៌មាន​មួយ​ចំនួន​ប្រព្រឹត្ត​បទឧក្រិដ្ឋដោយខ្លួនឯង។ ជាមួយ​នឹង​កំហុស​នៅ​ក្នុង​ការ​ចុះ​ផ្សាយ​ព័ត៌មាន ​​ច្បាប់​ស្តីពី​សារព័ត៌មាន​គួរ​ត្រូវ​បាន​យក​មក​អនុវត្ត ប៉ុន្តែ​ចំពោះ​ករណី​ទី​ពីរ​ ចំណាត់ការ​ផ្លូវ​ច្បាប់​គួរ​ត្រូវ​បាន​ធ្វើ​ឡើង។

លោក ​កូឡា​ ​បាន​មានប្រសាសន៍​ថា៖ «តាមខ្ញុំ​សង្កេត​ឃើញ​ថា នៅ​ពេល​ពាក់ព័ន្ធ​ក្នុងការផ្សព្វផ្សាយព័ត៌មាន ក្លឹបរបស់ខ្ញុំ នឹងធ្វើការរឿងហ្នឹងភ្លាម ប៉ុន្តែ​ប្រសិន​បើ​មិន​ពាក់ព័ន្ធ​ផ្សព្វផ្សាយព័ត៌មាន ​ក្លឹប​របស់​យើង​ នឹង​មិន​ធ្វើការ​លើ​រឿង​នេះ​ទេ»

លោកស្រី​ចក់ សុភាព​​ នាយិកា​មជ្ឈមណ្ឌល​សិទ្ធិមនុស្ស​កម្ពុជា (CCHR) បាន​និយាយ​ថា ​រដ្ឋាភិបាល​គួរ​តែ​អនុញ្ញាត​ឲ្យ​បណ្តាញ​ផ្សព្វផ្សាយ​រាយការណ៍​ពី​គំនិត​បែប​ចម្រុះ​​គ្នា និង​ធ្វើ​ព័ត៌មាន​បែប​ស៊ើបអង្កេត​អំឡុងពេល​វិបត្តិសុខភាព​សាធារណៈ ជាជាង​ព្រមាន​​ពី​ចំណាត់ការ​ផ្សេងៗ។

លោកស្រី​បាន​លើកឡើង​ថា សេចក្តីថ្លែងការណ៍​របស់​ក្រសួងព័ត៌មាន​នឹង​មាន​ផលវិបាក «យ៉ាងខ្លាំង»​មក​លើ​អ្នកសារព័ត៌មាន​ឯករាជ្យ ដែល​ពួកគេ​​ត្រូវ​គិត​ពិចារណា​ឡើងវិញ​ពី​ការ​រាយការណ៍​​របស់​ខ្លួន និង​​ត្រូវ​ព្រួយបារម្ភ​ពី​ចំណាត់ការ​​ផ្លូវ​ច្បាប់​ពី​សំណាក់​រដ្ឋាភិបាល។

​ លោកស្រី​​ចក់ សុភាព​ មានប្រសាសន៍ថា៖ «​ខណៈ​ព័ត៌មាន​មិន​​ពិត​​ដែល​បង្ក​ឲ្យ​មាន​ការ​ប៉ះពាល់​​​ផ្សេងៗគួរ​តែ​ត្រូវ​បង្រ្កាប ការ​ប្រយុទ្ធ​ប្រឆាំង​នឹង​ព័ត៌មាន​មិន​ពិត​​គួរ​តែ​ត្រូវ​បាន​ធ្វើ​ឡើង​ដោយ​សច្ចភាព និង​មិន​ត្រូវ​បាន​ប្រើប្រាស់​ជា​ហេតុផល​ដើម្បី​បំបិទសេរីភាព​នៅ​ក្នុង​ការ​បញ្ចេញ​មតិ​យោបល់ និង​សំឡេង​រិះគន់​នោះ​ទេ។ រដ្ឋាភិបាល​កម្ពុជា​គួរ​តែ​ពិចារណា​លើ​ប្រើប្រាស់​វិធានការ​ផាកពិន័យ​ក្នុង​ទម្ងន់​ស្រាលជាង​នេះ»

ប្រែសម្រួលពីអត្ថបទភាសាអង់គ្លេស៖ CamboJA News

Share on facebook
Share on twitter
Share on linkedin
Share on telegram
Share on whatsapp
ព័ត៌មានថ្មីៗ »
អត្ថបទពេញនិយម »