ក្រសួងការងារកូរ៉េដាក់សំណើរមកក្រសួងការងារខ្មែរឱ្យកាត់បន្ថយពលករ និងត្រូវរៀបចំឱ្យបានល្អប្រសើរមុននឹងបញ្ជូនទៅធ្វើការ បន្ទាប់ពីពលករខ្មែរចាកចេញពីប្រទេសកូរ៉េដោយអ្នកខ្លះមិនជូនដំណឹងដល់ថៅកែ ខណៈអ្នកនាំពាក្យក្រសួងការងារកម្ពុជាថាកំពុងដោះស្រាយបញ្ហារឿងពលករជាមួយភាគីកូរ៉េដើម្បីបានបញ្ជូនពលករធម្មតាវិញ។
បើតាមលោក ហេង សួរ អ្នកនាំពាក្យក្រសួងការងារបណ្ដុះបណ្ដាលវិជ្ជាជីវៈ បានប្រាប់ ខេមបូចា តាមតេឡេក្រាមថា ចាប់ពីថ្ងៃទី២៣ដល់២៥ខែសីហា ពលករខ្មែរធ្វើការនៅកូរ៉េបានសម្រុកចេញមកកម្ពុជាចំនួនជាង៤០០នាក់។ លោកបន្តថា ពលករខ្មែរទាំងនោះខ្លះសុំច្បាប់ថៅកែថាឪពុកម្តាយឈឺធ្ងន់និងខ្លះទៀតសុំច្បាប់ថៅកែឈប់មិនបានក៏ពួកគេសម្រេចចិត្តបោះបង់ការងារចោល និងត្រឡប់មកកម្ពុជាវិញ។
លោកបញ្ជាក់ថា ការចាកចេញរបស់ពួកគេគឺដោយសារជឿលើការឃោសនាអកុសលបែបអបិយជំនឿ និងមិនសមហេតុផលរបស់លោក ខឹម វាសនា។ លោក ហេង សួរ បន្តទៀតថា ការណ៍នេះធ្វើឱ្យក្រុមហ៊ុនកូរ៉េមួយចំនួនបានប្តឹងទៅក្រសួងការងារកូរ៉េដោយស្នើឱ្យកាត់បន្ថយពលកររបស់កម្ពុជាដែរ ប៉ុន្ដែលោកមិនអាចបញ្ជាក់ថាតើមានចំនួនក្រុមហ៊ុនប៉ុន្មានទេ ដែលបានប្តឹងទៅក្រសួងការងារកូរ៉េ។
អ្នកនាំពាក្យក្រសួងការងារថ្លែងថា៖ «យើងកំពុងធ្វើការជាមួយភាគីពាក់ព័ន្ធឱ្យមានការយោគយល់លើករណីនេះ។ យើងបានចាប់ផ្តើមបញ្ជូនវិញជាធម្មតាហើយ។ បងប្អូនយើងភាគច្រើនលើសលប់បានយល់ និងបង្កើនការប្រុងប្រយ័ត្នលើការឃោសនានានា»។
លោក ហេង សួរ បញ្ជាក់ថា៖ «គេ[ក្រុមហ៊ុនកូរ៉េ]បានប្តឹងទៅក្រសួងកាងារកូរ៉េនិងបានសំណូមពរឱ្យក្រសួងការងារកូរ៉េកាត់បន្ថយចំនួនពលករយើង។ យើងបានខិតខំសុំការយោគយល់ពីនិយោជកកូរ៉េហើយសន្យាថានឹងអប់រំបងប្អូនយើងបន្ថែម»។
លោក ហេង សួរ បានបន្ថែមថា បច្ចុប្បន្នពលករខ្មែរដែលធ្វើការនៅប្រទេសកូរ៉េមានជាង៥ម៉ឺននាក់និងកំពុងបញ្ជូនបន្ដទៀតដោយសារតែប្រទេសកូរ៉េកង្វះពលករខ្លាំង។
អ្នកស្រី លី សូប៊ិន អ្នកបកប្រែនិងជាអ្នកទទួលបន្ទុកពលករដែលឡើងពីប្រទេសខ្មែរនិងមន្ត្រីផ្នែកអប់រំនៃក្រសួងការងារនិងបណ្ដុះបណ្ដាលវិជ្ជាជីវៈកូរ៉េ បានប្រាប់ ខេមបូចា ឱ្យដឹងថា ក្នុងរយៈពេលប៉ុន្មានថ្ងៃមុននេះ មានពលករខ្មែរជាច្រើននាក់បាននាំគ្នាសម្រុកចេញពីប្រទេសកូរ៉េដោយប្រញាប់ បើទោះបីជាមិនទទួលបានប្រាក់បំណាច់ឆ្នាំពីថៅកែក៏ដោយ។
អ្នកស្រីបន្ដថា ដោយសារហេតុដូច្នេះហើយក៏មានថៅកែជាច្រើនបាននាំគ្នាដាក់ពាក្យបណ្ដឹងទៅក្រសួងការងារកូរ៉េ ប៉ុន្ដែមានចំនួនប៉ុន្មានមិនដឹងចំនួនច្បាស់លាស់នោះទេ។ ដោយសារតែអ្នកស្រីទទួលបន្ទុកតែផ្នែកទទួលពលករពីខ្មែរឡើងទៅនិងអប់រំមុននឹងទៅធ្វើការ។ ហើយអ្នកស្រីក៏មានក្ដីបារម្ភផងដែរថា ខាងកូរ៉េអាចនឹងកាត់បន្ថយពលករខ្មែរ និងអាចមានវិធានការអ្វីផ្សេងទៀត ពីព្រោះឥឡូវមានថៅកែកូរ៉េបាននាំគ្នាច្រានចោលពលករខ្មែរខ្លះៗដោយទៅយកពលករប្រទេសផ្សេងជំនួសវិញ។
អ្នកស្រី សូប៊ិន បន្ដថា៖ «ខ្ញុំមិនសូវជាដឹងច្បាស់ទេបង ដោយសារខ្ញុំកាន់ផ្នែកអប់រំនិងទទួលពលករខ្មែរយើងដែលបានឡើងមកធ្វើការនៅកូរ៉េ។ ហើយរឿងថៅកែដាក់ពាក្យប្ដឹងហ្នឹងច្បាស់ជាមានច្រើនបង ប៉ុន្ដែចំនួនប៉ុន្មានខ្ញុំអត់ដឹងច្បាស់ទេ»។ អ្នកស្រីបន្ថែមថា «គ្រាន់តែថាខ្ញុំមានការព្រួយបារម្ភដែរបង កាលណាពលករគាត់ធ្វើចឹងវាប៉ះពាល់ខ្លាំងដល់ប្អូនក្រោយៗដែលពួកគាត់ចង់ឡើងមក តែដោយសាររឿងហ្នឹង[ទឹកជំនន់]អ្នកខ្លះថៅកែយកហើយ ក៏ច្រានចោលវិញ គ្នាខំរៀនអស់លុយម៉ាគំនរហើយបែរជាថៅកែច្រានចោលបែបនេះ»។
លោក សាន វិបុល អាយុ២៩ឆ្នាំ ជាពលករដែលបានចាកចេញពីប្រទេសកូរ៉េកាលពីថ្ងៃទី២៦ ខែសីហា ឆ្នាំ២០២២ បាននិយាយថា លោកបានគាំទ្រគណបក្សសម្ព័ន្ធដើម្បីប្រជាធិបតេយ្យតាំងពីយូរមកហើយ ហើយលោកតែងតែតាមដានរាល់សកម្មភាពរបស់គណបក្ស ជាពិសេសការពន្យល់ធម៌របស់លោក ខឹម វាសនា ហើយរឿងលិចទឹកជំនន់លោកពិតជាជឿថា មានមែនទើបលោកប្រញាប់មកពីប្រទេសកូរ៉េ។
លោក វិបុល បន្ដថា៖ «បាទបងខ្ញុំបានមកខ្មែរតាំងពីថ្ងៃ២៦មកម្ល៉េះ ដោយសារតែគិតថាវាពិតជាមានរឿងកើតឡើងដូចលោកពូ ខឹម វាសនា និយាយមែន។ បានហើយបងខ្ញុំសុំឆ្លើយនឹងបងប៉ុណ្ណឹងចុះ»។
លោក ផង់ វិបុល អាយុ៣០ឆ្នាំ ជាពលករទៅធ្វើការនៅប្រទេសអស់រយៈពេល២អាណាត្ដិ បានរៀបរាប់ថា លោកក៏មិនដឹងច្បាស់ដែរថា ការចាកចេញដោយប្រញាប់របស់បងប្អូនពលករ ចាកចេញដោយសាររឿងអីច្បាស់នោះទេ។ គ្រាន់តែដឹងថា ដោយសារការឃោសនារបស់ប្រធានគណបក្សLDP។ លោកបន្ដថា ការចាកចេញនេះវាបានប៉ះពាល់ដល់ពលករផ្សេងៗទៀតដែលចង់មកបម្រើការងារនៅប្រទេសកូរ៉េ។
ពលកររូបនេះបន្ដថា៖ «ខ្ញុំមិនសូវដឹងច្បាស់ទេបង ប៉ុន្ដែថាការចាកចេញរបស់ពលករយើងវាបានប៉ះពាល់ដល់ពលករដទៃទៀត ជាពិសេសពលករដែលគ្នាកំពុងរង់ចាំឡើងមក ដោយសារតែរឿងហ្នឹងអ្នកខ្លះថៅកែច្រានចោល ហើយ គាត់ទៅយកពលករប្រទេសផ្សេងជំនួសវិញ»។
ចំណែកឯពលករម្នាក់ទៀតដែលបានចុះកិច្ចសន្យារួចហើយ លោក ហាច់ គឹមហុង អាយុ២៨ឆ្នាំ រស់នៅស្រុកបាកាន ខេត្តពោធិ៍សាត់ បាននិយាយទាំងការព្រួយបារម្ភថា លោកបានចុះកិច្ចសន្យាការងារកាលពីម្សិលមិញរួចហើយ ប៉ុន្ដែលោកខ្លាចតែដោយសារតែរឿងពលករសម្រុកចាកចេញភ្លាមៗអាចធ្វើឱ្យថៅកែច្រានចោលវិញ។ លោកថា បើសិនជាមិនច្រានចោលជារឿងល្អ តែបើច្រានចោលគឺចប់តែម្ដងមិនដឹងពេលណាថៅកែយកវិញ។
លោក គឹមហុង បន្ដថា៖ «ខ្ញុំចុះកិច្ចសន្យាការងារនិងថៅកែម្សិលមិញហើយបង ប៉ុន្ដែមិនដឹងម៉េចម៉ាទេបង ពីព្រោះមិត្តភក្ដិខ្ញុំ ដែលថៅកែរើសដំណាលខ្ញុំ គេច្រានចោលវិញបាត់ហើយដោយសាររឿងចាកចេញរបស់ពលករយើងបង»។
លោក គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិតសភា បានថ្លែងពន្យល់អ្នកសារព័ត៌មាន ខេមបូចា ថា ការសម្រុកចាកចេញរបស់ពលករកូរ៉េក្នុងរយៈពេលខ្លីនេះ មិនសូវជាប៉ះពាល់សេដ្ឋកិច្ចជាតិប៉ុន្មាននោះទេ ប៉ុន្ដែអ្វីដែលប៉ះពាល់ខ្លាំងនោះគឺមុខមាត់និងកិត្តិយសរបស់កម្ពុជា ដែលជាប្រទេសមានការទទួលខុសត្រូវខ្ពស់ ប៉ុន្ដែត្រូវបានទទួលការមិនទុកចិត្តពីបណ្ដាប្រទេសជាដៃគូរដោយសារតែបញ្ហាការចាកចេញពីប្រទេសកូរ៉េ។
លោក សេរីវឌ្ឍន៍ បន្ថែមថា៖«ខ្ញុំគិតថាការចាកចេញរបស់ពលករកូរ៉េវាមិនសូវជាប៉ះពាល់សេដ្ឋកិច្ចធ្ងន់ធ្ងរដល់កម្ពុជាទេ ប៉ុន្ដែអ្វីដែលបានប៉ះពាល់នោះគឺមុខមាត់និងកិត្តិយសរបស់កម្ពុជាដែលជាប្រទេសមានការទទួលខុសត្រូវខ្ពស់ក្នុងការបញ្ជូនពលករទៅក្រៅប្រទេស។ ហើយប្រមុខរដ្ឋាភិបាលក៏បានចេញមុខសុំទោសទៅបណ្ដាប្រទេសដែលមានពលករខ្មែររួចហើយផងដែរ»។
រីឯលោក មឿន តុលា នាយកប្រតិបត្តិមជ្ឈមណ្ឌលសម្ព័នភាពការងារ និងសិទ្ធិមនុស្ស (Central) បានមានប្រសាសន៍ថា ការចាកចេញរបស់ពលករខ្មែរពីប្រទេសកូរ៉េដោយសាររឿងជំនឿដែលជារឿងមិនគួរកើតមាននោះទេ ពីព្រោះសម័យនេះជាសម័យវិទ្យាសាស្រ្ដ បើសិនជាមានរឿងហ្នឹងកើតឡើងមែន អង្គការ ណាសា នឹងប្រកាសអាសន្នហើយ ដូច្នេះវាមិនអាចមានដូចការឃោសនារបស់លោក ខឹម វាសនា បានទេ។
លោកបន្ដថា ការចាកចេញរបស់ពលករពិតណាស់ វានឹងប៉ះពាល់ដល់ប្រយោជន៍របស់ពលករនិងប្រយោជន៍ជាតិ ជាពិសេសបើសិនជាអ្នកចាកចេញមកដោយមានការសុំច្បាប់ត្រឹមត្រូវគឺមិនអីទេ ប៉ុន្ដែពលករដែលចាកចេញដោយមិនមានការអនុញ្ញាតពីថៅកែ ពួកគេមិនអាចត្រឡប់ទៅវិញបាន ហើយអាចជាប់ឈ្មោះក្នុងបញ្ជីខ្មៅបន្ថែមទៀត និងប៉ះពាល់ដល់ពលករផ្សេងៗទៀតដែលមានបំណងទៅធ្វើការនៅប្រទេសកូរ៉េ។
លោក តុលា មានប្រសាសន៍ថា៖ «ជាការយល់ឃើញរបស់ខ្ញុំការចាកចេញដោយសារជំនឿ វាមិនត្រឹមត្រូវឡើយ ពីព្រោះព្រះពុទ្ធសាសនាជឿលើកម្មផល។ ហើយការចាកចេញរបស់ពួកគាត់វាបានជះឥទ្ធិពលខ្លាំងដល់ពលករផ្សេងទៀត ដែលពួកគាត់កំពុងមានបំណងចង់ទៅ។ ហើយមិនដឹងថាថៅកែទាំងនោះអាចនឹងបន្ដយកពលករខ្មែរយើងទៀតឬអត់? បើនៅយកគឺជារឿងល្អ តែបើឈប់យកវានឹងប៉ះពាល់ដល់សេដ្ឋកិច្ចជាតិយ៉ាងខ្លាំង»។
នៅថ្ងៃទី៣១ ខែសីហា នៅក្នុងពិធីបើកការដ្ឋានសាងសង់ស្ពានអាកាសថ្មីចំនួន២ក្នុងរាជធានីភ្នំពេញ លោកនាយករដ្ឋមន្រ្ដី ហ៊ុន សែន មានប្រសាសន៍ថា សូមកុំឱ្យរដ្ឋាភិបាលនៃប្រទេសទាំងអស់ដែលមានពលករធ្វើការនៅក្នុងប្រទេសរបស់ខ្លួនដាក់ពាក្យបណ្តឹងទាមទារសំណងពីរដ្ឋាភិបាលកម្ពុជាឬពីពលករដែលរត់ចោលការងារ។
លោកនាយករដ្ឋមន្ត្រីបានបន្តថា៖ «សូមកុំផ្សារភ្ជាប់ពលករកម្ពុជាដទៃទៀតជាមួយពលករដែលធ្វើកំហុសដោយសារការចាញ់បោករបស់ លោក ខឹម វាសនា ដែលបានតាំងខ្លួនជាព្រះព្រហ្ម នៅប្រទេសកម្ពុជា»។ លោកបានបន្ថែមសារយ៉ាងខ្លីថា៖ «បើឯកឧត្ដម ខឹម វាសនា ធ្វើនយោបាយដោយយកអបិយជំនឿបែបនេះ គឺនឹងចាញ់»។
លោក ហ៊ុន សែន បន្ថែមទៀតថា ទាក់ទងនឹងបញ្ហានេះ លោកក៏បានស្នើទៅខាងក្រុមហ៊ុនកូរ៉េ ជប៉ុន និងថៃ សុំកុំប្តឹងតាមផ្លូវច្បាប់លើរដ្ឋាភិបាលកម្ពុជានិងពលករដែលរត់ចោលការងារនាពេលថ្មីៗនេះអី។
គួរបញ្ជាក់ថា កាលពីពេលថ្មីៗនេះ លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ បានតាំងខ្លួនថាជា[ព្រហ្មរក្សាលោក] និងបានទស្សទាយថាមានទឹកជំនន់លិចពិភពលោក ហើយមានតែដីចម្ការម្រេចរបស់លោកនៅក្បែរជើងភ្នំគូលែន ខេត្តសៀមរាប ប៉ុណ្ណោះដែលមិនជន់លិច។ លោក ខឹម វាសនា បានហៅសមាជិករបស់ខ្លួនឱ្យមកផ្តុំគ្នានៅចម្ការនោះដើម្បីរួចផុតពីការជន់លិចដែលជាហេតុធ្វើឱ្យអ្នកគាំទ្រលោកទាំងក្នុងស្រុកនិងក្រៅស្រុក នាំគ្នាសម្រុកទៅទីនោះ៕
