សមាគមសម្ព័ន្ធអ្នកសារព័ត៌មានកម្ពុជា

មនុស្សជាង៦០០នាក់ រួមមានអ្នកសារព័ត៌មាន ធ្វើតេស្តជំងឺកូវីដ១៩ ឃើញលទ្ធផលអវិជ្ជមាន

អ្នកថតរូប និងវីដេអូ ឈរថតជិតរដ្ឋមន្រ្តីការបរទេសហុងគ្រីលោក Peter Szijjarto នៅក្នុងពិធីបើកជាផ្លូវការការិយាល័យនៃស្ថានទូតហុងគ្រី នៅរាជធានីភ្នំពេញ កាលពីថ្ងៃទី០៣ ខែវិច្ឆិកា ឆ្នាំ២០២០។ បញ្ញា ឆព័ណ្ណ
អ្នកថតរូប និងវីដេអូ ឈរថតជិតរដ្ឋមន្រ្តីការបរទេសហុងគ្រីលោក Peter Szijjarto នៅក្នុងពិធីបើកជាផ្លូវការការិយាល័យនៃស្ថានទូតហុងគ្រី នៅរាជធានីភ្នំពេញ កាលពីថ្ងៃទី០៣ ខែវិច្ឆិកា ឆ្នាំ២០២០។ បញ្ញា ឆព័ណ្ណ

មនុស្ស​ជាង​ ៦០០​នាក់ រួម​មាន​អ្នកសារព័ត៌មាន​មួយ​ចំនួន​ដែល​បាន​ទៅ​យក​ព័ត៌មាន​ពី​ដំណើរ​ទស្សនកិច្ច​របស់​រដ្ឋមន្រ្តីការបរទេស​ហុងគ្រី ​កាល​ពី​ថ្ងៃ​ទី​០៣ ខែ​វិច្ឆិកា ត្រូវ​បាន​ធ្វើ​តេស្ត​រក​ឃើញ​ថា មិន​មាន​ឆ្លង​ជំងឺ​កូវីដ ១៩ នោះ​ទេ គិត​មក​ត្រឹម​ថ្ងៃ​ទី០៤ ខែ​វិច្ឆិកា​នេះ ខណៈ​មនុស្ស​មួយ​ចំនួន​ទៀត​កំពុង​រង់ចាំ​លទ្ធផល​តេស្ត។ ​

កាល​ពី​ថ្ងៃ​ទី០៥ ខែ​វិច្ឆិកា អ្នកសារព័ត៌មាន​ ដែល​បាន​ចូលរួម ​​បាន​បញ្ជាក់​​ថា ពួកគេ​បាន​ចាប់​ផ្តើម​នៅដាច់ដោយឡែក​រយៈពេល​ ១៤​ថ្ងៃ បន្ទាប់​ពី​បាន​ទៅ​យក​ព័ត៌មាន​ពី​ដំណើរ​ទស្សនកិច្ច​មួយ​ថ្ងៃ​របស់​លោក Peter Szijjarto រដ្ឋមន្រ្តី​ការបរទេស​និង​ពាណិជ្ជកម្ម​ហុងគ្រី។

នៅ​ក្នុង​ដំណើរ​ទស្សនកិច្ច​នេះ លោក​ Peter Szijjarto បាន​ជួប​ជាមួយ​នឹង​ថ្នាក់​ដឹកនាំ​រដ្ឋាភិបាល​កម្ពុជា​នៅ​វិមាន​សន្តិភាព និង​បាន​ធ្វើ​ទស្សនកិច្ច​នៅ​ធនាគារ​ជាតិ និង​សារមន្ទីរ​សេដ្ឋកិច្ច និង​រូបិយវត្ថុ​នៅ​ក្បែរ​នោះ។ រដ្ឋមន្រ្តី​ការបរទេស​ និង​ពាណិជ្ជកម្ម​ហុងគ្រី​រូប​នេះ​ត្រូវ​បាន​ធ្វើ​តេស្ត​រក​ឃើញ​ថា មាន​ផ្ទុក​វីរុស​កូរ៉ូណា​កាល​ពី​ល្ងាច​ថ្ងៃ​ទី០៣ ខែ​វិច្ឆិកា​ ពេល​ទៅ​ដល់​ប្រទេស​ថៃ។ ​​​​​

អ្នកសារព័ត៌មាន​ក្នុង​ស្រុក​មួយ​​រូបឈ្មោះ​ វុទ្ធី ដែល​បាន​ទៅ​យក​ព័ត៌មាន​នៅ​ក្នុង​ពិធី​ជួបសំណេះសំណាល និង​ចុះហត្ថលេខា​រវាង​គណៈ​ប្រតិភូ​របស់​លោករដ្ឋមន្រ្តី Szijjarto និង​លោក​នាយករដ្ឋមន្រ្តី​ ហ៊ុន សែន ជាមួយ​នឹង​​រដ្ឋមន្រ្តី​មួយ​ចំនួន​ទៀត​ បាន​និយាយ​ថា លោក និង​សហការី​ចំនួន​បី​នាក់​ផ្សេង​ទៀត​ ដែល​បាន​សម្ភាសន៍ និង​ថត​រូប​ជាមួយ​នឹង​ឥស្សរជន​ហុងគ្រី​ ត្រូវ​បាន​ធ្វើ​តេស្ត​រក​ឃើញ​ថា មិន​បាន​ឆ្លង​វីរុស​កូរ៉ូណា​នោះ​ទេ។

លោក វុទ្ធី បាន​និយាយ​ថា៖ «ខ្ញុំ​បាន​ធ្វើ​តេស្ត​រក​ឃើញ​ថា អវិជ្ជមាន ហើយ​ក្រុម​គ្រូពេទ្យ​ក្រសួង​សុខាភិបាល​បាន​ស្នើ​ឲ្យ​ខ្ញុំ​ធ្វើ​​ចត្តាឡីស័ក​ចំនួន ១៤​ថ្ងៃ ដូច្នេះ​ខ្ញុំ​កំពុង​ធ្វើ​ចត្តាឡីស័ក​នៅ​ផ្ទះ» ដោយ​បាន​បន្ថែម​ថា ភរិយា​ និង​កូន​របស់​លោក​កំពុង​ស្នាក់​នៅ​ដោយ​ឡែក​នៅ​ផ្ទះ​អ្នក​ជិត​ខាង​មួយ​រយៈ។ ​

ភរិយា និង​កូន​របស់​លោក​មិន​ទទួល​បាន​ការ​ធ្វើ​តេស្ត​នោះ​ទេ ពីព្រោះ​ក្រសួង​សុខាភិបាល​បាន​ប្រាប់​លោក​ថា ប្រសិន​បើ​លោក​មិន​មាន​រោគសញ្ញា នោះ​លោក​មិន​អាច​ចម្លង​ទៅ​អ្នក​ដទៃ​បាន​នោះ​ទេ។ លោក​វុទ្ធី​​បាន​បន្ថែម​​ថា លោក​ និង​អ្នកសារព័ត៌មាន​ដទៃ​ទៀត​ ដែល​បាន​ជួប​ជាមួយ​នឹង​លោក Szijjarto ត្រូវ​បាន​ប្រាប់​ឲ្យ​ជួប​ជាមួយ​នឹង​វេជ្ជបណ្ឌិត​ជា​បន្ទាន់ ប្រសិន​បើ​កំណត់​ឃើញ​មាន​រោគសញ្ញា​ណា​មួយ។

លោក​ វុទ្ធី​ បាន​និយាយ​ថា៖ «ក្រុម​ពួក​យើង​បាន​ពាក់​ម៉ាស់​នៅ​ពេល​យើង​សម្ភាសន៍​លោក​រដ្ឋមន្ត្រី​ការបរទេស និង​ពាណិជ្ជកម្ម​ហុងគ្រី ប៉ុន្តែ​យើង​បាន​ដោះម៉ាស់​ចេញ​នៅ​ពេល​យើង​ថត​រូប​ជាមួយ​គាត់»

យោង​ទៅ​តាម​សេចក្តីថ្លែងការណ៍​ពី​ក្រសួង​សុខាភិបាល​​ចុះ​កាល​ពី​ថ្ងៃ​ទី០៥ ខែ​វិច្ឆិកា​ បន្ទាប់​ពី​ទទួល​បាន​ព័ត៌មាន​ថា លោក​ Szijjarto ត្រូវ​បាន​ធ្វើ​តេស្ត​រកឃើញ​​ថា មាន​ជំងឺ​កូវីដ១៩ ក្រសួង​​សុខាភិបាល​បាន​ធ្វើ​តេស្ត​លើ​អ្នក​​ដែល​បាន​ប្រាស្រ័យ​ទាក់ទង​ជាមួយ​នឹង​លោក​រដ្ឋមន្រ្តី ហើយ​បាន​បញ្ជូន​សំណាក​ពី​ការ​ធ្វើ​តេស្ត​នោះ​ទៅ​កាន់​វិទ្យាស្ថាន​ប៉ាស្ទ័រ។

សេចក្តីថ្លែង​ការណ៍​ខាង​លើ​បាន​សរសេរ​ថា៖ «គិត​មក​ត្រឹមម៉ោង១១យប់ ​ថ្ងៃទី០៤ ខែ​វិច្ឆិកា មនុស្ស​ចំនួន ៦២៨​នាក់ ត្រូវ​បាន​ធ្វើ​តេស្ត​​ដោយ​វិទ្យាស្ថាន​ប៉ាស្ទ័រ និង​ទទួល​បាន​លទ្ធផល​ជំងឺ​កូវីដ១៩ អវិជ្ជមាន»។​

វីដេអូ​មួយ​បង្ហោះ​នៅ​ទំព័រ​ហ្វេសប៊ុក​ផ្លូវការ​​របស់​លោក​នាយករដ្ឋមន្រ្តី​ហ៊ុន សែន​បាន​បង្ហាញ​ថា លោក​ Szijjarto បាន​ចាប់​ដៃ​ជាមួយ​នឹង​រដ្ឋមន្រ្តី​ក្រសួង​កសិកម្ម​លោក វេង សាខុន រដ្ឋមន្រ្តី​ក្រសួង​ធនធាន​ទឹក​លោក លឹម គានហោ និង​រដ្ឋមន្រ្តី​​ទទួលបន្ទុកអាកាសចរណ៍​ស៊ីវិល​លោក ម៉ៅ ហាវណ្ណាល់ ដែល​ភាគ​ច្រើន​មិន​បាន​ពាក់ម៉ាស់​នោះ​ទេ។ លោក​នាយករដ្ឋមន្រ្តី​ ហ៊ុន សែន ក៏​បាន​ចូលរួម​​ជា​អធិបតី​​​អំឡុងពេល​ពិធី​ចុះ​ហត្ថលេខា​​ផង​ដែរ ដែល​ក្នុង​នោះ​អនុស្សារណៈ​ចំនួន​បី​ត្រូវ​បាន​ចុះ​ហត្ថលេខា។

អ្នក​សារព័ត៌មាន​មួយ​រូប​ទៀត ដែល​សុំ​ត្រឹម​ឲ្យ​ឈ្មោះ​ថា សាម៉ន ​ដែល​បាន​ទៅ​យក​ព័ត៌មាន​ពី​ពិធី​ខាង​លើផងដែរ បាន​និយាយ​ថា លោក​បាន​ទៅ​ធ្វើ​តេស្ត​​រក​ជំងឺ​កូវីដ១៩ កាល​ពី​ព្រឹក​ថ្ងៃ​០៥ ខែ​វិច្ឆិកា។

លោក​ សាម៉ន ​បាន​និយាយ​ថា៖ «ខ្ញុំ​បាន​ទៅ​ធ្វើ​តេស្ត​នៅ​ក្រសួង​សុខាភិបាល​ដោយ​មិន​យក​ថ្លៃ ប៉ុន្តែ​ខ្ញុំ​មិន​ទាន់​​ទទួល​បាន​លទ្ធផល​នោះ​ទេ»

លោក​ ​សាម៉ន បាន​​បន្ត​​ថា លោក​ស្ថិត​នៅ​ក្នុង​ចំណោម​​អ្នកសារព័ត៌មាន​ជាង​ ២០​នាក់​ផ្សេង​ទៀត​ ដែល​បាន​ទៅ​យក​ព័ត៌មាន​ពី​ជំនួប​រវាង​​រដ្ឋមន្រ្តី​ការបរទេស​ហុងគ្រី​លោក Szijjarto និង​ឧបនាយករដ្ឋមន្រ្តី និង​រដ្ឋមន្រ្តី​ក្រសួងការបរទេស លោក ប្រាក់ សុខុន ប៉ុន្តែលោក​មិន​បាន​ដឹង​ថា អ្នកសារព័ត៌មាន​ចំនួន​ប៉ុន្មាន​នោះ​ទេ​បាន​យក​ព័ត៌មាន​ពី​ជំនួប​បន្ទាប់​រវាង​លោក​រដ្ឋមន្រ្តី​ការបរទេស​ហុងគ្រី និង​លោក​នាយករដ្ឋមន្រ្តី​ហ៊ុន សែន។ ​​

​លោក សាម៉ន ​បាន​បន្ថែម​ថា លោក​មិន​មាន​ការ​ព្រួយបារម្ភ​ពី​ការ​ឆ្លង​ជំងឺ​កូវីដ១៩ ពីព្រោះលោកឈរនៅឆ្ងាយពី​លោក​ Szijjarto។

 លោក​សាម៉ុន​បាន​និយាយ​ថា៖ «ខ្ញុំ​មិន​ព្រួយបារម្ភ​នោះ​ទេ ពីព្រោះ​ខ្ញុំ​មិនបាន​ប្រាស្រ័យ​ទាក់ទង​ដោយ​ផ្ទាល់​នោះ​ទេ​ជាមួយ​នឹង​រដ្ឋមន្រ្តី​ក្រសួងការបរទេស​ និង​ពាណិជ្ជកម្ម​ហុងគ្រី​ ប៉ុន្តែ​គ្រួសារ​ខ្ញុំ​បារម្ភ​ពី​សុវត្ថិភាព​របស់​ខ្ញុំ។ ខ្ញុំ​បាន​ឈរ​ប្រហែល​ ៣​ ទៅ ៤​ម៉ែត្រ​ឆ្ងាយ​ពី​គាត់»

លោក អ៊ិត សូធឿត នាយក​​នៃ​នាយកដ្ឋានប្រព័ន្ធ​​ផ្សព្វផ្សាយ​ CCIM​ បាន​និយាយ​ថា នា​ពេល​បច្ចុប្បន្ន អ្នកសារព័ត៌មាន​គួរ​ដឹង​ថា ជំងឺ​កូវីដ១៩​ នៅ​មាន​វត្តមាន​នៅ​ឡើយ ហើយ​​គួរ​ប្រុងប្រយ័ត្ន និង​គោរព​តាម​សេចក្តីណែនាំ​របស់​ក្រសួង​សុខាភិបាល​ និង​អង្គការ​សុខភាព​ពិភពលោក។

លោក​បាន​លើកឡើង​ថា លោក​បាន​ដឹង​ថា អ្នកសារព័ត៌មាន​ដែល​បាន​ចូលរួម​ក្នុង​កិច្ចជំនួប​នោះ​ត្រូវ​បាន​ធ្វើ​តេស្ត​ដោយ​ក្រសួង​សុខាភិបាល និង​ត្រូវ​ឲ្យ​ធ្វើ​ចត្តាឡីស័ក​ចំនួន ១៤​ថ្ងៃ។

​​លោក សុធឿត បាន​និយាយ​ថា៖ «ខ្ញុំ​គិត​ថា រដ្ឋាភិបាល​គួរ​ផ្តល់​ជំនួយ​ដល់​ពួកគាត់​ និង​គ្រួសារ​របស់​ពួកគាត់​​ ខណៈ​ពួកគាត់​​ធ្វើ​ចត្តាឡីស័ក​ចំនួន​ ១៤​ថ្ងៃ»

លោក យ៉ង់ គឹមអេង ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍ បាន​និយាយ​ថា ជំងឺ​កូវីដ១៩ នៅ​តែ​បង្ក​ជា​ការ​គំរាមកំហែង​នៅ​ជុំវិញ​ពិពលោក ហើយ​លោក​រដ្ឋមន្រ្តី​ Szijjarto បាន​ធ្វើ​ដំណើរ​ពី​តំបន់​ដែល​មាន​ហានិភ័យ​ខ្ពស់។

លោក ​គឹមអេង ​បាន​និយាយ​ថា៖ «យើង​មាន​ការ​សោកស្តាយ​ដែល​មន្រ្តីរបស់​យើង​មិនមាន​ធ្វើ​ឲ្យ​បាន​គ្រប់គ្រាន់​ទៅ​តាម​សេចក្តីណែនាំ​របស់​អង្គការ​សុខាភាព​ពិភពលោក​ ដើម្បី​បញ្ចៀស​ការ​ព្រួយបារម្ភ​ដូច​នេះ»។​

​លោក​បាន​បន្ថែម​ថា រដ្ឋាភិបាល​កម្ពុជា​គួរ​តែ​ចាត់ទុក​ស្ថានភាព​នេះ​ជា​មេរៀន​មួយ​សម្រាប់​ពេល​អនាគត ពីព្រោះ​ការណ៍​នេះ​បង្ហាញ​ថា ​មន្រ្តី​រដ្ឋាភិបាល និង​ពលរដ្ឋ​ទូទៅ​នៅ​តែ​ប្រឈម​នឹង​ការ​ឆ្លង​ប្រសិន​បើ​ពួកគេ​មិន​ប្រកាន់ខ្ជាប់​នូវ​វិធានការ​រក្សាគម្លាត។

លោក ​គឹមអេង ​បាន​បន្ថែម​ថា៖ «ប្រសិន​បើ​ករណី​ឆ្លង​ជំងឺ​កូវីដ១៩ កើន​ឡើង ​នោះ​នឹង​មាន​ផល​វិបាក​ធ្ងន់ធ្ងរ​មក​លើ​កម្ពុជា»

អ្នក​នាំពាក្យ​ក្រសួង​ព័ត៌មាន ​លោក​ មាស សុភ័ណ្ឌ បាន​បញ្ជាក់​ថា មាន​អ្នកសារព័ត៌មាន​ក្នុង​ចំណោម​មនុស្ស​សរុប ៦២៨​នាក់ ដែល​បាន​ប្រាស្រ័យ​ទាក់ទង់​​ជាមួយ​នឹង​លោក Szijjarto ហើយ​លោក​​បាន​ស្នើ​​ឲ្យ​​អ្នក​សារព័ត៌មានទាំងអស់​​ប្រកាន់​ខ្ជាប់​នូវ​វិជ្ជាជីវៈ និង​គោរព​តាម​សេចក្តីណែនាំ​របស់​ក្រសួង​សុខាភិបាល​ពាក់ព័ន្ធ​នឹង​ជំងឺ​កូវីដ១៩។

​នៅ​ក្នុង​សារ​បង្ហោះ​មួយ​នៅ​លើ​ទំព័រ​ហ្វេសប៊ុក​ផ្លូវ​ការ​កាល​ពី​ថ្ងៃ​ទី០៤ ខែ​វិច្ឆិកា លោក​នាយករដ្ឋមន្រ្តី​ហ៊ុន សែន បាន​មានប្រសាសន៍ថា លោក និង​ក្រុម​​គ្រួសារ​  ក៏ដូចជា​មនុស្ស​មួយ​ចំនួន​ទៀត​ ដែល​បាន​ប្រាស្រ័យ​ទាក់ទង​ជាមួយ​នឹង​លោក​រដ្ឋមន្រ្តី​ការបរទេស និង​ពាណិជ្ជកម្ម​ហុងគ្រី បាន​ធ្វើ​តេស្ត​រក​ឃើញ​ថា មិន​មាន​ឆ្លង​ជំងឺ​កូវីដ១៩​នោះ​ទេ។

លោកបានសរសេរថា៖ «ទោះបី ខ្ញុំមិនមានឆ្លងកូវីដ១៩ក្តី តែដើម្បី​សុវត្ថិភាព​ទាំងអស់គ្នា គ្រូពេទ្យតម្រូវឱ្យខ្ញុំ​រស់នៅដាច់​ដោយឡែក​រយៈពេល១៤​ថ្ងៃ​ សូម្បីតែ​ភរិយា កូន​ និងចៅ

ក៏មិនអាចជួប​បានដែរ»

សារ​របស់​លោក​នាយករដ្ឋមន្រ្តី​បាន​បន្ត​ថា លោក​នឹង​លុប​ចោល​ការ​ចូលរួម​ក្នុង​ពិធី​ផ្សេងៗ​ទៀត រួម​មាន​​ពិធី​បុណ្យ​ឯករាជ្យ​ជាតិ​ ០៩ វិច្ឆិកា និង​គម្រោង​​ជួប​ជាមួយ​នឹង​ជនរងគ្រោះ​ដោយសារ​ទឹក​ជំនន់​ក្នុង​ខេត្ត​ពោធិ៍សាត់ បាត់ដំបង និង​បន្ទាយ​មាន​ជ័យ។ ​

កាល​ពី​ថ្ងៃ​ទី​០៥ ខែ​វិច្ឆិកា ក្រសួង​ការបរទេស​ និង​សហប្រតិបត្តិការ​អន្តរជាតិ​កម្ពុជា​បាន​ចេញ​សេចក្តីថ្លែងការណ៍​មួយ​ ដោយ​លើកឡើង​ថា គ្រប់​ថ្នាក់​ដឹកនាំ និង​មន្រ្តី​របស់​ក្រសួង​​បាន​ធ្វើ​តេស្ត​រក​​ជំងឺ​កូវី១៩ ហើយ​ទទួល​បាន​លទ្ធផល​អវិជ្ជមាន និង​ត្រូវ​ធ្វើ​​ចត្តាឡីស័ក​ចំនួន ១៤​ថ្ងៃ។ នៅ​ក្នុង​សេចក្តីថ្លែងការណ៍​កាល​ពី​ថ្ងៃ០៣ ខែ​ ក្រសួង​ការបរទេស​ និង​សហប្រតិបត្តិការ​អន្តរជាតិ​កម្ពុជា​បាន​លើកឡើង​ថា សមាជិក​គណៈ​ប្រតិភូ​ហុងគ្រី​មាន​វិញ្ញាបនបត្របញ្ជាក់​ថា គ្មាន​វីរុស​កូវីដ១៩​ មុន​ពេល​ចាកចេញ​ពី​ប្រទេស​ហុងគ្រី មក​កាន់​ប្រទេស​កម្ពុជា៕

121 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម