សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋខេត្តប៉ៃលិនដែលមានវិវាទដីធ្លីកំពុងព្រួយបារម្ភបន្ទាប់ពីតុលាការខេត្តប៉ៃលិនកោះហៅសាកសួរពលរដ្ឋជាង២០នាក់

ប្រជាពលរដ្ឋតំបន់សំបុកចាបឡើងមកសាលាខេត្តប៉ៃលិនសុំអន្តរាគមន៍ពីអាជ្ញាធរ មុនថ្ងៃចូលតុលាការខេត្ត។ រូបថ្ងៃទី១៦ ខែសីហា ឆ្នាំ២០២២។ រូបភាពផ្តល់ឱ្យ
ប្រជាពលរដ្ឋតំបន់សំបុកចាបឡើងមកសាលាខេត្តប៉ៃលិនសុំអន្តរាគមន៍ពីអាជ្ញាធរ មុនថ្ងៃចូលតុលាការខេត្ត។ រូបថ្ងៃទី១៦ ខែសីហា ឆ្នាំ២០២២។ រូបភាពផ្តល់ឱ្យ

ប្រជាពលរដ្ឋរស់នៅតំបន់សំបុកចាបក្នុងខេត្តប៉ៃលិន កំពុងមានការព្រួយបារម្ភយ៉ាងខ្លាំង ខណៈ​ពលរដ្ឋជាង២០នាក់ក្នុងចំណោមជាង១០០គ្រួសារ ត្រូវបានសាលាដំបូងខេត្តប៉ៃលិន​កោះហៅ​ឱ្យ​ចូល​ខ្លួនពាក់ព័ន្ធនឹងបញ្ហាដីធ្លី។

ដីតំបន់សំបុកចាបនេះស្ថិតនៅភូមិផ្សារព្រំជើង ឃុំស្ទឹងកាច់ ស្រុកសាលាក្រៅខេត្តប៉ៃលិន តំបន់នេះមានចម្ងាយតែប៉ុន្មានរយម៉ែត្រប៉ុណ្ណោះពីច្រកអន្តរជាតិព្រំ ដែលជាច្រក​សេដ្ឋកិច្ច​ដ៏សំខាន់មួយរបស់ខេត្តប៉ៃលិន។

ប្រជាពលរដ្ឋលោក កែវ សុវណ្ណ អាយុ ៤៨ឆ្នាំ ដែលមានដីកាកោះក្នុងចំណោមប្រជាពលរដ្ឋ​ទាំងជាង២០នាក់ បាននិយាយថា គាត់មានការតក់ស្លុតណាស់នៅពេលដែលមានមន្រ្តី ប្រៃណីយ៍ម្នាក់បានយកដីកាមកឱ្យនាល្ងាចថ្ងៃទី១៥ ខែសីហា ចោទប្រកាន់ថាពួកគាត់ប្រើ​ប្រាស់​ហិង្សាលើម្ចាស់អចលនវត្ថុដោយសុចរិតដូច្នេះ។

លោក សុវណ្ណ បានបញ្ជាក់ថា គាត់និងប្រជាជនមិនដែលបានប្រើប្រាស់អំពើហិង្សាលើ អ្នកណានោះទេ បើមានការប្រើហិង្សាមែន សមត្ថកិច្ចម្តេចមិនចាប់ខ្លួនពួកគាត់តាំង​ពីពេល​នោះមក។

លោក កែវ សុវណ្ណ​ បានលើកឡើងថា៖ «ចោទពួកខ្ញុំប្រើអំពើហិង្សាទាំងពួកខ្ញុំអត់ដឹងអីសោះ បើសិនពួកខ្ញុំប្រើអំពើហិង្សា ម្តេចសមត្ថកិច្ចជុំវិញទិសហេតុអ្វីមិនចាប់តាំងពីពេលនោះ បើប្រើអំពើហិង្សាទូទាំងភូមិទៅហើយ វាមិនដែលសមត្ថកិច្ចមិនដឹង»

លោក សុវណ្ណ បញ្ជាក់ថា នៅព្រឹកថ្ងៃទី១៧ ខែសីហា​ប្រជាពលរដ្ឋមួយចំនួនបានឡើង​ទៅ​តុលាការ​​តាមដីកាកោះហៅ តែប្រជាពលរដ្ឋដែលមានដីការកោះហៅទាំងជាង២០នាក់ មិន​បាន​​ត្រូវ​សាកសួរ​អ្វីនោះទេ ដោយ មន្រ្តីតុលាការរំសាយឱ្យត្រឡប់ទៅផ្ទះវិញ​សិនដោយលើក​ទៅពេលក្រោយវិញ។

លោក សុវណ្ណ បានបន្ថែមថា៖ «ពេលដល់តុលាការមានតែប្រជាពលរដ្ឋម្នាក់ប៉ុណ្ណោះ​ត្រូវ​បាន​គេ​ហៅ​ឱ្យចូលជួប រួចឱ្យមកប្រាប់តៗគ្នាថាឱ្យទៅផ្ទះវិញដោយគេថារំសាយសិន តែខ្ញុំ​នៅតែ​ព្រួយបារម្ភថាគេប្រាកដជាកោះហៅលើកក្រោយទៀតមិនលើកលែងទេ»

លោកស្រី បាន ស្រីមុំ អភិបាលខេត្តប៉ៃលិន ជួបដោះស្រាយជាមួយតំណាងពលរដ្ឋ​តំបន់សំបុកចាប នៅសាលាខេត្តប៉ៃលិន។ ទី១៦ ខែសីហា ឆ្នាំ២០២២។ រូបភាពពីផេក​រដ្ឋបាលសាលាខេត្តប៉ៃលិន

ដីកាបង្គាប់ឱ្យចូលខ្លួនរបស់សាលាដំបូងខេត្តប៉ៃលិនចុះថ្ងៃទី៩ ខែសីហា ឆ្នាំ២០២២ របស់ លោក គឹម ម៉េង ចៅក្រមស៊ើបសួរនៃសាលាដំបូងខេត្តប៉ៃលិន បានបង្គាប់ឱ្យប្រជាពរដ្ឋឈ្មោះ នូ ខេមរ៉ា ភេទប្រុស អាយុ៣៣ឆ្នាំ ឈ្មោះ ចន កូឡាប ភេទស្រី ឈ្មោះ យ៉ុន សីហា ភេទប្រុស ឈ្មោះ ទេស ចេក ភេទប្រុស និង បក្សពួក២៤នាក់ទៀត ចូលខ្លួននៅថ្ងៃទី១៧ ខែសីហា ឆ្នាំ២០២២។

ពលរដ្ឋទាំងនេះត្រូវបានរងការចោទប្រកាន់ទាក់ទងបទ «ហិង្សាទៅលើអ្នកកាន់កាប់​អចលនវត្ថុដោយសុចរិត» ដែលប្រព្រឹត្តនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន កាលពី អំឡុង ២០១០ រហូតមកដល់អំឡុងឆ្នាំ២០១៦។ បទល្មើសព្រហ្មទណ្ឌ​នេះមានចែងឱ្យមានទោសតាមបទបញ្ញតិមាត្រា២៥៣នៃច្បាប់ភូមិបាល។

ក្នុងមាត្រា២៥៣នៃច្បាប់ភូមិបាលជនណាដែលប្រើហិង្សាទៅលើអ្នកកាន់កាប់អចលនវត្តុ​ដោយ​​សុចរិត ទោះមិនទាន់បានធ្វើបណ្ណរឺកំពុងមានទំនាស់ក៏ដោយ ត្រូវផ្តន្ទាទោស​ពិន័យជា ​ប្រាក់១លាន៥សែនរៀលដល់២៥លានរៀល និងដាក់ពន្ធនាគារពី៦ខែដល់២ឆ្នាំ ដោយពុំទាន់​គិតបញ្ចូលនូវទោសប្រព្រឹត្តអំពើហិង្សាប្រឆាំងមនុស្ស។

អ្នកសារព័ត៌មានខេមបូចា បានធ្វើដំណើរស្កាត់ទៅជួបប្រជាពលរដ្ឋមួយក្រុម៧នាក់ដែលខ្លះ​មាន​ដីកាកោះហៅនៅភូមិសំបុកចាបផ្ទាល់ ពួកគាត់បានហៅ​អ្នកព័ត៌មានទៅក្រោយ​ផ្ទះក្រោម​ដើមឈើដើម្បីផ្តល់ព័ត៌មាន និងឯកសារផ្សេងៗ។ ប្រជាពលរដ្ឋទាំងនេះមាន​ទឹកមុខស្រង៉ូត​ស្រង៉ាត់ ហាក់មានការភ័យខ្លាចដោយស្នើសុំនិយាយក្នុងលក្ខខណ្ឌមិនបញ្ចេញឈ្មោះ និង សំឡេងដើម្បីសុវត្ថិភាព។

ពលរដ្ឋដែលមានដីកាកោះម្នាក់ក្នុងចំណោមនោះបាននិយាយថា ពួកគាត់រស់នៅ​ទីនេះ​តាំង​ពីឆ្នាំ១៩៩៨មក ក្រោយពីអាជ្ញាធរបាន​ផ្លាស់ប្តូរពីតំបន់ព្រំដែនក្បែរនោះ​ឱ្យមករស់​នៅ​ទីនេះ។

ពួកគាត់និយាយថានៅសុខៗ ឃើញគេយកដីកាពីតុលាការមកឱ្យដល់ផ្ទះ ពួកគាត់ស្រឡាំង​កាំងគ្រប់គ្នានឹងមានការភ័យខ្លាចជាខ្លាំង ដោយពួកគាត់ថាមិនបានប្រើអំពើហិង្សា​លើអ្នកណា​នោះទេនាពេលកន្លងមក។ ហើយក៏មិនស្គាល់អ្នកណាជាម្ចាស់ដីពិតប្រាកដនោះទេ ដឹងតែ​ដី​នេះអាជ្ញាធរបានផ្ទេរឱ្យប្រជាពលរដ្ឋមករស់នៅទីនេះជាង២០ឆ្នាំមកហើយ។

ពលរដ្ឋម្នាក់នោះថ្លែងថា៖ «កន្លងទៅអាជ្ញាធរធ្លាប់ប្រាប់បន្តបន្ទាប់ថា ដីសំបុកចាបនេះជារបស់​ឥស្សរជន ហើយក្រោយមកថាជាដីរបស់ក្រុមហ៊ុន តែមិនដឹងឈ្មោះក្រុមហ៊ុនមួយណា ក្រោយ​មកថាជាដីរបស់ជំទាវបានស្រីមុំ ម្តងថាដីរបស់ឯកឧត្តម អ៊ី ឈាន មិនដឹងមួយណា?»

ប្រជាពលរដ្ឋបានប្រាប់ថា នៅព្រឹកថ្ងៃទី១៦ ខែសីហា ឆ្នាំ២០២២ មុនមួយថ្ងៃដែលត្រូវ​តុលាការ​ខេត្តប៉ៃលិនកោះហៅ​ឱ្យចូលខ្លួន ប្រជាពលរដ្ឋជាច្រើននាក់បាន​លើកគ្នាទៅមុខ​សាលាខេត្ត​ប៉ៃលិន ដើម្បីឱ្យអាជ្ញាធរ​​ខេត្តជួយដោះស្រាយ កុំឱ្យតុលាការកោះហៅពួកគាត់ទៀត និងស្នើសុំ​ធ្វើ​ប្លង់​កម្មសិទ្ធិ​ដីធ្លីជូនពួកគាត់។ នៅពេលនោះអាជ្ញាធរខេត្តបានអនុញ្ញាត​ឱ្យពលរដ្ឋចំនួន​៨នាក់​​​ចូលជួប​លោក​ជំទាវ បាន ស្រីមុំ អភិបាលខេត្តប៉ៃលិនផ្ទាល់តែម្តង។

ក្នុងជំនួបនោះ ប្រជាពលរដ្ឋបានប្រាប់ដំណើររឿងជម្រាបជូនលោកជំទាវអភិបាលខេត្ត ដោយ​សុំឱ្យតុលាការបញ្ឈប់ការចេញដីកាកោះហៅប្រជាពលរដ្ឋទៀត និងសុំធ្វើប្លង់កម្មសិទ្ធិ​ដីធ្លី​ជូន​ដល់ប្រជាពលរដ្ឋ ។

ការឆ្លើយតបពេលនោះ តាមប្រជាពលរដ្ឋបញ្ជាក់ថា លោកជំទាវអភិបាលខេត្តបានមាន​ប្រសាសន៍​ថា៖ «ដីតំបន់សំបុកចាបនេះជាដីរបស់ឯកឧត្តម អ៊ី ឈាន គាត់ខំធ្វើការបរិច្ចាគ ឱ្យប្រជាពលរដ្ឋហើយ ប្រជាពលរដ្ឋត្រូវជួយគាត់វិញ គឺត្រូវបោះឆ្នោតជួនគណបក្សប្រជាជន​ក្នុងការបោះឆ្នោតជ្រើសរើសតំណាងរាស្រ្តឆ្នាំ២០២៣ខាងមុខឱ្យជាប់១០០ភាគរយ គាត់នឹងធ្វើ​ប្លង់ដីឱ្យ គឺធ្វើមួយខែហើយៗ នឹងធ្វើផ្លូវបេតុងឱ្យទៀត » ។  

អ្នកស្រី ហម ស្រីនាង ជាពលរដ្ឋម្នាក់ដែលបានចូលជួបអភិបាលខេត្ត​ប៉ៃលិន​ពេលនោះដែរ​បាននិយាយថា នេះជាលើកទី១ហើយដែលគាត់លឺពេញត្រចៀក​ពីមាត់របស់​លោក​ជំទាវ​អភិបាលខេត្តប៉ៃលិនថា​ ម្ចាស់ដីតំបន់សំបុកចាបនេះ ជារបស់លោក អ៊ី ឈាន ដែលអតីត​អភិបាលខេត្តប៉ៃលិន ។

អ្នកស្រី ហម ស្រីនាង ថ្លែងថា៖ «លើកទី១ហើយដែលលឺដូច្នេះ ហើយលោកជំទាវថា​អាជ្ញាធរ​ជួយហើយ ប្រជាពលរដ្ឋត្រូវជួយខ្លួនឯងផង គឺត្រូវបោះឆ្នោតតំណាងរាស្រ្តខាងមុខ​ឱ្យ​គណបក្សប្រជាជន»

លោកស្រី បាន ស្រីមុំ អភិបាលខេត្តប៉ៃលិន ជួបដោះស្រាយជាមួយតំណាងពលរដ្ឋ​តំបន់សំបុកចាប នៅសាលាខេត្តប៉ៃលិន។ ទី១៦ ខែសីហា ឆ្នាំ២០២២។ រូបភាពពីផេក​រដ្ឋបាលសាលាខេត្តប៉ៃលិន

ពលរដ្ឋម្នាក់ទៀតរស់នៅតំបន់សំបុកចាប លោក កែវ សុវណ្ណ អាយុ៦៨ឆ្នាំ បាននិយាយថា ពលរដ្ឋ​មានការព្រួយបារម្ភយ៉ាងខ្លាំងពីសុវត្ថិភាព នៅពេលដែលមានដីកាកោះហៅ ​ដូច្នេះ​​វា​ផ្ទុយស្រឡះដែលអាជ្ញាធរសន្យាធ្វើប្លង់កម្មសិទ្ធិដីធ្លីស្របច្បាប់ឱ្យប្រជាពលរដ្ឋ​កាលពី​មុន​បោះ​ឆ្នោត​ក្រុមប្រឹក្សាឃុំសង្កាត់អណ្តតិនេះ។

លោកបញ្ជាក់ថា នៅថ្ងៃឃោសនាបោះឆ្នោតលោក សៅ សារ៉ាត់ តំណាងរាស្រ្តមណ្ឌលខេត្ត ប៉ៃលិនរបស់គណបក្សប្រជាជន និងអាជ្ញាធរតំបន់នោះបានសន្យាថាធ្វើប្លង់កម្មសិទ្ធិដីធ្លី​ឱ្យ​ពលរដ្ឋជាង១០០គ្រួសាររស់នៅតំបន់នេះឱ្យតែបោះឆ្នោតជូនគណបក្សបានជាប់និងបានសុំ​ទោសបើមានមន្រ្តីរាជការធ្វើឱ្យប៉ះពាល់លើប្រជាពលរដ្ឋកន្លងមក សូមកុំខឹងសម្បាអី លោក​នឹង​ណែនាំអប់រំបន្ថែម។ ប្រជាពលរដ្ឋបញ្ជាក់ថាតាមប្រសាសន៍របស់អ្នកតំណាងរាស្រ្ត​ខាងលើ​នេះប្រាប់​ពលរដ្ឋពេលនោះថា ដីតំបន់សំបុកចាបនេះជារបស់លោកជំទាវ បាន ស្រីមុំ អភិបាល​ខេត្តប៉ៃលិន។

លោក សុវណ្ណ បញ្ជាក់ថា៖ «នៅពេលក្រោយបោះឆ្នោត ហើយបាត់យូរមិនឃើញធ្វើប្លង់ឱ្យ  ប្រជាពលរដ្ឋទៅសួរស្រុក គាត់ថាគេចាំតែធ្វើប្លង់ឱ្យតើ ប្រជាពលរដ្ឋក៏នាំគ្នាផ្តិតមេដៃ​សុំទៅ​អាជ្ញាធរខេត្តធ្វើប្លង់កម្មសិទ្ធិតាមការសន្យា ក្រោយពីដាក់ពាក្យស្នើសុំប៉ុន្មានថ្ងៃបែរជា​មានដីកា​កោះហៅប្រជាពលរដ្ឋជាង២០នាក់ទៅវិញ»

លោក កែវ សុវណ្ណ បានបន្តថា ក្រោយពីជួបជាមួយអភិបាលខេត្តប៉ៃលិន​ហើយ នៅព្រឹកថ្ងៃ​ទី១៧​ ខែសីហា ឆ្នាំ២០២២ ប្រជាពលរដ្ឋបានឡើងទៅកាន់​តុលាការតាម​ដីកា​កោះហៅ ដោយ​មាន​ប្រជាពលរដ្ឋច្រើននាក់ទៅអមជាមួយ​ឈរនៅមុខ​តុលាការ​ខេត្ត​ប៉ៃលិន​។

លោក សុវណ្ណ បានឱ្យដឹងថា៖ «នៅព្រឹកនោះ មានតែប្រជាពលរដ្ឋម្នាក់ប៉ុណ្ណោះឈ្មោះ យុត ទ្រី ត្រូវបានអនុញ្ញាតឱ្យចូលជួប តែមន្រ្តីតុលាការមិនបានសាកសួរអីទេ គ្រាន់តែប្រាប់​ឱ្យ​ឈ្មោះ​​ទ្រីហ្នឹង ប្រាប់តៗគ្នាឱ្យរំសាយសិន លើកទៅពេលក្រោយទៀត ដោយមិនបាន​លាយ​លក្ខណ៍​អក្សរ​នោះទេ»

លោក សុវណ្ណ បានបន្ថែមថា ក្រោយមកដោយព្រួយបារម្ភពីផ្លូវច្បាប់ ដោយសារមន្រ្តីតុលាការ មិនបានលាយលក្ខណ៍អក្សរលើលិខិតបញ្ជាក់ថាឱ្យប្រជាពលរដ្ឋត្រឡប់ទៅផ្ទះវិញនោះ នៅថ្ងៃ​ទី១៨ ខែសីហា ឆ្នាំ២០២២ ប្រជាពលរដ្ឋបានទៅតុលាការខេត្តប៉ៃលិន​ម្តងទៀត​ដើម្បី​បញ្ជាក់។

យោងតាមលិខិតមួយច្បាប់ មន្រ្តីតុលាការសរសេរនៅជ្រុងខាងក្រោមប៉ែកខាងឆ្វេងលើដីកា​កោះហៅប្រជាពលរដ្ឋនោះ តាមការស្នើសុំរបស់ប្រជាពលរដ្ឋ តែមិនបានបញ្ជាក់​ឈ្មោះអ្នក​សរសេរ​នោះទេ ដោយមានខ្លឹមសារខ្លីថា៖ «លើកពេលទៅថ្ងៃក្រោយ ១៨/០៨/២០២២»។

ខេមបូចា បានទូរសព្ទទៅលោក គឹម ម៉េង ប្រធានសាលាដំបូងខេត្តប៉ៃលិន និងជាចៅក្រម​ស៊ើប​សួរ​ក្នុងរឿងក្តីខាងលើនេះ ប៉ុន្តែលោកទាំងពីរបានចុចផ្តាច់ទូរសព្ទ នៅពេលដែល​អ្នកសារព័ត៌មានសាកសួរ​ជុំវិញការចេញដីកាកោះហៅពលរដ្ឋនៅតំបន់​សំបុកចាប។

ចំណែកលោកស្រី បាន ស្រីមុំ អភិបាលខេត្តប៉ៃលិន មិនអាចទំនាក់ទំនងដើម្បីបំភ្លឺតាមទូរស័ព្ទ​បានទេ។

ទោះបីយ៉ាងណានៅលើផេកផ្លូវការរបស់រដ្ឋបាលខេត្តប៉ៃលិន បានសរសេរកាលពីថ្ងៃទី១៦ ខែសីហា ឆ្នាំ២០២២ថា៖ «លោកជំទាវ បាន ស្រីមុំ អភិបាលខត្តប៉ៃលិន បានអញ្ជើញជួប​សវនាការជាមួយប្រជាពលរដ្ឋដែលមានបញ្ហាទំនាស់ដីធ្លីនៅភូមិផ្សារព្រំ(សំបុកចាប) ឃុំស្ទឹងកាច់ ស្រុកសាលាក្រៅខេត្តប៉ៃលិន​» ។

បើតាមលោក សៅ សារ៉ាត់ តំណាងរាស្រ្តមណ្ឌលខេត្តប៉ៃលិន នៃគណបក្សប្រជាជនកម្ពុជា បានមានប្រសាសន៍ប្រាប់ ខេមបូចា យ៉ាងខ្លីថា ដីតំបន់សំបុកចាបជាដីរបស់ឯកឧត្តម​ អ៊ី ឈាន ហើយអាជ្ញាធរបានជួបដោះស្រាយជាមួយប្រជាពលរដ្ឋចប់អស់ហើយ។

លោក សៅ សារ៉ាត់ ថ្លែងថា៖« លោកជំទាវអភិបាលខេត្តបានជួបដោះស្រាយជាមួយ​ប្រជាពលរដ្ឋ​ហើយ ចាំជួបពួកគាត់ទៅដឹងហើយ គាត់បានដោះស្រាយហើយ កុំឱ្យពិបាក​បញ្ជាក់តគ្នាអី ពួកគាត់ទទួលយកបានហើយ គាត់ឯកភាពគ្នាអស់ហើយ គ្រាន់តែដឹងប៉ុណ្ណឹង​ទៅបានហើយ»

ខេមបូចា មិនអាចទំនាក់ទំនងលោក អ៊ី ឈាន អតីតអភិបាលខេត្តប៉ៃលិន ដែលបច្ចុប្បន្នជា​រដ្ឋលេខាធិការក្រសួងការពារជាតិ ដែលគេស្គាល់ថាជាស្វាមីរបស់លោកស្រី បាន ស្រីមុំ អភិបាលខេត្តប៉ៃលិន បាននោះទេ។

ប្រជាពលរដ្ឋភូមិសំបុកចាប ជុំគ្នាផ្តល់ព័ត៌មាន នៅឃុមស្ទឹងកាច់ ស្រុកសាលាក្រៅ ខេត្តប៉ៃលិន។ រូបថតនៅថ្ងៃទី១៩ ខែសីហា ឆ្នាំ២០២២។ ខេមបូចា/ សុខ សាវី

ស្ថានភាពបច្ចុប្បន្ននិងប្រវត្តិដីតំបន់សំបុកចាប

ដីតំបន់សំបុកចាបនេះស្ថិតនៅភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន តំបន់នេះមានចម្ងាយតែប៉ុន្មានរយម៉ែត្រប៉ុណ្ណោះពីច្រកអន្តរជាតិព្រំ ដែលជាច្រក​សេដ្ឋកិច្ច​ដ៏សំខាន់មួយរបស់ខេត្តប៉ៃលិន។ នៅក្បែរតំបន់សំបុកចាកនេះ ឃើញមាន​ការអភិវឌ្ឍ​សំណង់​តូចធំព្រោងព្រាត មានសណ្ឋាគារ កាស៊ីណូ ផ្សារ បូរី និងហាងលក់ទំនិញតូចធំនានាប្រៀប​បាន​​កូនទីក្រុងមួយដូច្នេះដែរ។

ថ្វីត្បិតតែតំបន់នេះមានការអភិវឌ្ឍ តែប្រជាពលរដ្ឋរស់នៅតំបន់សំបុកចាបភាគច្រើន ផ្ទះ​សំបែង​របស់ពួកគាត់មិនមានសំណង់រឹងមាំនោះទេ ភាគច្រើនប្រក់ដំបូល និងជញ្ជាំង​សង្ខ័សី ខ្លះបាំងក្រឡាត់ ខ្លះគ្មានជញ្ជាំងជាដើម។ មុខរបរពួកគាត់ភាគច្រើនស៊ីឈ្នួលបេះផ្លែឈើ កម្មករ​សំណង់ក្នុងស្រុក ឆ្លងទៅប្រទេសថៃ វិលល្ងាចជាដើម ដែលរស់ស៊ីមួយថ្ងៃរស់មួយថ្ងៃ​ប៉ុណ្ណោះ។ ទីនេះឃើញមានលំនៅដ្ឋានប្រជាពលរដ្ឋតិចតួចប៉ុណ្ណោះជាប់នឹងផ្លូវជាតិ មាន​ជញ្ជាំង​ថ្មខ្លះនិងដាក់លក់ម្ហូបអាហារ លក់ខោអាវ និងសម្ភារៈនានា។

ពលរដ្ឋ អ៊ឹម សុជាតិ អាយុ៥៥ ឆ្នាំ បានឱ្យដឹងថា ប្រជាពលរដ្ឋមករស់នៅតំបន់សំបុកចាប​នេះ តាំងពីឆ្នាំ១៩៩៨មកម៉្លេះ ក្រោយពីអាជ្ញាធរបានផ្ទេរពួកគាត់មកពីចំណុចកាស៊ីណូ​ជាប់ព្រំ​ដែន​កម្ពុជាថៃ ក្បែរច្រកអន្តរជាតិព្រំ។

លោកបញ្ជាក់ថា បច្ចុប្បន្ននេះមានប្រជាពលរដ្ឋសល់១០៥គ្រួសារ រស់នៅលើផ្ទៃដីជាង មួយហិកតាប៉ុណ្ណោះ ដោយកន្លងទៅប្រជាពលរដ្ឋស្ទើរពាក់កណ្តាល បានសុខចិត្តដោះដូរ ទៅនៅតំបន់លូរដាច់ ដែលមានចម្ងាយប្រហែលបីគីឡូម៉ែត្រពីទីនេះបួនប្រាំឆ្នាំមកហើយ ដោយមួយគ្រួសារទទួលបានអង្ករមួយការ៉ុង តង់១ លុយ២០០ដុល្លារ និងដីមួយឡូត៍ទំហំ ៥ម៉ែត្រគុណ១៦ម៉ែត្រ។ ចំណែកប្រជាពលរដ្ឋដែលរស់នៅតំបន់សំបុកចាបបច្ចុប្បន្ននេះ គឺសុទ្ធសឹងតែអ្នកមិនយល់ព្រមដោះដូរ ។

លោក សុជាតិ បន្ថែមថាប្រជាពលរដ្ឋរស់នៅតំបន់សំបុកចាបនេះអាជ្ញាធរមិនមានចេញ​បណ្ណកម្មសិទ្ធិឱ្យនៅឡើយទេ ហើយគ្មានសិទ្ធិលក់ដូរ រឺផ្ទេរកម្មសិទ្ធិ។ បន្ថែមពីនោះ អាជ្ញាធរហាមមិនឱ្យសាងសង់សំណង់រឹងមាំ  សូម្បីតែទឹករដ្ឋក៏មិនទាន់តឱ្យដែរ គឺតឱ្យតែ​តំណាងប៉ុន្មាននាក់ប៉ុណ្ណោះ ។

លោក សុជាតិ បន្ថែមថា៖ «គេតឱ្យតែតំណាងក្រុម៣នាក់ទេ ហើយប្រជាពលរដ្ឋសុំតចែកគ្នា​ប្រើពីតំណាង ប្រជាពលរដ្ឋនោះបានប្រើតៗគ្នា ហើយពលរដ្ឋសាងសង់សំណង់រឹងក៏មិនបាន ចង់យកឯកសារដីធ្លីទៅបញ្ចាំធនាគារដើម្បីយកលុយមករកស៊ីក៏មិនបានដែរ គេមិនធ្វើ​ឱ្យ​ទេ»

អតីតទាហានសម័យរដ្ឋកម្ពុជាលោក កែវ សុវណ្ណ ឱ្យដឹងថា តំបន់សំបុកចាបនេះ​ពីមុន​ជា​ព្រលាន​ឈើ ដែលក្រុមហ៊ុនថៃឡើងមកកាប់លើភ្នំ សុទ្ធតែឈើប្រណិតៗធំៗ យកមកគរ​ដូចភ្នំនៅទីនេះក្នុងសម័យខ្មែរក្រហមកាន់កាប់ ហើយក្រោយមកត្រូវបានដឹកចេញ​ទៅ​ប្រទេសថៃ ក្រោយពីដោះស្រាយបញ្ចប់សង្គ្រាម។

លោកបញ្ជាក់ថា អាជ្ញាធរផ្ទេរឱ្យប្រជាពលរដ្ឋមកនៅទីនេះ មុនដំបូងសុទ្ធតែព្រៃ និងគ្រាប់មីន​ដែលរាយប៉ាយ ប្រជាពលរដ្ឋនាំគ្នាប្តូរកាប់ឆ្ការព្រៃត្រែង នឹង ដោះមីនដើម្បី​បានសាកសង់ផ្ទះ​រស់នៅដោយវេទនាណាស់។

លោក កែវ សុវណ្ណ ឱ្យដឹងថា៖ «ប្រជាពលរដ្ឋវេទនាណាស់ទំរាំមកដល់បច្ចុប្បន្ន មិនទាន់មាន​បណ្ណកម្មសិទ្ធិទៀត បច្ចុប្បន្ននេះប្រជាជនចាស់ៗក៍ខ្លះស្លាប់ ខ្លះសល់កូន សល់ប្រពន្ធ​រស់នៅ​បច្ចុប្បន្ននៅទីនេះបន្ត និងមានអ្នកថ្មីមករស់នៅដែរ»

បើតាមប្រជាពលរដ្ឋបានឱ្យដឹងថាកាលពីឆ្នាំ២០១៣និង២០១៥កន្លងទៅពួកគាត់ធ្លាប់បានដាក់ពាក្យសុំអន្តរាគមន៍ពីរដ្ឋសភាជាតិ ប្រមុខរាជរដ្ឋាភិបាល និងក្រសួងដែនដីនគរូបនីយកម្ម និង​សំណង់ជាដើម ដើម្បីដោះស្រាយបញ្ហាដីធ្លីរបស់គាត់ និង សុំបណ្ណកម្មសិទ្ធកាន់កាប់ស្រប​ច្បាប់។

ក្នុងលិខិតមួយច្បាប់របស់គណៈកម្មាធិការសិទ្ធិមនុស្សទទួលពាក្យបណ្តឹងនិងអង្កេត និង​ទំនាក់​ទំនងព្រឹទ្ធសភារដ្ឋសភា ចុះថ្ងៃទី២១ ខែមករា ឆ្នាំ២០១៣ ចុះហត្ថលេខាដោយសម្តេច ហេង សំរិន ប្រធានរដ្ឋសភាជាតិ បានជម្រាបជូនអភិបាលខេត្តប៉ៃលិន ឱ្យដោះស្រាយតាមការគួរ​ទៅ​តាមលិខិតសុំអន្តរាគមន៍របស់តំណាងប្រជាពលរដ្ឋ១៩២គ្រួសារលើផ្ទៃដីជាង២ហិកតា រស់នៅ​ភូមិផ្សារព្រំ (តំបន់សំបុកចាប) ដែលសុំបណ្ណកម្មសិទ្ធិរស់នៅស្របច្បាប់។

លិខិតនោះបញ្ជាក់​ថា ​ពេលដោះស្រាយបានលទ្ធផលយ៉ាងណា សូមផ្ញើរបាយការណ៍ដោះ​ស្រាយ​មកគណៈកម្មាធិការវិញផង ដើម្បីមានមូលដ្ឋានជម្រាបជូនម្ចាស់សំណើរវិញ។

ក្នុងលិខិតមួយច្បាប់របស់ខុទ្ទកាល័យលោកនាយករដ្ឋមន្រ្តីហ៊ុនសែន ចុះថ្ងៃទី៦ ខែឧសភា ឆ្នាំ ២០១៣ ដែលចុះហត្ថលេខាដោយលោក ហូ សិទ្ធី ក៏បានជម្រាបជូនអភិបាលខេត្តប៉ៃលិន​ផង​ដែរ ឱ្យជួយដោះស្រាយតាមសំណូមរបស់ប្រជាពលរដ្ឋ ដែលស្នើរសុំកម្មសិទ្ធស្របច្បាប់របស់​ប្រជាពលរដ្ឋខាងលើផងដែរ។

ទោះបីមានការដាក់លិខិតស្នើសុំអន្តរាគមន៍ពីថ្នាក់ដឹកនាំជាតិកំពូលៗជាបន្តបន្ទាប់អស់​រយៈ​ពេល​ជាច្រើនឆ្នាំមកទល់នឹងបច្ចុប្បន្ន នេះប្រជាពលរដ្ឋបានអះអាងថា ពួកគាត់នៅ​តែមិនទាន់​មាន បណ្ណកម្មសិទ្ធរស់នៅស្របច្បាប់ពីអាជ្ញាធរនៅឡើយ ហើយប្រជាពលរដ្ឋ​ខ្លះរស់នៅ​ដោយ​ភ័យខ្លាច ដោយសារនៅជាប់រឿងក្តីក្តាំនៅតុលាការមិនចេះចប់។

លោក ព្រាប សារុន មេភូមិផ្សារព្រំជើង បានឱ្យដឹងថា បច្ចុប្បន្ននេះមាន​ប្រជាពលរដ្ឋ​ទាំងចាស់​និងថ្មី រស់នៅតំបន់សំបុកចាបនេះ ចំនួន២២៧គ្រសារលើផ្ទៃដី១ហិកតាកន្លះ។ កន្លងទៅ​ប្រជាពលរដ្ឋ​ខ្លះក៏មានការដោះដូរទៅរស់នៅតំបន់ផ្សេង ខ្លះក៏ទៅហើយត្រឡប់មកនៅកន្លែង​ដើម​វិញ​ក៏មាន។

លោកមេភូមិបញ្ជាក់ថា ដីតំបន់សំបុកចាបនេះ ពីដើមឡើយជាដីរបស់ឯកឧត្តម អ៊ី ឈាន អាជ្ញាធរក៏មានការដោះស្រាយជាបន្តបន្ទាប់ដែរ នឹងត្រៀមធ្វើប្លង់កម្មសិទ្ធិជូនប្រជាពលរដ្ឋ​តាមការសន្យា មុនបោះឆ្នោត ក្រុមប្រឹក្សាឃុំសង្កាត់ដែរ តែដោយសារមានរឿងប្តឹងផ្តល់នៅ​តុលាការ ដែលក្នុងនាមអាជ្ញាធរក៏មិនដឹងថាខាងណាជាម្ចាស់ដើមបណ្តឹងនៅឡើយទេ។

លោកមេភូមិបន្ថែមថា ក្នុងនាមអាជ្ញាធរលោកតែងតែកាន់ជើងប្រជាពលរដ្ឋ ព្រោះការប្តឹងផ្តល់ នៅតុលាការប៉ះពាលដល់ជីវភាពប្រជាពលរដ្ឋ ពួកគាត់ចំណាយពេលវេលាឡើងចុះតុលាការ ខាតពេលវេលារកចំណូល ព្រោះប្រជាពលរដ្ឋតំបន់សំបុកចាបនេះក្រីក្ររ រកព្រឹកខ្វះល្ងាច។

លោកមេភូមិបន្ថែម៖ «ខ្ញុំក៏បន់ស្រន់ដែរឱ្យដោះស្រាយឱ្យបានរួចរាល់ជូនប្រជាពលរដ្ឋ​ឆាប់ៗ ខ្ញុំក៏សប្បាយចិត្តដែរ »

ទាក់ទងករណីនេះដែរ អភិបាលស្រុកសាលាក្រៅ លោក សំ សារ៉េត បានឱ្យដឹងថា​អាជ្ញាធរ​នៅចាំតែធ្វើប្លង់កម្មសិទ្ធិ ជូនប្រជាពលរដ្ឋប៉ុណ្ណោះ តែវានៅមានរឿងក្តីក្តាំនៅតុលាការ ។

លោកអភិបាលស្រុកបន្ថែមថា៖ «រឿងចេញដីកាកោះហៅរបស់តុលាការអាជ្ញាធរមិនហ៊ាន​លូកដៃទេ» ។

លោក អ៊ិន គង់ជិត មន្រ្តីស៊ើបអង្កេតអង្គការសិទ្ធមនុស្ស លីកាដូ ប្រចាំខេត្តបាត់ដំបង​និង​ប៉ៃលិន ដែលបានចុះស៊ើបអង្កេតករណីខាងលើបានឱ្យដឹងថា តាមការចុះស៊ើបអង្កេត​ស្រាវ​ជ្រាវ និងពិនិត្យដល់ទីតាំងជាក់ស្តែង លោករកឃើញថា ដីនៅចំណុចសំបុកចាបនេះគឺ ជាដី​ឯកជនរបស់រដ្ឋ កាលពីមុនជាដីព្រលានសំរាប់ផ្ទុកឈើ ដោយបានផ្ទេរប្រជាពលរដ្ឋជាង​២០០​គ្រួសារ មកពីតំបន់កាស៊ីណូ តែក្រោយមកដោយដីនៅទីនោះមានតម្លៃខ្ពស់​នៅលើទីផ្សារ​(ជាដី​ចំកណ្តាលក្រុង)ត្រូវរៀបចំហេដ្ឋារចនាសម្ព័ន្ធជាទីក្រុង។

លោកបន្ថែមថា បន្ទាប់មកក៏មានអ្នក​មាន​អំណាច និងតួនាទីនាសម័យក្រោយការធ្វើ​សមាហរណកម្ម ចេះតែចាប់យកធ្វើជាកម្មសិទ្ធិ​ផ្ទាល់ខ្លួន ព្យាយាមជន្លៀសគ្រួសារប្រជាពលរដ្ឋ​ចេញពីទីនោះទៀត តែពួកគេមិនព្រមចេញ ព្រោះបានកាន់កាប់ដោយសុចរិតជាប់លាប់​ពិត​ប្រាកដ។

លោក គង់ជិត បន្តថា ក្នុងនាមសង្គមស៊ីវិលលោកយល់ឃើញថាអាជ្ញាធរខេត្តប៉ៃលិន​គួរតែ​ផ្តល់បណ្ណកម្មសិទ្ធិដល់ពួកគេទាំងអស់គ្នា តាមការសន្យា ដូចកាលពីអំឡុងពេលឃោសនា​បោះឆ្នោត​ជ្រើសរើសសមាជិកក្រុមប្រឹក្សាឃុំសង្កាត់ ។

លោក គង់ជិត បន្ថែមថា៖ «ម្យ៉ាងទៀតតុលាការខេត្តប៉ៃលិន គួរតែទំលាក់បទចោទប្រកាន់​លើប្រជាពលរដ្ឋទាំង២៨នាក់ ព្រោះពួកគេមិនដែលពីបានប្រព្រឹត្តដូចការចោទប្រកាន់នោះ​ឡើយ ដោយសារ ប្រជាពលរដ្ឋ មិនដែលបានស្គាល់ឈ្មោះ និងឃើញម្ចាស់ដី​មក​បង្ហាញ​មុខ​ម្តង​ណាឡើយ។ ព្រោះការចេញដីកានេះ ជាការគំរាមកំហែងបំបាក់ស្មារតីពួកគាត់​ឱ្យមាន​ការ​ភ័យខ្លាចស្មើនឹងការបណ្តេញពួកគាត់ចេញពីលំនៅដ្ឋាន»

598 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម