សមាគមសម្ព័ន្ធអ្នកសារព័ត៌មានកម្ពុជា

សហជីពឯករាជ្យមកពីវិស័យផ្សេងៗគ្នា ស្នើឱ្យក្រសួងការងារដោះស្រាយវិវាទការងារដែលជាប់គាំង

តំណាងសហជីព និងកម្មករនិយោជិត មកពីវិស័យផ្សេងគ្នា ដែលមិនទាន់បានដំណោះស្រាយ ពីក្រសួងការងារ ព្យាយាមដើរទៅដាក់ញត្តិនៅទីស្ដីការគណៈរដ្ឋមន្រ្តី ប៉ុន្តែត្រូវបានរារាំង ដោយអាជ្ញាធរ រហូតមានការប្រតាយប្រតប់កើតជាហិង្សាបន្តិចបន្តួច ក្បែរស្ពានអាកាស តិចណូ។ រូបថតនៅថ្ងៃទី១១ ខែកញ្ញា ឆ្នាំ២០២២។ ខេមបូចា/ សុវណ្ណ ស្រីពេជ្រ
តំណាងសហជីព និងកម្មករនិយោជិត មកពីវិស័យផ្សេងគ្នា ដែលមិនទាន់បានដំណោះស្រាយ ពីក្រសួងការងារ ព្យាយាមដើរទៅដាក់ញត្តិនៅទីស្ដីការគណៈរដ្ឋមន្រ្តី ប៉ុន្តែត្រូវបានរារាំង ដោយអាជ្ញាធរ រហូតមានការប្រតាយប្រតប់កើតជាហិង្សាបន្តិចបន្តួច ក្បែរស្ពានអាកាស តិចណូ។ រូបថតនៅថ្ងៃទី១១ ខែកញ្ញា ឆ្នាំ២០២២។ ខេមបូចា/ សុវណ្ណ ស្រីពេជ្រ

តំណាងសហជីព និងកម្មករនិយោជិតមកពីវិស័យការងារផ្សេងៗគ្នាប្រមាណ៣០០នាក់ បាន​ជួបជុំ​គ្នាដើម្បីសម្ដែងមតិ និងដាក់ញត្តិ​ស្នើឱ្យក្រសួងការងារដោះស្រាយវិវាទ​ការងារ​របស់​​កម្មករឱ្យបានឆាប់រហ័ស ត្បិតពួកគេ​អះ​អាង​ថា ក្រសួងការងារគ្មានគោលជំហរ​ក្នុងការ​ដោះ​ស្រាយវិវាទការងារជូនកម្មករឡើយ តួយ៉ាង​ដូចករណីណាហ្គាវើលដ៍ជាដើម។

បដាអមដោយពាក្យស្លោក និងសំឡេងស្រែកទាមទារពីក្រុមបុគ្គលិក កម្មករ មកពី​វិស័យ​ផ្សេងគ្នា បានស្រែកព្រមគ្នាទាមទារឱ្យក្រសួងការងារ ដោះស្រាយវិវាទការងារ​ឱ្យពួកគេ ខណៈអាជ្ញាធរជាច្រើននាក់បានត្រឹមតែរារាំងមិនឱ្យពួកគេបន្តដំណើរទៅដាក់ញត្តិនៅទីស្ដីការគណៈរដ្ឋមន្រ្តី។

បុគ្គលិក កម្មករស្រីប្រុសមកពីវិស័យការងារផ្សេងៗគ្នា បានមកជួបជុំគ្នានៅមុខក្រសួងការងារ​ប្រមាណជា៣ម៉ោង ក្នុងគោលបំណងសំខាន់២ គឺ គោលបំណងទីមួយ ស្នើឱ្យក្រសួងការងារ ដោះស្រាយបញ្ចប់វិវាទការងារនៅក្នុងក្រុមហ៊ុនណាហ្គាវើលដ៍ និងគោលបំណងទីពីរ ស្នើឱ្យ​ដោះស្រាយសំណុំរឿងបញ្ឈប់ថ្នាក់ដឹកនាំ និងសកម្មជនសហជីពសរុបចំនួន៣១ករណីរបស់​សហជីព កម្មករ វិស័យកាត់ដេរ។

បើតាមអ្នកស្រី អ៊ូ ទេពផល្លីន ប្រធានសហព័ន្ធសហជីពកម្មករចំណីអាហារ និងសេវាកម្ម​កម្ពុជា មានប្រសាសន៍ថា ការជួបជុំនៅមុខក្រសួងការងារនេះ គឺដើម្បីទាមទារសិទ្ធិ​របស់​បុគ្គលិក កម្មករ នៅក្នុងវិស័យផ្សេងគ្នា ដែលកំពុងរងគ្រោះ និងមិនទាន់មានដំណោះ​ស្រាយ​ពីក្រសួងនៅឡើយ។

អ្នកស្រី ទេពផល្លីន លើកឡើងថា៖ «យើងមកទីនេះគឺដើម្បីបញ្ឈប់ការកេងប្រវ័ញ្ច​របស់ថៅកែ ពួកយើងឃើញថាស្ថានភាពកូវីដនេះ ជួបរឿងវិបត្តិអយុត្តិធម៌ខ្លាំងមែនទែន ជាអកុសល​ប្រព័ន្ធ​នៅស្រុកយើងអត់បានជួយគាំពារទៅដល់វណ្ណៈកម្មករដូចពួកយើង ហើយគាំទ្រឱ្យពួកថៅកែ​បន្ត​កេងប្រវ័ញ្ច​កម្មករ»។

អ្នកស្រីបន្តថា កម្មករនឹងក្លាយជាទាសករ ប្រសិនបើមិនមានសហជីពឯករាជ្យ​ដើម្បីការងារ​ផលប្រយោជន៍ និងសិទ្ធិជាមូលដ្ឋានរបស់ពួកគេ ហើយរដ្ឋអំណាច គួរណាតែការពារ​បុគ្គលិក​កម្មករ​នៅពេលដែលទាមទារសិទ្ធិ នៅពេលដែលពួកគេរងគ្រោះដោយសារតែថៅកែ។

អ្នកស្រីបន្តទៀតថា៖ «ក្នុងស្ថានភាពចុងក្រោយនេះ កាន់តែអាក្រក់ទៅៗនៅពេល​ដែលវណ្ណៈ​កម្មករ​ចាប់ផ្ដើមប្រើសិទ្ធិ គឺគេប្រើប្រាស់នូវប្រព័ន្ធតុលាការ ប្រើប្រាស់អ្នកមានអំណាច​អ្នកមាន​តួនាទីផ្សេងៗប្រើអំពើហិង្សាមកលើយើង»។

ក្រុមកម្មករនិយោជិត ត្រូវបានអាជ្ញាធរបង្អាក់ដំណើរ ក្បែរស្ពានអាកាសតិចណូ នៅពេល​ពួកគេ​ព្យាយាមដើរជាក្រុមទៅដាក់ញត្តិនៅទីស្ដីការគណៈរដ្ឋមន្រ្តី។​ រូបថតនៅថ្ងៃទី១១  ខែកញ្ញា ឆ្នាំ២០២២។ ខេមបូចា/ សុវណ្ណ ស្រីពេជ្រ

កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ​នៃក្រុមហ៊ុន​ណាហ្គាវើលដ៍ ថ្លែងថា ការជួបជុំគ្នានៅមុខក្រសួងការងារនាព្រឹកថ្ងៃអាទិត្យនេះ ដោយសារតែ  ក្រសួងការងារមិនបានស្វែងរកដំណោះស្រាយសមស្របឱ្យកម្មករនិយោជិតឡើយ ដោយ​អូស​បន្លាយអស់រយៈពេលជិតមួយឆ្នាំមកហើយ មិនតែប៉ុណ្ណោះ ពួកគេរងនូវការ​ចោទ​ប្រកាន់​ពីផ្លូវតុលាការទៀតផង។

កញ្ញា ស៊ីថរ ឱ្យដឹងថា៖ «យើងឃើញថាគ្មានស្ថាប័នណាផ្ដល់យុត្តិធម៌ឱ្យពួកយើងទេ​ជាងមួយ​ឆ្នាំនេះ ពួកយើងមិនចង់តវ៉ា មិនចង់ឈរស្រែកនៅទីនេះដែរ ក៏ប៉ុន្តែយើងគ្មានជម្រើស យើង​គ្រាន់តែចង់បានសិទ្ធិការងារមួយ ដែលធានាថាកម្មករខ្មែរមិនត្រូវបានដេញ​ដោយក្រុមហ៊ុន​ណាហ្គាវើលដ៍»។

គេឃើញថាបន្ទាប់ពីឈរនៅមុខក្រសួងការងារដើម្បីរង់ចាំដាក់ញត្តិ ប៉ុន្តែមិនមានមន្រ្តី​ណា​ម្នាក់មកទទួល ក្រុមកម្មករប្រមាណជា៣០០នាក់​បានសម្រេចចិត្តដើរទៅ​ទីស្ដីការ​គណៈរដ្ឋមន្ត្រី​ដើម្បីដាក់ញត្តិ ប៉ុន្តែត្រូវបានអាជ្ញាធរខណ្ឌទួលគោក និងសមត្ថកិច្ចប្រមាណ​ជិត៧០នាក់ ទប់ស្កាត់កណ្ដាលផ្លូវក្បែរស្ពានអាកាសតិចណូ រហូតដល់មានការប្រើហិង្សា​មកលើកម្មករផងដែរ។

បើតាមមន្រ្តីម្នាក់តំណាងមកពីក្រសួងការងារ តែមិនបានប្រាប់ឈ្មោះ បានមកទទួលញត្តិ​ពីតំណាងសហជីព និងបានសន្យាថានឹងយកញត្តិនេះទៅជូនថ្នាក់លើ ដើម្បីដោះស្រាយ​បញ្ហាដែលកម្មករបានប្រាប់។

មន្ត្រីនោះថ្លែងថា៖ «ឥឡូវអ៊ីចេះ! ក្មួយស្រីចង់ដាក់ញត្តិទៅក្រសួងការងារឬអត់? បើដាក់ញត្តិ​ខ្ញុំទទួល ខ្ញុំមន្រ្តីទទួលញត្តិ បើដាក់ខ្ញុំទទួលយកញត្តិទៅជូនថ្នាក់ដឹកនាំដើម្បីដោះស្រាយ​ឱ្យ​ពួកប្អូនៗ ខ្ញុំមិនដែលយកញត្តិពួកប្អូនៗទៅទុកចោលទេ»

ក្រុមកម្មករនិយោជិត លើកបដាធំៗដើម្បីបង្ហាញរូបថតថៅកែក្រុមហ៊ុនណាហ្គាវើលដ៍ ដែលបដិសេធមិនទទួលយកថ្នាក់ដឹកនាំសហជីពឱ្យចូលធ្វើការវិញ។ រូបថតនៅថ្ងៃទី១​១ ​ខែកញ្ញា ឆ្នាំ២០២២។ ខេមបូចា/ សុវណ្ណ ស្រីពេជ្រ

ចំណែកលោក មាស ចាន់យ៉ាដា អភិបាលរងរាជធានីភ្នំពេញ ថ្លែងទៅកាន់ថ្នាក់ដឹកនាំ​សហជីព​នៅកន្លែងតវ៉ាក្បែរស្ពានអាកាសទិចណូ ថាឱ្យបញ្ឈប់សកម្មភាពប្រមូលផ្ដុំតវ៉ា ដោយគ្មានច្បាប់អនុញ្ញាត និងរង់ចាំចូលតុចរចានៅថ្ងៃទី១៥ ដើម្បីសណ្ដាប់ធ្លាប់ និងចៀស​វាងការមានហិង្សា។

លោក ចាន់យ៉ាដា លើកឡើងថា៖ «សូមកុំធ្វើបញ្ហាហ្នឹងឱ្យវាក្ដៅខ្លាំង យើងចង់ឱ្យបញ្ហាហ្នឹង​មានដំណោះស្រាយ គឺយើងមានយន្តការនៃការជជែកគ្នា កុំបំពានបង្កឱ្យមានអំពើហិង្សា​ខ្ញុំសួមអង្វរ»។

លោកបន្តថា៖ «សកម្មភាពរបស់យើងទៅក្រសួងការងារអត់ទាន់បានសុំច្បាប់សុំអីទេ ខ្ញុំក៏​អត់​ថាអីដែរ យើងក៏បានធ្វើសន្និសីទអីហើយដែរ ចឹងស្នើសុំបំបែកទៅ​ចាំថ្ងៃ​១៥ចូល​ចរចា​បន្ត ហើយ​លក្ខខណ្ឌដើម្បីមានដំណោះស្រាយ កុំដាក់លក្ខខណ្ឌដែលតឹងវា​ធ្វើឱ្យរួញ ចឹងស្នើសុំ​កុំ​យកគំនាបលើដងផ្លូវមកធ្វើចឹងវាអត់ល្អទេ»។

ជុំវិញបញ្ហានេះសារព័ត៌មានជិតស្និទ្ធនឹងរដ្ឋាភិបាលបានចេញផ្សាយកាលពីពេលថ្មីៗនេះថា ការជួបជុំតវ៉ារបស់ក្រុមកម្មករ គឺហួសបន្ទាត់ក្រហមហើយ និងបានចោទមកក្រុមកម្មករថា ជាក្រុមបាតុករខុសច្បាប់បម្រើផលប្រយោជន៍នយោបាយតែប៉ុណ្ណោះ។

ករណីនេះលោក ឃុន ថារ៉ូ អ្នក​គ្រប់​គ្រង​កម្ម​វិធី​ការ​ងារ​ នៃ​មជ្ឈ​មណ្ឌល​សម្ព័ន្ធ​ភាព​ការងារ និង​សិទ្ធិ​មនុស្សរបស់អង្គការ សង់ត្រាល់ បញ្ជាក់ថា ការជួបជុំរបស់ក្រុមសហជីពនិងកម្មករ មកពី​វិស័យផ្សេងគ្នា ក្នុងគោលបំណង២ គឺស្នើដោះស្រាយបញ្ចប់វិវាទការងារ​នៅក្នុងក្រុមហ៊ុន​ណាហ្គាវើលដ៍ និងដោះស្រាយសំណុំរឿងបញ្ឈប់ថ្នាក់ដឹកនាំ និងសកម្មជនសហជីព​សរុប​ចំនួន៣១ករណី មកពីCATU រោងចក្រ CCAWDU  មកពី INTUFE មកពី FUFL និងមកពី​សហជីពការពារសិទ្ធិកម្មករនៃក្រុមហ៊ុន អិម អិល អ៊ិនធីមេត អឹភែរឹល។

លោកយល់ឃើញថា កាលដែលក្រសួងការងារបណ្ដែតបណ្ដោយ និងមិនទាន់ស្វែងរក​យុត្តិធម៌​ជូនបុគ្គលិក កម្មករ គឺជាគំរូមិនល្អ ដែលធ្វើឱ្យថៅកែក្រុមហ៊ុន ឬរោងចក្រ​ដទៃ​យកគំរូតាមថៅកែក្រុមហ៊ុនណាហ្គាវើលដ៍។ លោកថា ក្រសួងការងារគួរតែដោះស្រាយវិវាទ​ការងារ ឬបណ្ដឹងរបស់កម្មករ ដែលជាប់គាំងអស់រយៈពេលជាយូរមកហើយ ឱ្យកម្មករដោយ​តម្លាភាព និងទំនួលខុសត្រូវ។

លោកបន្តថា៖ «ករណីនេះគឺជាការដែលបង្ហាញឱ្យនិយោជក ធ្វើតាមស្រេចតែចិត្តនៅក្នុងការ​បញ្ឈប់ថ្នាក់ដឹកនាំសហជីពក្នុងការការពារសិទ្ធិ និងផលប្រយោជន៍កម្មករនៅកន្លែងការងារ។ ចឹងករណីណាហ្គានេះ គឺឆ្លុះបញ្ចាំងការដែលក្រុមហ៊ុន និយោជកផ្សេងៗទៀតនោះ ខណៈ​ពេល​ដែលក្រសួងមិនបានដោះស្រាយនូវករណីទាំងអស់នោះ»

តាមការសង្កេត លោក ថារ៉ូ មើលឃើញថាការអនុវត្តច្បាប់ការងារនៅមានកម្រិត ព្រោះ​ក្រុមហ៊ុន​មួយចំនួនមិនព្រមទទួលយកថ្នាក់ដឹកនាំសហជីព ឬបុគ្គលិកកម្មករ​ឱ្យចូល​ធ្វើការ​វិញឡើយ ទោះបីមានសេចក្ដីបង្គាប់របស់ក្រសួងការងារក៏ដោយ។ ដូច្នេះ លោកចាត់ទុកថា​ការអនុវត្តសិទ្ធិជាមូលដ្ឋានសម្រាប់កម្មករមិនទាន់បានពេញលេញ និងរងការគំរាមកំហែង​ក្រោមរូបភាពផ្សេងៗ ខណៈក្រសួងការងារមិនមានការការពារដល់សិទ្ធិ និងផលប្រយោជន៍​របស់កម្មករ។ 

លោក ថារ៉ូបន្ថែមទៀតថា៖ «សង្កេតឃើញថាក្រសួងអសមត្ថភាពក្នុងការដោះស្រាយ ហើយ​វិធានការបន្ទាប់ទៀតគ្មានអីក្រៅតែពីការស្នើកិច្ចអន្តរាគមន៍ពីនាយករដ្ឋមន្រ្តីឱ្យចាត់វិធានការជាក់លាក់ ដើម្បីមានការអនុវត្តច្បាប់ ដើម្បីធានាថាថ្នាក់ដឹកនាំដែលបញ្ឈប់​ខុសនីតិវិធី​ច្បាប់ ទទួលបានលក្ខខណ្ឌធានាដោយច្បាប់»។

អាជ្ញាធររារាំងមិនឱ្យកម្មករធ្វើដំណើរទៅដាក់ញត្តិនៅទីស្ដីការគណៈរដ្ឋមន្រ្តី ក្បែរស្ពាន​អាកាសតិចណូ។ រូបថតនៅថ្ងៃទី១​១ ​ខែកញ្ញា ឆ្នាំ២០២២។ ខេមបូចា/ សុវណ្ណ ស្រីពេជ្រ

កាលពីពេលថ្មីៗនេះរដ្ឋាភិបាលបានដាក់បញ្ជាទៅរដ្ឋមន្រ្តីក្រសួងការងារ ដើម្បីឱ្យ​ដោះ​ស្រាយ​វិវាទ​ការងារដែលមិនទាន់បានដំណោះស្រាយ ក្នុងវិស័យកាត់ដេរ។ ខណៈ​ក្រសួងមហាផ្ទៃ កាលពីខែមីនា ឆ្នាំ២០២២កន្លងទៅ ក៏បានស្នើទៅក្រសួងការងារ ឱ្យជួយ​ដោះ​ស្រាយវិវាទ​ការងាររបស់បុគ្គលិកនៃក្រុមហ៊ុនណាហ្គាវើលដ៍ផងដែរ។

គួររំលឹកថា វិវាទការងារនៅក្រុមហ៊ុនណាហ្គាវើលដ៍ បានចាប់ផ្ដើមនាខែធ្នូ ឆ្នាំ២០២១ រហូតមក​ទល់ពេលនេះមានរយៈពេល៩ខែហើយ មិនទាន់ទទួលបានដំណោះស្រាយនៅ​ឡើយ​ទេ ដោយ​​ក្រុមកម្មករអះអាងថា ក្រុមហ៊ុនមិនមានចេតនាក្នុងការដោះស្រាយ ព្រោះចង់បំបិទ​សំឡេង​​សហជីពឯករាជ្យនៅក្នុងក្រុមហ៊ុន និងជំនួសដោយសហជីពថ្មីរៀបចំដោយ​ក្រុមហ៊ុន៕

557 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម