សមាគមសម្ព័ន្ធអ្នកសារព័ត៌មានកម្ពុជា

រោងចក្រកាត់ដេរជាង១០កន្លែងបានបិទទ្វារដើមឆ្នាំ២០២៣ ខណៈមួយចំនួនទៀតបានព្យួរការងារ និងកាត់បន្ថយកម្មករ

អ្នកលក់ដូរពីរនាក់អង្គុយបេះបន្លែនៅមុខរោងចក្រកាត់ដេរ លីម ឡាញ អ៊ិនធើណេសិនណល (ខេមបូឌា) ហ្គាមេន ដែលត្រូវបានបិទទ្វារកាលពីថ្ងៃទី២៤ ខែមករា ស្ថិតក្នុងខណ្ឌឫស្សីកែវ រាជធានីភ្នំពេញ។ រូបថតថ្ងៃទី២៦ ខែមករា ឆ្នាំ២០២៣។ ខេមបូចា/ ព្រីង សំរាំង
អ្នកលក់ដូរពីរនាក់អង្គុយបេះបន្លែនៅមុខរោងចក្រកាត់ដេរ លីម ឡាញ អ៊ិនធើណេសិនណល (ខេមបូឌា) ហ្គាមេន ដែលត្រូវបានបិទទ្វារកាលពីថ្ងៃទី២៤ ខែមករា ស្ថិតក្នុងខណ្ឌឫស្សីកែវ រាជធានីភ្នំពេញ។ រូបថតថ្ងៃទី២៦ ខែមករា ឆ្នាំ២០២៣។ ខេមបូចា/ ព្រីង សំរាំង

រោងចក្រចំនួនជាង១០កន្លែងបានបិទទ្វារនៅដើមឆ្នាំ២០២៣ និងចំនួនជិត​៤០ផ្សេង​ទៀត​បានព្យួរការងារកម្មករនិយោជិត និង៦០កន្លែងទៀតបានកាត់បន្ថយបុគ្គលិក ខណៈ​​សង្គម​​ស៊ីវិលមើលឃើញថា វាជាបញ្ហាសេដ្ឋកិច្ចរបស់កម្ពុជា ដែលអត្រាពលរដ្ឋ​អត់​ការងារ​​ធ្វើកើនឡើង​ ដូច្នេះធ្វើឱ្យប៉ះពាល់ដល់ជីវភាព និងបញ្ហាផ្សេងៗគួរឱ្យព្រួយបារម្ភ។

យោងតាមការ​បញ្ជាក់របស់អង្គការសង្គមស៊ីវិលធ្វើការ​លើផ្នែកវិស័យការងារ​មួយចំនួន​បានអះ​អាង​ថា ដើមឆ្នាំ២០២៣នេះ វិស័យកាត់​ដេរក្នុងប្រទេសកម្ពុជាមួយចំនួនកំពុងតែប្រឈមខ្លាំង​ដោយសារតែកម្មករកម្មការនីអត់ការងារធ្វើកាន់តែច្រើនពីមួយថ្ងៃទៅមួយថ្ងៃ​។

បើតាម លោក អាត់ ធន់ ប្រធានសហភាពការងារកម្ពុជា បានបញ្ជាក់ឱ្យខេមបូចាដឹងថា តាម​របាយការណ៍ពីសមាជិករបស់សហជីពខ្លួនបានបង្ហាញថា គឺមានរោងចក្រចំនួន​១០បាន​បិទ​ទ្វារ និងរោងចក្រចំនួន២០បានព្យួរការងារកម្មករ ខណៈប្រមាណ៦០រោងចក្រផ្សេង​ទៀត​បាន​កាត់បន្ថយបុគ្គលិក។

ជុំវិញរឿងនេះលោក អាត់ ធន់ បានបន្តថា វាជាបញ្ហាប្រឈមធ្ងន់ធ្ងរមួយ​សម្រាប់​ពលរដ្ឋកម្ពុជា​ដែលរស់ពឹងផ្អែកលើវិស័យកាត់ដេរសំលៀកបំពាក់ និងស្បែកជើង និង​ចង្វាក់​ផលិតកម្ម​ផ្សេងៗ​​ទៀតត្រូវបានបិទទ្វារទាំងស្រុង។ ការណ៍នេះវាធ្វើឱ្យសេដ្ឋកិច្ចកម្ពុជាអាច​នឹង​ជួប​បញ្ហា​ប្រឈមខ្លាំង បើរោងចក្របន្ដបិទទ្វារ និងព្យួរបែបនេះ។ យ៉ាងណាលោកថា ករណី​រោង​ចក្របិទទ្វារ និងព្យួរការងារដោយសារតែខ្វះការបញ្ជាទិញ ទើបបញ្ហាទាំងអស់នេះកើតឡើង។

លោកបន្ដថា៖ «ដោយសារកង្វះការបញ្ជាទិញ ទើបរោងចក្រមួយចំនួនបានបិទទ្វារ និងព្យួរ។ បញ្ហាពលរដ្ឋអត់ការងារធ្វើនឹងកើនឡើង ហើយសេដ្ឋកិច្ចនឹងជួបបញ្ហាច្រើន»

លោកបានឱ្យដឹងថា ដើម្បីដោះស្រាយបញ្ហាទាំងអស់នេះបាន ដំបូងក្រសួងការងារ​ត្រូវសម្រប​សម្រួល​ក្នុងការដោះស្រាយសំណងតាមច្បាប់ការងារជូនកម្មករ កម្មការិនីដែលរោងចក្រ​បាន​បិទទ្វារ ជាពិសេសលុយសង្គ្រោះពីរដ្ឋគួរតែផ្ដល់ឱ្យពួកគាត់។​ ហើយរដ្ឋត្រូវតែរក្សាEBA ក្នុង​ការ​បញ្ជាទិញឱ្យបាន បើមិនអ៊ឹចឹងទេ វិបត្ដិសេដ្ឋកិច្ចនឹងកើតឡើង។

លោកបន្ថែមថា៖ «ក្រសួងគួរតែជួយអន្ដរាគមន៍ឱ្យពួកគាត់ដើម្បីងាយស្រួលស្វែង​រកការងារ​ផ្សេង​ធ្វើ។ ហើយការឧបត្ថម្ភពីរដ្ឋគួរតែផ្ដល់ឱ្យពួកគាត់។ រដ្ឋត្រូវតែរក្សាEBAឱ្យបាន ដើម្បីឱ្យ​ការ​បញ្ជា​ទិញនៅតែបន្ដទើបអាចដោះស្រាយបញ្ហាទាំងហ្នឹងបាន»

អ្នកស្រី​  យ៉ាង សុភ័ណ្ឌ  ប្រធានសហជីពកម្ពុជា បានបញ្ជាក់ថា រោងចក្រដែលជាសមាជិក​របស់អ្នកស្រីចំនួន២២ហើយមាន៣ត្រូវបានបិទទ្វារ និង១១ព្យួរការងារ ចំណែកផ្សេងទៀត​អាចនឹងប្រឈម។

រីឯលោក គង់ អាទិត្យ ប្រធានសហជីពស៊ីខៅឌូ បានថ្លែងថា សមាជិកសហជីពលោក​ចំនួន​៥៣​រោងចក្រ ក្នុងនោះ១បានបិទទ្វារ និង៦បានព្យួរ ផ្សេងទៀតធ្វើការឆ្លាស់គ្នាធ្វើការ ប៉ុន្ដែ​អាច​នឹងប្រឈមបញ្ហាផងដែរ។

កាលពីថ្ងៃទី២៤ខែមករានេះ សហព័ន្ធសហជីពសេរីកម្មករនៃព្រះរាជាណាចក្រកម្ពុជា (FTUWKC) បានប្រកាសឱ្យដឹងដែរថា ក្រុមហ៊ុន លីម ឡាញ អ៊ិនធើណេសិនណល (ខេមបូឌា) ហ្គាមេន (Lim Line International (Cambodia) Garment Co.,Ltd.) ស្ថិត​នៅ​រាជធានីភ្នំពេញ ដែលមានកម្មករ-កម្មការិនីបម្រើការងារ ចំនួន៨៨៥នាក់ បាន​បិទ​ទ្វារ​អាជីវកម្មរបស់ខ្លួនផងដែរ ដោយក្រុមហ៊ុនបានអះអាងថា «គ្មានអ្នកបញ្ជាទិញ»

បន្ថែមលើនេះ កម្មកររោងចក្រមួយកន្លែងនៅខេត្ដកំពង់ឆ្នាំង ក៏បានផ្ទុះការតវ៉ាផងដែរ កាលពី​ថ្ងៃទី​២៣ ខែមករា ក្រោយពីថៅកែបានព្យួរការងារកម្មករកម្មការិនីប្រមាណជិត ២ ០០០នាក់។ សហព័ន្ធសហជីពសេរីកម្មករនៃព្រះរាជាណាចក្រកម្ពុជា (FTUWKC) បានសំដែងការ​សោក​ស្តាយ​ចំពោះការព្យួរការងារកម្មករខាងលើនេះ ដោយថា ការព្យួរការងារនេះ នឹងធ្វើឱ្យប៉ះពាល់​ដល់​ប្រាក់ចំណូល និងជីវភាពរបស់កម្មករ។

ជុំវិញរឿងនេះដែរ កញ្ញា យ៉ុង លាភ ​អគ្គលេខាធិការិនី​នៃសហព័ន្ធសហជីពសេរីកម្មករ​នៃ​ព្រះរាជាណាចក្រកម្ពុជា (FTUWKC) បានឱ្យដឹងថា មានសហជីពចំនួន​១៨​ដែល​ជា​សមាជិក​របស់សហព័ន្ធសហជីពសេរីកម្មករនៃព្រះរាជាណាចក្រកម្ពុជា ហើយមាន១ត្រូវបានបិទទ្វារ​ទាំងស្រុងនៅដើមសប្ដាហ៍នេះ និង២រោង​ចក្រផ្សេងទៀតបានព្យួរការងារកម្មករជិត ៣​ ០០០​នាក់ និងមានរោងចក្រផ្សេងទៀត​ក៏ប្រឈមក្នុងការបិទទ្វារឆាប់ៗដែរ។

យ៉ាងណាកញ្ញាថា បើក្រុមហ៊ុន និងរោងចក្របន្ដបិទ​និង​ព្យួរ​ការងារកម្មករ កម្មការិនី​បន្ថែម​ទៀត នោះបញ្ហាសេដ្ឋកិច្ចរបស់កម្ពុជានឹងប្រឈមខ្លាំង​ដោយ​សារអត្រាអត់ការងារ​ធ្វើកើន​ឡើង ពលរដ្ឋគ្មានប្រាក់ចំណូលដូច្នេះវិបត្ដិសេដ្ឋកិច្ចនឹងជួប។

កញ្ញាបន្ដថា៖ «ក្នុងនាមជាអង្គការសង្គមស៊ីវិល មានការព្រួយបារម្ភខ្លាំងពីបញ្ហាជីវភាព​របស់​កម្មករ កម្មការិនី ព្រោះកម្មករខ្លះក្រោយពីឈប់ពីកន្លែងចាស់​ពួកគាត់មិនអាចទៅ​រកការងារ​ធ្វើកន្លែងផ្សេងបានទេ ដោយសារពួកគាត់អាយុច្រើនគឺពិបាកណាស់»

បុរសម្នាក់បើកម៉ូតូកាត់មុខរោងចក្រកាត់ដេរ លីម ឡាញ អ៊ិនធើណេសិនណល (ខេមបូឌា) ហ្គាមេន ដែលត្រូវបានបិទទ្វារកាលពីថ្ងៃទី២៤ ខែមករា ស្ថិតក្នុងខណ្ឌឫស្សីកែវ រាជធានីភ្នំពេញ។ រូបថតថ្ងៃទី២៦ ខែមករា ឆ្នាំ២០២៣។ ខេមបូចា/ ព្រីង សំរាំង

កម្មការិនីម្នាក់ អ្នកស្រី លី ថារី អាយុ៣៨ឆ្នាំបានបម្រើការងារផ្នែកដេរ​អស់​រយៈ​ពេល​១៣ឆ្នាំ​នៅក្រុមហ៊ុន លីម ឡាញ អ៊ិនធើណេសិនណល (ខេមបូឌា) ហ្គាមេន (Lim Line International (Cambodia) Garment Co.,Ltd.)  និងជាស្រ្ដីមេម៉ាយដែលមាន​កូនក្នុងបន្ទុក​៤នាក់ បានលើក​ឡើងថា ក្រោយពី​រោងចក្របានបិទទ្វារទាំងស្រុងកាលពីដើមសប្ដាហ៍​នេះ​ដូច្នេះវាប្រាកដជា​ធ្វើឱ្យ​ប៉ះពាល់ដល់ជីវភាពអ្នកស្រីហើយ។

អ្នកស្រីបន្តថា ប្រាក់ចំណូលសម្រាប់ផ្គត់ផ្គង់គ្រួសារគឺអ្នកស្រីរកតែម្នាក់​ឯងដោយពឹងផ្អែក​លើ​ការងារ​រោងចក្រនេះឯង កាលណាបិទដូច្នេះវាប៉ះពាល់ខ្លាំងណាស់។ យ៉ាងណាមិញ​អ្នកស្រី​បាន​បញ្ជាក់ថា អ្នកស្រីចង់ស្វែងរកការងារនៅកន្លែងផ្សេងដែរ តែគេមិនយកឱ្យចូលធ្វើការងារ​នោះទេ ដោយសារតែអ្នកស្រីមានអាយុច្រើន ដូច្នេះវាជាបញ្ហាប្រឈម​សម្រាប់កូនៗដែល​កំពុងរៀន។

ស្រ្ដីមេម៉ាយរូបនេះត្អូញត្អែរថា៖ «ខ្ញុំមិនដឹងគិតម៉េចទេបង បើកន្លែងផ្សេងគេ[រោងចក្រ]​អត់យក​ខ្ញុំទេ ព្រោះខ្ញុំអាយុច្រើន។ ខ្ញុំត្រូវចឹញ្ចឹមកូន៤នាក់សុទ្ធតែនៅរៀន និងបង់ធនាគារ​ទៀត។ ខ្ញុំពឹង​លើរោងចក្រ គ្រាន់បាន៣០០ដុល្លារទៅ៤០០ដុល្លារក្នុងមួយខែ តែឡូវចប់ហើយបង។ បើទៅ​ស្រុកមិនដឹងធ្វើអី បើមានស្រែគ្រាន់ធ្វើ ចុះបើខ្ញុំអត់មានផង មិនដឹងទៅធ្វើអី»

អ្នកស្រី ថារី បានស្នើសុំទៅក្រសួងការងារ និងរដ្ឋាភិបាលមេត្ដា​ជួយដោះស្រាយ​យ៉ាងណា​ឱ្យកម្មករកម្មការិនីដែលមានអាយុប្រហាក់ប្រហែល​អ្នកស្រីអាចចូលធ្វើការ​នៅកន្លែងផ្សេង​បាន ដើម្បីដោះស្រាយបញ្ហាប្រឈមផ្សេងៗក្នុងជីវភាព។

កាលពីថ្ងៃទី១៨ ខែមករា ឆ្នាំ២០២៣ ក្រសួងការងារបានចេញសេចក្ដីជូនដំណឹង ស្ដីពីការ​បើក​​ប្រាក់​ឧបត្ថម្ភជូនបងប្អូនកម្មករនិយោជិតក្នុងវិស័យកាត់ដេរ និងទេសចរណ៍ ដែល​ត្រូវ​បាន​ព្យួរ​កិច្ចសន្យាការងារ ស្របតាមស្មារតីនៃកញ្ចប់វិធានការរាជរដ្ឋាភិបាល​(លើក​ទី៨៨)។

ក្នុងលិខិតដដែលបានបញ្ជាក់ថា មានរោងចក្រសហគ្រាសចំនួន១២បានព្យួរ ហើយកម្មករ​និយោជិត​៨៦៦នាក់ដែលបានព្យួរការងារអាចបើកប្រាក់ឧបត្ថម្ភៈដោយរដ្ឋ។ ការព្យួរការងារ​ចាប់​ពី១១ថ្ងៃ​ទៅ២០ថ្ងៃ​គឺទទួល១២ម៉ឺនរៀល ឬស្មើ៣០ដុល្លារ។ ការព្យួរការងារចាប់ពី២១ថ្ងៃ​ទៅ១ខែត្រូវ​ទទួល​បានប្រាក់១៦ម៉ឺន២ពាន់រៀល ស្មើនឹង៤០ដុល្លារ។

លោក សេង សក្ដា ប្រតិភូរដ្ឋាភិបាលទទួលបន្ទុកជាអគ្គនាយកការងារនៃក្រសួងការងារ បាន​បញ្ជាក់ថា លោកមិនបានទទួលបន្ទុកលើផ្នែកហ្នឹងនោះទេ ដោយលោក​អ្នកសារព័ត៌មាន​ខេមបូចា​ទៅសួរឯកឧត្ដម ហេង សួរ ជាអ្នកទទួលបន្ទុកលើកិច្ចការងារអស់ហ្នឹង។

លោក សក្ដាបន្ដថា៖ «បងអត់ទទួលបន្ទុករឿងហ្នឹងទេ អាចសួរឯកឧត្ដម ហេង សួរ ព្រោះគាត់អ្នកទទួលបន្ទុកលើការងារហ្នឹង បងអត់ដឹងទេ»។   

ជុំវិញរឿងនេះ លោក ហេង សួរ  អ្នកនាំពាក្យក្រសួងការងារ មិនបានឆ្លើយតបនឹងសំណួររបស់ ខេមបូចានោះទេ ដោយលោកបានឱ្យអ្នកសារព័ត៌មានទៅមើលច្បាប់ស្ដីពីការងារជំនួសវិញ។

លោកថ្លែងយ៉ាងខ្លីថា៖ «ប្អូនទៅមើលច្បាប់ការងារចុះ ខ្ញុំមិនមានអីនិយាយទេ»

យោងតាមច្បាប់ស្ដីពីការងារ មាត្រា៩១ ឱ្យដឹងថា ការរំលាយកិច្ចសន្យាការងារតាមឆន្ទៈ​ផ្ទាល់​នៃភាគីណាមួយ ដោយគ្មានហេតុផលត្រឹមត្រូវនោះ អាចបើកសិទ្ធិឱ្យភាគីម្ខាងទៀតទាម​ទារសំណងសោហ៊ុយជំងឺចិត្តបាន។

ចំណែកលោក កាំង មូនីកា អគ្គលេខាធិការរងនៃសមាគមរោងចក្រកាត់ដេរកម្ពុជា (GMAC) បានមាន​ប្រសាសន៍ថា បញ្ហាដែលរោងចក្របានបិទទ្វារ និងព្យួរការងារនេះគឺគ្រប់គ្នា​បានដឹង​ហើយ​ថាដោយសារតែវិបត្ដិសេដ្ឋកិច្ចរបស់សហភាពអឺរ៉ុប និងអាមេរិក​ក្រោយពីមានសង្គា្រម​រវាងអ៊ុយក្រែន និងរុស្សី ព្រោះរាល់ការផលិតបានត្រូវនាំចេញទៅតំបន់ទាំងនោះ។

លោកបន្ដថា ពាក់ព័ន្ធនឹងបញ្ហានេះ វាអាចមានផលអវិជ្ជមានខ្លះ ប៉ុន្ដែមិនរហូតដល់ធ្វើឱ្យ​សេដ្ឋកិច្ចកម្ពុជាធ្លាក់ចុះទាំងស្រុងដែរ។ លោកថាបញ្ហានេះមិនមែនតែកម្ពុជាតែមួយនោះទេ មានទាំងប្រទេសវៀតណាម បង់ក្លាដេស និងមានប្រទេសផ្សេងៗទៀត ក៏កំពុងជួប​បញ្ហានេះ​ដែរ ដូច្នេះវាមិនមែនជាបញ្ហាធំដុំដែលគួរឱ្យព្រួយបារម្ភនោះទេ។

លោក មូលីកា បន្ដថា៖ «យើងដឹងហើយថាបញ្ហាសេដ្ឋកិច្ចនៅអឺរ៉ុបកំពុង​តែជួបបញ្ហាអាក្រក់​ដោយសារសង្រ្គាមនៅអ៊ុយក្រែនដែលនាំឱ្យតម្រូវការធ្លាក់ចុះ ហើយការបញ្ជា​ទិញក៏មិន​សូវ​មាន ទើបប៉ះពាល់បងប្អូនកម្មករយើង។ ខ្ញុំគិតថាមានបញ្ហាអវិជ្ជមាន ក៏ប៉ុន្ដែខ្ញុំមិនទាន់គិតថា​វាស្ថិតនៅកម្រិតមួយដែលអាចបង្កជាចលាចលទេ បាទ!»

បើតាមលោក គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិតសភា បានពន្យល់​ប្រាប់ថា បញ្ហា​នាំចេញទៅសហភាពអឺរ៉ុប មិនមានអ្វីជាបញ្ហានោះទេ លោកឃើញ​ទំហំ​នៃ​វិស័យ​កាត់ដេរ​គឺ​មាន​កំណើនរហូត។ លោកបន្ដថា បញ្ហាបិទរោងចក្រនេះ មិនមែន​ដោយសារតែ សង្គ្រាម​អ៊ុយក្រែន​​​ទេ ប៉ុន្ដែអ្វីដែលជាបញ្ហា​សំខាន់គឺការអស់​ផលិតភាព​នៃកម្លាំងពលកម្ម​ដោយសារ​កម្មករកម្មការិនីពួកគាត់មានវ័យចាស់​នឹងមិនអាចដេរបាន​បន្ដ​ទៀតទេ​ គេហៅថា ការធ្លាក់ចុះ​នៃផលិតភាពក្នុងវិស័យកាត់ដេរ។

លោក សេរីវឌ្ឍន៍ ថា៖ «រោងចក្រមួយចំនួនត្រូវព្យួរការងារសម្រាប់ពួកគាត់ហើយ​នឹង​រើស​ការងារថ្មីក្មេងមានកម្លាំងដើម្បីបង្កើនផលិតភាព។ អ៊ឹចឹងហើយ រដ្ឋាភិបាលបានផ្ដល់​នូវ​ប្រាក់​ឧបត្ថម្ភ​ដើម្បីជួយជាសាច់ប្រាក់ផង និងការបណ្ដុះ​បណ្ដាល​វិជ្ជាជីវៈ ដើម្បីឱ្យគាត់ប្ដូរ​ពី​ផលិតកម្ម​នៃវិស័យកាត់ដេរទៅវិស័យផ្សេងទៀត បាទ!»

1,286 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម