កម្មករ កម្មការិនីជិត៤ពាន់នាក់ដែលបម្រើការនៅក្នុងរោងចក្រ ខេន ស្តតស៊ូ ស្ថិតក្នុងឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង បានប្រមូលផ្ដុំគ្នាកូដកម្មនៅថ្ងៃអង្គារនេះ ដើម្បីទាមទារឱ្យថៅកែគោរព និងអនុវត្តតាមលក្ខខណ្ឌការងារចំនួន៣៥ចំណុច។ ទន្ទឹមនឹងការធ្វើកូដកម្មនេះ តំណាងសហជីពចំនួន៣នាក់ត្រូវបានសមត្ថកិច្ចចាប់ខ្លួនផងដែរកាលពីល្ងាចថ្ងៃចន្ទនិងព្រឹកថ្ងៃអង្គារ។
បើតាមសេចក្ដីប្រកាសព័ត៌មានរបស់កម្មករនៃរោងចក្រ ខេន ស្ត័តស៊ូ បានឱ្យដឹងថា ពួកគេ បានបោះឆ្នោតដោយសម្ងាត់ ដើម្បីធ្វើកូដកម្មទាមទារថៅកែរោងចក្រគោរពលក្ខខណ្ឌការងារក្នុងគោលដៅបង្កើតទំនាក់ទំនងវិជ្ជាជីវៈ និងដើម្បីលើកកម្ពស់លក្ខខណ្ឌការងារឱ្យបានល្អប្រសើរនៅក្នុងក្រុមហ៊ុន។
សេចក្ដីប្រកាសដដែលបានឱ្យដឹងថា ពួកគេមានការខកចិត្ត និងមិនអាចទទួលយកបានជាដាច់ខាត់នូវទង្វើរបស់ក្រុមហ៊ុនដែលតែងតែបដិសេធ និងជំទាស់សេចក្តីបង្គាប់របស់ក្រុមប្រឹក្សាអាជ្ញាកណ្ដាលគ្រប់សំណុំរឿងទាំងអស់ ដែលបង្ហាញពីឆន្ទៈមិនគោរពច្បាប់ការងារក្នុងប្រទេសកម្ពុជា។
មិនត្រឹមតែប៉ុណ្ណឹង ក្រុមកម្មករថាក្រុមហ៊ុនខាងលើ មិនគោរពសិទ្ធិមនុស្ស ដូចជាមិនអនុញ្ញាតឱ្យមានការលក់ដូរនៅមុខរោងចក្របណ្តាលឱ្យកម្មករ កម្មការិនីខ្វះអាហារហូបចុក បង្ខំឲ្យកម្មករថែមម៉ោង បង្ខំកម្មករឱ្យធ្វើការរហូតរលូតកូន មិនបើកលុយថ្លៃបាយឱ្យកម្មករជាដើម។
យ៉ាងណាមិញបើតាម បើតាមអ្នកស្រី ហែម បុប្ផា អាយុ៤១ឆ្នាំ ជាប្រធានក្រុមការងារនៅក្រុមហ៊ុន ខេន ស្ព័តស៊ូ រយៈពេល៩ឆ្នាំ បានឱ្យដឹងថា កម្មករជាច្រើនពាន់នាក់បានប្រមូលផ្ដុំគ្នាមកធ្វើកូដកម្មដោយអហិង្សា ទាមទារឱ្យរោងចក្រគោរពតាមសេចក្ដីបង្គាប់របស់ក្រុមប្រឹក្សាអាជ្ញាកណ្ដាល និងចំណុចផ្សេងៗទៀតរួមមាន មានកន្លែងលក់ម្ហូបអាហារដូចមុន បើកប្រាក់ថ្លៃបាយទៀងទាត់ជាដើម។
អ្នកស្រីបន្តថា កម្មករប្រុសស្រីជិត៤ពាន់នាក់ មកតវ៉ាតាំងពីព្រឹកម៉ោង៦ តែក្រុមហ៊ុនបានត្រឹមតែស្រែកប្រកាសតាមមេក្រូ ឱ្យកម្មករចូលធ្វើការមុនម៉ោង៧ព្រឹក និងមានអាជ្ញាធរ សន្តិសុខឈរអមជាច្រើននាក់។
អ្នកស្រី បុប្ផា បន្ថែមទៀតថា ទន្ទឹមនឹងមុនពេលមានការតវ៉ារបស់កម្មករ ក៏មានការចាប់ខ្លួនតំណាងសហជីពចំនួន៣នាក់ផងដែរ ក្នុងនោះមានស្រី២នាក់ និងប្រុសម្នាក់។ ចំពោះស្រ្តី២នាក់ ត្រូវបានសមត្ថិកិច្ចចាប់ខ្លួនតាំងពីល្ងាចថ្ងៃទី៣០ ខែឧសភា ចំណែកបុរសម្នាក់ជាតំណាងសហជីព ទើបតែត្រូវបានចាប់ខ្លួននៅព្រឹកមិញនេះទេ ខណៈរូបគេកំពុងស្នាក់នៅឯផ្ទះរបស់ខ្លួន។
អ្នកស្រី បុប្ផា ប្រាប់ថា៖ «ពួកយើងចង់បានកន្លែងលក់ដូរសមស្រប ព្រោះអាហារដ្ឋានរបស់ក្រុមហ៊ុនគឺខ្វះអនាម័យ បាយឆៅ បន្លែសាច់ឆៅ កម្មករហូបអត់កើត»។
អ្នកស្រីបន្តថា៖«លុយបាយថែមម៉ោងពីចន្ទដល់សុក្រ ពីមុនបាន១ម៉ឺន តែឥលូវថែមម៉ោងពីចន្ទដល់សុក្រ គឺទទួលបានតែ៨ពាន់ទេ ដោយ២ពាន់ទៀតគាត់ជំពាក់រាល់អាទិត្យ»។
ចំណែកលោក នី អាយុ៣២ឆ្នាំ ជាកម្មករផ្នែកខ្សែរទឹកហូរ បម្រើការរយៈពេល៧ឆ្នាំ បានឱ្យដឹងថា រូបលោកក៏ដូចជាកម្មករផ្សេងទៀតសម្រេចចិត្តចូលរួមធ្វើកូដកម្ម ព្រោះចង់ឱ្យក្រុមហ៊ុនគោរពតាមការស្នើសុំរបស់កម្មករទាំង៣៥ចំណុច។ ចំពោះលោកសង្កត់ធ្ងន់ត្រង់ចំណុចកន្លែងលក់ដូរម្ហូបអាហារ ព្រោះសព្វថ្ងៃកម្មករពិបាកហូបចុក។
លោកប្រាប់ឱ្យដឹងថា៖«ឥលូវនេះអត់មានការលក់ដូរទេ ខ្ញុំចង់ឱ្យមានកន្លែងលក់ដូរដូចរោងចក្រដែលមានរបងជាប់គ្នាហ្នឹង ព្រោះថាការហូបចុកគឺខុសគ្នា»។
ឆ្លើយតបចំពោះបញ្ហានេះ លោក ហេង សួរ អ្នកនាំពាក្យក្រសួងការងារ បានលើកឡើងថា ចំពោះបញ្ហាកំពុងកើតឡើងមន្ទីរការងារ និងបណ្ដុះបណ្ដាលវិជ្ជាជីវៈខេត្តកំពង់ឆ្នាំង កំពុងតែធ្វើការដោះស្រាយជូនកម្មករ កម្មការិនីនៃរោងចក្រ ខេន ស្ព័តស៊ូ។
លោកមានប្រសាសន៍ថា៖ «អ្វីដែលពាក់ព័ន្ធនឹងច្បាប់ការងារ មន្ទីរការងារបណ្ដុះបណ្ដាលវិជ្ជាជីវៈខេត្តកំពង់ឆ្នាំង កំពុងតែធ្វើការដោះស្រាយ»។
លោកបន្ថែមថា ចំពោះបញ្ហាផ្សេងទៀតពាក់ព័ន្ធនឹងចំណាត់ការផ្សេងៗ ដែលលើសពីច្បាប់ការងារ ក្នងនាមជាក្រសួងគណៈកម្មការដោះស្រាយកូដកម្ម បាតុកម្មគ្រប់មុខសញ្ញានឹងធ្វើការជាមួយអាជ្ញាធរ និងមន្ទីរបន្ថែមទៀត។
បើតាមការបញ្ជាក់ពីក្រុមកម្មករ បានឱ្យដឹងដែរថា ការធ្វើកូដកម្មនេះ ពួកគេធ្វើកូដកម្មដោយអហិង្សា ដោយមានការប្រើឧបករណ៍បំពង់សម្លេង ការលើកពាក្យបដារ និងការស្រែកតវ៉ានៅខាងមុខក្រុមហ៊ុន។ ពួកគេនឹងចាប់ធ្វើកូដកម្មចាប់ពីថ្ងៃទី៣១ ខែឧសភា រយៈពេល៧ថ្ងៃ រហូតមានដំណោះស្រាយចំនួន៣៥ចំណុច។
ចំណែកលោក វន ស៊ីផា អភិបាលស្រុកសាមគ្គីមានជ័យ បានបដិសេធមិនឆ្លើយតបជុំវិញករណីនេះ។ ដោយលោកប្រាប់ថា មិនបានដឹង និងឱ្យអ្នកសារព័ត៌មានសាកសួរទៅអ្នកនាំពាក្យអភិបាលខេត្តជំនួសវិញ។
ដោយឡែក លោកស្រីយ៉ាង សុភ័ណ្ឌ ប្រធានសហព័ន្ធសហជីពកម្ពុជា បានថ្លែងឱ្យដឹងថា កាលពីព្រឹកមិញនេះ តំណាងសហជីពចំនួន៣នាក់ ត្រូវបានសមត្ថិកិច្ចចាប់ខ្លួន។ ក្នុងនោះមានតំណាងសហជីពម្នាក់ភេទប្រុស ត្រូវបានសម្ថកិច្ចចាប់ខ្លួនក្បែរផ្ទះខណៈរូបគេរៀបចេញមកធ្វើការ។
អ្នកស្រីបញ្ជាក់ថា៖ «មកដល់ពេលនេះ គឺឃើញថាខាងសម្ថកិច្ចបានចាប់មេដឹកនាំសំខាន់ៗចំនួន៣រូប មេដឹកនាំសហជីព ក្នុងចំណោម៣នាក់ហ្នឹងមានសហជីពខាងខ្ញុំមួយដែរ»។
លោកស្រីបន្តថា ការទាមទាររបស់កម្មករភាពច្រើនគឺសុទ្ធតែជាការសម្រេចរបស់ក្រុមប្រឹក្សាអាជ្ញាកណ្ដាលកាលពីពេលកន្លងទៅ។ហើយការធ្វើកូដកម្មនេះ អ្នកស្រីបញ្ជាក់ថា ជាការធ្វើកូដកម្មទាមទារដោយស្របច្បាប់ ដោយសារតែកម្មករទាំងនោះ កើតទុក្ខមិនសុខចិត្តស្របពេលដែលក្រុមប្រឹក្សាអាជ្ញាកណ្ដាលបានសម្រេចចំណុចមួយចំនួនហើយ ប៉ុន្តែខាងក្រុមហ៊ុនមិនគោរពតាម៕
