តុលាការកំពូល សម្រេចតម្កល់ការផ្តន្ទាទោសចំនួន១៤ឆ្នាំ លើអ្នកសារព័ត៌មានពីរនាក់ ពាក់ព័ន្ធនឹងរឿងសម្ងាត់នៃការការពារជាតិ

តុលាការកំពូល នៅព្រឹកថ្ងៃទី២៥ ខែមិថុនា បានសម្រេចតម្កល់ការផ្តន្ទាទោសចំនួន១៤ឆ្នាំ លើអ្នកសារព័ត៌មានពីរនាក់ ពាក់ព័ន្ធនឹងការប៉ះពាល់ដល់រឿងសម្ងាត់នៃការការពារជាតិ ។

អ្នកសារព័ត៌មានពីរនាក់ រួមមាន លោក ផន សុភាព និងលោក ភាព ភារ៉ា ត្រូវបានតុលាការកំពូល សម្រេចតម្កល់សាលដីការបស់សាលាឧទ្ធរណ៍តំបន់ ដោយរក្សាការផ្តន្ទាទោសដាក់ពន្ធនាគារម្នាក់ៗចំនួន១៤ឆ្នាំ ពីបទ «ប្រគល់ឱ្យរដ្ឋបរទេសនូវព័ត៌មានជាអាទិ៍ដែលធ្វើឱ្យអន្តរាយដល់ការការពារជាតិ» ដែលបានប្រព្រឹត្តនៅខេត្តឧត្តរមានជ័យ និងបណ្តាញសង្គមហ្វេសប៊ុកកាលពីខែកក្កដា ឆ្នាំ២០២៥។ សាលដីកានេះ ត្រូវបានប្រកាសដោយ លោក តាំង ស៊ុនឡាយ ចៅក្រមតុលាការកំពូល នៅព្រឹកថ្ងៃទី២៥ ខែមិថុនា ឆ្នាំ២០២៦ ។

សាលាឧទ្ធរណ៍តំបន់ នៅថ្ងៃទី២៦ ខែមីនា ឆ្នាំ២០២៥ បានសម្រេច​តម្កល់សាលក្រមព្រហ្មទណ្ឌ ចុះថ្ងៃទី១៧ ខែធ្នូ ឆ្នាំ២០២៥ របស់សាលាដំបូងខេត្តសៀមរាប ទុកជាបានការដដែល ។

សាលាដំបូងខេត្តសៀមរាប នៅថ្ងៃទី១៧ ខែធ្នូ ឆ្នាំ២០២៥ បានសម្រេចផ្តន្ទាទោសអ្នកសារព័ត៌មានពីរនាក់ គឺលោក ផន សុភាព ភ្នាក់ងារសារព័ត៌មានបាត់ដំបងប៉ុស្តិ៍ និង លោក ភាព ភារ៉ា ភ្នាក់ងារសារព័ត៌មាន TSP68 TV Online ឱ្យជាប់ពន្ធនាគារម្នាក់១៤ឆ្នាំ ក្រោមបទចោទតាមមាត្រាច្បាប់លេខ៤៤៥នៃក្រមព្រហ្មទណ្ឌ «ប្រគល់ឱ្យរដ្ឋបរទេសនូវព័ត៌មានជាអាទិ៍ដែលធ្វើឱ្យអន្តរាយដល់ការការពារជាតិ» ដែលបានប្រព្រឹត្តនៅខេត្តឧត្តរមានជ័យ និងបណ្តាញសង្គមហ្វេសប៊ុក កាលពីថ្ងៃទី២៥ រហូតដល់ថ្ងៃទី៣១ ខែកក្កដា ឆ្នាំ២០២៥ ។

នៅថ្ងៃដែលតុលាការកំពូលបើកការជំនុំជម្រះករណីអ្នកសារព័ត៌មានពីរនាក់ ខាងក្រៅតុលាការក្នុងរាជធានីភ្នំពេញ អ្នកស្រី ព្រំ យ៉ន ម្តាយរបស់ សុភាព បានស្រក់ទឹកភ្នែក ខណៈពេលដែលអ្នកស្រីបានបដិសេធថា កូនប្រុសរបស់គាត់មិនបានក្បត់ជាតិ ឬបញ្ជូនព័ត៌មានទៅឱ្យអង្គភាពបរទេស។

អ្នកស្រីបានពណ៌នាអំពីកូនអ្នកស្រីថា ជាអ្នកកាសែតដែលតែងតែរាយការណ៍អំពីបញ្ហាសង្គម ហើយបាននិយាយថា កំហុសណាមួយដែលគាត់បានធ្វើគឺរឿងអចេតនាទេ។ អ្នកស្រីបានអំពាវនាវដល់តុលាការឱ្យទម្លាក់ចោលការចោទប្រកាន់ប្រឆាំងនឹងអ្នកសារព័ត៌មានទាំងពីរ។

អ្នកស្រីបាននិយាយថា៖ «ខ្ញុំសូមអំពាវនាវដល់តុលាការ និងរដ្ឋាភិបាលឱ្យមានការអត់ឱនចំពោះកូនប្រុសរបស់ខ្ញុំ ពីព្រោះគាត់មិនមានចេតនាធ្វើទេ»។ អ្នកស្រីបានបន្តថា៖ «គាត់បានឃ្លាតឆ្ងាយពីប្រពន្ធ និងកូនៗរបស់គាត់ ហើយយើងកាន់តែចាស់ទៅៗ។ សូមដោះលែងកូនប្រុសរបស់ខ្ញុំវិញមក»។

នៅថ្ងៃសវនាការនោះដែរ ភរិយារបស់ សុភាព គឺ អ្នកស្រី ហុង ថា បានបន្ទរតាមបណ្តឹងឧទ្ធរណ៍របស់ម្តាយក្មេករបស់គាត់។ អ្នកស្រីបាននិយាយថា៖ «គាត់កាន់តែស្គមជាងមុន។ គាត់ជាអ្នកកាសែតដ៏ល្អម្នាក់»។ អ្នកស្រីបន្តថា៖ «ខ្ញុំសង្ឃឹមថាថ្នាក់ដឹកនាំ និងតុលាការនឹងជួយកាត់បន្ថយទោសនេះ ពីព្រោះស្វាមីរបស់ខ្ញុំជាមនុស្សសុភាពរាបសារ»។

អ្នកកាសែតទាំងពីរនាក់ខាងលើបានចាប់ខ្លួនដាច់ដោយឡែកពីគ្នាកាលពីថ្ងៃទី៣១ ខែកក្កដា ឆ្នាំ២០២៥ បន្ទាប់ពីធ្វើដំណើរត្រឡប់ពីរាយការណ៍ព័ត៌មាននៅខេត្តឧត្តរមានជ័យ ។

កន្លងមក អ្នកទាំងពីរនាក់បាននិយាយក្នុងសវនាការសាលាឧទ្ធរណ៍ថ្នាក់តំបន់ថា ពួកគេបានចូលទៅតំបន់ទាំងនោះ ព្រោះដោយសារកិច្ចឈប់​បាញ់​បានបញ្ចប់នៅពាក់កណ្តាលអាធ្រាតយប់ថ្ងៃទី២៨ ខែកក្កដា ឆ្នាំ២០២៥។ ពួកគេចូលទៅតំបន់ទាំងនោះដោយពាក់បណ្ណសំគាល់ខ្លួនជាអ្នកសារព័ត៌មាន ហើយសុទ្ធតែបានសុំការអនុញ្ញាត​ពីមេៗអង្គភាពទាំងដោយបានយកជំនួយមនុស្សធម៌ទៅផ្តល់ឱ្យកងទ័ពបន្ទាប់ពីមានបទឈប់បាញ់ ។

ពួកគេបានបញ្ជាក់ទៀតថា មុននឹងថតរូបខ្លួនបានសុំការអនុញ្ញាតពីមេៗនៅទីនោះ ត្រឹមតែរូបភាពផ្តល់ជំនួយ ដើម្បីផ្ញើទៅឱ្យសប្បុរសជនបានឃើញ លោកមិនបានថតកន្លែងលេណដ្ឋាន អាវុធ និងទីតាំងកងទ័ពកំពុងឈរជើងទេ ។

លោក ភាព ភារ៉ា បានឱ្យដឹងថា ចំពោះរូបភាពខ្លះខ្លួនដាក់ក្នុងក្រុមតេឡេក្រាមមនុស្សធម៌ស្រុកថ្មពួក ហើយនៅក្នុងក្រុមនោះមានសមាជិកជាជនជាតិខ្មែរម្នាក់រស់នៅប្រទសថៃ បានយករូបភាពហ្នឹងទៅបង្ហោះ។ លោកបានបន្ថែមថា ពួកខ្លួនមុននឹងថតរូបបានបិទPGSរួចហើយ ដោយបានដឹងអំពីបម្រាមពីខាងក្រសួងការពារជាតិ ។

លោក ផន សុភាព បានបដិសេធថា ពួកខ្លួនមិនដែលបានផ្តល់ឱ្យជនជាតិបរទេសណាទេ ខ្លួនមិនចេះភាសាបរទេសទេ ហើយក៏មិនដែលធ្លាប់ទទួលប្រាក់ ឬជំនួយពីជនបរទេសណាសោះឡើយ ៕