លោក ផល សម្បត្តិ កសិករនៅស្រុកភ្នំស្រុក ខេត្តបន្ទាយមានជ័យ បានលើកឡើងថា ស្រូវជិត៣ហិកតារបស់លោកក្នុងចំណោមស្រូវជិត២០ម៉ឺនហិកតារបស់កសិករផ្សេងទៀត នៅតាមបណ្តាខេត្តចំនួន៨ បានរងផលប៉ះពាល់ដោយសារគ្រោះរាំងស្ងួតដែលអូសបន្លាយអស់រយៈពេលប្រមាណ៣ខែមកនេះ ខណៈស្រូវប្រាំងនៅដើមរដូវនេះ លក់បានតម្លៃល្អដល់ជាង ១ ០០០ រៀលក្នុង១គីឡូក្រាម ដោយសារបរិមាណទិន្នផលស្រូវធ្លាក់ចុះ។
ក្រសួងកសិកម្មបានឱ្យដឹងកាលពីខែមុនថា គ្រោះរាំងស្ងួតនៅតាមបណ្តាខេត្តចំនួន៨ បានធ្វើឱ្យប៉ះពាល់ដំណាំកសិកម្មសរុបចំនួន ២០៩ ០៨៥ ហិកតាក្នុងនោះមានស្រូវជិត២០ម៉ឺនហិកតា ស្មើនឹង ៦,០៤ភាគរយនៃផ្ទៃដីដាំដុះសរុបទូទាំងប្រទេស។
លោក ផល សម្បត្តិ ជាកសិកររស់នៅឃុំភ្នំដី ស្រុកភ្នំស្រុក ខេត្តបន្ទាយមានជ័យបាននិយាយរៀបរាប់ប្រាប់សារព័ត៌មានខេមបូចាថា នៅក្នុងរដូវវស្សាឆ្នាំនេះ លោកធ្វើស្រែលើផ្ទៃដីចំនួន១២ហិកតា ក្នុងនោះដីកម្មសិទ្ធិផ្ទាល់ខ្លួនមានជិត៣ហិកតា ក្រៅពីនេះជាដីជួលគេ ក្នុងតម្លៃ៥០ម៉ឺនរៀល ក្នុងមួយហិកតា សម្រាប់ធ្វើស្រែក្នុងមួយរដូវ។
បុរសវ័យ៤៧ឆ្នាំរូបនេះ បានរៀបរាប់ ខណៈកំពុងដើរពិនិត្យមើលស្រូវកាលពីថ្ងៃ៣១ ខែកក្កដាថា ទុក្ខលំបាករបស់កសិករ តែងតែកើតឡើងជារៀងរាល់ឆ្នាំគឺការលក់ស្រូវមិនបានថ្លៃ ខណៈជីកសិកម្ម ថ្នាំកសិកម្មផ្សេងៗ និងប្រេងម៉ាស៊ូតមានតម្លៃថ្លៃ។ ឆ្នាំនេះប្រេងម៉ាសឡើងថ្លៃ ដែលធ្វើឱ្យកសិករជួបការលំបាក។ បន្ថែមពីនេះត្រូវចំណាយលើការជួលត្រាក់ទ័រភ្ជួរស្រែ ក្នុងមួយរដូវត្រូវភ្ជួរ២ដងក្នុង១ហិកតា ត្រូវចំណាយអស់៤០ម៉ឺនរៀល រួមទាំងថ្លៃពូជ និងថ្លៃផ្សេងៗទៀត។
បុរសសម្បុរខ្មៅស្រអែម មានកូននៅតូចៗ៣នាក់ក្នុងបន្ទុក កំពុងសិក្សារូបនេះ បានឱ្យដឹងទៀតថា៖«នៅឆ្នាំនេះកសិករយើងជួបបញ្ហាធំមួយទៀត គឺគ្រោះរាំងស្ងួត។ ដូចស្រែខ្ញុំ១២ហិកតាត្រូវក្រៀមស្វិតអស់៣ហិកតា ដោយសារតែគ្រោះរាំងស្ងួតប្រមាណ៣ខែមកនេះ។ដូចស្រែដែលខ្ញុំកំពុងមើលនៅនេះ ក្រោយពីភ្លៀងមានទឹកភ្លៀង៤-៥ថ្ងៃហើយនៅមិនទាន់លូតលាស់នៅឡើយទេ ដោយសារជួបគ្រោះរាំងស្ងួតយូរពេក»។
ជាមួយគ្នានេះ លោកសម្បត្តិបានអំពាវនាវដល់រដ្ឋាភិបាល សូមឱ្យជួយសម្រាលទុក្ខលំបាករបស់កសិករ តាមរយៈការសាងសង់អាងស្តុកទឹក និងប្រឡាយមេសម្រាប់កសិករធ្វើកសិកម្មឱ្យបានគ្រប់រដូវ បញ្ចុះតម្លៃជី តម្លៃថ្នាំកសិកម្ម ជាពិសេសជួយរកទីផ្សារលក់ស្រូវឱ្យបានតម្លៃសមរម្យជាដើម ខណៈតម្លៃស្រូវបានចុះថោកយ៉ាងខ្លាំងក្នុងរយៈពេលប៉ុន្មានឆ្នាំកន្លងមកនេះ។
បច្ចុប្បន្ននៅឃុំភ្នំដី ពុំទាន់មានអាងស្តុកទឹក ឬប្រឡាយមេទឹកធំៗនោះទេ មានតែប្រឡាយតូចៗសម្រាប់បូមទឹកចេញពីស្ទឹងបណ្តាក់បន្តគ្នា ហើយបើមេឃខានភ្លៀងយូរ ទឹកស្ទឹងក៏រីងហួតអស់ ពុំមានទឹកបូមដាក់ស្រែនោះទេ។
កសិករអ្នកស្រុក ភ្នំស្រុករូបនេះបានត្អូញត្អែរថា៖«លំបាកណាស់បង អ្នកស្រែពិបាកម៉ាចប់ ប៉ុន្តែបើយើងមិនធ្វើស្រែមិនដឹងទៅធ្វើអ្វីទេ ពីព្រោះយើងចេះតែធ្វើស្រែតាំងពីជីតា តាទួតមកហើយបើទៅរកការងារសំណង់ធ្វើនៅភ្នំពេញក៏លំបាកដែរ។ ដូចប្អូនៗខ្ញុំ២-៣នាក់ទៅធ្វើការសំណង់នៅភ្នំពេញប្រមាណ៣-៤ខែ មេការសំណង់មិនបានបើកលុយឱ្យទេទើបវិលត្រឡប់មកដល់ផ្ទះវិញកាលពីម្សិលមិញ[២៩កក្កដា]។ បើយើងទៅរកការងាររោងចក្រធ្វើយើងអាយុប៉ុណ្ណេះហើយគ្មានអ្នកណាគេយកយើងទេ»។
ចំណែកលោក ម៉ៅ ថៃ វ័យ៣៥ឆ្នាំ ដែលធ្វើស្រែលើផ្ទៃដី១៥ហិកតាក្នុងនោះជួលដីស្រែគេ១១ហិកតា នៅវាលបឹងចក ក្នុងស្រុកសង្កែខេត្តបាត់ដំបង បានប្រាប់សារព័ត៌មានខេមបូចា កាលពីថ្ងៃទី១ ខែសីហាថា លោក និងកសិករដទៃទៀត មានការសប្បាយរីករាយដែលក្នុងរយៈពេល៣-៤ថ្ងៃកន្លងមកនេះ មេឃបានធ្លាក់ភ្លៀងជាបន្តបន្ទាប់ធ្វើឱ្យស្រូវចាប់ផ្តើមលូតលាស់ បន្ទាប់ពីស្រពាប់ស្រពោនដោយសារគ្រោះរាំងស្ងួតអស់រយៈពេលជាច្រើនខែ។
បុរសកសិករដែលមានកូន២នាក់ក្នុងបន្ទុក កូនប្រុសច្បងរៀនថ្នាក់ទី៩ និងកូនស្រីពៅរៀនថ្នាក់ទី៥រូបនេះនិយាយដោយក្តីសប្បាយរីករាយថា៖ «ពេលមេឃមានភ្លៀងអ៊ីចឹង សប្បាយចិត្ត ពីព្រោះខ្ញុំនិងប្រពន្ធខ្ញុំពិបាកចិត្តប្រមាណ២ខែមកហើយនៅពេលឃើញស្រូវក្រៀមស្វិតពីមួយថ្ងៃទៅមួយថ្ងៃ។ ប៉ុន្តែឥឡូវនេះបានភ្លៀងមកខ្លះៗគឺល្អស្រូវមិនងាប់»។
លោក ថៃ បន្តថា លោកបន់ឱ្យតែស្រូវរបស់លោកឆាប់ចេញផ្លែនោះទេ ខណៈបច្ចុប្បន្នលោកឃើញកសិករនៅតាមតំបន់មួយចំនួនបានផុសពីការលក់ស្រូវបានតម្លៃថ្លៃដល់ជាង៨០០ ឬជាង៩០០រៀល មានខ្លះរហូតដល់១០០០រៀលក្នុង១គីឡូក្រាមក៏មានទៅតាមប្រភេទស្រូវ។
បើតាមកសិករដែលរស់នៅពឹងផ្អែកទាំងស្រុងទៅលើការធ្វើស្រែ និងដាំបន្លែមួយចំនួនរូបនេះ បើសិនស្រូវអាចលក់បានថ្លៃចាប់ពីជាង៨០០រៀលឡើងក្នុង១គីឡូក្រាម គឺកសិករអាចសល់បានប្រាក់ចំណេញបានខ្លះ បន្ទាប់ពីសងថ្លៃជី ថ្លៃថ្នាំ និងថ្លៃប្រេងម៉ាស៊ូតបូមទឹកដាក់ស្រែ ខណៈកាលពីឆ្នាំមុនស្រូវរបស់លោកលក់បានតម្លៃតែជិត៧០០រៀលប៉ុណ្ណោះក្នុង១គីឡូក្រាម។
ប៉ុន្តែយ៉ាងណាក្តី សម្រាប់លោក រ៉ា សីហា ជាកសិកររស់នៅស្រុកថ្មគោល ខេត្តបាត់ដំបងបានប្រាប់សារព័ត៌មានខេមបូចានៅថ្ងៃទី២ ខែសីហាថា ដោយសារតែគ្រោះរាំងស្ងួតធ្ងន់ធ្ងរស្រូវក្នុងស្រុកថ្មគោលប្រមាណ៥០ភាគរយត្រូវបានភ្ជួរចោល។
លោកនិយាយថា៖«គិតត្រឹមថ្ងៃទី២សីហាពុំទាន់មានភ្លៀងធំទេ សម្រាប់ស្រុកថ្មគោលទាំងមូលគឺភ្លៀងដែរតែភ្លៀងផ្សែងៗតិចៗមិនទាន់មានភ្លៀងធំយកជាសាច់ការអាចសង្គ្រោះស្រូវដែលកំពុងក្រៀមស្វិតបាននៅឡើយទេ»។
បើតាមលោក សីហា រហូតមកដល់ពេលនេះ ស្រូវរបស់កសិកររាប់ពាន់ហិកតា នៅក្នុងឃុំខ្នាយរមាស ឃុំរូងជ្រៃ និងឃុំបន្សាយត្រែង គឺបានក្រៀមស្វិតងាប់ជាបណ្តើរៗ ដោយសារគ្រោះរាំងស្ងួតយ៉ាងធ្ងន់ធ្ងរក្នុងរយៈពេលជាច្រើនខែមកនេះ។ ក្នុងនាមជាកសិករលោកសូមអំពាវនាវដល់មន្ត្រីកសិកម្ម និងមន្ត្រីធនធានទឹកក្នុងខេត្តបាត់ដំបង រួមទាំងក្រសួងកសិកម្មនិងក្រសួងធនធានទឹកសូមមេត្តាចុះមកជួយស្តារប្រឡាយ«ស្វាយអា»ឡើងវិញ ហើយបើមិនមានលទ្ធភាពស្តារទេ សូមបើកសិទ្ធិឱ្យប្រជាពលរដ្ឋរួមគ្នាស្តារដើម្បីយកទឹកធ្វើស្រែ ខណៈប្រឡាយសហគមន៍ស្វាយអាបច្ចុប្បន្នបានគោករាក់ស្ទើរតែស្មើទៅនឹងដីស្រែទៅហើយ ធ្វើឱ្យកសិករដែលមានដីស្រែនៅប្រ៉បតាមប្រឡាយនេះចំនួន៣ឃុំពុំអាចធ្វើស្រែបានទេពេលមេឃរាំងស្ងួត។
ពាក់ព័ន្ធនឹងគ្រោះរាំងស្ងួតដោយសារឥទ្ធិពលនៃបាតុភូត El Niño នេះ ក្រសួងកសិកម្មអះអាងថា ខ្លួនបាននិងកំពុងសហការជាមួយក្រសួងធនធានទឹក និងឧតុនិយម គណៈកម្មាធិការជាតិគ្រប់គ្រងគ្រោះមហន្តរាយ អាជ្ញាធរខេត្តគោលដៅ និងភាគីពាក់ព័ន្ធ ដើម្បីពន្លឿនវិធានការជួយសង្គ្រោះស្រូវរបស់កសិករ និងជួយដោះស្រាយបញ្ហាប្រឈមផ្សេងៗរបស់ប្រជាកសិករ។
លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រម៉ាញ់និងនេសាទ បានប្រាប់សារព័ត៌មានខេមបូចាកាលពីថ្ងៃទី២សីហាថា គិតត្រឹមថ្ងៃទី៣១ ខែកក្កដា ឆ្នាំ២០២៦ គ្រោះរាំងស្ងួតបានប៉ះពាល់លើខេត្តចំនួន៨ រួមមានខេត្តបន្ទាយមានជ័យ បាត់ដំបង សៀមរាប កំពង់ធំ កំពង់ចាម ពោធិ៍សាត់ កំពង់ឆ្នាំង និងខេត្តប៉ៃលិន ដែលធ្វើឱ្យប៉ះពាល់ដំណាំកសិកម្មសរុបចំនួន២០៩ ០៨៥ហិកតា ស្មើនឹង៦,០៤ភាគរយនៃផ្ទៃដីដាំដុះទូទាំងប្រទេស។
ក្នុងនោះដំណាំស្រូវប៉ះពាល់ ១៨៩ ០១៣ ហិកតា ខូចខាតចំនួន ២ ០១១៥ ហិកតា និងដំណាំស្បៀងរួមផ្សំ និងដំណាំទ្រទ្រង់សេដ្ឋកិច្ចប៉ះពាល់ចំនួន ២០ ០៧២ ហិកតាខូចខាតចំនួន២៣១ហិកតា។ លោកបញ្ជាក់ថា បច្ចុប្បន្ននេះមានកិច្ចអន្តរាគមន៍បូមទឹកនិងភ្លៀងធ្លាក់រាយប៉ាយធ្វើឱ្យស្រូវដែលជួបគ្រោះរាំងស្ងួតងើបឡើងវិញប្រមាណ៩៥ភាគរយ។
លោក ឃឹម ហ្វីណង់ ថ្លែងទៀតថា៖ «ទាក់ទងនឹងកិច្ចអន្តរាគមន៍ជួយសង្គ្រោះស្រូវ ខ្ញុំយល់ថា ក្រសួងធនធានទឹកត្រូវជាង ពីព្រោះការងារដំណាក់កាលនេះ ជាការងារអន្តរាគមន៍ជាមួយក្រសួងធនធានទឹកទេ ដោយឡែកក្រសួងកសិកម្មយើង អាចមានយន្តការនៅពេលដែលមានការស្តារឡើងវិញ ប៉ុន្តែបច្ចុប្បន្ននេះពាក់ព័ន្ធនឹងក្រសួងធនធានទឹកច្រើនជាង»។
សារព័ត៌មានខេមបូចា មិនអាចទាក់ទងលោក ចាន់ យុត្ថា អ្នកនាំពាក្យក្រសួងធនធានទឹក ដើម្បីស្នើសុំធ្វើអត្ថាធិប្បាយ លើបញ្ហានេះបានទេនៅថ្ងៃទី២ ខែសីហា។ ប៉ុន្តែលោក ឈុន ពុទ្ធារិទ្ធ អគ្គនាយកនៃអគ្គនាយកដ្ឋានកិច្ចការបច្ចេកទេសនិងជាប្រធានអង្គភាពត្រួតពិនិត្យគម្រោង នៃក្រសួងធនធានទឹក បានថ្លែងនៅពេលចុះត្រួតពិនិត្យ និងវាយតម្លៃវឌ្ឍនភាពគម្រោងជួសជុលទំនប់ និងគម្រោងសាងសង់សំណង់ស្ទាក់ទឹក ក្នុងភូមិសាស្ត្រខេត្តសៀមរាប និងខេត្តកំពង់ធំ កាលពីថ្ងៃ៣១ ខែកក្កដាថា គម្រោងជួសជុលទំនប់អាងទឹកសួង៧៨ គឺសម្រេចបាន១០០% ដោយបានជួសជុលទំនប់ប្រវែង ៣ ៨០០ម៉ែត្រ និងសាងសង់សំណង់ទ្វារទឹកសរុប ៥កន្លែង។
ក្រោយបញ្ចប់ ទំនប់ដែលមានទទឹង ៦ម៉ែត្រនេះ នឹងក្លាយជាផ្លូវលំជនបទ ជួយសម្រួលការធ្វើដំណើរ និងដឹកជញ្ជូនកសិផល ព្រមទាំងស្តុកទឹកស្ទឹងជីក្រែងសម្រាប់ស្រោចស្រពស្រូវវស្សាបានចំនួន ១ ១២០ ហិកតា ស្រូវប្រាំងលើកទីមួយ ២ ២៣៥ ហិកតា ស្រូវប្រាំងលើកទីពីរ ២ ២៣៥ហិកតា និងដំណាំរួមផ្សំ ៣០ហិកតា ផ្តល់ប្រយោជន៍ដល់ប្រជាកសិករ ១ ៧៣៩ គ្រួសារ ក្នុង១២ឃុំ នៃស្រុកជីក្រែង ខេត្តសៀមរាប។
សម្រាប់លោក រ៉ា សីហា ខណៈបច្ចុប្បន្នស្ថានភាពសេដ្ឋកិច្ចប្រជាពលរដ្ឋកំពុងធ្លាក់មួយកម្រិតស្រាប់ ហើយមកជួបនឹងគ្រោះរាំងស្ងួតទៀតគឺធ្វើឱ្យស្រូវដែលកសិករចំណាយដើមទុនភ្ជួររាស់ សាបព្រោះងាប់ វាធ្វើឱ្យជីវភាពរបស់កសិករកាន់តែធ្លាក់ធ្ងន់មួយកម្រិតថែមទៀតដោយសារត្រូវចំណាយដើមទុនភ្ជួររាស់សាបព្រោះឡើងវិញនៅពេលមានភ្លៀង។
កសិករដែលឆ្នាំនេះធ្វើស្រែលើផ្ទៃដី១០ហិកតាកន្លះរូបនេះបានឱ្យដឹងថា បើតាមលោកគណនាការធ្វើស្រែរបស់កសិករដែលសន្សំបានបន្តិចបន្តួចក្នុងរយៈពេល៤-៥ឆ្នាំកន្លងមកយកមកទប់ការខាតដោយសារគ្រោះរាំងស្ងួតក្នុងឆ្នាំនេះមិនរួចនោះទេ ពីព្រោះជាច្រើនឆ្នាំកន្លងមកនេះឱ្យតែដល់រដូវប្រមូលផលគឺស្រូវតែងតែចុះថោក។
លោកនិយាយថា ៖«ឆ្នាំនេះបើនៅតែប៉ុណ្ណឹងទៀតខ្ញុំថាខាតជាន់លើខាតសម្រាប់អ្នកស្រែ ព្រោះអីបើតាមការសិក្សាបស់ខ្ញុំយើងមិនអាចទៅបន្ទោសរោងម៉ាស៊ីនបន្ទោសឈ្មួញទាំងស្រុងបានទេ។ ខ្ញុំបន្ទោសរដ្ឋច្រើនជាងដែលមិនមានប្រព័ន្ធ មិនមានទុនសម្រាប់ទិញស្រូវកសិករស្តុកទុកនៅពេលរដូវប្រមូលផល ដូចនៅវៀតណាមនៅថៃ ដល់អ៊ីចឹង ឈ្មួញគេចង់ទិញឱ្យតម្លៃប៉ុន្មានក៏បានគឺនៅលើគេ ដល់អ៊ីចឹងកសិករចាំតែងាប់»។
លោកកត់សម្គាល់ថា កន្លងមកតម្លៃស្រូវអង្ករនៅក្នុងស្រុកថ្មគោលទាំងមូលលោកមិនដែលឃើញអាជ្ញាធរស្រុកឬអាជ្ញាធរខេត្តមន្ទីរពាណិជ្ជកម្មខេត្តជួយអ្វីបាននោះទេ ហើយបន្ទាប់ពីមន្ត្រីជំនាញជួបប្រជុំជាមួយខាងរោងម៉ាស៊ីនរួចគឺតម្លៃស្រូវតែងតែចុះថោកងាប់តែកសិករ។
ស្រូវប្រាំងដើមរដូវកំពុងមានតម្លៃល្អ
នាពេលបច្ចុប្បន្នកសិករនៅតាមបណ្តាខេត្តមួយចំនួន ដូចជាខេត្តតាកែវ ព្រៃវែង ត្បូងឃ្មុំ កំពង់ចាម និងកំពង់ធំ ជាដើមបានអះអាងថា ស្រូវប្រាំងរបស់ពួកគាត់ លក់បានថ្លៃល្អគួរសម។
អ្នកស្រី ម៉ៅ រ៉ានី វ័យ៤៣ឆ្នាំ រស់នៅស្រុកសន្ទុកខេត្តកំពង់ធំ ដែលកំពុងប្រមូលផលស្រូវប្រាំងលើដីស្រែ៩ហិកតាបាននិយាយថា នៅក្នុងតំបន់ខ្វាវ មកដល់ត្រឹមថ្ងៃទី៣១ ខែកក្កដា ឆ្នាំ២០២៦ ពូជស្រូវ៦៦៦លក់បាន៩៥០រៀលក្នុង១គីឡូក្រាម ខណៈពូជស្រូវប្រភេទOM៥៤៥១លក់បានតម្លៃ៩៨០រៀលក្នុង១គីឡូក្រាម។
អ្នកស្រីនិយាយដោយក្តីសប្បាយរីករាយថា៖ «នេះជាតម្លៃល្អ។ ខ្ញុំអាចសល់ប្រាក់បានខ្លះ បន្ទាប់ពីសងថ្លៃជី ថ្លៃថ្នាំ ថ្លៃប្រេង និងថ្លៃភ្ជួររាស់សាបព្រោះ។ បន្ទាប់ពីប្រមូលផលរួច ខ្ញុំនឹងប្រញាប់ភ្ជួររាស់សាបព្រោះដាំដុះជាថ្មីទៀត។ កាលពីឆ្នាំមុនខ្ញុំលក់បានតែ៦៥០រៀលទេក្នុង១គីឡូ។ យ៉ាងណាក្តីឆ្នាំនេះ ជី ថ្នាំ ប្រេងក៏បានឡើងថ្លៃដែរ»។
ពាក់ព័ន្ធនឹងតម្លៃស្រូវកំពុងឡើងថ្លៃក្នុងពេលបច្ចុប្បន្ននេះ លោក ឃឹម ហ្វីណង់ បានបញ្ជាក់ថា វាជានិន្នាការសកល ខណៈនៅពេលនេះគឺមិនទាន់ដល់រដូវប្រមូលផលស្រូវទេ ទើបតែដើមដៃសម្រាប់ស្រូវប្រាំង។ លោកបន្តថា៖«រៀងរាល់ឆ្នាំអ្វីដែលឃើញតម្លៃនេះគឺដើមដៃគឺយ៉ាងដូច្នេះឯង។ អ៊ីចឹងយើងនៅមិនទាន់ដឹងថា ស្រូវឡើងថ្លៃឬក៏យ៉ាងណានោះទេគឺយើងត្រូវរង់ចាំសង្កេតមើលទាំងអស់គ្នា»។
យ៉ាងណាក្តី លោក ជីវ ហាប់ ជាអាជីវករទិញស្រូវ ដែលជាម្ចាស់រោងម៉ាស៊ីនកិនស្រូវ ជីវហាប់ នៅស្រុកថ្មគោល ខេត្តបាត់ដំបង បានលើកឡើងនៅថ្ងៃទី៤ ខែសីហានេះថា ការដែលស្រូវលក់បានតម្លៃល្អនៅពេលនេះគឺដោយសារតែបរិមាណនៃទិន្នផលស្រូវនៅពេលនេះបានធ្លាក់ចុះប្រមាណ៥០ភាគរយដោយសារគ្រោះរាំងស្ងួត។
លោកថ្លែងថា ៖«ដោយសារតែគ្រោះរាំងស្ងួតបានធ្វើឱ្យកសិករភ្ជួរស្រូវប្រាំងដែលក្រៀមស្វិតចោលអស់ប្រមាណ៥០ភាគរយ ដូច្នេះធ្វើឱ្យទិន្នផលស្រូវប្រាំងថយចុះទើបតម្លៃកើនឡើង»។
បើតាមលោក ជីវ ហាប់ គិតត្រឹមថ្ងៃទី៤ ខែសីហានេះ ស្រូវសែនក្រអូប កសិករលក់បានតម្លៃពី១១៨០ ទៅ ១២០០ រៀល ក្នុង១គីឡូក្រាម ស្រូវ OM តម្លៃពី ៩៥០ ទៅ ៩៦០ និងស្រូវស្រង៉ែតម្លៃពី ១០៦០ ទៅ ១០៧០ រៀលក្នុង១គីឡូក្រាម។
លោកបញ្ជាក់ថា ៖«នៅរដូវប្រមូលផលស្រូវវស្សាខាងមុខ ស្រូវប្រហែលជាអាចធ្លាក់ថ្លៃបន្តិចបន្តួចប៉ុន្តែមិនធ្លាក់ច្រើនដូចឆ្នាំមុនទេ ដោយសារបរិមាណផលិតឆ្នាំនេះថយចុះដោយសារគ្រោះរាំងស្ងួត»។
សម្រាប់កសិករ ផល សម្បត្តិ បើស្រូវលក់បានតម្លៃជិត១០០០រៀល ឬលើ១០០០រៀល ក្នុងមួយគីឡូក្រាមគឺជាតម្លៃល្អ ធ្វើឱ្យកសិករអាចទូទាត់ថ្លៃផលិតបាន និងសល់ប្រាក់ចំណេញបានខ្លះ ខណៈកាលពីឆ្នាំមុនស្រូវOM របស់លោកលក់បានចន្លោះពី៥០០ជាងទៅ៦០០រៀល ឯស្រូវសែនក្រអូបបានពី៧០០ទៅ ៨០០ក្នុង១គីឡូក្រាម ធ្វើឱ្យរូបលោកនិងកសិករផ្សេងទៀតត្រូវខាតដើម។
លោក សម្បត្តិ បារម្ភខ្លាចស្រូវធ្លាក់ថ្លៃវិញនៅពេលដល់រដូវប្រមូលផលដែលមានស្រូវជន់ច្រើន។ លោកបញ្ជាក់ថា កាលពីឆ្នាំមុន នៅពេលប្រមូលផលស្រូវអស់ លក់សងធនាគារមិនទាំងគ្រប់ផង ថែមទាំងនៅជំពាក់ថ្លៃជី ថ្លៃថ្នាំគេទៀត។ នៅពេលសួរថា តើលោកនៅជំពាក់ធនាគារប៉ុន្មានទៀត លោកសម្បត្តិមិនបានបញ្ជាក់ពីចំនួនច្បាស់លាស់នោះទេដោយគ្រាន់តែឆ្លើយថា៖ «រាងគួរសមដែរបង»៕
