សមាគមសម្ព័ន្ធអ្នកសារព័ត៌មានកម្ពុជា

បុគ្គលិកស្រ្តីផ្នែកសេវាកម្សាន្តស្នើឱ្យមានប័ណ្ណ ប.ស.ស ដើម្បីទទួល​បានសេវាព្យាបាលដោយមិនគិតថ្លៃ

បុគ្គលិកដែលបម្រើការងារផ្នែកសេវាកម្សាន្ត ចូលរួមសិក្ខាសាលា បង្ហាញពីក្តីបារម្ភ និងបញ្ហាប្រឈមរបស់កម្មករ ដើម្បីចូលប្រើគម្រោងបេឡាជាតិរបបសន្តិសុខសង្គម។ រូបថតនៅថ្ងៃទី២៣ ខែកុម្ភៈ ឆ្នាំ២០២៣។ ខេមបូចា/ សុវណ្ណ ស្រីពេជ្រ
បុគ្គលិកដែលបម្រើការងារផ្នែកសេវាកម្សាន្ត ចូលរួមសិក្ខាសាលា បង្ហាញពីក្តីបារម្ភ និងបញ្ហាប្រឈមរបស់កម្មករ ដើម្បីចូលប្រើគម្រោងបេឡាជាតិរបបសន្តិសុខសង្គម។ រូបថតនៅថ្ងៃទី២៣ ខែកុម្ភៈ ឆ្នាំ២០២៣។ ខេមបូចា/ សុវណ្ណ ស្រីពេជ្រ

បុគ្គលិកស្រ្តីដែលបម្រើការងារនៅផ្នែកសេវាកម្សាន្ត និងចំណីអាហារ បានលើកឡើង​ពីក្ដី​បារម្ភ​អំពីសុខភាពរបស់ពួកគេ ខណៈអ្នកទាំងនោះមិនទាន់មានប័ណ្ណ ប.ស.ស សម្រាប់​ទទួលការ​ព្យាបាល​ជំងឺនៅពេលឈឺថ្កាត់ និងជំរុញរដ្ឋាភិបាលផ្ដល់កិច្ចគាំពារសង្គម​ទៅដល់ពួកគេ​ឱ្យ​កាន់​តែ​ប្រសើរឡើង។

បើ​តាម​អង្គការ​ពលកម្ម​អន្តរជាតិ​បាន​ឱ្យដឹង​ថា ប្រជាជន​កម្ពុជា​ភាគច្រើន ជាអ្នក​ធ្វើការ​ក្នុង​វិស័យសេដ្ឋកិច្ច​ក្រៅ​ប្រព័ន្ធ។ ហើយក្នុងនោះនិយោជកត្រូវបានតម្រូវឱ្យចូលរួមចំណែក​ផ្តល់អត្ថប្រយោជន៍ ប.ស.ស  ក្រោមច្បាប់ស្តីពីរបបសន្តិសុខសង្គមឆ្នាំ២០១៩។

ប៉ុន្តែរហូតមកដល់ពេលនេះ មានកម្មករ ដែលម្រើការងារក្នុងវិស័យសេដ្ឋកិច្ចក្រៅប្រព័ន្ធ​តិចតួចប៉ុណ្ណោះដែលអាចទទួលបានអត្ថប្រយោជន៍ពីបេឡាជាតិរបបសន្តិសុខសង្គម បើទោះជាជារឿយៗ ពួកគេមានការងារដោយខ្លួនឯងស្របច្បាប់​ដូចករណីអ្នករត់រ៉ឺម៉ក​កង់បីក៏ដោយ។

អនុប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា លោកស្រី អ៊ុំ ម៉ានិត បានថ្លែងថា បុគ្គលិកស្រ្តីដែលបម្រើការងារក្នុងផ្នែកសេវាកម្សាន្តភាគច្រើន មិនមានប័ណ្ណ​បេឡាជាតិរបបសន្តិសុខសង្គម (ប.ស.ស) ខណៈការងារដែលពួកគេបម្រើការងារ​ងាយ​ប្រឈម​នឹងហានិភ័យទាំងសុខភាព និងងាយរងនូវការបៀតបៀនរាងកាយ ធ្វើការលើសម៉ោង​កំណត់ ដោយខ្វះការយកចិត្តទុកដាក់ពីអាជ្ញាធររដ្ឋ។

លោកស្រី ម៉ានិត និយាយថា៖ «បងប្អូនដែលធ្វើការនៅក្នុងវិស័យសេវាកម្សាន្ត ដែលមាន​ថៅកែ ឬមួយក៏ម្ចាស់សហគ្រាសធំៗបានចុះបញ្ជីវាស្ថិតក្នុងប្រព័ន្ធហើយ ដោយសារតែវាមាន​ការខ្វះចន្លោះមួយចំនួន ធ្វើឱ្យពួកគាត់មិនទទួលបានការគំាពារ ឬចុះបញ្ជី ប.ស.ស ឱ្យបាន​គ្រប់ទេ»។

បុគ្គលិកដែលបម្រើការងារនៅក្នុងវិស័យក្រៅប្រព័ន្ធ ដូចជាផ្នែកកាស៊ីណូ ផ្នែកខារ៉ាអូខេ បៀហ្គាឌិន មិនមានប័ណ្ណ ប. ស.ស ឡើយ ដោយសារតែពួកគេមិនមានឯកសារគ្រប់គ្រាន់។ ទន្ទឹមនឹងនោះ ពួកគេមិនមានកិច្ចសន្យាការងារជាមួយនិយោជកឡើយ ដែលជាហេតុដែល​ពួកគេមិនទទួលបានអត្ថប្រយោជន៍ទៅតាមច្បាប់ការងារ។

អ្នកស្រីបន្តថា៖ «បញ្ហាដែលពួកគាត់មិនទទួលបានប័ណ្ណ បសស គឺពួកគាត់មិនមាន​អត្តសញ្ញាណប័ណ្ណ ឬមួយឯកសារណាដែលអាចចុះបញ្ជីបាន ដោយសារតែពួកគាត់មួយចំនួន​ចំណាកស្រុក»

បុគ្គលិកដែលបម្រើការងារផ្នែកសេវាកម្សាន្ត ពួកគេគ្មានប្រាក់ខែគោលឡើយ ពួកគេរក​ចំណូល​បានតាមរយៈលុយធីប ឬគេហៅថាលុយលើកទឹកចិត្តពីភ្ញៀវពេលបំពេញការងារ។​ ពួកគេរកប្រាក់ចំណូលបានតិច ឬច្រើន គឺអាស្រ័យលើការលក់ស្រាបៀរ ឬកំដរភ្ញៀវ​ហូប​គ្រឿងស្រវឹង។ កត្តានេះ ដែលធ្វើឱ្យពួកគេប្រឈមនឹងបញ្ហាសុខភាព ដោយសារតែការហូប​ស្រា​កំដរភ្ញៀវហួសប្រមាណ បូករួមទាំងការធ្វើការលើសម៉ោង និងមិនទទួលបាន​អត្ថប្រយោជន៍​ជាច្រើនទៀត។

លោកស្រី ម៉ានិត បញ្ជាក់ថា៖ «ពួកគេចូលម៉ោងមានកំណត់ តែចេញវាអត់កំណត់ គ្មានការ​ថែមលុយ​ឬក៏ទទួលបានប្រាក់កម្រៃអីទេ។ កម្មករមិនទទួលបានសិទ្ធិឈប់សម្រាក​លំហែ​មាតុភាព ឱកាសក្នុងការទទួលបានការគាំពារពីរដ្ឋក្នុងការឈប់សម្រាកលំហែមាតុភាព គឺ​សូន្យ​សម្រាប់យើង។ ហើយយើងមើលឃើញថាវិស័យសេវាកម្មកម្សាន្ត ស្រ្តី៩៩ភាគរយគាត់​ទៅ​បំពេញការងារនៅទីនោះ»។

លោកស្រី អ៊ុំ ម៉ានិត អនុប្រធានសហព័ន្ធសហជីពសហជីពកម្មករចំណីអាហារ និង​សេវាកម្មកម្ពុជា ថ្លែងអំពីបញ្ហាប្រឈមរបស់បុគ្គលិកផ្នែកសេវាកម្សាន្ត។ រូបថតនៅថ្ងៃទី២៣ ខែកុម្ភៈ ឆ្នាំ២០២៣។ ខេមបូចា/ សុវណ្ណ ស្រីពេជ្រ

អ្នកស្រី កញ្ចនា ជាអ្នកបម្រើការងារនៅផ្នែកសេវាកម្សាន្ត​នៅភោជនីយដ្ឋាន​មួយកន្លែង​ក្នុង​រាជធានីភ្នំពេញ បានឱ្យដឹងថា ទោះបីពេលខ្លះរូបគាត់មានជំងឺក្ដី ប៉ុន្តែគាត់សុខចិត្តទ្រាំ​មិន​ទៅឱ្យពេទ្យពិនិត្យដោយសារមិនមានថវិកាគ្រប់គ្រាន់ និងពេលខ្លះត្រូវខ្ចីលុយគេដើម្បី​ទៅ​ពិនិត្យជំងឺនៅពេលដែលវាធ្វើទុក្ខខ្លាំង ខណៈពួកគាត់មួយចំនួន​ធំក៏កំពុង​ជំពាក់ធនាគារផង​ដែរ។

អ្នកស្រីបន្តថា គោលបំណងដែលអ្នកស្រីចង់ទទួលបានប័ណ្ណ ប.ស.ស នោះគឺដើម្បីអាចជួយ​កាត់​បន្ថយការចំណាយនៅពេលដែលមានជំងឺ ដោយសារថាពួកគាត់ជាអ្នកដែល​ងាយ​ប្រឈម​នឹងជំងឺជាងគេ ព្រោះតែតម្រូវឱ្យមានការបរិភោគគ្រឿងស្រវឹងជារៀងរាល់ថ្ងៃ។

អ្នកស្រីឱ្យដឹងថា៖ «រាល់ថ្ងៃមិនមែនខ្ញុំអត់មានជំងឺឯណា! ពេលខ្លះខ្ញុំអត់មានលុយ​សុខចិត្តទ្រាំ ពេលខ្លះទៅយើងខ្ចីលុយគេទៅពេទ្យសិន ដោយសារយើងឈឺខ្លាំងគឺយើងត្រូវតែ​រត់ទៅ​រក​ពេទ្យ។ ឥឡូវកំពុងឈឺក្រពះខ្លាំង ៣-៤ថ្ងៃហ្នឹង មិនទាន់បានរកថ្នាំរកអីផង ណាមួយ​បើមាន​ប័ណ្ណ ប.ស.ស ពេលទៅពេទ្យទៅថតមើលអី វាមិនអស់លុយហើយបានដឹងគ្រឿងក្នុង​យើង​សព្វគ្រប់ទៀត»។

ការចងក្រងជាសហជីពនៅក្នុងវិស័យសេវាកម្សាន្ត គឺជាឧបស្គគមួយសម្រាប់​អ្នកបម្រើ​ការងារ​ក្នុងវិស័យនេះ ដោយការចុះបញ្ជីការមិនបានសម្រេច និងមានការរើសអើងពីសំណាក់ថៅកែ។ នេះបើតាមការលើកឡើងរបស់លោកស្រី ម៉ានិត។

លោកស្រី កញ្ចនា លើកឡើងថា៖ «ច្បាប់សហជីពក៏ជាឧបស្គគដែរ ពេលដែលបងប្អូនបង្កើត​សហជីពនៅកន្លែងធ្វើការពិបាកចុះបញ្ជីណាស់ ពេលដែលដល់អាណត្តិមាន​លក្ខណៈសាំញាំ​សម្រាប់ពួកយើង។ ហើយការជួបប្រជុំផ្សេងៗក៏មានការរើសអើងដែរ អាជ្ញាធរតែងមកសួរនាំ​យើង ជីកឬសជីកគល់ ថាយើងជាអ្នកឃោសនាបក្សនយោបាយ»។​

អ្នកស្រី កញ្ចនា បានបន្តទៀតថា ដោយសារតែកាលពីមុនអ្នកស្រីមិនសូវយល់ច្បាស់​ពី​សិទ្ធិ​ទទួលបានប័ណ្ណ ប.ស.ស នេះ និងគិតថាអ្នកដែលទទួលបានគឺមានតែកម្មកររោងចក្រ​តែ​ប៉ុណ្ណោះ។ ដូច្នេះហើយនៅពេលដែលគាត់បានយល់ពីសិទ្ធិក្នុងការដែលអាចទទួលបាន ទើបពួកគាត់ស្នើឱ្យមានការផ្ដល់ប័ណ្ណនេះជូនពួកគាត់ឱ្យបានក្នុងពេលកំណត់ណាមួយ។

អ្នកស្រីបន្ថែមថា៖ «មិនមែនថាយើងអត់ដឹងនោះទេ តែមកពីថាយើងអត់មានអ្នកពន្យល់អ្នក​អីអ៊ីចឹង វាអត់ដឹងថាប័ណ្ណ ប.ស.ស ហ្នឹង! ព្រោះដំបូងស្មានតែគេធ្វើដើម្បីតែពួករោងចក្រទេ។ ហើយខ្ញុំអត់ដឹងថាខាងពួកខ្ញុំហ្នឹងអាចថាស្នើទៅគេ គេធ្វើឱ្យដែរ ទើបតែពេលដឹងមួយរយៈ​កន្លងមក ឆ្នាំមុននេះឯង»

ក្រោមច្បាប់ស្តីពីរបបសន្តិសុខសង្គមឆ្នាំ២០១៩ បានចែងថា កម្មករតាមផ្ទះ និងនិយោជក ត្រូវតែរួមវិភាគទានរួមគ្នាដល់គម្រោងអត្ថប្រយោជន៍សោធននិវត្តន៍ និងការថែទាំសុខភាព ខណៈដែលនិយោជកត្រូវតែរ៉ាប់រងការរួមចំណែកសម្រាប់ហានិភ័យការងារ ឬគ្រោះថ្នាក់ ការធានារ៉ាប់រង

បុគ្គលិកដែលបម្រើការងារផ្នែកសេវាកម្សាន្ត ចូលរួមសិក្ខាសាលា បង្ហាញពីក្តីបារម្ភ និងបញ្ហាប្រឈមរបស់កម្មករ ដើម្បីចូលប្រើគម្រោងបេឡាជាតិរបបសន្តិសុខសង្គម។ រូបថតនៅថ្ងៃទី២៣ ខែកុម្ភៈ ឆ្នាំ២០២៣។ ខេមបូចា/ សុវណ្ណ ស្រីពេជ្រ

លោក សេន រ៉េ ជាបុគ្គលិកបម្រើការផ្នែកសេវាកម្សាន្ត​បានលើកឡើងថា លោកធ្វើការក្នុង​វិស័យ​សេវាកម្សាន្ត មិនដែលមានប័ណ្ណ ប.ស.ស ទេ ហើយលោកចាត់ទុកថាប័ណ្ណនេះ មានសារៈសំខាន់ណាស់សម្រាប់រូបលោក ក៏ដូចជាបុគ្គលិកដទៃទៀត។

លោករ៉េ និយាយថា៖ «ប័ណ្ណ ប.ស.ស ហ្នឹងខ្ញុំឮយូរហើយតែអ្នកខ្លះមានអ្នកខ្លះអត់មាន តែ​សម្រាប់​ខ្ញុំអត់មានទេ។ ពួកខ្ញុំក៏ចង់បានដែរ ពេលយើងឈឺថ្កាត់អត់មានលុយទៅ ចឹងប័ណ្ណ បសស ហ្នឹងសំខាន់សម្រាប់ពួកខ្ញុំធ្វើការសេវាកម្សាន្ត ពិនិត្យសុខភាពអត់អស់លុយ យើងផឹកគ្រឿងស្រវឹងយូរខែ ចឹងចង់បានប័ណ្ណ បសស​ ហ្នឹង»។

លោក រ៉េ ប្រាប់ទៀតថា ប្រកបអាជីពជាអ្នកធ្វើការផ្នែកសេវាកម្សាន្ត គឺពិបាក និងប្រឈម​នឹងបញ្ហាសុខភាព ពិសេសបញ្ហាជំងឺក្រពះ ដោយសារតែត្រូវហូបស្រាកំដរភ្ញៀវ ដែលជារឿង​ខានមិនបាន។

លោក រ៉េ បញ្ជាក់ថា៖ «ពិបាកដែរ អាជីពយើងខាងហ្នឹង បើយើងមានលុយច្រើន​យើង​ឈប់​ធ្វើការងារហ្នឹងក៏បានដែរ តែឥឡូវយើងអត់លុយ បើអត់ហូបជាមួយភ្ញៀវយើងអត់បាន​លុយ​ធីប ណាមួយតម្រូវតាមក្រុមហ៊ុនដែរយើងចូលលេងជាមួយភ្ញៀវ ផឹកលេងជាមួយភ្ញៀវទៅ ដើម្បីដាច់ប៊ីយែរច្រើន អស់ម្ហូបច្រើន ដើម្បីបានលុយចូលក្រុមហ៊ុន»។​

លោកស្រី សំ សោភ័ណ អនុប្រធាននាយកដ្ឋានការពារផ្លូវច្បាប់  ក្រសួងកិច្ចការនារី មាន​ប្រសាសន៍​ថា ទាក់ទងនឹងបញ្ហារបស់បុគ្គលិកផ្នែកសេវាកម្សាន្ត ខាងក្រសួងកិច្ចការនារី​តែងតែបានយកចិត្តទុកដាក់ និងធ្វើកិច្ចការងារក្នុងការគាំពារមកលើស្រ្តីជាយូរមកហើយ។

លោកស្រី សោភ័ណ និយាយថា៖ «ក្រសួងធ្វើការងារហ្នឹងយូរមកហើយ តាំងពីសម្ដេចនាយក​ឱ្យ​មេធាវីមកខាងគណៈមេធាវីមកខាងក្រុមប្រឹក្សាកម្ពុជាដើម្បីស្រ្តី និងក្រសួងកិច្ចការនារី​សម្រាប់​ការពារដល់ជនក្រីក្រ»។​

គណបក្សកាន់អំណាចទើបតែបានប្រកាសចេញនូវ គោលនយោបាយរបស់ខ្លួន ដោយគាំទ្រ​ដល់កម្មករនិយោជិត ដែលធ្វើការក្នុងវិស័យសេដ្ឋកិច្ចក្រៅប្រព័ន្ធ ដោយសន្យាថានឹងផ្តល់ឱ្យ​ពួកគេ​នូវអត្ថប្រយោជន៍សន្តិសុខសង្គម ក្នុងអំឡុងពេលសមាជវិសាមញ្ញ​របស់​គណបក្ស​កាល​ពីចុងខែមករា ឆ្នាំ២០២៣នេះ។

យ៉ាងណាមិញ រដ្ឋាភិបាល​បាន​អនុវត្ត​គម្រោង​សាកល្បង​មួយ​រួច​ហើយ​ដើម្បី​ផ្តល់​អត្ថប្រយោជន៍​ប.ស.ស ដល់​អ្នក​បើក​រ៉ឺម៉ក​កង់​បី​ចំនួន ២​ ០៥០នាក់ ដែល​ជា​សមាជិក IDEA និង​កម្មករ​តាម​ផ្ទះ ៣០០នាក់​មកពី​សមាគម​កម្មករ​តាម​ផ្ទះ(ADW)។

អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ ថា ចំពោះ​កិច្ច​គាំពារ​សម្រាប់អ្នកដែលធ្វើការក្នុងវិស័យសេវាកម្សាន្ត រដ្ឋាភិបាលបានកំពុងចាប់ផ្ដើម​រៀបចំ​ជាបណ្ដើរៗ ដោយនឹងអនុវត្តហើយដាក់ឱ្យដំណើរការជាផ្លូវការ​នៅក្នុងរដ្ឋាភិបាល​នីតិកាល​ទី៧ខាងមុខនេះ។

លោក ឥសាន ថ្លែងថា៖ «យើងចាប់ផ្ដើមពីថ្ងៃដែលយើងប្រកាសផ្សាយហ្នឹងហើយ! យើង​ចាប់ផ្ដើម​ហើយ ហើយ ជាពិសេសដំណើរការគិតចាប់ពីរដ្ឋាភិបាល​នីតិកាលទី៧​ពីព្រោះ​អាហ្នឹងវាជាកម្មវិធីនយោបាយយើងទើបតែដាក់ចេញនោះណា។ ក៏ប៉ុន្តែយើងដំណើរ​ការ​រៀបចំបណ្ដើរៗហើយយន្តការហ្នឹង!»។

បើតាមរបាយការណ៍របស់ក្រសួងទេសចរណ៍ នៅក្នុងប្រទេសកម្ពុជា មានមណ្ឌលកម្សាន្ត​ចំនួន ១ ២៩៣កន្លែងទូទាំងប្រទេស ក្នុងនោះមានខារ៉ាអូខេ(KTV) ចំនួន ១ ០៨៤កន្លែង ក្លិបឌីស្កូ ចំនួន១០៩កន្លែង រង្គក្រសាលចំនួន ១៦កន្លែង អាជីវកម្មបៀរហ្គាឌិន ចំនួន ៨៤កន្លែង ដែលផ្ដល់ការងារសម្រាប់ពលរដ្ឋកម្ពុជានៅក្នុងវិស័យសេវាកម្សាន្តនៅកម្ពុជា គិតត្រឹមខែមីនា ឆ្នាំ២០២០៕

583 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម