សមាគមសម្ព័ន្ធអ្នកសារព័ត៌មានកម្ពុជា

អាជ្ញាធរខេត្តកំពង់ឆ្នាំងបញ្ជាក់ថាបឹងពោធិ៍ជាបឹងរដ្ឋមិនអាចដាក់ទៅជាបឹងសហគមន៍

គ្រឿងចក្រក្រុមហ៊ុនឯកជនស្ដារបឹងពោធិ៍នៅឃុំតាជេស ស្រុកកំពង់ត្រឡាច ខេត្តកំពង់ឆ្នាំង។ រូបថតនៅថ្ងៃទី៨ ខែឧសភា ឆ្នាំ២០២២។ ផ្ដល់ដោយលោក ស្ងួន ញឿន
គ្រឿងចក្រក្រុមហ៊ុនឯកជនស្ដារបឹងពោធិ៍នៅឃុំតាជេស ស្រុកកំពង់ត្រឡាច ខេត្តកំពង់ឆ្នាំង។ រូបថតនៅថ្ងៃទី៨ ខែឧសភា ឆ្នាំ២០២២។ ផ្ដល់ដោយលោក ស្ងួន ញឿន

អាជ្ញាធរខេត្តកំពង់ឆ្នាំងបានអះអាងថាបឹងពោធិ៍ដែលស្ថិតក្នុងឃុំតាជេស ស្រុក​កំពង់ត្រឡាច មិន​បានប្រគល់ទៅឱ្យក្រុមហ៊ុនឯកជនទេ ខណៈប្រជាពលរដ្ឋ​សហគមន៍​កំពុងស្នើទាមទារ​ដាក់បឹង​នោះជាបឹងអភិរក្សរបស់សហគមន៍ ហើយពួកគាត់​ព្រួយបារម្ភ​ក្រែង​អាជ្ញាធរលក់ឱ្យ​ក្រុមហ៊ុន​ឯកជន។

លោក លី  ឡា  ប្រធានជលផលខេត្តកំពង់ឆ្នាំង បានថ្លែងថា បឹងរដ្ឋគឺជាបឹងរដ្ឋ​ហើយមិនអាច​ទៅដាក់ជាបឹងឯកជនបានទេ ហើយពាក់ព័ន្ធនឹងរឿងហ្នឹង​លោកថាមាន​ការ​ឆ្លើយតបពីរដ្ឋបាល​ថ្នាក់កណ្ដាលម្ដងរួចមកហើយ  ជាពិសេសកន្លែងហ្នឹងមិនអាចជា​កន្លែង​អភិរក្សអ្វីបានទេ។ ​​លោក​បានបញ្ជាក់ថា ខាងជលផលគឺធ្វើតែការបង្រ្កាបបទល្មើសផ្សេងៗ​គឺខាងលោកទៅ​បង្រ្កាបបទល្មើស ហើយរឿងសហគមន៍គឺនៅហ្នឹងគឺអត់មានទេ គឺពួកគាត់​បង្កើតដោយ​ខ្លួន​គាត់ទេ។

លោកបន្ដថា៖ «សម្រាប់បងអត់មានទេសហគមន៍នៅហ្នឹង ហើយបទល្មើសអូនកុំភ័យកុំថា​គេមិនចូលរួម ឲ្យគាត់តេមកបងម៉ោងប៉ុន្មានក៏បងឲ្យទៅដែរ»

ចំណែកឯលោក ងិន ហ៊ិន ប្រធានមន្ទីរកសិកម្មខេត្តកំពង់ឆ្នាំងបានអះអាងថា ដីបឹងពោធិ៍​នៅ​តែជាបឹងរបស់រដ្ឋហើយរឿងចង់បង្កើតសហគមន៍ទាល់តែមានការព្រមព្រៀងគ្នាពីសមាជិក ពីអាជ្ញាធរភូមិ ពីអាជ្ញាធរឃុំ ពីអាជ្ញាធរស្រុកបានអាចធ្វើទៅបាន មិនមែនពួកគាត់ធ្វើតែ​មួយ​ក្រុមគាត់ហើយស្នើមកលោក  ធ្វើម្ដេចលោកមានសិទ្ធិសម្រេចបាន។

លោកបន្ដថា៖«ខ្ញុំដឹងច្បាស់ថា​ ដីបឹង ដីបឹងរបស់រដ្ឋ ហើយការគ្រប់គ្រងរបស់មន្ទីរធនធាន​ទឹក»

ប្រជាសហគមន៍នៅភូមិឡពាង បានអះអាងថា ការលើកឡើង​របស់អាជ្ញាធរគឺជាការឃុបឃិត​គ្នាជាប្រព័ន្ធតាំងពីថ្នាក់ភូមិរហូតដល់ថ្នាក់ខេត្ត ដោយសារ​ទង្វើទាំងអស់ហ្នឹងហើយទើបធ្វើ​ឲ្យ​បឹងវារួមតូចតាំងពី១០០ហិកតាជាងមកនៅសល់ត្រឹម៤៧.២២ហិកតាទេ មូលហេតុដោសារ​គ្មាន​អ្នកណាគ្រប់គ្រង។

ប្រជាសហគមន៍បានបន្តថា​ បឹងជាបឹងរដ្ឋមែន​ប៉ុន្ដែរដ្ឋមិនបានគ្រប់គ្រង​បឹងហ្នឹងហើយនាំគ្នា​កាត់លក់អស់​២កន្លែងហើយ ​អ៊ីងចឹងហើយបានជាលោកចង់រក្សាដី៤៧.២២ហិតាហ្នឹង​ឲ្យ​គង់​វង្ស។ មួយវិញទៀត​លោកថា​មិនមែនពាក្យថាសហគមន៍មួយម៉ាត់ មិនមែន​យក​មក​គ្រប់គ្រង់​​ដោយ​ខ្លួន​ឯងនោះទេ ពាក្យថាសហគមន៍គឺយកមកបម្រើឲ្យប្រជាពលរដ្ឋ។

ទិដ្ឋភាពបឹងពោធិ៍នៅឃុំតាជេស ស្រុកកំពង់ត្រឡាច ខេត្តកំពង់ឆ្នាំង។ រូបថតនៅថ្ងៃទី៨ ខែឧសភា ឆ្នាំ២០២២។ ផ្ដល់ឱ្យដោយលោក ស្ងួន ញឿន

អ្នកស្រី ស្ងួន ​ញ៉េន អាយុ៤៧ឆ្នាំ ប្រជាពលរដ្ឋរស់នៅភូមិឡពាង ឃុំតាជេស បានរៀបរាប់ថា ការ​ដែលអាជ្ញាធរលើកឡើងថាមិនអាចប្រគល់បឹងពោធិ៍ទៅជាបឹងសហគមន៍ ប្រជាសហគមន៍​នឹងមាន​ផលលំបាកទៅថ្ងៃមុខ ពីព្រោះបើអាជ្ញាធរលប់បឹងអស់ទៅ​តើប្រជាពលរដ្ឋបានអ្វីហូប​បាន​អ្វី​រក។ អ្នកស្រីបន្ដថា ពីដើមមកគេឲ្យប្រជាពលរដ្ឋផ្ដិតមេដៃស្ដារបឹង តែពេលប្រជាពលរដ្ឋ​ផ្ដិត​មេដៃឲ្យហើយបែរជាគាត់(អាជ្ញាធរ)ស្ដារយកដីពីក្រោយមកចាក់លប់ផ្នែកខាងមុខបឹងវិញ។

អ្នកស្រី ញ៉េន បន្តថា រឿងនេះហើយដែលធ្វើឲ្យពួកគាត់មានបញ្ហាទៅថ្ងៃក្រោយវាអាចនឹង​បាត់បង់​ ជាពិសេសការលើកឡើងរបស់ពួកគាត់គឺមិនបានគិតពីប្រជាពលរដ្ឋថា​ថ្ងៃក្រោយ​ពិបាកអ្វីផង ណាមួយពួកគាត់ពេលធ្វើអ្វីមួយមិនដែលបានពិភាក្សាជាមួយប្រជាពលរដ្ឋទេ ជាពិសេសអ្នកស្រីថា​បើទោះបីគេមិនអនុញាត្តឲ្យបង្កើតសហគមន៍ក៏ពួកអ្នកស្រីនៅតែតស៊ូ​ទាមទារដើម្បីកូនចៅ​ជំនាន់ក្រោយ។

អ្នកស្រីនិយាយថា៖«[ប្រជាសហគមន៍]ឃើញ​ពួកខាងអាជ្ញាធរហ្នឹងដើរវាស់ដីទាំងយប់  ហ្នឹងហើយដែលពួកខ្ញុំមានការព្រួយបារម្ភ​ទៅថ្ងៃ​មុខ»

អ្នកស្រី អ៊ុំ សុភី ដែល​ជា​សកម្មជន​ដីធ្លី​និងជាតំណាង​សហគមន៍ឡពាង បាន​ប្រាប់​ខេមបូចាថា មូលហេតុដែលប្រជាសហគមន៍ចេះតែទាមទារបឹងពោធិ៍​មកកាន់កាប់ជាបឹងសហគមន៍​ពីព្រោះ​កន្លងមកបឹងនេះវាក្លាយជាបឹងអាណាធិបតេយ្យ ចង់អ្នកណាឆក់ ដាក់អួន ជីកបៀរក្នុងបឹង​បំផ្លាញពូជត្រី​ គឺមិនមានអាជ្ញាធរណាចេញទប់ស្កាត់ទេ ហើយអ្នកដែលហ៊ានធ្វើសកម្មភាព​ទាំងនេះសុទ្ធតែបងប្អូននិងខ្សែអាជ្ញាធរក្រៅពីហ្នឹងមិនមានអ្នកណាហ៊ាននោះទេ

អ្នកស្រីថ្លែងទៀតថា ដូច្នេះ​ហើយបានជាប្រជាសហគមន៍ចង់យកបឹងហ្នឹងមកថែរក្សា​និង​អភិរក្ស ប៉ុន្ដែបែរជាអាជ្ញាធរចោទពួកអ្នកស្រីថាញុះញង់ទៅវិញ អ្នកស្រីបានបញ្ជាក់បន្ថែមថា ការលើកឡើងរបស់អាជ្ញាធរមិនត្រឹមត្រូវឡើយ។​

អ្នកស្រីឱ្យដឹងថា៖«ពួកខ្ញុំគ្រាន់តែចង់អភិរក្សបឹងហ្នឹងជាបឹងសហគមន៍ទេ»

យ៉ាងណាក៏ដោយខេមបូចាបានព្យាយាមទាក់ទងទៅ លោក ដោក ប៊ុនថុន ប្រធានមន្ទីរ​ធនធានទឹកខេត្តកំពង់ឆ្នាំងដើម្បីសុំការបំភ្លឺពាក់ព័ន្ធនិងរឿងដីបឹងពោធិ៍ ប៉ុន្ដែតេទូរសព្ទចូល​គ្មានអ្នកលើក។

ចំណែកអ្នកស្រី ស្វាយ ស៊ីម មេឃុំតាជេស បានថ្លែងថា ដីបឹងពោធិ៍គឺជាដីរបស់រដ្ឋតាំងពីយូរ​តពីដូន​ពី​តា​មកមិនមែនទើបតែឥឡូវនោះទេ ហើយការស្នើសុំដាក់បឹងជាបឹងសហគមន៍​ចាំ​មើល​ថ្នាក់​លើ​គេអ្នកសម្រេច អ្នកស្រីបញ្ជាក់ថា កាលពី២ខែមុនថ្នាក់លើបាននាំគ្នាមកប្រជុំ​និយាយ​អំពី​បញ្ហាបឹងហ្នឹងដែរ ប៉ុន្ដែមិនទាន់មានការសម្រេចណាមួយនៅឡើយទេ ហើយរឿង​ស្ដារបឹង​នេះ​អាជ្ញាធរបានស្នើឲ្យមានការស្ដារបឹងពោធិ៍ហ្នឹងតាំងពី១០ឆ្នាំមុនមកហើយ ទើបតែ​បាន​ស្ដារ​ពេល​នេះទេ។

អ្នកស្រីបន្ដថា ការលើកឡើងថាអាជ្ញាធរបានយកបឹងពោធិ៍ហ្នឹងទៅលក់មិនមែនជាការ​ពិត​ឡើយ គ្រាន់តែស្ដារឲ្យវាជ្រៅដើម្បីបម្រើផលប្រយោជន៍ប្រជាពលរដ្ឋទូទៅប៉ុណ្ណោះ។

អ្នកស្រីថ្លែងថា៖«ខ្ញុំសុំជម្រាបទៅដល់ពួកគាត់[ប្រជសហគមន៍]ផងថាដីបឹងនេះអត់មានទៅ​លក់ឲ្យក្រុមហ៊ុនណាទេ ប្រាប់គាត់ផង»

លោក ឌុច  ប៊ុនហេង មេភូមិឡពាង បាននិយាយថា ​ការលើកឡើងរបស់ប្រជាពលរដ្ឋ​មួយ​ចំនួនចោទថាអាជ្ញាធរយកដីបឹងពោធិ៍ទៅលក់ឲ្យក្រុមហ៊ុនឯកជនមិនមែនជាការពិតទេវាជាការញុះញង់​សុទ្ធសាធ។ លោកបន្តថា អាជ្ញាធរគ្រាន់តែឲ្យក្រុមហ៊នឯកជនកាយធ្វើទំនប់​ដើម្បី​ទប់​ទឹក​​ទុកសម្រាប់ឲ្យប្រជាជនទូទៅអាស្រ័យផល​មិនមែនដូចជាការនិយាយ​របស់មនុស្សមួយ​ចំនួននោះទេ។

លោកបន្ថែម​ថា៖ «ខ្ញុំជាអ្នកធ្វើកិច្ចការងារអស់ហ្នឹងប៉ុន្ដែរឿងសម្រេចថាទុកបឹងហ្នឹង​ជារបស់​រដ្ឋគឺខាងមន្ទីរធនធានទឹកជាអ្នកចាត់ចែងទេ ខ្ញុំអត់បានដឹងទេ»

លោក ស្រ៊ន សំឬទ្ធី អភិបាលរងខេត្តកំពង់ឆ្នាំង បានមានប្រសាសន៍ថា លោកមិនបានដឹងរឿង​ហ្នឹងលម្អិតនោះទេ មានអភិបាលរងម្នាក់ដែលគាត់ធ្វើខាងហ្នឹងប៉ុន្ដែគាត់រវល់។

លោកបន្ដថា៖«ប្អូនអាចទាក់ទងទៅអភិបាលស្រុកទៅគាត់ដឹងរឿងហ្នឹងច្បាស់»

បើតាមលោក វ៉ន ស៊ីផា អភិបាលស្រុកំពង់ត្រាច បានថ្លែងថា ចេះតែនាំអាទិ៍នាំរឿងណាស់ បើវាជាបឹងរដ្ឋគឺបឹងរដ្ឋកុំមកសហគមន៍ស្អីនោះ មកសហគមន៍នាំតែជម្លោះគ្នាទេ។

លោកបន្ដថា៖«អាហ្នឹងសន្សំរឿង កុំសន្សំរឿងអី»។

អ្នកភូមិឡពាង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង មកចូលរួមសវនាការនៅ​សាលាឧទ្ធរណ៍ ក្នុងរាជធានីភ្នំពេញ។ រូបថតថ្ងៃទី២០ ខែតុលា ឆ្នាំ២០២១។ ខេមបូចា/ ព្រីង សំរាំង

ពាក់ព័ន្ធនឹងរឿងបឹងពោធិ៍នេះ ​ព្រះរាជអាជ្ញា​រង ​លោក​ ឡុង ស៊ីថា បានចេញដីកាកោះ សកម្មជន​ អ្នកស្រី អ៊ុំ សុភី លោក ស្ងួន​ ញឿន និង ​អ្នកស្រី អ៊ុន ម៉ុន ត្រូវ​បង្ហាញ​ខ្លួន​ដើម្បី​សាកសួរ​ក្នុងឆ្នាំ២០២១ ដោយសារ​ឈ្មោះ​ ប៉ក់ សុទន ដែលបាន​ប្តឹងកាល​ពី​ថ្ងៃ​ទី​២០ ខែ​មេសា ឆ្នាំ​២០២១ ដោយចោទពីប៉ុនប៉ងឃាតកម្ម និងបទបំផ្លិចបំផ្លាញ​ដោយចេតនា។

តុលាការ​ខេត្ត​កំពង់ឆ្នាំង​បាន​កោះហៅ​សកម្មជន​ដីធ្លី​បី​នាក់​ដើម្បី​មក​សាកសួរ​ជុំវិញ​ការ​ចោទ​ប្រកាន់​ពី​បទ​ប៉ុនប៉ង​​ឃាតកម្ម និង​បទ​បំផ្លិចបំផ្លាញ​ដោយ​ចេតនា​ បន្ទាប់​ពី​ក្រុម​សកម្មជន​​នេះ​ត្រូវ​​បានចោទប្រកាន់​​ថា បាន​ប្រើប្រាស់​កាំបិត ​ដើម្បី​បំផ្លាញ​សំណាញ់របស់លោក សុទន​ ក្នុង​ឃុំ​តាជេស​ ស្រុក​កំពង់ត្រឡាច។

ដោយឡែកនៅថ្ងៃទី២៤ខែឧសភានេះក៏មានការប្រកាសសាលក្រមនិងសាលដីកានៅសាលាដំបូង​ខេត្តកំពង់ឆ្នាំងនិងសាលឧទ្ធរណ៍គឺករណីរបស់លោក រាជ ស៊ីម៉ា និងករណីមួយទៀត គឺករណីរបស់អ្នកស្រី ទួន សេង ដែលបានប្រកាសសាលដីកានៅសាលាឧទ្ធរណ៍ក្នុងក្រុង​ភ្នំពេញ ប៉ុន្ដែករណីលោក រាជ ស៊ីម៉ា ត្រូវបានលើកពេលដោយសារចៅក្រមជាប់រវល់ រីឯករណី​អ្នកស្រី ទួន សេង តាមការ​បញ្ជាក់របស់លោក ជូង ជូងី ដែលជាមេធាវីការពារក្ដីអ្នកស្រីថា ការ​ប្រកាសសាលដីកា​នៅ​សាលាឧទ្ធរហណ៍គឺមិនមានផលវិជ្ជមានណាមួយដែលអាចផ្ដល់​ភាព​យុត្តិធម៌ឲ្យអ្នកស្រីឡើយ គឺនៅតែឃុំឃាំងបន្ដទៀត។

 លោក ជូងី បានប្រាប់ខេមបូចាថា លោកនឹងបន្ដនីតិវិធីទៅតុលាការកំពូលទៀត​ដើម្បី​ស្វែង​រក​យុត្តិធម៌ឲ្យកូនក្ដីលោកទទួលបានការដោះលែង។ លោកបានបញ្ជាក់ថា ការ​ប្រកាស​សាល​ដីកា​គឺទាក់ទងនឹងលិខិតដែលអាជ្ញាធរធ្វើការចោទប្រកាន់អ្នកស្រីទួន សេង ដោយមិនចុះ​ហត្ថលេខានិងកាលបរិច្ឆេទឲ្យបានច្បាស់លាស់ ប៉ុន្ដែសាលាដំបូងខេត្តកំពង់ឆ្នាំង​នៅតែចាប់​កូនក្ដីលោកដាក់ឃុំឃាំងទាំងមិនមានភស្ដុតាងច្បាស់លាស់បើទោះបីដើមបណ្ដឹងបានដក​ពាក្យបណ្តឹង​រួចហើយក៏ដោយ ក៏តុលាការនៅតែមិនព្រមដោះលែងកូនក្ដីលោកដដែល។

លោកបន្ដថា៖«ខ្ញុំចាប់អារម្មណ៍ថា ប្រជាពលរដ្ឋមានកំហុសតែបន្ដិច មន្ដ្រីតុលាការចាប់​ថ្នាក់​អូស​ដំណើរដាក់ទោសគាត់ភ្លាម ប៉ុន្ដែអ្នកអនុវត្តច្បាប់បំពានច្បាប់ច្បាស់ក្រឡែត​ បែរជា​អ្នកច្បាប់ដូចគ្នារកវិធីការពារកំហុសឆ្គងដោយអះអាងថាអត់មានខុសឆ្គង អាហ្នឹងហើយ​ដែលធ្វើឱ្យយុត្តិធម៌ស្រុកខ្មែរយើងក្រឡាប់ចក្រ»

ជាមួយគ្នានេះដែរ លោក អឿង សារិទ្ធ ជាប្ដីអ្នកស្រី ទួន សេង បានប្រាប់ខេមបូចាថា  លោកមិនយល់ព្រមជាមួយការ​ប្រកាសសាលដីកានោះទេ ​ព្រោះរឿងវាមិនត្រឹមត្រូវទេ ហើយចេះតែឃុំខ្លួនប្រពន្ធគាត់បន្តទៀត។

លោកឱ្យដឹងបន្តថា ការកាត់ក្ដីករណីប្រពន្ធលោក គឺវាអយុត្តិធម៌ខ្លាំងណាស់ ព្រោះមនុស្សអត់​ត្រូវជាប់ពន្ធនាគារ ហើយណាមួយពាក្យបណ្ដឹងក៍បានដកហើយដែរ។ លោកចង់ឲ្យ​គ្រប់​ក្រសួងជួយអន្ដរាគមន៍ឲ្យមានការដោះលែងប្រពន្ធលោក​ដោយសារតែគាត់មាន​ជំងឺប្រចាំ​កាយ ណាមួយការចោទប្រកាន់វាអត់មានភស្ដុតាងអីផង។

លោកបន្ថែមថា៖« ស្នងការដែលដាក់ពាក្យបណ្ដឹងអត់មានលេខរៀងត្រឹមត្រូវ សុំឲ្យអង្គការជួយអន្ដរាគមន៍ឲ្យខ្ញុំផង»

អ្នកភូមិឡពាង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង មកចូលរួមសវនាការនៅ​សាលាឧទ្ធរណ៍ ក្នុងរាជធានីភ្នំពេញ។ រូបថតថ្ងៃទី២០ ខែតុលា ឆ្នាំ២០២១។ ខេមបូចា/ ព្រីង សំរាំង

រីឯអ្នកស្រី ស៊ឹម សោភា ជាមេធាវីការពារក្ដីឲ្យលោក ​រាជ ស៊ីម៉ា បានអះអាងថា មូលហេតុដែល​ការប្រកាសសាលក្រមត្រូវបានលើកពេលដោយសារចៅក្រមរវល់ទៅចូលរួមការប្រកាសចូលកាន់តំណែងប្រធានសាលាដំបូងខេត្តមណ្ឌលគីរី ទើបត្រូវលើកពេល​ហើយការប្រកាស​លើក​ក្រោយ​នៅមិនទាន់ដឹងពេលវេលាច្បាស់លាស់ទេ ពេលវេលាប្រកាសសាលក្រមលើកក្រោយ​ ក្រឡាបញ្ជីគេនឹងប្រាប់។

យ៉ាងណាក៏ដោយ អ្នកស្រីមេធាវីបន្តថា អ្នកស្រីរងចាំមើលការប្រកាសសាលក្រមសិនថា​វាទទួលបានលទ្ធផលយ៉ាងដូចម្ដេចសម្រាប់កូនក្តី(លោក រាជ ស៊ីម៉ា ) រួចពីបទចោទ​ឬក៏ផ្ដន្ទាទោសទើបអ្នកស្រីបន្ដនីតិវិធីទៀត។

អ្នកស្រីបន្ថែម​ថា៖ «បើសាលាដំបូងសម្រេចផ្ដន្ទាទោសគាត់[កូនក្តី] យើងនឹងប្ដឹងទៅ​សាលាឧទ្ធរណ៍ទៀត»

លោក សំ ចាន់គា មន្ត្រីសម្របសម្រួលអង្គការអាដហុក​ប្រចាំ​ខេត្ត​កំពង់ឆ្នាំង មានប្រសាសន៍ថា អ្វីដែលតុលាការធ្វើនេះ តុលាការអត់មានឆន្ទៈក្នុងការ​ស្វែង​រក​យុត្តិធម៌ដល់ជនជាប់ចោទទេ  នៅក្នុងរឿងក្ដីនេះមានមន្ទិលសង្ស័យ​ច្រើនពាក់ព័ន្ធ​ទៅនឹង​រឿង​ចោទប្រកាន់របស់ភាគីមួយចំហៀង។

លោក​ ចាន់គា បន្តទៀតថា ក្នុងរឿងនេះដែរចេតនា​របស់ភាគី​បណ្ដឹងនិង​អ្នក​ពាក់ព័ន្ធគឺមាន​ចេតនាធ្វើទុកម្នេញឬបង្រាបទៅលើតំណាងសហគមន៍ឬតំណាងពលរដ្ឋណា​ដែលហ៊ានតវ៉ា​ប្រឆាំងទៅនឹងអាជ្ញាធរដូចជាករណីអ្នកស្រី ទួន សេង គឺមានជម្លោះជាមួយអាជ្ញាធរជាមុន  មុននឹងកើតរឿងនេះឡើងនិងលោករាជ ស៊ីម៉ា ក៏មានរឿងជម្លោះដែលគាត់ទាមទារ​ការពារ​បឹងនិងអភិរក្សនេះដែរ អ៊ីចឹងហើយទើបពួកគាត់ជាមុខសញ្ញាដែលអាជ្ញាធរចង់បង្រ្កាប។

លោកបន្ថែម​ថា៖ «តុលាការបែរជាមិនព្យាយាមរកឲ្យឃើញពីសច្ចៈភាព​និងភាពយុត្តិធម៌​ជូនពួកគាត់ទេ បែរជាដាក់បន្ទុកឲ្យជាប់ពន្ធធនាគារ»

កាលពីថ្ងៃទី៨ ខែកក្កដាសាលាដំបូងរាជធានីភ្នំពេញបានកាត់ទោសអ្នកភូមិចំនួន៤ នាក់ រួមទាំង អ្នកស្រី សុភី និង លោក រាជ សីម៉ា ឱ្យជាប់ពន្ធនាគាររយៈពេល១ឆ្នាំ ពីបទញុះញង់​ឱ្យប្រព្រឹត្តបទឧក្រិដ្ឋ បំផ្លិចបំផ្លាញដោយចេតនានិងប្រើប្រាស់​អំពើហិង្សា​លើទ្រព្យសម្បត្តិ​ដែលកាន់កាប់ដោយបុគ្គលម្នាក់ក្នុងឆ្នាំ ២០១២។

នៅក្នុងសំណុំរឿងដាច់ដោយឡែកមួយពាក់ព័ន្ធនឹងក្រុមហ៊ុន KDC តុលាការរាជធានីភ្នំពេញ​កាលពីថ្ងៃទី១៤ ខែសីហា ឆ្នាំ ២០២០ បានកាត់ទោសអ្នកស្រី សុភី និងអតីតមេភូមិឡពាង លោក ទូច លី ពីបទញុះញង់ឱ្យប្រព្រឹត្តបទឧក្រិដ្ឋ ហើយបានផ្តន្ទាទោសសកម្មជនរូបនេះ​ឱ្យ​ជាប់ពន្ធនាគាររយៈពេល១ឆ្នាំ បន្ទាប់ពីរកឃើញថាមានទោសពីបទញុះញង់​អ្នកភូមិឱ្យធ្វើ​ស្រែចម្ការ​លើដីរបស់ក្រុមហ៊ុន KDC ដែលជាមានលោកស្រី ជា ខេង ជានាយិកា​ និងជាប្រពន្ធលោក ស៊ុយ សែម រដ្ឋមន្ត្រីក្រសួងរ៉ែ និងថាមពល៕

221 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម