ប្រជាពលរដ្ឋជិត១០០នាក់បាននាំគ្នាទៅសាលាឃុំម៉ឺនជ័យក្នុងស្រុករំដួលខេត្តស្វាយរៀងកាលពីថ្ងៃទី៧ ខែកញ្ញា ដើម្បីស្នើឱ្យអាជ្ញាធរឃុំជួយដោះស្រាយបញ្ហាដីធ្លីជូនពួកគាត់ដែលកំពុងរងផលប៉ះពាល់ពីគម្រោងសាងសង់និងស្តារប្រឡាយទឹក។
គម្រោងអភិវឌ្ឍន៍ប្រឡាយ មេកីចក ដែលចុះហត្ថលេខាដោយរដ្ឋមន្ត្រីក្រសួងធនធានទឹក កាលពីថ្ងៃទី១ ខែមករា ឆ្នាំ២០១៤ ផ្ញើជូនអភិបាលខេត្តស្វាយរៀង គឺជួសជុលស្តារឡើងវិញនូវប្រឡាយមេកីចក ជំហានទី៤ ដែលឆ្លងកាត់ស្រុកចំនួន ៥ស្រុក គឺស្រុករំដួល ស្រុករមាសហែក ស្រុកស្វាយទាប ស្រុកកំពង់រោទិ៍ និងស្រុកចន្ទ្រា តែគម្រោងនេះសាងសង់មិនទាន់រួចរាល់នៅឡើយ។ បច្ចុប្បន្នគម្រោងនេះ ទើបតែជីកប្រឡាយឆ្លងកាត់តែពីរស្រុកទេ គឺស្រុករមាសហែក ឆ្ពោះទៅដល់ពាក់កណ្ដាលស្រុករំដួល។
លោក ស៊ិន សាម៉េត អាយុ៥៧ឆ្នាំ ប្រធានសហគមន៍មានជ័យនិងជាតំណាងពលរដ្ឋ នៅឃុំម៉ឺនជ័យ ស្រុករំដួល បានប្រាប់ ខេមបូចា ថា មូលហេតុឈានដល់ប្រជាពលរដ្ឋម្ដុំគ្នាទៅសាលាឃុំម៉ឺនជ័យ ដោយសារតែកន្លងមកក្រសួងធនធានទឹកមានគម្រោងសាងសង់ប្រឡាយទឹកមេកីចកមួយដែលស្ដារទទឹងថា២៦ម៉ែត្រ ទើបប្រជាពលរដ្ឋយល់ព្រមនិងមិនមានការតវ៉ា ស្រាប់តែពេលចុះស្ដារជាក់ស្ដែងបែរជាទទឹងពី៧០ម៉ែត្រទៅ១០០ម៉ែត្រវិញ។
លោកបានលើកឡើងថា៖ «ពេលគេ[ក្រសួងធនធានទឹក]ចុះវាស់ថាស្ដារតែទទឹង២៦ម៉ែត្រទេ ពេលចុះមកស្ដារជាក់ស្ដែងពី៧០ម៉ែត្រទៅ១០០ម៉ែត្រវិញ ដល់ពេលចឹងវាប៉ះពាល់ផ្ទះនិងដីស្រែរបស់ពួកខ្ញុំមិនតិចណា»។
ប្រធានសហគមន៍បន្ដថា ការប្រមូលគ្នាទៅសាលាឃុំម៉ឺនជ័យគ្រាន់តែចង់ស្នើឱ្យអាជ្ញាធរឃុំជួយស្វែងរកកិច្ចអន្ដរាគមន៍ពីជម្លោះដីធ្លីដែលអូសបន្លាយតាំងពីឆ្នាំ២០១៣មក នៅតែគ្មានការដោះស្រាយណាមួយ ដូច្នេះហើយបានជាប្រជាពលរដ្ឋនាំគ្នាទៅជួបនិងលោកមេឃុំម៉ឺនជ័យផ្ទាល់តែម្ដង។
ជុំវិញរឿងនេះលោកបន្ដបញ្ជាក់បន្ថែមថា គម្រោងសាងសង់ប្រឡាយរបស់ក្រសួងធនធានទឹកនេះ បានធ្វើឱ្យប៉ះពាល់ដល់ផ្ទះប្រជាពលរដ្ឋចំនួន២ឃុំមាន១៥២គ្រួសារនិង៨ភូមិ និងចំនួន៤៦ខ្នងផ្ទះ និងដីស្រែអស់២៧ហិកតា និងដីភូមិ៨ហិកតា ហើយគម្រោងស្ដារប្រឡាយបានប៉ះពាល់៥ស្រុក មានស្រុករមាសហែក ស្រុករំដួល ស្រុកចន្រ្ទា ស្រុកស្វាយទាប និងស្រុកកំពង់រោទិ៍ ប៉ុន្ដែលោកថា នៅស្រុកផ្សេងៗមិនមានប៉ះពាល់ដល់ដីផ្ទះនិងដីស្រែច្រើនដូចស្រុកលោកឡើយ។
លោក សាម៉េត បន្ថែមថា៖ «ពួកខ្ញុំបានដាក់ញត្តិទៅសាលាខេត្ដ ក្រសួងធនធានទឹក និងសាលាដំបូងខេត្ដស្វាយរៀងអស់ហើយ គេឆ្លើយថាចាំគេរកដំណោះស្រាយឱ្យ ប៉ុន្ដែមកដល់ពេលនេះស្ងាត់ឈឹងហ្មង មិនដឹងថាខាងគេ គេគិតម៉េចទេ? ពួកខ្ញុំផ្ទះក៏ប៉ះដីស្រែក៏ប៉ះ»។
រីឯអ្នកស្រី ម៉ែន ដាវី អាយុ៣៧ឆ្នាំ ជាប្រជាពលរដ្ឋដែលរងគ្រោះពីគម្រោងសាងសង់ប្រឡាយមេកីចក រស់នៅឃុំធ្មារ ស្រុករំដួល បានឲ្យដឹងថា ការប្រមូលទៅសាលាឃុំដើម្បីឱ្យខាងឃុំស្វែងរកដំណោះស្រាយរឿងបញ្ហាដីធ្លីរបស់ពួកគាត់ ពីព្រោះបញ្ហានេះកើតឡើងក៏មានខាងឃុំចូលរួមក្នុងការវាស់វែងនិងក្រសួងធនធានទឹកដែរ ដូច្នេះពួកគាត់ត្រូវទទួលខុសត្រូវស្វែងកិច្ចអន្ដរាគមន៍ពីអ្នកពាក់ព័ន្ធ។
អ្នកស្រី ដាវី បានថ្លែងថា ៖ «ខ្ញុំសុំសំណងដែលបាត់បង់ដោយសារការជីកប្រឡាយមេកីចកជំហានទី៤ដល់ពួកខ្ញុំផង»។
ពលរដ្ឋដែលរងគ្រោះទាំងដីស្រែនិងដីផ្ទះម្នាក់ទៀតអ្នកស្រី វ៉ា ថាវី អាយុ៥២ឆ្នាំ រស់នៅភូមិព្រៃពោធិ៍ ឃុំធ្មារ ស្រុករំដួល បានឱ្យដឹងថា គម្រោងរបស់ក្រសួងធនធានទឹកបានប៉ះពាល់ដល់ជីវភាពអ្នកស្រីខ្លាំងណាស់ អ្នកស្រីថា អ្នកស្រីបានប៉ះផ្ទះមួយខ្នងនិងដីស្រែដែលតែងតែអាស្រ័យផលអស់កន្លះហិកតាថែមទៀត។
អ្នកស្រីថា៖ «ខ្ញុំសុំឱ្យក្រសួងធនធានទឹកមេត្ដាគិតគូរជាសំណងឱ្យខ្ញុំមក បើមិនអ៊ីចឹងទេ ខ្ញុំគ្មានអីទីពឹងទេ សុំអាជ្ញាធរឃុំជួយដោះស្រាយបញ្ហាដីធ្លីនេះផង»។
ខេមបូចា មិនអាចសុំការអត្ថាធិប្បាយពីលោក មៃ រឿន មេឃុំម៉ឺនជ័យបានទេ ដោយទូរសព្ទចូលគ្មានអ្នកលើក។
ជុំវិញរឿងនេះ លោក ណង វ៉ា ស្មៀនឃុំម៉ឺនជ័យ ថ្លែងថា ខាងឃុំបានទទួលញត្ដិរបស់ប្រជាពលរដ្ឋដែលបានដាក់ព្រឹកមិញហើយ ប៉ុន្ដែរឿងថាដោះស្រាយយ៉ាងម៉េចលោកថា ចាំមើលលោកបញ្ជូនញត្ដិទៅខាងលើនិងសុំយោបល់ពីខាងលើសិន រួចហើយលោកឆ្លើយតបនិងប្រជាពលរដ្ឋជាក់ស្ដែង។
លោក វ៉ា បន្ដថា៖ «ខាងខ្ញុំកំពុងសុំគោលការណ៍បន្ដទៅលោកអភិបាលស្រុកដែរ តើលោកអភិបាលគាត់មានមតិយ៉ាងម៉េច? ហើយខាងខ្ញុំមិនទាន់មានព័ត៌មានអីឆ្លើយតបទេ»។
ចំណែកអភិបាលរងស្រុករំដួលលោក នៃ ស បានថ្លែងយ៉ាងខ្លីថា លោកមិនបានទទួលរបាយការណ៍ពីឃុំមកទេ ដូច្នេះលោកមិនអាចឆ្លើយបំភ្លឺបានទេ។
លោក វ៉ា បញ្ជាក់ថា៖ «ខ្ញុំអត់ទាន់បានរបាយការណ៍ឬក៏ញត្ដិពីឃុំមកទេ ដូច្នេះខ្ញុំមិនដឹងនិយាយប្រាប់ថាម៉េច?»។
បើតាមលោក រស់ ផារិទ្ធ អភិបាលរងខេត្ដស្វាយរៀង បានបញ្ជាក់ប្រាប់ ខេមបូចា ថា កាលពីឆ្នាំ២០១៤ លោកថាធ្លាប់បានដោះស្រាយនិងពន្យល់ប្រជាពលរដ្ឋរស់តាមប្រឡាយដែលត្រូវស្ដារហ្នឹងម្ដងរួចមកហើយ ហើយប្រជាពលរដ្ឋខ្លះក៏យល់និងមានប្រជាពលរដ្ឋខ្លះមិនយល់ ដូច្នេះលោកមិនមានអ្វីបកស្រាយបន្ថែមទេ។
លោកបន្ដថា ការស្ដារប្រឡាយនេះជាគម្រោងរបស់ក្រសួងធនធានទឹកនិងឧតុនិយម ហើយគោលការណ៍រដ្ឋមិនមានទូទាត់សំណងណាមួយឱ្យប្រជាពលរដ្ឋនោះទេ។
អភិបាលរងខេត្តស្វាយរៀងបន្ដថា៖ «គម្រោងនេះជាគម្រោងស្ដារប្រឡាយចាស់ បើតាមគម្រោងរបស់ក្រសួងធនធានទឹក មិនមានគោលនយោបាយដោះស្រាយផលប៉ះពាល់ទេ ពាក់ព័ន្ធគម្រោងស្ដារប្រឡាយមេកីចកហ្នឹង»។
លោក ចាន់ យុត្ថា រដ្ឋលេខាធិការនៃក្រសួងធនធានទឹកនិងឧតុនិយម បានមានប្រសាសន៍ថា គាត់កំពុងរវល់មិនអាចឆ្លើយបំភ្លឺរឿងគម្រោងសាងសង់ប្រឡាយមេកីចកបានទេ។
ទាក់ទងនឹងករណីនេះលោក ម៉ុម លីដា មន្ត្រីស៊ើបអង្កេតនៃអង្គការលីកាដូប្រចាំខេត្តស្វាយរៀង បានរកឃើញថា ក្រសួងធនធានទឹក មិនបានស្តារឡើងវិញនូវប្រឡាយទឹកតាមគម្រោងដែលបានកំណត់នោះទេ។ តួយ៉ាងក្នុងផែនការកំណត់ ការជីកប្រឡាយទទឹង ៣០ម៉ែត្រ ប៉ុន្តែការអនុវត្តផ្ទាល់គឺ ៧០ម៉ែត្រ ទៅ ១០០ម៉ែត្រ ធ្វើឲ្យប៉ះពាល់ធ្ងន់ធ្ងរដល់ផ្ទះសម្បែង ទ្រព្យសម្បត្តិ និងមុខរបរពលរដ្ឋជាដើម។
លោកបន្ដថា ការដាក់ញត្ដិរបស់ប្រជាពលរដ្ឋក្នុងគោលបំណងទាមទារសំណងពីក្រសួងធនធានទឹកជារឿងត្រឹមត្រូវ ហើយរដ្ឋក៏គួរតែមានគោលនយោបាយផ្ដល់ជាសំណងទៅលើគម្រោងណាដែលបានប៉ះពាល់សដល់ប្រជាពលរដ្ឋ បើមិនដូច្នេះទេ អ្នកដែលរងគ្រោះជាប្រជាជនរបស់ខ្លួន។
លោក លីដាបន្ថែមថា៖ «រដ្ឋគួរតែផ្ដល់សំណងសមរម្យណាមួយឱ្យពលរដ្ឋដែលគម្រោងរដ្ឋបានប៉ះពាល់ កុំចេះតែដើរធ្វើហើយមិនមានការសងសំណង វាជារឿងមិនត្រឹមត្រូវទេ។ យើងជាអង្គការសង្គមស៊ីវិលមិនគាំទ្រការអភិវឌ្ឍណាដែលធ្វើឱ្យប៉ះពាល់ដល់ជីវភាពរបស់ប្រជាពលរដ្ឋ»។
យ៉ាងណាមិញ លោក ថេង សាវឿន ប្រធានសមាគមសម្ព័ន្ធកសិករកម្ពុជា បានលើកឡើងថានៅពេលដែលមានបញ្ហាវិវាទកើតឡើងទៅលើការអភិវឌ្ឍណាដែលប៉ះពាល់ដល់ផ្ទះ ដំណាំភោគផលដីស្រែចំការរបស់ប្រជាពលរដ្ឋ អាជ្ញាធរមូលដ្ឋានក៏ដូចជារដ្ឋត្រូវតែដើរតួនាទីក្នុងការដោះស្រាយជូនដល់ប្រជាពលរដ្ឋ ដូចជាការផ្ដល់សំណង ហើយនឹងរកវិធីសាស្រ្ដនិងយន្ដការផ្សេងៗដើម្បីឱ្យពលរដ្ឋមានអារម្មណ៍ស្ងប់ចិត្ត។
លោកបន្ថែមថា រាល់ការអភិវឌ្ឍទាំងអស់ដើម្បីលើកកម្ពស់ជីវភាពនិងបម្រើផលប្រយោជន៍ពលរដ្ឋ ប៉ុន្ដែបើសិនជាការអភិវឌ្ឍធ្វើឱ្យប៉ះពាល់ វាមិនមែនជារូបភាពនៃការអភិវឌ្ឍទេ និងមិនមែនជារូបភាពក្នុងការកាត់បន្ថយភាពក្រីក្រទេ វាបែរជាបង្កើនរូបភាពក្រីក្របន្ថែមទៅវិញ។
លោក សាវឿន បានសង្កត់ធ្ងន់ថា៖ «និយាយជារួមខ្ញុំគិតថាការលើកឡើងឬក៏ក្ដីកង្វល់របស់ប្រជាពលរដ្ឋនេះ អាជ្ញាធរត្រូវតែធ្វើការយកចិត្តទុកដាក់ក្នុងការដោះស្រាយ ពីព្រោះថា ការស្នើសុំឱ្យមានដំណោះស្រាយពលរដ្ឋគឺវាស្របទៅតាមបទដ្ឋានច្បាប់ជាតិនិងអន្ដរជាតិដែលចែងការពាររួមទាំងរដ្ឋធម្មនុញ្ញរបស់ប្រទេសកម្ពុជាដែរ»។
លោកក៏បានជម្រុញឱ្យអាជ្ញាធរមានការដោះស្រាយនិងឆ្លើយតបនិងសំណើរពលរដ្ឋឱ្យទាន់ពេលវេលា បើមិនចឹងទេវាបង្កភាពលំបាកជាច្រើនដល់ប្រជាជនរហូតធ្លាក់ខ្លួនក្រីក្រក៏មានដោយសារតែគម្រោងរដ្ឋ។ បើយោងតាមការអះអាងតំណាងពលរដ្ឋថា ប្រជាពលរដ្ឋមានជម្លោះដីធ្លីជាមួយគម្រោងអភិវឌ្ឍន៍ស្តារប្រឡាយមួយខ្សែនៅស្រុករំដួល ខេត្តស្វាយរៀងនេះតាំងពីឆ្នាំ២០១៣ ដោយថា កាលពីដំបូងមានពលរដ្ឋជាង៣០០គ្រួសារបានរងផលប៉ះពាល់ ប៉ុន្តែ មានពលរដ្ឋតែ១៥២គ្រួសារហ៊ានចេញមុខតវ៉ាដោយសារភ័យខ្លាចក្រោយអាជ្ញាធរគំរាមកំហែងមិនឱ្យពួកគាត់ចេញតវ៉ា៕