ខេត្តកំពង់ឆ្នាំង៖ ម្ចាស់ស្ថានីយវិទ្យុប្រចាំខេត្តកំពង់ឆ្នាំង លោក សុខ ឧត្តម ក្នុងសវនាការកាលពីថ្ងៃអង្គារ បានបដិសេធការចោទប្រកាន់ថាលោកបានញុះញង់ឲ្យប្រជាពលរដ្ឋក្នុងខេត្តនេះប្រឆាំងនឹងក្រុមយោធា ខណៈដែល សាលក្រមសំណុំរឿងរបស់លោកគ្រោងប្រកាសនៅថ្ងៃទី១៧ ខែវិច្ឆិកា ខាងមុខ។
លោក ឧត្តម ត្រូវបានចាប់ខ្លួនកាលពីថ្ងៃទី១៣ ខែឧសភា និងរងការចោទប្រកាន់ពីបទញុះញង់ តាមរយៈការផ្សាយផ្ទាល់លើបណ្ដាញសង្គមហ្វេសប៊ុក ដែលលោកបាននិយាយពីក្រុមយោធាបានយកដីសង្គមកិច្ចរបស់ប្រជាពលរដ្ឋនៅតំបន់ដែកជម្រកសត្វព្រៃភ្នំឱរ៉ាល់។ ក្រុមអាជ្ញាធរបានចោទប្រកាន់លោកថាបានញុះញង់ឲ្យពលរដ្ឋប្រឆាំងនឹងយោធា និងចូលកាន់កាប់ដីដោយខុសច្បាប់។
ក្នុងអង្គជំនុំជម្រះ លោក ឧត្តម បានបដិសេធការចោទប្រកាន់បទញុះញង់នេះ និងបាននិយាយថាលោកគ្រាន់តែបានស្នើឲ្យអាជ្ញាធរស្វែងរកដំដោះស្រាយជូនប្រជាពលរដ្ឋប៉ុណ្ណោះ។
លោក ឧត្តម បានិយាយក្នុងអង្គជំនុំជម្រះថា៖«ខ្ញុំបដិសេធការចោទប្រកាន់ពីបទញុះញង់ ព្រោះថាខ្ញុំគ្រាន់តែបានស្នើឲ្យអាជ្ញាធរស្វែងរកដំណោះស្រាយសម្រាប់ប្រជាពលរដ្ឋទាំងនោះ ព្រោះពួកគាត់បានរស់នៅទីនោះមុនពេលមានការបង្កើតតំបន់ដែនជម្រកសត្វព្រៃទៅទៀត»។
លោក និយាយថា លោកមិនបានចាំច្បាស់ពីខ្លឹមសារនៅក្នុងការផ្សាយផ្ទាល់លើហ្វេសប៊ុករបស់លោកនោះទេ។ នៅក្នុងការផ្សាយនោះ លោកថា ប្រសិនជារដ្ឋចង់បានដីរបស់ប្រជាពលរដ្ឋ គួរតែយកដីរបស់អភិបាលខេត្តមុនគេ។
ទោះយ៉ាងណា លោក ចៅក្រម អ៊ី ថាវរៈ បាននិយាយថាលោក ឧត្តម បាននិយាយញុះញង់ប្រជាពលរដ្ឋ។
លោកថា៖ «លោកបានញុះញង់ប្រជាពលរដ្ឋ ដែលគ្មានសិទ្ធិជាម្ចាស់ស្របច្បាប់ចូលកាន់កាប់ដៃព្រៃរបស់រដ្ឋ»។
លោក ឧត្តម ត្រូវបានចោទប្រកាន់តាមមាត្រា៤៩៥ ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ហើយអាចប្រឈមមុខនឹងការជាប់ពន្ធនាគារពីរឆ្នាំ និងពិន័យជាប្រាក់រហូតដល់១ ០០០ដុល្លារ ខណៈរូបលោកត្រូវបានឃុំខ្លួនបណ្ដោះអាសន្នតាំងពីខែឧសភា មកម្លេះ។
សាក្សីបីរូប រួមទាំងមន្ត្រីជាន់ខ្ពស់យោធា លោក នូ សំរិទ្ធ ដែលជាដើមបណ្តឹងបានអវត្តមានក្នុងសាវនាការដែលត្រូវមកបង្ហាញភស្តុតាងប្រឆាំងនឹងលោកឧត្តម។
បើតាមចម្លើយរបស់លោក សំរិទ្ធ ដែលបានឆ្លើយនៅមុខចៅក្រមស៊ើបសួកាលពីថ្ងៃទី១២ ខែឧសភា និងត្រូវលើកយកមកអានក្នុងសវនាការថា មានអ្នកសារព័ត៌មានប្រមាណជា ៣០នាក់កាលពីថ្ងៃទី១២ ខែឧសភា ដែលបានបំផុសប្រជាពលរដ្ឋឲ្យចូលកាន់កាប់ដីរដ្ឋនៅក្នុងឃុំជៀប ខេត្តកំពង់ឆ្នាំង ជាកន្លែងដែលយោធាបំរុងទុកសាងសង់ទីលានហាត់បាញ់ពិត។
បើតាមពាក្យបណ្ដឹងរបស់លោក សំរិទ្ធ បានរៀបរាប់ថា៖ «សកម្មភាពទាំងនោះពិតជាបានប៉ះពាល់ដល់សេចក្ដីថ្លៃថ្នូររបស់កងទ័ព និងបានប្រមាថដល់ថ្នាក់ដឹកនាំ ដូចនេះសូមស្នើតុលាការដាក់ទោស សុខ ឧត្តម និងផ្ដល់សំណងជំងឺចិត្តជាទឹកប្រាក់១០០ លានរៀល»។
សវនាការរបស់ លោក ឧត្តម ធ្វើឡើងមួយសប្ដាហ៍បន្ទាប់ពី សវនាការរបស់លោក រស់ សុឃិត ចាងហ្វាងកាសែតជាតិខ្មែរ ដែលត្រូវកាត់ក្ដីទាក់ទងនឹងបទចោទលើការផ្សព្វផ្សាយលើហ្វេសប៊ុកទាក់ទងនឹងលោកនាយករដ្ឋមន្ត្រី ហ៊ុន សែន និងបំណុលដ៏ច្រើនលើសលុបនៅតាមគ្រួសារនីមួយៗ។
កាលពីខែតុលា លោក សុវណ្ណ រិទ្ធី ម្ចាស់សារព័ត៌មានអនឡាញTVFB ត្រូវបានកាត់ទោសឲ្យជាប់ពន្ធនាគារទាក់ទងនឹងបទញុះញង់ ប៉ុន្តែទោសនេះត្រូវបានព្យួរ។ លោក រិទ្ធី ត្រូវបានចោទប្រកាន់លើការរាយការណ៍ពីប្រសាសន៍លោកនាយករដ្ឋមន្ត្រី ហ៊ុន សែន ដែលផ្ដល់ជាយោបល់ឲ្យអ្នករត់ម៉ូតួឌុបលក់ម៉ូតូដើម្បីទិញអាហារហូប។ ប្រសាសន៍របស់ លោកនាយករដ្ឋមន្ត្រីនេះធ្វើឡើងដោយយោងទៅលើការធ្លាក់ចុះនៃសេដ្ឋកិច្ច តែមន្ត្រីរដ្ឋាភិបាលបាននិយាយថា ការលើកឡើងនេះគ្រាន់ជាការនិយាយលេងរបស់លោកនាយករដ្ឋមន្ត្រីប៉ុណ្ណោះ។
ស្ថានីយវិទ្យុរិទ្ធិសែន របស់លោកឧត្តម ត្រូវបានក្រសួងព័ត៌មានដកអាជ្ញាបណ្ណភ្លាមៗបន្ទាប់ពីត្រូវចាប់ខ្លួន បើទោះបីជាលោកមិនទាន់ត្រូវបានកាត់ទោសទាក់ទងនឹងបទល្មើសណាមួយក៏ដោយ។ ក្នុងសេចក្ដីសម្រេចរបស់ក្រសួងព័ត៌មានបញ្ជាក់ថាលោកបានបំពាននឹងក្រមសីលធម៌វិជ្ជាជីវៈអ្នកសារព័ត៌មាន។
ក្នុងសេចក្ដីសម្រេចដដែល រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ មានប្រសាសន៍ថា៖ «សុខ ឧត្តម ម្ចាស់ស្ថានីយវិទ្យុរិទ្ធិសែន និងព័ត៌មានអនឡាញ បានផ្សាយបំផ្លើសព័ត៌មាន ញុះញង់ប្រជាពលរដ្ឋឲ្យមានអំពើហិង្សា បង្កើតការរើសអើសពូជសាសន៍ និងបង្កអសន្តិសុខ និងចលាចលសង្គម»។
មេធាវីការពារក្ដីឲ្យលោក ឧត្តម គឺលោក អ៊ុន ច័ន្ទថុល មានប្រសាសន៍ថា គ្មានភស្តុតាងណាមួយបញ្ជាក់ថាកូនក្ដីលោកបានប្រព្រឹត្តដូចការចោទប្រកាន់នោះទេ។
លោកបន្តថា៖ «ជាធម្មតាអ្នកសារព័ត៌មានគាត់ទៅរាយការណ៍ព័ត៌មានតាមអ្វីដែលគាត់បានទទួល ដូចនេះ យើងមើលឃើញថាគ្មានធាតុផ្សំសម្រាប់គាំទ្រដល់ការចោទប្រកាន់បទញុះញង់ឲ្យប្រព្រឹត្តបទឧក្រិដ្ឋនោះទេ»។
លោកបន្ថែមថា វាសមហេតុផលជាង បើយកច្បាប់ស្ដីពីរបបសារព័ត៌មានមកប្រើ និងស្នើឲ្យមានការកែតម្រូវ បើលោកឧត្តម បានផ្សាយទៅមិនត្រឹមត្រូវ។
លោក ច័ន្ទថុល បន្ថែមថា៖ « តាមច្បាប់ស្តីពីរបបសារព័ត៌មាន គឺមានការតម្រូវឲ្យធ្វើការកែតម្រូវឡើងវិញក្នុងរយៈពេលប្រាំពីរថ្ងៃ ប្រសិនបើគាត់បានផ្សាយចេញព័ត៌មានខុស»។
អ្នកស្រី នុត សុវន្ធូរ ភរិយាលោក ឧត្តម អះអាងថាមានមន្ត្រីជាន់ខ្ពស់យោធាមួយចំនួនបានស្នើផ្ដល់ប្រាក់ឲ្យប្ដីរបស់អ្នកស្រីដើម្បីឈប់ផ្សាយរឿងទាំងនោះ។ យ៉ាងណា អ្នកស្រីបានបដិសេធផ្ដល់ព័ត៌មានលម្អិលចំពោះការលើកឡើងនេះដោយបារម្ភសុវត្ថិភាពផ្ទាល់ខ្លួង។ អ្នកស្រី ក៏បានបង្ហាញការមិនពេញចិត្តចំពោះអវត្តមានសាក្សី នឹងដើមបណ្តឹងដែលត្រូវមកឆ្លើយដាក់បន្ទុកសា្វមីអ្នកស្រីនៅបន្ទប់សវនាការ។
អ្នកស្រីបន្ថែមថា៖ «វាចម្លែកដែលថាពួកគេជាដើមបណ្ដឹង ប៉ុន្តែពួកគេមិនមានវត្តមានពេលជំនុំជម្រះ»។
លោក គង់ ច័ន្ទមុនី អ្នកសម្របសម្រួលអង្គការសិទ្ធិមនុស្សលីកាដូប្រចាំខេត្តកំពង់ឆ្នាំង ដែលបានចូលស្តាប់សវនាការ បាននិយាយថា លោកឧត្តម បានបំពេញការងាររបស់គាត់តាមវិជ្ជាជីវៈ ដោយមានអាជ្ញាបណ្ណចេញដោយក្រសួងព័ត៌មាន។
លោក បន្តថា៖ «អង្គការសង្គមស៊ីវិលចង់បានសេរីភាពនៃការបញ្ចេញមតិដែលការពារដោយរដ្ឋធម្មនុញ្ញ»។
លោក ណុប វី នាយកប្រតិបត្តិសម្ព័ន្ធអ្នកសារព័ត៌មានម្ពុជា ហៅកាត់ថាខេមបូចា បង្ហាញក្ដីបារម្ភចំពោះការប្រើច្បាប់ក្រមព្រហ្មទណ្ឌប្រឆាំងនឹងអ្នកសារព័ត៌មានជាបន្តបន្ទាប់មកនេះ។
លោក បន្ថែមថា៖ «ខ្ញុំគិតថាតុលាការគួរតែពិនិត្យទ្បើងវិញពីបទចោទញុះញង់ប្រឆាំងលោក សុខ ឧត្តម ថាតើ គាត់បានបំផុសញុះញង់ប្រជាពលរដ្ឋ ហើយបានបង្កឲ្យមានចលាចលក្នុងសង្គម ឬប្រឆាំងអាជ្ញាធរដែរឬទេ»។ គិតចាប់ពីខែមករា ដល់ខែតុលា ខេមបូចា បានកត់ត្រាឃើញថាមានអ្នកសារព័ត៌មានចំនួន៥៩នាក់បានរងនូវអំពើហិង្សា ចាប់ខ្លួន សម្លាប់ ឬជាប់បណ្ដឹងនៅតុលាការ។ ក្នុងចំណោមនោះ មាន២៧នាក់ត្រូវចាប់ខ្លួន ប្រាំពីរនាក់រងអំពើហិង្សា និងមានម្នាក់បានស្លាប់ ដែលកើតចេញពីអ្វីដែលសមត្ថកិច្ចបានអះអាងថាជាគ្រោះថ្នាក់ចរាចរណ៍។
