ស្ត្រីបម្រើការងារក្នុងវិស័យសេវាកម្សាន្តក្នុងប្រទេសកម្ពុជាបានលើកឡើងអំពីការរើសអើង លក្ខខណ្ឌការងារមិនសុវត្ថិភាព ការមិនផ្ដល់សិទ្ធិសម្រាកលំហែមាតុភាព និងរបបសន្តិសុខសង្គមជាដើម។ ពួកគេនិយាយថា គម្លាត និងការអនុវត្តច្បាប់ខ្សោយបានធ្វើឱ្យពួកគេប្រឈមនឹងការរំលោភបំពាន ខណៈពេលដែលរដ្ឋាភិបាលបញ្ជាក់ថាមិនមានការប្តឹងផ្តល់ជាផ្លូវការឡើយ។
កាលពីសប្តាហ៍មុន អង្គការអាក់សិនអេតកម្ពុជា(ActionAid Cambodia) បានចេញផ្សាយធម្មនុញ្ញនៃការទាមទាររបស់ស្ត្រីដែលធ្វើការនៅក្នុងវិស័យសេវាកម្សាន្តមិនថានៅតាមហាងលក់ស្រាបៀរ ហាងខារ៉ាអូខេ និងក្លឹបរាត្រី។ ក្រុមយុត្តិធម៌ពិភពលោក បានស្រង់បញ្ជីបន្ទាប់ពីការស្ទង់មតិ និងការពិភាក្សាជាក្រុមជាមួយកម្មការិនីជាង១០០នាក់ ធ្វើការនៅទីប្រជុំជនចន្លោះពីឆ្នាំ ២០២១ ដល់ ២០២៤ ។
ធម្មនុញ្ញនេះ បានរកឃើញថា កម្មការិនីជាច្រើននៅតែមិនអាចទទួលបានអត្ថប្រយោជន៍ជាមូលដ្ឋានពីនិយោជក ដែលធានាដោយច្បាប់ការងាររបស់កម្ពុជា។
ស្ត្រីជាច្រើនក៏បានរាយការណ៍ដែរថា ពួកគេកំពុងប្រឈមមុខនឹងការរើសអើង ដូចជាការតម្រូវឱ្យធ្វើតេស្តទឹកនោមជាទៀងទាត់ ដើម្បីពិនិត្យរកមើលការមានផ្ទៃពោះ។
សេចក្តីប្រកាសបានសរសេរថា៖ «នេះគឺជាការរើសអើងចំពោះស្ត្រីមានផ្ទៃពោះ ហើយប្រសិនបើកម្មករស្ត្រីចង់មានកូននោះ គាត់ត្រូវបង្ខំចិត្តឈប់ពីការងារ»។
ប្រភពដដែលក៏បានបញ្ចូលនូវការទាមទារឱ្យមានការការពារប្រឆាំងនឹងអំពើហិង្សាលើយេនឌ័រពីសំណាក់អតិថិជន និងអ្នកគ្រប់គ្រង ការតម្រូវឱ្យនិយោជកចុះឈ្មោះជាមួយបេឡាជាតិរបបសន្តិសុខសង្គម(ប.ស.ស) ផ្ដល់ប្រាក់បៀវត្សរ៍ថេរ និងទៀងទាត់ ហើយជាពិសេសគឺបញ្ឈប់ការដាក់សម្ពាធឱ្យបរិភោគស្រាដើម្បីសម្រេចគោលដៅលក់។
អ្នកនាង ភិន ស្រីនាថ តំណាងឱ្យស្ត្រីដែលបម្រើការងារក្នុងវិស័យនេះក្នុងរាជធានីភ្នំពេញ បានជំរុញឱ្យក្រសួងការងារធ្វើអធិការកិច្ចជាប្រចាំ ដើម្បីធានាលក្ខខណ្ឌការងារត្រឹមត្រូវ។
ជាមួយគ្នានេះដែរ ប្រធានសហព័ន្ធសហជីពកម្ពុជា លោកស្រី យ៉ាង សុភ័ណ្ឌ មានប្រសាសន៍ថា៖ «រដ្ឋាភិបាលជាអ្នកគ្រប់គ្រងលើច្បាប់ ដូច្នេះរដ្ឋាភិបាលត្រូវតែមើលទៅលើការអនុវត្តរបស់និយោជក ហើយនៅពេលដែលឃើញថាមិនមានការអនុវត្តត្រឹមត្រូវ រដ្ឋាភិបាលត្រូវជំរុញឱ្យនិយោជកផ្នែកសេវាកម្សាន្តត្រូវចូលមកដោះស្រាយ»។
លោកស្រី សុភ័ណ្ឌ បានបន្ថែមថា កង្វះនិយមន័យផ្លូវច្បាប់ច្បាស់លាស់សម្រាប់តួនាទីផ្លូវការ និងក្រៅផ្លូវការក្នុងវិស័យសេវាកម្សាន្តបានរារាំងកម្មការិនីពីការទទួលបានការការពារសង្គម រួមទាំងអត្ថប្រយោជន៍បេឡាជាតិរបបសន្តិសុខសង្គមផងដែរ។
គិតត្រឹមពេលនេះ ប.ស.ស.បានចេញបណ្ណសមធម៌សុខភាពដល់អាជីវកម្មកម្សាន្តចំនួន ៥០៧កន្លែង ដែលគ្របដណ្តប់កម្មករចំនួន ៣ ៤១៨នាក់ នេះបើតាមការលើកឡើងរបស់អគ្គនាយករងបេឡាជាតិរបបសន្តិសុខសង្គម លោក ហេង សុផាន់ណារិទ្ធ ។
ប៉ុន្តែរបាយការណ៍ឆ្នាំ ២០២០ របស់ក្រសួងទេសចរណ៍បាននិយាយថា យ៉ាងហោចណាស់អាជីវកម្មសេវាកម្សាន្តចំនួន ១ ២៩៣ បានកំពុងដំណើរការនៅទូទាំងប្រទេស។
អ្នកនាំពាក្យក្រសួងការងារ លោក ស៊ុន មេសា មានប្រសាសន៍ថា រដ្ឋាភិបាលមិនព្រងើយកន្តើយចំពោះការរំលោភបំពានរបស់និយោជកទេ ប៉ុន្តែអះអាងថា មិនមានពាក្យបណ្តឹងផ្លូវការណាមួយត្រូវបានប្តឹងដោយកម្មករនិយោជិតបម្រើការក្នុងវិស័យសេវាកម្សាន្ត ដែលទាមទារឱ្យចាត់វិធានការលើបញ្ហាជាប្រព័ន្ធនេះ។
លោកថ្លែងថា៖ «ប្រសិនបើកម្មករជួបប្រទះនឹងបញ្ហា សូមកម្មករប្តឹងមកក្រសួងការងារ ហើយក្រសួងនឹងចាត់វិធានការត្រួតពិនិត្យ និងអង្កេតទៅលើកិច្ចការងារទាំងអស់នេះ»។
យ៉ាងណាមិញ ថ្នាក់ដឹកនាំក្នុងវិស័យការងារនិយាយថា កម្មករបានបង្ហាញនូវកង្វល់របស់ពួកគេច្បាស់លាស់រួចហើយ គ្រាន់តែមិនបានធ្វើឡើងតាមរបៀបវារៈផ្លូវការរបស់ក្រសួងប៉ុណ្ណោះ។
ត្រឡប់មក លោកស្រី សុភ័ណ្ឌ ក៏បានឱ្យដឹងដែរថា ស្រ្តីដែលបម្រើការងារក្នុងវិស័យនេះ បានលើកឡើងម្តងហើយម្តងទៀតតាមរយៈព្រឹត្តិការណ៍សាធារណៈដូចជា ទិវានារីអន្តរជាតិ ទិវាពលកម្មអន្តរជាតិ និងទិវាសិទ្ធិមនុស្ស។
លោកស្រីបន្តថា៖ «រាល់ពេលដែលយើងធ្វើកម្មវិធីទាំងអស់ហ្នឹង យើងតែងតែដាក់នូវបញ្ហាអាទិភាពរបស់កម្មករផ្នែកសេវាកម្សាន្ត។ តែបន្ទាប់មកមិនមានការឆ្លើយតបពីក្រសួងជាវិជ្ជមានណាមួយទេ»៕
ប្រែសម្រួលពីអត្ថបទភាសាអង់គ្លេស៖ Women Entertainment Workers Demand Labor Protections, End to Abuse
