គណបក្សតូចចំនួនប្រាំ និងជំនួយការផ្ទាល់លោក កឹម សុខា បានជួបជាមួយនឹងឯកអគ្គរដ្ឋទូតអាមេរិកប្រចាំកម្ពុជាលោក W. Patrick Murphy នាសប្តាហ៍នេះ ហើយនៅក្នុងជំនួបនេះ តំណាងគណបក្សតូចៗបានបង្ហាញការព្រួយបារម្ភពីការធ្លាក់ចុះលទ្ធិប្រជាធិបតេយ្យនៅកម្ពុជា។
លោកឯកអគ្គរដ្ឋទូត Murphy បានជួបជាមួយនឹងតំណាងគណបក្សខ្មែរក្រោក គណបក្សសម្ព័ន្ធដើម្បីប្រជាធិបតេយ្យ គណបក្សសំបុកឃ្មុំសង្គមប្រជាធិបតេយ្យ គណបក្សហ៊្វុនស៊ិនប៉ិច គណបក្សប្រជាធិបតេយ្យមូលដ្ឋាន និងលោក មុត ចន្ថា ជំនួយការជាន់ខ្ពស់របស់អតីតប្រធានគណបក្សសង្រ្គោះជាតិលោក កឹម សុខា។
គណបក្សតូចទាំងប្រាំតំណាងឲ្យ១៣ភាគរយនៃសំឡេងឆ្នោតសរុបពីការបោះឆ្នោតជាតិកាលពីឆ្នាំ ២០១៨ និងមិនទទួលបានកៅអីនៅក្នុងរដ្ឋសភា និងព្រឹទ្ធសភាដែលគ្រប់គ្រងដោយគណបក្សប្រជាជនកម្ពុជា។ គណបក្សសង្រ្គោះជាតិត្រូវបានរំលាយកាលពីឆ្នាំ២០១៧ និងមិនបានចូលរួមនៅក្នុងការបោះឆ្នោតឆ្នាំ២០១៨នោះទេ។
លោក ម៉ម សូណង់ដូ ដែលដឹកនាំគណបក្សសំបុកឃ្មុំសង្គមប្រជាធិបតេយ្យ បានមានប្រសាសន៍ថា លោកបានប្រាប់ទៅលោកឯកអគ្គរដ្ឋទូត Murphy អំពីការក្តោបអំណាចគ្រប់គ្រងរបស់គណបក្សប្រជាជនកម្ពុជាមកលើមែកធាងទាំងបីរបស់រដ្ឋាភិបាល ជាពិសេសប្រព័ន្ធតុលាការ ដែលលោកនិយាយថា ការក្តោបអំណាចនេះបានប៉ះពាល់ដល់ឯករាជ្យភាពរបស់តុលាការ។
លោកបានថ្លែងថា៖ «ប្រសិនបើយើងមិនអាចធានានូវឯករាជ្យរបស់តុលាការ បញ្ហានៅតែបន្តកើតឡើងដូចមុន ពីព្រោះ [តុលាការ] គឺជាក្រុមដូចគ្នា [នឹងគណបក្សប្រជាជនកម្ពុជា]»។
លោកសូណង់ដូក៏បានចោទសួរលោកឯកអគ្គរដ្ឋទូតផងដែរអំពីគោលបំណងរបស់សហរដ្ឋអាមេរិកក្នុងដាក់សម្ពាធមកលើកម្ពុជា តាមរយៈទណ្ឌកម្មសេដ្ឋកិច្ច ដើម្បីឲ្យមានការកែប្រែការធ្លាក់ចុះលទ្ធិប្រជាធិបតេយ្យនៅក្នុងប្រទេស។
លោក យ៉េង វីរៈ ប្រធានគណបក្សប្រជាធិបតេយ្យមូលដ្ឋាន ដែលមានគោលបំណងស្នងតំណែងគណបក្សសង្រ្គោះជាតិ បាននិយាយថា លោកបានពាំនាំក្តីកង្វល់របស់ពលរដ្ឋកម្ពុជាអំពីស្ថានភាពសិទ្ធិមនុស្សនៅក្នុងប្រទេស និងបានសង្កត់ធ្ងន់ពីការប្រឹងប្រែងរបស់គណបក្សលោកដើម្បីប្រព័ន្ធដឹកនាំបែបពហុបក្ស ដូចមានចែងនៅក្នុងរដ្ឋធម្មនុញ្ញ។
លោក វីរៈ បានថ្លែងថា៖ «ដំណើរការលទ្ធិប្រជាធិបតេយ្យគឺមានឡើងចុះ ហើយមិនប្រព្រឹត្តទៅដោយរលូននោះទេ»។
លោក អ៊ី សាំងឡេង អនុប្រធានគណបក្សសម្ព័ន្ធដើម្បីប្រជាធិបតេយ្យ បានមានប្រសាសន៍ថា ប្រទេសកម្ពុជាមិនមានលទ្ធិប្រជាធិបតេយ្យពិតប្រាកដ ហើយសិទ្ធិមនុស្សមិនត្រូវបានគោរពនោះទេ។
លោកបានថ្លែងថា៖ «លទ្ធិប្រជាធិបតេយ្យមានន័យថា ប្រជាជនមានអំណាច ប៉ុន្តែតាមការពិតនៅកម្ពុជា ប្រជាជនមិនមានអំណាចនោះទេ» ដោយបន្ថែមថា គ្រប់អំណាចទាំងអស់គឺនៅផ្តុំជាមួយនឹងលោកនាយករដ្ឋមន្រ្តី ហ៊ុន សែន។
លោក Chad Roedemeier អ្នកនាំពាក្យស្ថានទូតអាមេរិកប្រចាំនៅកម្ពុជា បានមានប្រសាសន៍ថា សហរដ្ឋអាមេរិកបានជួយលើកកម្ពស់លទ្ធិប្រជាធិបតេយ្យ និងការគោរពសិទ្ធិមនុស្ស ដែលជាចំណុចផ្តោតចម្បងនៅក្នុងគោលនយោបាយការបរទេសរបស់សហរដ្ឋអាមេរិក នៅកម្ពុជា និងជុំវិញពិភពលោក។
លោកបានមានប្រសាសន៍ថា៖«យើងមិនគាំទ្រក្រុម ឬបុគ្គលណាមួយនោះទេ។ យើងគាំទ្រប្រជាជនកម្ពុជា និងសិទ្ធិតាមរដ្ឋធម្មនុញ្ញរបស់ពួកគេដើម្បីលទ្ធិប្រជាធិបតេយ្យ និងសេរីភាពមូលដ្ឋាន»។
លោក សុខ ឥសាន សមាជិកព្រឹទ្ធសភា និងអ្នកនាំពាក្យគណបក្សប្រជាជនកម្ពុជា មិនយល់ស្របជាមួយនឹងគំនិតរបស់ក្រុមគណបក្សតូចអំពីចំណាត់ថ្នាក់របស់កម្ពុជានៅក្នុងផ្នែកលទ្ធិប្រជាធិបតេយ្យនោះទេ។
លោកបានថ្លែងថា៖ «ខ្ញុំសូមនិយាយថា ប្រសិនបើកម្ពុជាធ្លាក់ចុះនូវលទ្ធិប្រជាធិបតេយ្យ នោះនឹងមិនមានស្ថិរភាពនយោបាយ និងសន្តិភាពដូចពេលបច្ចុប្បន្ននោះទេ។ ដូច្នេះ មិនមានការធ្លាក់ចុះនូវលទ្ធិប្រជាធិបតេយ្យ និងមិនមានការរំលោភបំពានសិទ្ធិមនុស្សជាទូទៅនោះទេ»។
ក្រៅពីការរំលាយគណបក្សសង្រ្គោះជាតិកាលពីឆ្នាំ ២០១៧ រដ្ឋាភិបាលកម្ពុជានៅតែបន្តធ្វើទុក្ខបុកម្នេញ ចាប់ខ្លួន និងកាត់ទោសសមាជិក និងអ្នកគាំទ្រគណបក្សនេះ។ នាពេលបច្ចុប្បន្ន តុលាការកំពុងជំនុំជម្រះសំណុំរឿងចោទប្រកាន់ពាក់ព័ន្ធនឹងអតីតសមាជិក និងអ្នកគាំទ្រគណបក្សសង្គ្រោះចំនួន ១៣០នាក់ពីបទក្បត់ជាតិ។
លោកប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជា បានមានប្រសាសន៍ថា មធ្យោបាយតែមួយគត់ដើម្បីកែប្រែបរិយាកាសនយោបាយគឺ ការដាក់បញ្ចូលគណបក្សសង្រ្គោះជាតិតាមរយៈការសម្រុះសម្រួលក្នុងទម្រង់ណាមួយ ពីព្រោះគណបក្សតូចៗមិនអាចដណ្តើមកៅអីនៅក្នុងការបោះឆ្នោតតទល់នឹងគណបក្សប្រជាជនកម្ពុជាបាននោះទេ។
លោកចន្ទរឿនបានថ្លែងថា៖ «ប្រសិនបើមិនមានដំណោះស្រាយនយោបាយជាកញ្ចប់ធំ [ជាមួយនឹងគណបក្សសង្រ្គោះជាតិ] ខ្ញុំគិតថា គណបក្សតូចៗនាពេលបច្ចុប្បន្នមិនមានកម្លាំងគ្រប់គ្រាន់ដើម្បីទាញយកជំនឿទុកចិត្តពីសាធារណជនដូចគណបក្សប្រឆាំង [ដែលត្រូវបានរំលាយ] នោះទេ»៕
ប្រែសម្រួលពីអត្ថបទភាសាអង់គ្លេស៖ Minor political parties raise democratic concerns with U.S. ambassador
