សមាគមសម្ព័ន្ធអ្នកសារព័ត៌មានកម្ពុជា

បុគ្គលិកក្រុមហ៊ុនណាហ្គាវើលដ៍មិនទាន់ទទួលដំណោះស្រាយនៅឡើយបន្ទាប់ពីប្រជុំពេញមួយថ្ងៃជាមួយសាលាក្រុងនិងតំណាងក្រុមហ៊ុន

បុគ្គលិកណាហ្គាវើលដ៍បន្តធ្វើកូដកម្មនៅមុខសណ្ឋាគារ និងកាស៊ីណូណាហ្គាវើលដ៍ ក្នុងរាជធានីភ្នំពេញ។ រូបថតថ្ងៃទី២២ ខែធ្នូ ឆ្នាំ២០២១។ ខេមបូចា/ ព្រីង សំរាំង
បុគ្គលិកណាហ្គាវើលដ៍បន្តធ្វើកូដកម្មនៅមុខសណ្ឋាគារ និងកាស៊ីណូណាហ្គាវើលដ៍ ក្នុងរាជធានីភ្នំពេញ។ រូបថតថ្ងៃទី២២ ខែធ្នូ ឆ្នាំ២០២១។ ខេមបូចា/ ព្រីង សំរាំង

បុគ្គលិកក្រុមហ៊ុនណាហ្គាវើលដ៍មិនទាន់ទទួលដំណោះស្រាយនៅឡើយ បន្ទាប់ពីតំណាង​បុគ្គលិកបានចូលរួមប្រជុំជាមួយសាលាក្រុង ក្រសួងការងារ និងតំណាងក្រុមហ៊ុន​ណាហ្គាវើលដ៍ កាលពីថ្ងៃអង្គារនៅសាលាក្រុង ដោយសារក្រុមហ៊ុន​មិនព្រមទទួលយក​បុគ្គលិក៣៦៥នាក់​ចូលធ្វើការវិញ។ ថ្ងៃពុធនេះ តំណាងភាគីទាំងអស់បានជួបប្រជុំគ្នាបន្តទៀត​នៅ​ក្រសួងការងារវិញម្តង។

កិច្ចប្រជុំនៅព្រឹកថ្ងៃអង្គារទី២១ ខែធ្នូ រវាងតំណាងបុគ្គលិកជាមួយសាលាក្រុង ក្រសួងការងារ និងតំណាងក្រុមហ៊ុនណាហ្គាវើលដ៍ ហាក់មានភាពតានតឹង ខណៈភាគីក្រុមហ៊ុនមិនទាន់​ដោះស្រាយបញ្ហាណាមួយដាច់ស្រេចក្នុងចំណោមការស្នើរបស់​កម្មករចំនួន៩ចំណុច​ ហើយ​កម្មករនៅតែ​រក្សាគោលជំហរក្នុងការធ្វើកូដកម្ម។

កញ្ញា​ស៊ុន ស្រីពេជ្រ ជាសកម្មជនសហជីពណាហ្គាវើលដ៍បាននិយាយថា ក្រសួងនៅតែទទួច​ឱ្យក្រុមកម្មកររំសាយកូដកម្ម ហើយរង់ចាំដំណោះស្រាយ តែខាងសហជីពមិនអាចសម្រេចចិត្ត​ភ្លាមៗបានទេ ទាល់តែមានការបោះឆ្នោតសម្រេចពីកម្មករ។

ស្រីពេជ្រប្រាប់ថា៖ «ក្រសួងគាត់ប្រាប់ថាឱ្យកូដកររំសាយ ដើម្បីមានយន្តការហ្នឹង តែខាងសជីពគ្មានសិទ្ធិសម្រេចទេ បានត្រឹមតែពាំនាំការស្នើរបស់សាលាក្រុងទៅកម្មករទេ»។

ចំណែកសេចក្ដីប្រកាសរបស់សាលាក្រុង បានឱ្យដឹងថា តំណាងសហជីពទ្រទ្រង់សិទ្ធិ​ការងារ​បុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ បានយល់ព្រមធ្វើបញ្ជីឈ្មោះកម្មករនិយោជិត​ចំនួន ៣៦៥នាក់ បែងចែកជាចំនួន២ក្រុម ទីមួយយល់ព្រមទទួលយកសំណង ដើម្បីបញ្ឈប់ពី​ការងារ ប៉ុន្តែស្នើសុំគោលការណ៍ទូទាត់ឱ្យបានត្រឹមត្រូវស្របតាមច្បាប់ស្តីពីការងារ និងទីពីរ​អ្នកដែលស្នើសុំចូលបម្រើការងារវិញ។

ប៉ុន្តែខាងតំណាងសហជីពបានឆ្លើយតបថា មានតែក្រុមហ៊ុនទេ ដែលមានកម្មវិធីរក្សាទុកបញ្ជី​ឈ្មោះបុគ្គលិក ហើយសហជីពមិនមានបញ្ជីជាក់លាក់ដើម្បីផ្ទៀងផ្ទាត់ជាមួយក្រុមហ៊ុនទេ ទើប​ស្នើឱ្យក្រុមហ៊ុនយកបញ្ជីដើម្បីពិនិត្យមើលថាមានខុសឬត្រូវចំណុចណា។

សកម្មជនសហជីពដដែលបានលើកឡើងថា៖ «ម្ងៃហ្នឹងគឺគាត់និយាយតែរឿងគណនាលុយ ដែលប្រទាញប្រទង់រកចំណុចរួមអត់ឃើញ មានតែបន្ថែមបន្ទុក ព្រោះថាបញ្ជីអស់ហ្នឹង​នៅ​ក្រុមហ៊ុនមានទាំងអស់ស្អីក៏ក្រុមហ៊ុនមានដែរ  ហើយសហជីពមិនមែនអ្នកកាន់ខាងPayroll ទេ»។

ទោះបីជាយ៉ាងណា ក្នុងចំណោមកម្មករនិយោជិតទាំង ៣៦៥នាក់ ក្នុងនោះមានចំនួន ៤៨នាក់​លើចំនួន ៣០០នាក់ យល់ព្រមទទួលយកប្រាក់សំណង ដើម្បីឈប់ពីការងារនៅពេលទូទាត់ ត្រឹមត្រូវស្របតាមច្បាប់ស្តីពីការងារ ចំណែក៦៥នាក់ទៀត មិនមានការឆ្លើយតបទេ។

ស្រីពេជ្រ បញ្ជាក់ទៀតថា ក្នុងកិច្ចប្រជុំក្រុមហ៊ុនថានឹងយកតារាងបញ្ចប់កិច្ចសន្យា​ការងារ​មក​គណនាម្ដងទៀត ដើម្បីបញ្ជាក់ពីភាពត្រូវឬខុស ឱ្យក្រសួងនិងតំណាង​សហជីពបានឃើញ​ទាំងអស់គ្នា។

ស្របជាមួយគ្នានេះដែរ ខាងសាលារាជធានីភ្នំពេញស្នើឱ្យក្រុមហ៊ុនណាហ្គាវើលដ៍ ត្រូវយក​បញ្ជីឈ្មោះការទូទាត់ប្រាក់សំណង របស់កម្មករនិយោជិតចំនួន ៣៦៥នាក់ ជូនក្រសួងការងារ និងបណ្តុះបណ្តាលវិជ្ជាជីវៈ ដើម្បីផ្ទៀងផ្ទាត់ត្រួតពិនិត្យផងដែរ។

ជាលទ្ធផលពីខាងក្រុមហ៊ុន៖ ​«នឹងយកបញ្ជីឈ្មោះបុគ្គលិកក្នុងកញ្ចប់កិច្ចសន្យានីមួយៗមក​ផ្ទៀងផ្ទាត់ តែបញ្ហារឿង​ទទួល​បុគ្គលិកឱ្យចូលធ្វើការវិញ តំណាងក្រុមហ៊ុនថានឹង​ប្រជុំ​ក្រុមប្រឹក្សាភិបាលប្រចាំ​ក្រុមហ៊ុនជា​មុនសិន»។

តំណាងសហជីព មើលឃើញថា ខាងក្រុមហ៊ុនមិនទាន់មានដំណោះស្រាយ​ជាក់លាក់​ណា​មួយរឿងទទួលយកកម្មកចូលធ្វើការវិញទេ។

តាមរយៈកិច្ចប្រជុំនេះ កញ្ញា ស្រីពេជ្រ ឲ្យដឹងថា ខាងសហជីពក៏បានប្រាប់ទៅសាលា​ក្រុងដែរ​ថា៖ «ប្រសិន​បើចំណុច​ទី១ក្រុមហ៊ុនដោះស្រាយបាន ចំណុចទី២ ឬទី៣ក៏ដោះស្រាយបាន​ដូច​គ្នា ព្រោះវាទាក់ទង​នឹងការគណនាលុយដូចគ្នា»។

បុគ្គលិកណាហ្គាវើលដ៍បានទាមទារចំណុចសំខាន់ៗមួយចំនួនក្នុងនោះរួមមាន៖ ទាមទារឱ្យ​ក្រុមហ៊ុន គិតប្រាក់បំណាច់បញ្ចប់កិច្ចសន្យាការងារ​បង្រួបបន្ថែមឱ្យបានត្រឹមត្រូវ​សម្រាប់​កម្មករ​និយោជិតដែលត្រូវបានកាត់ចេញតាមគម្រោងកាត់បន្ថយបុគ្គលិក។ ទាមទារឱ្យក្រុមហ៊ុន​អនុវត្តសេចក្ដីបង្គាប់របស់ក្រុមប្រឹក្សាអាជ្ញាកណ្តាលកាលពីថ្ងៃទី១០ ខែកញ្ញា ឆ្នាំ២០២១ ត្រង់​ចំណុចទី៣ ដោយគិតប្រាក់បញ្ចប់កិច្ចសន្យាការងារបង្រួបបន្ថែមឱ្យបានត្រឹមត្រូវ។ ទាមទារឱ្យ ក្រុមហ៊ុនផ្តល់ប្រាក់បំណាច់អតីតភាពការងារ និងប្រាក់រំលឹកអតីតភាពការងារ​ឱ្យបានត្រឹមត្រូវ​តាមច្បាប់សម្រាប់ឆ្នាំ២០២០ និង ២០២១។

ក្រៅពីនេះ ពួកគេក៏ទាមទារឱ្យក្រុមហ៊ុនផ្តល់ប្រាក់បន្ថែមស្មើនឹង៧% លើប្រាក់ឈ្នួលគោល​បច្ចុប្បន្នឱ្យកម្មករនិយោជិតទាំងអស់ ដើម្បីបំពេញអតិផរណាតម្លៃទំនិញលើទីផ្សារ ទាមទារ​ឱ្យក្រុមហ៊ុនបញ្ឈប់ការកេងប្រវ័ញ្ចតាមរយៈការប្រើប្រាស់កម្មករនិយោជិត ក្រោមស្លាក​កម្មសិក្សា រួមនិងចំណុចសំខាន់ៗមួយចំនួនទៀត។

យោងតាមប្រកាសព័ត៌មានរបស់សាលាក្រុង ថ្វីបើខាងសាលាក្រុងបានទទូចឱ្យបុគ្គលិក​ក្រុមហ៊ុន​ណាហ្គាវើលដ៍រំសាយកូដកម្មជាដាច់ខាតក៏ពិតមែន។ តែជាលទ្ធផលបន្ទាប់ពី​តំណាង​សហជីពទ្រទ្រង់សិទ្ធិការងារបុគ្គលិកកម្មករខ្មែរ នៃ​ក្រុមហ៊ុនណាហ្គាវើលដ៍ បានយកស្មារតីអង្គ​ប្រជុំជាមួយរដ្ឋបាលរាជធានីភ្នំពេញ ទៅ​ផ្សព្វ​ផ្សាយដល់កម្មករនិយោជិតរបស់ខ្លួនរួចមក និង​ឆ្លងកាត់ការពិភាក្សាគ្នានៅល្ងាចថ្ងៃទី២១​ដដែល ជារួមកម្មករនិយោជិតនៅតែសម្រេចចិត្ត​បន្ត​ធ្វើកូដកម្មដោយអហិង្សាដដែល ក្រោម​ហេតុផលក្រុមហ៊ុនមិនទាន់ដោះស្រាយបញ្ហា​ណាមួយ​ក្នុងចំណោម៩ចំណុចដែលកម្មករស្នើសុំបានជោគជ័យនោះទេ។

ជុំវិញបញ្ហានេះ រដ្ឋបាលរាជធានីភ្នំពេញ​ ក៏បានអំពាវនាវដល់កម្មករនិយោជិតដែលមានវិវាទ​ការងារ ឱ្យបន្តភាពអត់ធ្មត់ ដោយបញ្ឈប់ការសំដែងមតិដោយខុសច្បាប់ ដើម្បីទុកពេលឱ្យ​ក្រសួងស្ថាប័នមានសមត្ថកិច្ចបន្តធ្វើការសម្របសម្រួលដោះស្រាយវិវាទការងារនេះ​ជូនភាគី​ទាំងពីរដោយឈរលើស្មារតីយោគយល់ អធ្យាស្រ័យគ្នា និងស្របតាមច្បាប់ជាធរមាន។

បើតាមសេចក្តីថ្លែងការណ៍រួមកាលពីថ្ងៃចន្ទ ពីតំណាងអង្គការសង្គមស៊ីវិល សហភាពសហជីព សហព័ន្ធសហជីព និងសមាគមដែលធ្វើការដើម្បីលើកកម្ពស់សិទ្ធិការងារ និងសិទ្ធិមនុស្ស​នៅ​កម្ពុជា ថាកម្មករនិយោជិតដែលកំពុងតែធ្វើកូដកម្មនៅក្រុមហ៊ុនណាហ្គាវើលដ៍ កំពុង​ប្រើប្រាស់​សិទ្ធិជាមូលដ្ឋានក្នុងការធ្វើកូដកម្មដោយសន្តិវិធីស្របតាមច្បាប់ស្តីពីការងារ ច្បាប់ស្តីពី​សហជីព និងផ្អែកតាមលក្ខន្តិក:របស់សហជីពដែលបានចុះបញ្ជីការនៅក្រសួងការងារនិង​បណ្តុះបណ្តាលវិជ្ជាជីវៈ។

មន្ត្រីសាលាក្រុង និងតំណាងក្រុមហ៊ុនណាហ្គាវើលដ៍មិនអាចសុំការអត្ថធិប្បាយបានទេ៕

637 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម