សមាគមសម្ព័ន្ធអ្នកសារព័ត៌មានកម្ពុជា

ក្តីសង្ឃឹមរបស់គណបក្សប្រឆាំងក្នុងការបោះឆ្នោតជាតិឆ្នាំ២០២៣ អាស្រ័យលើកំណែទម្រង់ប្រព័ន្ធបោះឆ្នោត

លោក យ៉េង វីរៈ ប្រធានគណបក្សប្រជាធិបតេយ្យមូលដ្ឋានបង្ហាញមុខនៅក្រៅសាលាដំបូងរាជធានីភ្នំពេញកាលពីថ្ងៃទី១៥ ខែកក្កដា ឆ្នាំ២០២២ ដើម្បីគាំទ្រលោក សុន ឆ័យ ដែលកំពុងតតាំងនឹងបណ្តឹងបរិហារកេរ្តិ៍។ខេមបូចា / ស៊ន សារ៉ាត
លោក យ៉េង វីរៈ ប្រធានគណបក្សប្រជាធិបតេយ្យមូលដ្ឋានបង្ហាញមុខនៅក្រៅសាលាដំបូងរាជធានីភ្នំពេញកាលពីថ្ងៃទី១៥ ខែកក្កដា ឆ្នាំ២០២២ ដើម្បីគាំទ្រលោក សុន ឆ័យ ដែលកំពុងតតាំងនឹងបណ្តឹងបរិហារកេរ្តិ៍។ខេមបូចា / ស៊ន សារ៉ាត

សម្ព័ន្ធភាព​ដែលមានគណបក្សប្រឆាំងចំនួន​ប្រាំពីរបានទទូច​ឲ្យ​​រដ្ឋាភិបាល​​ធ្វើកំណែទម្រង់ការបោះឆ្នោត​ទ្រង់ទ្រាយធំ បើមិនដូច្នេះទេ​អាចនឹង​បាត់​បង់​ទំនុកចិត្តសម្រាប់​ការបោះឆ្នោតជាតិ​នៅឆ្នាំក្រោយ​។

ក្រុមបក្សប្រឆាំងទាំងនោះ​​បាន​លើកឡើងនូវបញ្ហា​មួយចំនួននៅក្នុងការបោះឆ្នោត​ឃុំសង្កាត់​កាលពីខែមិថុនា ដែលរួមមាន​​ការ​បំ​ភិតបំភ័យ ​និង​ការ​យាយី​តាម​ផ្លូវ​ច្បាប់​ជា​ដើម ហើយ​បារម្ភថា បរិយា​កាសនយោបាយដែល​អាប់អ៊ួរនេះ ​នឹង​កាន់តែអាក្រក់ជាងនេះ បើ​គ្មានការ​កែប្រែ​ដ៏គួរឲ្យ​កត់សម្គាល់នោះទេ។

សេចក្តីថ្លែងការណ៍នេះ​ធ្វើ​ឡើង ខណៈអនុប្រធាន​គណបក្ស​ប្រឆាំងធំបំផុត​នៅកម្ពុជា ​កំពុងតតាំង​បណ្តឹងពាក់ព័ន្ធនឹងការបោះឆ្នោតចំនួនពីរ។ លោក សុន ឆ័យ អនុ​ប្រធានគណបក្ស​ភ្លើងទៀន​ត្រូវ​បានគណៈកម្មាធិការជាតិ​រៀបចំការ​បោះឆ្នោត​ និងគណបក្សប្រជាជនកម្ពុជា​ប្តឹង​ ដោយ​ចោទ​​ប្រកាន់​លោក​ថា បានបរិហាកេរ្តិ៍​ បន្ទាប់ពីលោក​បាន​លើក​ឡើង​​អំពី​ភាព​ត្រឹម​ត្រូវ​នៃការ​រាប់​សន្លឹក​ឆ្នោត​។

លោក យ៉េង វីរៈ ប្រធាន​គណបក្ស​ប្រជាធិបតេយ្យ​មូលដ្ឋាន​ ដែល​បាន​បង្ហាញមុខ​នៅ​ក្រៅ​សាលាដំបូងរាជធានីភ្នំពេញ​កាល​ពីថ្ងៃសុក្រ​ ដើម្បី​គាំទ្រ​លោក សុន ឆ័យ​ មាន​ប្រសាសន៍ថា៖ «បណ្តឹងព្រហ្មទណ្ឌពាក់ព័ន្ធនឹងការ​បោះឆ្នោត​គឺជាការវិវឌ្ឍ​មួយ​​​មិនល្អ ​។ ប្រទេសកម្ពុជា​កំពុង​ប្រឈម​នឹង​វិបត្តិនយោបាយ​រួច​ហើយ​។ យើង​មិន​ចង់​ឃើញ​វាកាន់តែអាក្រក់ជាងនេះទៀតនោះទេ»

គណបក្ស​ទាំង​នេះ​បាន​ទាមទារឲ្យមាន​​វិធានការ​មួយចំនួន​សំដៅ​ធានាឲ្យមាន​ការ​​បោះឆ្នោតមួយត្រឹមត្រូវ​ជាងនេះ រួម​ទាំង​ការ​បញ្ចប់​ការគំរាមកំហែង ការ​បំភិត​បំភ័យ និងការ​បើកឡើងវិញនូវ​លំហ​នយោបាយ ​និង​សង្គមស៊ីវិល។​

វិធានការ​នេះក៏តម្រូវ​ឲ្យមានការ​ធានាអព្យាក្រិត្យភាព​របស់​​គណៈកម្មាធិការជាតិរៀបចំការ​បោះឆ្នោត តម្លាភាពក្នុង​ការ​រាប់សន្លឹកឆ្នោត​ និងធ្វើ​ឲ្យប្រសើរ​នូវ​​បទបញ្ញត្តិ​ទាក់ទិន​នឹង​ការ​រាប់សន្លឹឆ្នោត​ឡើងវិញ។​

លោក គង់​ មូនីកា ប្រធាន​គណបក្ស​ឆន្ទៈខ្មែរ​ បាន​ការ​ពារ​ការអត្ថាធិប្បាយ​ ​ដែលបាន​ធ្វើ​ឲ្យ​លោក សុន ឆ័យ និង​ទទូច​ឲ្យ​​​បញ្ឈប់ការ​បំបិទមាត់​ផ្នែកនយោបាយ​ ដែល​ត្រូវ​បាន​ការពារដោយ​រដ្ឋធម្មនុញ្ញ។​​​

លោក​ថ្លែង​ថា៖ «​វាគឺជា​រូបភាព​នៃការ​រឹតត្បិតលើសេរីភាព​នៃការ​បញ្ចេញ​មតិ​។ បណ្តឹងរបស់​គ.ជ.ប​ ប្រឆាំង​នឹង​អ្នក​នយោបាយ​មិន​គួរ​កើត​មាន​ទេ ពីព្រោះ​គ.ជ.ប គឺជា​ស្ថាប័ន​ឯករាជ្យ​។ វាបង្ហាញនូវរូប​ភាព​អាក្រក់​សម្រាប់ការ​បោះឆ្នោត​ និង​លទ្ធិប្រជាធិបតេយ្យ​នៅ​កម្ពុជា»

លោក អ៊ូ ច័ន្ទ​រ័ត្ន ​អនុប្រធាន​គណបក្ស​កែទម្រង់កម្ពុជា​បាន​ព្រមានថា ករណីបណ្តឹងទាំងពីរ​មក​លើ​លោក សុន ឆ័យ មាន​ផល​ប៉ះពាល់​ខ្លាំង​ចំពោះ​សេរីភាព​នៃការ​បញ្ចេញមតិ។​​

លោកបន្ត​ថា៖ «ការរឹតត្បិតលើសេរីភាពនៃការបញ្ចេញមតិ​នឹងមាន​ផលប៉ះពាល់យ៉ាងខ្លាំងលើការ​បោះឆ្នោត​នៅឆ្នាំក្រោយ ខណៈអ្នក​នយោបាយ ​និង​សកម្មជន​នយោបាយ​ជួប​ការ​លំបាក​ក្នុងការ​រិះគន់​ គ.ជ.ប និងគណបក្ស​កាន់អំណាច»។

លោក សុន ឆ័យ អនុប្រធាន​គណបក្សភ្លើងទៀន​លើកដៃជាសញ្ញា​ទៅកាន់អ្នក​យក​ព័ត៌មាន​ និង​អ្នក​គាំទ្រ​ ខណៈលោក​មក​ដល់​សាលាដំបូង​រាជធានីភ្នំពេញ​សម្រាប់ការ​សាកសួរ​កាលពីថ្ងៃទី​១២ ខែកក្កដា ឆ្នាំ​២០២២។ ខេមបូចា / ព្រីង សំរាំង​

បន្ទាប់ពី​តុលាការ​សាកសួរ​អស់រយៈ​ពេល​បី​ម៉ោង លោក សុន ឆ័យ បានមាន​ប្រសាសន៍ថា លោក​ស្នើ​ឲ្យ​តុលាការ​ច្រាន​ចោល​បណ្តឹង​នេះ។

លោក​ថ្លែង​ថា៖ «វាគឺជា​បណ្តឹងដែល​មិនចាំបាច់​និងគ្មាន​ប្រយោជន៍ទាល់តែសោះ​។ មតិរបស់ខ្ញុំ​អំពី​ការ​បោះ​ឆ្នោត គឺផ្អែក​លើភស្តុតាង។​ យើងទទួល​បាន​ព័ត៌មាន​ពី​សកម្មជន​របស់យើង​នៅ​តាម​ខេត្ត​ដែល​បាន​និយាយថា សកម្មជន​យើង​នៅ​មូលដ្ឋានត្រូវ​បានបំភិតបំភ័យ»។​

លោក សុន ឆ័យ​ មិន​មែនជា​មនុស្ស​តែ​ម្នាក់​គត់​ដែល​លើកឡើងពីភាព​មិន​ប្រក្រតី​ក្នុងការបោះឆ្នោតនោះទេ។ លោក​បាន​មាន​ប្រសាសន៍ថា គណបក្ស​ផ្សេងទៀត ​​និងក្រុម​សង្គមស៊ីវិលក៏​បាន​បង្ហាញ​ការ​បារម្ភ​ស្រដៀងគ្នា​នេះដែរ​។ ទោះ​បីជា​​​យ៉ាង​ណា​មាន​តែ​លោកសុន ឆ័យ ​ម្នាក់​ប៉ុណ្ណោះ​ដែលត្រូវបាន​ប្តឹង។​

លោកបានបន្ត​ថា៖ «នៅពេល​គេនិយាយដល់​ការលួចបន្លំសន្លឹកឆ្នោត យើង​មាន​របាយ​ការណ៍ពីការបិទទ្វារ​នៃការិយាល័យរាប់សន្លឹកឆ្នោត​ ទីដែល​យើងមិន​អាចឃ្លាំមើលការរាប់សន្លឹកឆ្នោត​។ យើងចង់​ដឹងពីគោលបំណងនេះ​ ហើយ​ប្រសិនបើគ្មាន​ការ​ពន្យល់ច្បាស់លាស់ ពិតណាស់វាជាការ​ប្រព្រឹត្តការលួចបន្លំសន្លឹកឆ្នោត»។

លោក សុខ ឥសាន​ ​អ្នក​នាំពាក្យ​គណបក្ស​ប្រជាជនកម្ពុជា​បាន​បដិសេធ​ថា គ្មាន​ការ​ធ្វើ​ទុក្ខបុកម្និញគូប្រជែង​តាម​រយៈបណ្តឹងនោះទេ ដោយ​លោក​អះអាងថា គណបក្ស​ប្រជាជន​ប្តឹងតែអ្នក​ល្មើសច្បាប់តែប៉ុណ្ណោះ។

លោក​ថ្លែង​ថា៖ «បើ​ពួកគេចង់​ឲ្យ​ឈប់មាន​បណ្តឹង ពួកគេត្រូវ​តែ​ឈប់​បំពាន​ច្បាប់​។ គ្មាន​សេរីភាពក្នុងការបរិហារកេរ្តិ៍អ្នក​ដទៃទេ ហើយក៏​គ្មាន​ច្បាប់ណា​ហាមឃាត់មិនឲ្យ​ប្តឹងដែរ។ វាគឺជាសិទ្ធិរបស់យើង​ សេចក្តី​ថ្លៃថ្នូររបស់​យើង »

501 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម