បេឡាជាតិសន្តិសុខសង្គម(ប.ស.ស.) ប្រកាសកាលពីថ្ងៃអាទិត្យថា ខ្លួននឹងមិនធ្វើបណ្ណឲ្យបុគ្គលណាដែលមិនបង្ហាញភស្តុតាងថា បានចាក់វ៉ាក់សាំងបង្ការកូវីដ-១៩ នោះទេ។ ការប្រកាសនេះធ្វើឡើងបន្ទាប់ពីសាលារាជធានីភ្នំពេញបានដាក់វិធានការតម្រូវឲ្យប្រជាពលរដ្ឋត្រូវបង្ហាញបណ្ណចាក់វ៉ាក់សាំងពេលចេញចូលស្ថាប័នរដ្ឋ ឬឯកជនក្នុងរាជធានីភ្នំពេញ។
ក្នុងសេចក្ដីប្រកាសព័ត៌មានរបស់ខ្លួន បេឡាជាតិសន្តិសុខសង្គម សរសេរថា៖ «ចាប់ពីថ្ងៃជូន ដំណឹងនេះតទៅ រាល់ពេល លោក លោកស្រីមកទទួលសេវានៅគ្រប់ទីស្នាក់ការ ប.ស.ស. ទូទាំងរាជធានី-ខេត្ត-ខណ្ឌ ទាំងអស់ ត្រូវបង្ហាញបណ្ណចាក់វ៉ាក់សាំងកូវីដ-១៩ ឬ បណ្ណចាក់ វ៉ាក់សាំងបង្ការជំងឺកូវីដ-១៩ ឬ លិខិតបញ្ជាក់ការចាក់វ៉ាក់សាំងបង្ការជំងឺកូវីដ-១៩»។ សេចក្ដីប្រកាសដដែលបន្តថា៖ «ក្នុងករណីមិនមានបណ្ណចាក់វ៉ាក់សាំង នោះ ប.ស.ស. មិនផ្តល់សេវាជូននោះទេ»។
ការប្រកាសនេះធ្វើឡើងបន្ទាប់ពីសាលារាជធានីភ្នំពេញ ចេញវិធានការមួយកាលពីថ្ងៃទី៥ ខែតុលា តម្រូវឲ្យប្រជាពលរដ្ឋមានអាយុចាប់ពីប្រាំមួយឆ្នាំឡើង ត្រូវបង្ហាញបណ្ណចាក់វ៉ាក់សាំងពេលទៅសាលារៀន ផ្សារ រោងចក្រ និងទីកន្លែងសាធារណៈ ឬឯកជនផ្សេងៗទៀតក្នុងរាជធានីភ្នំពេញ។ ស្ថាប័ន ឬទីតាំងណា ដែលអនុញ្ញាតឲ្យអ្នកគ្មានបណ្ណចាក់វ៉ាក់សាំងចូលទីតាំងរបស់ខ្លួនអាចប្រឈមនឹងការដកហូតអាជ្ញាបណ្ណ ឬបិទអាជីវកម្ម។
លោក ហេង សុផាន់ណារិទ្ធិ អ្នកនាំពាក្យ បេឡាជាតិសន្តិសុខសង្គម ប្រាប់ខេមបូចាថា វិធានការរឹតបន្តឹងថ្មីនេះអនុវត្តឡើងសម្រាប់តែអ្នកដែលដាក់ស្នើសុំធ្វើបណ្ណប.ស.ស. តែប៉ុណ្ណោះ មិនសំដៅដល់អ្នកកំពុងប្រើប្រាស់បណ្ណដើម្បីទទួលសេវាផ្សេងៗ ដូចជាសេវាថែទាំសុខភាព ដែលបានផ្ដល់ជូនក្រោមកម្មវិធីសន្ដិសុខសង្គមនោះទេ។
លោកមានប្រសាសន៍ថា៖ «ខ្ញុំចង់បញ្ជាក់ឲ្យច្បាស់ថាប.ស.ស គ្រាន់តែធ្វើតាមសេចក្ដីណែនាំ[របស់សាលារាជធានីភ្នំពេញ]…ពេលពួកគាត់ចង់ធ្វើបណ្ណប.ស.ស. ពួកគាត់ត្រូវតែបង្ហាញបណ្ណចាក់វ៉ាក់សាំង»។
លោកឲ្យដឹងទៀតថា ក្នុងករណីកម្មករដែលមិនមានកាតចាក់វ៉ាក់សាំង អ្នកទាំងនោះត្រូវតែសុំលិខិតបញ្ជាក់ពីមណ្ឌលសុខភាព ពន្យល់ពីមូលហេតុ ដូចជាមានផ្ទៃពោះ ដែលនាំឲ្យពួកគាត់មិនទាន់បានទទួលការចាក់វ៉ាក់សាំង។
លោក ហ៊ត វ៉ាន់ធី ប្រធានរដ្ឋបាលផ្សារអូឫស្សី មានប្រសាសន៍ថា ផ្សារអូឫស្សី បានអនុវត្តវិធានការណែនាំរបស់សាលាក្រុងតាំងពីថ្ងៃទី៨ ខែតុលា ក្រោយបុណ្យភ្ជុំបិណ្ឌមក។
លោកឲ្យដឹងទៀតថា៖ «អ្នកណាដែលមិនមានបណ្ណចាក់វ៉ាក់សាំង យើងមិនអនុញ្ញាតឲ្យចូលក្នុងផ្សារទេ»។ ដោយលោកបន្តថា៖ «ប៉ុន្តែពួកគាត់ភាគច្រើនមានបណ្ណចាក់វ៉ាកសាំង ឬពេលខ្លះពួកគាត់មិនបានយកតាមខ្លួន ប៉ុន្តែពួកគាត់បានថតវាទុកក្នុងទូរសព្ទដៃ»។
លោកបានឲ្យដឹងថា៖ «ខ្ញុំបានដាក់បុគ្គលិកឲ្យយាមតាមច្រកចូលផ្សារ ដើម្បីពិនិត្យកាតចាក់វ៉ាក់សាំងចំពោះអ្នកចូលក្នុងផ្សារ»។ លោកបន្ថែមថា ផ្សារក៏បានអនុវត្តតាមគោលការណែនាំរបស់ក្រសួងសុខាភិបាល ដែលមានការពាក់ម៉ាស លាងដៃជាមួយអាល់កុលឬជេល និងរក្សាគម្លាតជាដើម។
អ្នកស្រី សូ បូភ័ក្រ វ័យ ៣៧ឆ្នាំ អ្នកលក់ភេសជ្ជៈ និងគ្រឿងទេស ក្នុងរាជធានីភ្នំពេញ ឲ្យដឹងដែរថា ផ្សារខ្លះសន្តិសុខបានសួររកបណ្ណចាក់វ៉ាក់សាំងពេលចង់ចូលក្នុងផ្សារ តែផ្សារខ្លះទៀតមិនបានសួរនាំទេ។
អ្នកស្រីបន្តថា៖ «មិនថាគេសួរយើងរកកាតវ៉ាក់សាំងឬអត់ទេ ខ្ញុំនៅតែការពារខ្លួនឯងដោយពាក់ម៉ាស បាញ់អាល់កុល[សម្អាតដៃ] គ្រប់ពេល ដើម្បីធានាសុវត្ថិភាព»។
លោក ថូ កុសល វ័យ៣៣ឆ្នាំ ជាកម្មករនៅរោងចក្រ W&F ក្នុងខណ្ឌដង្កោ ឲ្យដឹងដែរថា លោកកម្រចេញក្រៅណាស់ ដូចនេះលោកមិនច្បាស់ទេថា ត្រូវបង្ហាញបណ្ណចាក់វ៉ាក់សាំងមុនចូលទីតាំងណាមួយនោះ។
លោក បន្ថែមថា៖ «ជាការពិត កម្មករភាគច្រើនបានចាក់វ៉ាក់សាំងរួចអស់ហើយ និងខ្ញុំក៏បានចាក់វ៉ាក់សាំងដូសទី២រួចហើយដែរ ដូចនេះបើសិនជាគេតម្រូវឲ្យយើងបង្ហាញបណ្ណចាក់វ៉ាក់សាំង វាមិនមានបញ្ហាអ្វីនោះទេ»។
លោកឲ្យដឹងទៀតថា៖ «សម្រាប់រោងចក្រដែលខ្ញុំធ្វើការ ពួកគេជ្រើសរើសកម្មករយកតែអ្នកមានកាតចាក់វ៉ាក់សាំង បើសិនជាមិនមាន ពួកគេមិនជ្រើសយកទេ ដូចនេះវានឹងពិបាកសម្រាប់អ្នកមិនបានចាក់វ៉ាក់សាំងក្នុងការរកការងារធ្វើ»។
លោកស្រី យ៉ាង សោភ័ណ្ឌ ប្រធានសហព័ន្ធសហជីពកម្ពុជា(CATU) មានប្រសាសន៍ថា ការជ្រើសរើសចាក់វ៉ាក់សាំង ឬអត់ គួរតែជាសិទ្ធិរបស់កម្មករ ឬមនុស្សផ្សេងទៀត មិនមែនជាការបង្ខំដោយគោលនយោបាយសាធារណៈនោះទេ។
លោកស្រី បានបានឲ្យដឹងថា៖ «កន្លងមក មនុស្សស្ទើរគ្រប់គ្នាបានចាក់វ៉ាក់សាំង លើកលែងតែអ្នកមានសុខភាពខ្សោយ មានជំងឺ មានកម្ដៅខ្លួនខ្ពស់ និងស្រ្តីមានផ្ទៃពោះ»។ លោកស្រីបន្ថែមថា៖ «ឥឡូវនេះ គេតម្រូវឲ្យគ្រប់គ្នាបង្ហាញបណ្ណចាក់វ៉ាក់សាំង វានឹងប៉ះពាល់ដល់មនុស្ស ឬកម្មករទាំងនោះ»។
លោក យង់ គឹមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព មានប្រសាសន៍ថា គោលការតម្រូវថ្មីរបស់បេឡាជាតិសន្តិសុខសង្គមមិនមែនជាការសម្រេចចិត្តត្រឹមត្រូវទេ។
លោក លើកឡើងថា៖ «បើសិនជាពួកគេពិតជាតម្រូវឲ្យមានដាច់ណាត់ថា គ្រប់គ្នាត្រូវតែបង្ហាញបណ្ណចាក់វ៉ាក់សាំង វានឹងប៉ះពាល់ដល់សិទ្ធិទទួលបានបណ្ណប.ស.ស.»។
លោក បន្ថែមថា ខាងបេឡាសន្ដិសុខសង្គមគួរតែលើកលែងលើអ្នកមិនមានបណ្ណចាក់វ៉ាក់សាំង ដោយថាអ្នកខ្លះមិនបានចាក់វ៉ាក់សាំងព្រោះតែមានបញ្ហាសុខភាព។
លោកបន្ថែមថា៖ «រឿងដែលសំខាន់នោះគឺថា តើផ្សារ ឬហាងទាំងនោះ បានអនុវត្តវិធានការក្រសួងសុខាភិបាលត្រឹមត្រូវឬអត់»។ ដោយលោកបន្តថា៖ «បើសិនជាពួកគេមិនបានអនុវត្តត្រឹមត្រូវ ទោះជាពួកគេបានចាក់វ៉ាក់សាំងមួយ ឬក៏ពីរដូស ក៏នៅតែអាចឆ្លងបានដែរ»។
លោក ម៉េត មាសភក្ដី អ្នកនាំពាក្យសាលារាជធានីភ្នំពេញ និងអភិបាលរង លោក កើត ឆែ មិនអាចទាក់ទងសុំអត្ថាធិប្បាយបានទេ។
ក្រសួងសុខាភិបាលកាលពីថ្ងៃទី១០ ខែតុលា បានឲ្យដឹងមនុស្សចំនួន១៣.៤៩២.៤០៦នាក់បានចាក់វ៉ាក់សាំងដូសទី១ និងមាន១១.៤៩៨.៥១៧នាក់បានចាក់វ៉ាក់សាំងដូសទី២ រួចរាល់។ បន្ថែមពីនេះ មនុស្ស៩២៣.២៥៩នាក់ បានចាក់វ៉ាក់សាំងដូសទី៣ ជាដូសជំរុញរួចហើយដែរ។
ភាគរយប្រជាពលរដ្ឋកម្ពុជាបានចាក់វ៉ាក់សាំងគិតត្រឹមថ្ងៃទី១០ ខែតុលា មានចំនួន៩៩,២០ភាគរយ ក្នុងចំណោមប្រជាពលរដ្ឋគោលដៅសរុប១០លាននាក់ និងចាក់បាន៨៩,៨១ភាគរយសម្រាប់កុមារ និងយុវវ័យអាយុចន្លោះពី១២ទៅក្រោម១៨ឆ្នាំ ក្នុងចំណោមគោលដៅសរុប១. ៩៦៦.៩៣១នាក់ ក៏ដូចជាកុមារអាយុចន្លោះពី៦ទៅក្រោម១២ឆ្នាំ ចាក់បាន៩៥,១៨ភាគរយ ធៀបនឹងគោលដៅចំនួន១.៨៩៧.៣៨២នាក់។
ប្រែសម្រួលពីអត្ថបទភាសាអង់គ្លេស៖ NSSF demands people show proof of vaccination before receiving social security card
