សមាគមសម្ព័ន្ធអ្នកសារព័ត៌មានកម្ពុជា

លោក ហ៊ុន សែន បញ្ជាក់ជំហរទៅបំពេញទស្សនកិច្ចនៅមីយ៉ាន់ម៉ា ទោះមានការរិះគន់ច្រើន

លោកនាយករដ្ឋមន្ត្រី ហ៊ុន សែន ជួបជាមួយរដ្ឋមន្ត្រីការបរទេសតំណាងរបបយោធាមីយ៉ាន់ម៉ា លោក វុនណា ម៉ោងលីន (Wanna Maung Lwin) នៅវិមានសន្ដិភាពក្នុងទីក្រុងភ្នំពេញ។ រូបភាពថតនៅថ្ងៃទី៧ ខែធ្នូ ឆ្នាំ ២០២១ ហើយបង្ហោះនៅលើហ្វេសប៊ុកលោកនាយករដ្ឋមន្ត្រី។
លោកនាយករដ្ឋមន្ត្រី ហ៊ុន សែន ជួបជាមួយរដ្ឋមន្ត្រីការបរទេសតំណាងរបបយោធាមីយ៉ាន់ម៉ា លោក វុនណា ម៉ោងលីន (Wanna Maung Lwin) នៅវិមានសន្ដិភាពក្នុងទីក្រុងភ្នំពេញ។ រូបភាពថតនៅថ្ងៃទី៧ ខែធ្នូ ឆ្នាំ ២០២១ ហើយបង្ហោះនៅលើហ្វេសប៊ុកលោកនាយករដ្ឋមន្ត្រី។

លោកនាយក​រដ្ឋ​មន្ត្រី​ ហ៊ុន សែន នៅ​ថ្ងៃ​ពុធនេះ​បាន​បញ្ជាក់​ជា​ថ្មី​ពី​ចេត​នា​របស់​លោក​ក្នុង​ការ​ទៅ​បំពេញ​ទស្សនកិច្ច​នៅ​ប្រទេស​មីយ៉ាន់ម៉ា ដើម្បីជួប​ជាមួយ​មេ​ដឹក​នាំ​របបយោធា ដែល​ឡើង​កាន់​អំណាច​កាលពីខែ​កុម្ភៈ តាម​រយៈ​ការ​ធ្វើ​រដ្ឋ​ប្រហារ​។ លោក​នាយក​រដ្ឋ​មន្ត្រី ក៏​បាន​ថ្លែង​ការពារ​កម្ពុជា ដែល​នឹង​ក្លាយ​ជា​ប្រធាន​អាស៊ាន​ដែរថា ប្រទេសចិន​មិន​មាន​ឥទ្ធិ​ពល​លើ​ជំហរ​របស់​កម្ពុជា​​ទាក់​ទង​នឹង​ជម្លោះ​នៅ​សមុទ្រ​ចិន​ខាង​ត្បូង​នោះ​ដែរ​។​

លោកនាយក​រដ្ឋ​មន្ត្រី​ បាន​ប្រកាស​កាល​ពី​សប្ដាហ៍​មុន​ថា លោក​នឹង​ទៅ​ទស្សនកិច្ច​ពីរ​ថ្ងៃ​នៅ​ប្រទេស​មីយ៉ាន់ម៉ា ពី​ថ្ងៃទី​៧ ដល់​ទី​៨ ខែមករា សម្រាប់​អ្វី​ដែល​លោក​ហៅ​ថា​ជាការ​ខិត​ខំ​ប្រឹង​ប្រែង​ស្ដារ​ដំណើរ​ការ​អាស៊ាន​ឲ្យ​វិល​ទៅ​រក​ភាព​ប្រក្រតី​ឡើង​វិញ។ មន្ត្រី​​ជាន់​ខ្ពស់​ក្រ​សួង​ការ​បរទេស​អាមេរិក​ លោក Derek Chollet ដែល​កំពុង​បំពេញ​ទស្សនកិច្ច​នៅ​ក្នុង​តំបន់​ បាន​ជំរុញ​ឲ្យ​កម្ពុជា​កុំ​ធ្វើ​សម្បទាន​ណាមួយ​ដល់​របបយោធា​មីយ៉ាន់​ម៉ា។​

លោកនាយក​រដ្ឋ​មន្ត្រី​ បញ្ជាក់​ក្នុង​ពិធី​សម្ពោធ​សណ្ឋាគារ​ថ្មី​មួយ​ក្នុង​ទីក្រុង​ភ្នំពេញ​នៅ​ថ្ងៃ​ពុធ​ថា៖ «​ខ្ញុំ​និយាយ​ម្ដង​ទៀត ខ្ញុំ​នឹង​ទៅ​បំពេញ​ទស្សនកិច្ច​នៅ​មីយ៉ាន់ម៉ា​ក្នុង​ខែ​មករា [អ្នក] ហាមឃាត់ខ្ញុំ​មិនបាន​ទេ ហើយ​ទុក​​ឱកាសឲ្យ​ខ្ញុំ​ធ្វើ​ការ​ទេ»។

 លោក លើក​ឡើង​ថា អាស៊ាន​មាន​ធម្មនុញ្ញ​របស់​ខ្លួន និង​អះអាង​ថាដើម្បី​ឲ្យ​តំបន់​មួយ​នេះ​វិល​ទៅ​រក​សមាជិក​មាន​ ១០​ប្រទេស​វិញ គឺត្រូវ​ការ​ការ​ធ្វើ​ការ​ជាមួយ​រដ្ឋាភិបាល​ដែល​កំពុង​កាន់​អំណាច​បច្ចុប្បន្ន​។​

ឆ្លើយ​តប​ទៅ​នឹង​សំនួរ​ដែល​សួរ​ថា​តើ​កម្ពុជា​អាច​ដោះស្រាយ​បញ្ហា​មីយ៉ាន់ម៉ា​បាន​ឬ​យ៉ាងណា លោកនាយក​រដ្ឋ​មន្ត្រី មាន​ប្រសាសន៍​ថា ដំដោះ​ស្រាយ​ណា​មួយ​នឹង​ត្រូវ​កើត​ចេញ​ពី​ប្រទេស​មីយ៉ាន់​ម៉ា​ខ្លួន​ឯង​ និង​ថា​អាស៊ាន​គ្រាន់​តែ​ជា​ផ្នែក​មួយ​ជួយ​ប្រទេស​ជាសមាជិក​ក្នុង​ការ​រក​ដំណោះ​ស្រាយ​។​

លោក​​បន្ត​ទៀត​ថា៖ «​វាមិន​ចំណុះលើ​ថា​កម្ពុជា​អាច​ដោះស្រាយ​បាន ឬ​ក៏​អត់​​នោះ​ទេ ប៉ុន្តែ​កម្ពុជា​នឹង​ព្យាយាម​សម្រប​សម្រួល​ស្ថានការ​នៅ​មីយ៉ាន់​ម៉ា​ឲ្យ​វិល​ទៅ​រក​ស្ថានភាពមួយដ៏​ប្រសើរ​ឡើង​វិញ»។​

 ​ប្រទេស​មីយ៉ាន់​ម៉ា បាន​ស្ថិត​ក្នុង​ស្ថានភាព​ច្របូក​ច្របល់​បន្ទាប់​ពី​ឧត្តម​សេនីយ៍ច្រើន​រូប​បាន​ធ្វើ​រដ្ឋប្រហារ និង​ចាប់​ខ្លួន​លោក​ស្រី អ៊ុង​សាន ស៊ូជី កាល​ពីខែ​កុម្ភៈ កន្លង​មក​។​ ក្រុម​យោធា​ភ្លាមៗ​នោះ​ក៏​បាន​ប្រកាស​ដាក់​ប្រទេស​ក្នុង​ស្ថានភាព​អាសន្ន និង​បាន​អះអាង​ថា​នឹង​រៀបចំការបោះ​ឆ្នោត​ថ្មី​មួយ​នៅ​ឆ្នាំនេះ​។​

​ទាក់ទង​នឹងកម្ពុជា​ត្រូវ​ក្លាយ​ជា​ប្រធាន​អាស៊ាន​នៅ​ឆ្នាំ​ក្រោយ​នេះ​ដែរ លោក ហ៊ុន សែន បាន​ផ្ដាំ​ទៅ​ក្រុម​អ្នក​សង្កេត​ការ​ណ៍​ថា​ កុំ​បន្ទោស​កម្ពុជា បើសិន​ជា​កិច្ច​ប្រជុំ​កំពូល​បរាជ័យ​ក្នុងការ​អនុវត្ត​ក្រម​ប្រតិបត្តិ​ (COC)​​ទាក់ទង​នឹង​ជម្លោះក្នុង​ដែន​សមុទ្រ​ចិន​ខាង​ត្បូង ជាទី​ដែល​ប្រទេស​ក្នុង​តំបន់​អាស៊ានមួយ​ចំនួន ព្រម​ទាំង​ប្រទេស​ចិន​ផង បានទាមទារ​ជា​ម្ចាស់​កម្មសិទ្ធិ​លើ​ដែន​កោះ និង​ដែន​ទឹក​​ទាំង​នោះ​។ កម្ពុជា​កាលពី​ឆ្នាំ​២០១២ បាន​រង​ការ​រិះ​គន់​យ៉ាង​ខ្លាំង​លើ​អ្វី​ដែល​គេ​ហៅ​ថា​បាន​រារាំង​មិន​ឲ្យ​មាន​ចេញ​សេចក្ដី​ថ្លែង​ការណ៍​រួម​ទាក់​ទង​នឹង​បញ្ហា​មុទ្រ​ចិន​ខាង​ត្បូង ដែលមាន​ចែង​ក្នុង​សេចក្ដីព្រាង​សេចក្ដី​ថ្លែង​ការណ៍​រួម​ហើយ​នោះ​។ ការ​ខកខាន​ការ​ចេញ​សេចក្ដី​ថ្លែង​ការណ៍​រួម​នេះ គឺជា​ការ​ខក​ខាន​លើកទី​មួយ​ក្នុង​ប្រវត្តិសាស្រ្ត​អាស៊ាន ៤៥ឆ្នាំ ដែល​មិន​អាច​ចេញ​សេចក្ដី​ថ្លែងការណ៍​រួម​បាន​។​

​លោក​នាយក​រដ្ឋមន្ត្រី​ពន្យល់​ថា ក្នុង​ឆ្នាំ​២០១២ កម្ពុជា​មិន​អាច​ចេញ​សេចក្ដី​ថ្លែង​ការណ៍​រួម​បាន ដោយសារ​តែ​សមាជិក​មួយ​ចំនួន​បាន​ស្នើ​ឲ្យ​កម្ពុជា​ទទួល​ស្គាល់​ការ​ទាម​ទារ​របស់​ពួក​គេ​ក្នុង​តំបន់​​ជម្លោះ​នៅ​ដែន​សមុទ្រ​ចិន​ខាង​ត្បូង​។​

 លោកមានប្រសាសន៍​ថា៖ «អ្នក​ឯ​ង​មិន​ដឹង​ថា​មាន​អ្វី​បាន​កើត​ឡើងទេ​នៅ​ពេល​នោះទេ ​មិន​មែន​កម្ពុជា​ការពារចិន​នោះទេ ប៉ុន្តែ​បញ្ហា​គឺ​មកពីប្រទេស​ជាសមាជិកដែល​ដណ្តើម​អធិបតេយ្យ​នៅ​ក្នុង​សមុទ្រចិន​ខាង​ត្បូង ទាម​ទារ​ឲ្យ​ប្រធាន​អាស៊ាន[កម្ពុជា] ចេញ​សេចក្ដី​ប្រកាស​ទទួល​ស្គាល់​ថា​កោះ​នេះ​ជារបស់​ប្រទេស​នេះ ហើយ​ដែន​សមុទ្រទាំង​នោះ​ក៏ជា​របស់​ប្រទេសនេះ»។​

លោក​បន្ត​ទៀត​ថា៖ «​ខ្ញុំ​ចង់​ផ្ញើ​សារ​ទៅពិភព​លោក​ថា សូម​ដឹង​ឲ្យ​បាន​ច្បាស់​ពី​បញ្ហា​ក្នុង​ឆ្នាំ​២០១២ ដែល​នាំ​ឲ្យ​មិន​អាច​ចេញ​សេចក្ដី​ថ្លែងការណ៍​រួម ថា​មាន​អ្វី​នៅ​ពីក្រោយ​រឿង​ហ្នឹង…​ពួក​គេ​បង្ខំ​កម្ពុជា​ឲ្យ​វិនិច្ឆ័យ​រឿង​ហ្នឹង»។ លោក​បន្ថែម​ទៀត​ថា លោក​លើក​ទឹក​ចិត្ត​ឲ្យ​ប្រទេស​ពាក់​ព័ន្ធ​ទាំង​អស់​ដោះស្រាយ​បញ្ហា​ជាមួយ​គ្នា ដោយថា​ទាំង​អាស៊ាន និង​អង្គការ​សហប្រជា​ជាតិ​គ្មាន​សិទ្ធិ​វាស់​វែង​ដី​សម្រាប់​អ្នក​ទាំងនោះ​ទេ​។​

 លោក​បញ្ជាក់​ទៀត​ថា៖ «ឥឡូវ​ខ្ញុំ​បញ្ជាក់​ជាមុនថា​ខ្ញុំ​នឹង​ខិត​ខំធ្វើ​ការ​ជាមួយ​ប្រទេស​ជាសមាជិក​អាស៊ានដ៏ទៃទៀត រួម​ជាមួយសារណរដ្ឋមានិត​ចិន​ផងដែរ ដើម្បី​ធ្វើ​ការ​ចរចាសម្រេចនៅ COC មួយ​ឲ្យ​មាន​ប្រសិទ្ធិភាព ហើយឈាន​ដល់​ការ​ទទួល​យក​បាន»។​

លោក អៀ សុផល ជាអ្នក​អត្ថាធិប្បាយ​នយោបាយ​កម្ពុជា និង​ជា​​សាស្រ្តាចារ្យ​នៅ​សាកលវិទ្យាល័យ​ Occidental College ក្នុង​រដ្ឋ​កាលីហ្វ័រញ៉ា មាន​ប្រសាសន៍​ថា លោក​នាយក​រដ្ឋ​មន្ត្រី​ ហ៊ុន សែន កំពុង​ព្យាយាម​ជាថ្មី​ម្ដងទៀត​កេង​ចំពេញ​ពី​អាស៊ាន​ទៅ​តាមអ្វី​ដែល​លោក​អាច​ធ្វើ​បាន ដោយ​ថា​កាល​ពី​ឆ្នាំ​២០១២ លោកនាយក​រដ្ឋ​មន្ត្រី​បាន​បំផ្លាញ​អាស៊ាន​ម្ដង​ហើយ​។​

លោកមានប្រសាសន៍ថា៖ «វា​គឺ​ជា​ការ​ទះខ្នង​គ្នា​ម្ដង​ម្នាក់។ គ្មាន​អ្នកណា​អាច​បំភ្លេច​នូវ​អ្វី​ដែល​កំពុង​កើត​ឡើង​នៅ​កម្ពុជា​នោះទេ​ ទាក់ទង​នឹង​ការ​រំលោភសិទ្ធិ​មនុស្ស ការបំផ្លាញ​លទ្ធិ​ប្រជា​ធិបតេយ្យ និង​ការ​គាប​សង្កត់​សិទ្ធិសេរីភាព»។

លោក សេង​ សារី អ្នក​វិភាគ​នយោបាយ ប្រាប់​ខេមបូចា ដែរថា លោកគាំទ្រ​ជំហរ​របស់​លោក​នាយក​រដ្ឋ​មន្ត្រី​ ហ៊ុន សែន ទាក់ទង​នឹង​ការ​ដោះ​ស្រាយ​វិបត្តិ​នៅ​ប្រទេស​មីយ៉ាន់ម៉ា ដោយថា​ជា​ប្រធាន​អាស៊ាន លោក ហ៊ុន សែន ​នឹង​លើកពី​បញ្ហា​នេះ​នៅ​ក្នុង​របៀបវារៈ​កិច្ច​ប្រជុំ​កំពូល​ឆ្នាំក្រោយ​។​

លោក​មានប្រសាសន៍​ថា៖ «​សម្រាប់​គំនិត​ខ្ញុំ​ផ្ទាល់ ខ្ញុំ​គាំទ្រ​ការសម្រេច​ចិត្ត​របស់​រដ្ឋាភិបាល ដើម្បី​សម្រប​សម្រួល​ដោះ​ស្រាយ​វិបត្តិ​នយោបាយ​នៅមីយ៉ាន់ម៉ា»។ លោក​បន្ត​ទៀត​ថា បើ​គ្មាន​ការ​ស្រុះស្រួល​គ្នា​វាង​សមាជិក​អាស៊ាន​ទាំង​១០​ទេ ក៏​​ក្រម​ប្រតិបត្តិ​លើបញ្ហា​​សមុទ្រ​ចិន​​ខាង​ត្បូងមិន​​អាច​ដោះ​ស្រាយ​បាន​ដែរ។​

លោកបន្ថែមថា៖ «ឥឡូវ​ល្មម​ដល់​ពេល​ឈប់​ប្រើ​យុទ្ធសាស្រ្ត [បោះបញ្ហា​​ពី​ប្រទេស​មួយ​ទៅ​ប្រទេស​មួយ​ដូច​បោះ​បាល់] ហើយ​…​វាគួរ​តែ​មាន​ទម្លាប់​ថ្មី​ក្នុងការ​ដោះ​ស្រាយ​បញ្ហា​ក្នុង​តំបន់ ជា​ជាង​ឲ្យ​អ្នក​ក្រៅ​ចូល​មក​ជ្រៀត​ជ្រែក​កិច្ចការ​របស់​អាស៊ាន»

ប្រែសម្រួលពីអត្ថបទភាសាអង់គ្លេស៖ Hun Sen reaffirms resolve to visit Myanmar despite mounting criticism

72 views

ព័ត៌មានថ្មីៗ

អត្ថបទពេញនិយម