សាលាដំបូងរាជធានីភ្នំពេញបានបើកសវនាការលើសំណុំរឿងអ្នករិះគន់រាជរដ្ឋាភិបាល លោក នី ណាក់ ដែលត្រូវបានចោទប្រកាន់ពីបទបរិហាកេរ្តិ៍ជាសាធារណៈ និងញុះញង់ឱ្យមានការរើសអើង ដែលការចោទប្រកាន់នេះធ្វើឡើង ក្រោយលោក បានបង្ហោះលើទំព័រហ្វេសប៊ុកផ្ទាល់ខ្លួន អំពីបុគ្គលម្នាក់ឈ្មោះ ហេង សួរ បានទទួលដី៩១ហិកតានៅខេត្តកំពតពីរដ្ឋាភិបាល។
មេធាវីតំណាងឱ្យ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានស្នើឱ្យមានការពិន័យធ្ងន់ធ្ងរ រួមទាំងការហាមលោក ណាក់ មិនឱ្យចាកចេញពីប្រទេស និងទាមទារឱ្យសងសំណងចំនួន៥០ម៉ឺនដុល្លារ។
លោក ណាក់ ដែលជាអ្នកផលិតជីកសិកម្ម និងជាអ្នកលក់កូនឈើហូបផ្លែច្រើនមុខ ត្រូវបានចោទប្រកាន់ និងឃុំខ្លួននៅថ្ងៃទី៥ ខែមករា ឆ្នាំនេះ បន្ទាប់ពីលោក ហេង សួរ បានដាក់ពាក្យប្តឹងលើរូបគាត់ចំពោះការអត្ថាធិប្បាយ។
ដោយស្លៀកក្នុងសំលៀកបំពាក់ពណ៌ទឹកក្រូច នៅក្នុងបន្ទប់សវនាការ លោក ណាក់ បានសារភាពថា លោកបានបង្ហោះសាររិះគន់នៅលើទំព័រហ្វេសប៊ុក «Iman-KH» ដោយរៀបរាប់ថា រដ្ឋាភិបាលសម្រេចប្រគល់ដី៩១ហិកតានៅខេត្តកំពត ឲ្យទៅបុគ្គលឈ្មោះ «ហេង សួរ»។ ទោះយ៉ាងណា លោកណាក់មិនបានកំណត់អត្តសញ្ញាណលោក ហេង សួរ ជារដ្ឋមន្ត្រីទេ។
លោកណាក់ប្រាប់តុលាការថា៖ «ខ្ញុំទទួលស្គាល់ការបង្ហោះទាំងនោះ ដោយសារខ្ញុំចង់ផ្សព្វផ្សាយព័ត៌មានបន្ថែមដល់សាធារណជនឱ្យដឹងថា រដ្ឋបានប្រគល់ដីឱ្យឯកជនធ្វើជាម្ចាស់កម្មសិទ្ធិ។ [ខ្ញុំ] មិនមានចេតនាញុះញង់ទេ»។
លោកថា៖ «ខ្ញុំសុំឲ្យចៅក្រមទម្លាក់បទចោទញុះញង់ និងបរិហារកេរ្តិ៍។ ខ្ញុំគ្រាន់តែបង្ហាញពីការបាត់បង់ធនធានធម្មជាតិប៉ុណ្ណោះ»។
លោកបានយល់ស្របថា លោកមិនបានផ្ទៀងផ្ទាត់ថាតើបុគ្គលដែលលោកដាក់ឈ្មោះនោះជារដ្ឋមន្ត្រី ឬបុគ្គលផ្សេងទៀតនោះទេ ប៉ុន្តែលោកបានចែករំលែកសារជាថ្មី បន្ទាប់ពីសារព័ត៌មាន ឌឹ ខេមបូឌា ដេលីផ្សព្វផ្សាយ ដែលភ្ជាប់ជាមួយរូបភាពរបស់លោករដ្ឋមន្ត្រី ហេង សួរ។
លោក កត្តា អ៊ន អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ធ្លាប់បានបញ្ជាក់ថា រដ្ឋាភិបាលបានផ្តល់ដីនេះ មិនមែនជាលោក ហេង សួរ រដ្ឋមន្ត្រីក្រសួការងារទេ។
នៅក្នុងករណីដាច់ដោយឡែកមួយទៀត លោក ណាក់ ត្រូវបានកាត់ទោសឱ្យជាប់ពន្ធនាគាររយៈពេល១៨ខែ ក្រោមការចោទប្រកាន់ពីបទញុះញង់ឱ្យមានការរើសអើងក្នុងខែសីហា ឆ្នាំ២០២១ ដោយសារ «ការប្រមាថលើសុន្ទរកថា» របស់អតីតនាយករដ្ឋមន្ត្រី លោក ហ៊ុន សែន។
លោក លី រដ្ឋធី មេធាវីការពារក្តីរបស់រដ្ឋមន្ត្រីក្រសួងការងារ លោក ហេង សួរ បានស្នើឱ្យចៅក្រមកាត់ទោស លោក ណាក់ ឱ្យធ្ងន់ធ្ងរជាអតិបរមា ការមិនរាងចាលក្នុងបទមជ្ឍឹម ជាពិសេសការហាមឃាត់គាត់មិនឱ្យចាកចេញពីកម្ពុជា។
លោកថ្លែងថា៖ «ខ្ញុំ [ស្នើ] ចៅក្រមពិចារណាការហាមគាត់មិនឱ្យចាកចេញពីប្រទេសព្រោះអ្នករិះគន់ចង់បានប្រជាប្រិយភាពដើម្បីទៅរស់នៅបរទេស»។
លោកមេធាវី ក៏បានស្នើឱ្យតុលាការពិចារណាលើការបិទទំព័រហ្វេសប៊ុក របស់គាត់ផងដែរ ព្រោះទំព័រហ្វេសប៊ុកនេះជាដើមហេតុនៃ «ចេតនាប្រព្រឹត្តបទល្មើស» និងទាមទារសំណងចំនួន២ពាន់លានរៀល (៥០ ម៉ឺនដុល្លារ)។
ព្រះរាជអាជ្ញារង សេង ហៀង បានស្នើឱ្យចៅក្រមពិចារណាលើការផ្តន្ទាទោសជនជាប់ចោទដែលបានបង្ហោះ «ព័ត៌មានមិនពិតដើម្បីមួលបង្កាច់» លើសមាជិករដ្ឋាភិបាល ដែលជារដ្ឋមន្រ្តីក្រសួងការងារនេះ គឺហួសពីសិទ្ធិក្នុងការបញ្ចេញមតិរបស់គាត់។
លោកមានប្រសាសន៍ថា៖ «វាមិនមែនជាការអនុវត្តសិទ្ធិសេរីភាពក្នុងការបញ្ចេញមតិទេ ប៉ុន្តែវាជាការញុះញង់ និងបង្កាច់ព័ត៌មានមិនពិត»។ លោក ហៀង បន្ថែមថា៖ «វាមិនគ្រាន់តែប៉ះពាល់ដល់កិត្តិយសរដ្ឋមន្ត្រី ហេង សួរ ប៉ុណ្ណោះទេ ប៉ុន្តែវាជាការវាយប្រហារមកលើសមាជិករដ្ឋាភិបាលដែរ»។
ទន្ទឹមនេះ មេធាវីការពារក្តីចុងចោទ លោក ជូង ជូងី បានស្នើឱ្យចៅក្រមទម្លាក់ចោលការចោទប្រកាន់ទាំងអស់លើកូនក្តីរបស់លោក ដោយកត់សម្គាល់ថា មិនមានធាតុផ្សំណាមួយសម្រាប់ដាក់ទោសកូនក្តីរបស់លោក ព្រោះលោក នី ណាក់ មិនបានបញ្ជាក់ឈ្មោះ ឬបរិហារកេរ្តិ៍លើរដ្ឋមន្ត្រីក្រសួងការងានោះទេ។
លោកបានិយាយថា៖ «វាមិនមែនជាការញុះញង់ឲ្យមានអំពើហិង្សាលើសញ្ជាតិ ឬជាតិសាសន៍ទេ ព្រោះគាត់គ្រាន់តែបង្ហាញពីការព្រួយបារម្ភរបស់គាត់ចំពោះការប្រគល់ដីរបស់រដ្ឋទៅធ្វើជាកម្មសិទ្ធិឯកជនប៉ុណ្ណោះ»។
លោក ជូងី បន្ថែមថា៖ «ខ្ញុំឃើញថា គាត់មិនមានន័យបង្ខូចឈ្មោះបុគ្គល ហេង សួរ ទេ។ នៅពេលដែលកូនក្តីរបស់លោកបង្ហោះព័ត៌មាននោះ មានមនុស្សជាច្រើនបានបញ្ចេញមតិ និងរិះគន់ ដូច្នេះអ្នកបញ្ចេញមតិគួរតែទទួលខុសត្រូវជំនួសវិញ»។
លោក ជូងី បានឆ្លើយតបទៅនឹងសំណួរអំពីសំណើនៃការហាមឃាត់ការធ្វើដំណើរថា៖ «វាប្រហែលនឹងមានការកាត់ទោសបន្ថែម ប៉ុន្តែវាអាស្រ័យលើការសម្រេចរបស់ចៅក្រម»។
លោក នី សុខា ប្រធានសមាគមការពារសិទ្ធិមនុស្សអាដហុក បានថ្លែងថា លោកមិនមានសុទិដ្ឋិនិយមថា លោក នី ណាក់ នឹងត្រូវរួចផុតពីការចោទប្រកាន់នោះទេ ដោយសារតែស្ថានភាពសេរីភាពនៃការបញ្ចេញមតិនៅកម្ពុជានៅតែត្រូវបានរឹតត្បិត រួមទាំងសេរីភាពធ្វើនយោបាយផងដែរ។
លោកមានប្រសាសន៍ថា៖ «ប្រជាពលរដ្ឋចង់មានសិទ្ធិសេរីភាពជាមូលដ្ឋាន ព្រោះប្រទេសយើងជាប្រទេសប្រជាធិបតេយ្យ។ តុលាការមិនគួរពិចារណាដាក់ទណ្ឌកម្មពលរដ្ឋ ដែលធ្វើឱ្យប៉ះពាល់ដល់សេរីភាពបញ្ចេញមតិរបស់ពលរដ្ឋនោះទេ»។
លោកបានកត់សម្គាល់ឃើញថា ការទាមទារប្រាក់សំណងគឺ «លើសកម្រិត» ដែលនឹងធ្វើឱ្យប្រពលរដ្ឋខ្លាចរអាពីការអនុវត្តសិទ្ធិសេរីភាពក្នុងការបញ្ចេញមតិ។
ចៅក្រមនឹងប្រកាសសាលក្រមរបស់លោក នី ណាក់ នៅថ្ងៃទី ២២ ខែសីហា ខាងមុខនេះ។
ប្រែសម្រួលពីអត្ថបទភាសាអង់គ្លេស៖ Heavier Sentence Likely For Outspoken Government Critic Ny Nak Over Labor Minister Case
