កម្មវិធីទូរសព្ទដៃ រឺApp ដែលមានឈ្មោះថា «មតិយើង» ត្រូវបានក្រសួងមហាផ្ទៃ និងសង្គមស៊ីវិលដាក់ឱ្យប្រើប្រាស់ជាផ្លូវការដើម្បីឱ្យប្រជាពលរដ្ឋទូទាំងប្រទេសដាក់ពាក្យបណ្ដឹង ឬរិះគន់ពីភាពខ្វះខាតរឺអសកម្មណាមួយអំពីសេវាសាធារណៈនៅថ្នាក់ក្រោមជាតិដោយរក្សាការសម្ងាត់។
កម្មវិធីទូរសព្ទ«មតិយើង» ជាឧបករណ៍ថ្មីមួយសម្រាប់ប្រជាពលរដ្ឋដើម្បីផ្តល់ព័ត៌មានត្រឡប់ រួមទាំងការដាក់ពាក្យបណ្ដឹងអំពីសេវាសាធារណៈនៅថ្នាក់ក្រោមជាតិក្នុងប្រទេសកម្ពុជា ដោយ បានដាក់ឱ្យប្រើប្រាស់ជាផ្លូវការនៅថ្ងៃទី២៨ ខែកក្កដា ក្រោមការសហការផលិតដោយក្រសួងមហាផ្ទៃ អង្គការតម្លាភាពកម្ពុជា និងអង្គការអាក់សិនអេតកម្ពុជា ។
លោក ងី ចន្រ្ទ័ផល រដ្ឋលេខាធិការក្រសួងមហាផ្ទៃ បានមានប្រសាសន៍ថា ក្រៅតែកម្មវិធីទូរសព្ទដៃ ក្រសួងបានបង្កើតការិយាល័យប្រជាពលរដ្ឋបន្ថែមលើច្រកចេញចូលតែមួយ។ ការិយាល័យប្រជាពលរដ្ឋនឹងមានការបោះឆ្នោតជ្រើសរើសថ្នាក់ដឹកនាំមួយរូប ដើម្បីទទួលបញ្ហា ឬពាក្យបណ្ដឹងរបស់ពលរដ្ឋជុំវិញការមិនពេញចិត្តនូវសេវាសាធារណៈអាចប្រាប់ទៅកាន់ការិយាល័យប្រជាពលរដ្ឋបាន។
លោកបន្តថា មកដល់ពេលនេះនៅសល់តែ៨០ក្រុងស្រុកប៉ុណ្ណោះ ដែលមិនទាន់បោះឆ្នោតជ្រើសរើសប្រធានការិយាល័យប្រជាពលរដ្ឋនៅតាមមូលដ្ឋាន ដើម្បីទទូលបណ្ដឹងពលរដ្ឋ។ ខណៈ បច្ចុប្បន្នមានអគ្គនាយកដ្ឋានរដ្ឋបាលនៃក្រសួងមហាផ្ទៃ នាយកដ្ឋានកិច្ចការរាជធានីខេត្ត និងនាយកដ្ឋានសុចរិតភាពនិងអភិបាលកិច្ចដែលជាយន្តការសម្រាប់ដោះស្រាយបញ្ហាសេវាសាធារណៈថ្នាក់ក្រោមជាតិឱ្យកាន់តែល្អប្រសើរថែមទៀត។
លោក ច័ន្ទ្រផល ថ្លែងថា៖ «ជាយន្តការមួយដែលធានាឱ្យប្រជាពលរដ្ឋអាចមកទទួលសេវាបានលឿន មិនចាំបាច់រត់ពីមួយទៅមួយ ពីមុនគាត់រត់ពីមួយទៅមួយទម្រាំតែបានវាយូរ ឥឡូវគាត់មកតែមួយកន្លែងគឺបានហ្មង៎»។
លោក ច័ន្រ្ទផល បញ្ជាក់ថា ប្រសិនបើកម្មវិធីទូរសព្ទដៃនេះដំណើការទៅរលូន ក្រសួងនឹងធ្វើសមហរកម្មបញ្ច្រៀបទៅកាន់រដ្ឋបាលសាធារណៈ ហើយការគាំទ្រពីដៃគូសង្គមស៊ីវិល នឹងក្លាយទៅជាការងាររបស់រដ្ឋបាលថ្នាក់ក្រោមជាតិ ឬរបស់រដ្ឋាភិបាល ព្រោះកិច្ចការនេះគឺជាកំណែទម្រង់របស់រដ្ឋាភិបាល។
យ៉ាងណាមិញ លោក ច័ន្រ្ទផល អះអាងថា កម្មវិធីទូរសព្ទ «មតិយើង» នឹងរក្សាការសម្ងាត់ជូនអ្នករាយការណ៍ពីបញ្ហាដែលមានក្នុងមូលដ្ឋាន ដោយមិនបញ្ចេញអត្តសញ្ញាណពលរដ្ឋឡើយ។
គិតត្រឹមដើមឆ្នាំ២០២២ កំណែចុងក្រោយនៃកម្មវិធីទូរសព្ទដៃ «មតិយើង» ត្រូវបានផលិតឡើង និងដាក់ឱ្យប្រើប្រាស់សាកល្បងដោយជោគជ័យនៅតាមរដ្ឋបាលថ្នាក់ក្រោមជាតិក្នុងតំបន់គោលដៅនៃគម្រោង នៃប្រទេសកម្ពុជា រួមមាន អង្គភាពច្រកចេញចូលតែមួយ និងការិយាល័យប្រជាពលរដ្ឋថ្នាក់រាជធានី/ខេត្តចំនួន៣ ការិយាល័យច្រកចេញចូលតែមួយ និងការិយាល័យប្រជាពលរដ្ឋថ្នាក់ក្រុង/ស្រុកចំនួន៨ និងរដ្ឋបាលឃុំ/សង្កាត់ចំនួន៣០។
លោក ស៊ វរិន អគ្គនាយករង នៃអគ្គនាយកដ្ឋានរដ្ឋបាល ក្រសួងមហាផ្ទៃ បានថ្លែងថា កម្មវិធីនេះ គឺជាមធ្យោបាយថ្មីមួយសម្រាប់រដ្ឋបាលថ្នាក់ជាតិទប់ស្កាត់ និងកែលម្អឱ្យកាន់តែប្រសើរឡើងក្នុងការអនុវត្តតួនាទីរបស់ខ្លួន ជាពិសេសរដ្ឋបាលថ្នាក់ក្រោមជាតិអាចយល់បានច្បាស់នូវបញ្ហារបស់ពលរដ្ឋក្នុងមូលដ្ឋាន។
លោកថ្លែងថា៖ «ប្រសិទ្ធភាពប្រើប្រាស់កម្មវិធីទូរសព្ទដៃនេះនឹងរួមចំណែកឱ្យការចូលរួមរបស់ប្រជាពលរដ្ឋកាន់តែច្រើនថែមទៀតក្នុងកិច្ចការអភិវឌ្ឍមូលដ្ឋាន»។
លោកបន្ថែមថា កន្លងមកការអនុវត្តកម្មវិធីទូរសព្ទដៃនេះ បានអនុវត្តនៅការិយាល័យប្រជាពលរដ្ឋគោលដៅចំនួន១១ ហើយបានបង្កលក្ខណៈងាយស្រួលដល់ប្រជាពលរដ្ឋក្នុងការដាក់ពាក្យបណ្ដឹងនានា ដែលពាក់ព័ន្ធនឹងការផ្ដល់សេវាក្នុងតំបន់គោលដៅ។
បើតាមអង្គការតម្លាភាព កម្មវិធីនេះ គឺជាយន្តការសម្ងាត់ងាយស្រួលប្រើ និងឥតគិតថ្លៃសម្រាប់សាធារណជនក្នុងការដាក់បណ្ដឹង ស្វែងរកជំនួយ សាកសួរព័ត៌មាន និងវាយតម្លៃសេវាសាធារណៈនៅតាមមូលដ្ឋានរបស់ខ្លួន។ គោលបំណងនៃការផលិតកម្មវិធីទូរសព្ទដៃនេះ គឺដើម្បីចូលរួមចំណែកក្នុងការធ្វើឱ្យសេវាសាធារណៈនៅកម្ពុជាកាន់តែមានតម្លាភាព បរិយាបន្ន(សេចក្តីសម្រេចដែលត្រឹមត្រូវ) និងគណនេយ្យភាពបន្ថែមទៀត ជាពិសេសសេវាសាធារណៈដែលឆ្លើយតបនឹងតម្រូវការយេនឌ័រ។
លោក ប៉ិច ពិសី នាយកប្រតិបត្តិនៃអង្គការតម្លាភាពកម្ពុជា មានប្រសាសន៍ថា ការដាក់ឱ្យដំណើរការជាផ្លូវការនូវកម្មវិធីទូរសព្ទដៃ «មតិយើង» គឺជាការបោះជំហានដ៏សំខាន់មួយទៀតឆ្ពោះទៅរកសេវាសាធារណៈប្រកបដោយប្រសិទ្ធភាពនៅប្រទេសកម្ពុជា។ ដោយសារអត្រាខ្ពស់នៃការប្រើប្រាស់ទូរសព្ទឆ្លាតវៃ និងអ៊ីនធឺណិតនៅក្នុងប្រទេស ការផលិត និងអនុវត្តកម្មវិធីទូរសព្ទដៃនេះគឺជាឱកាសដ៏ល្អប្រសើរជាងពេលណាៗទាំងអស់។
លោក ពិសីថ្លែងថា៖ «កម្មវិធីទូរសព្ទដៃនេះនឹងផ្តល់ជូនប្រជាពលរដ្ឋ ជាពិសេសយុវជននូវវេទិកាដ៏ទំនើប ប៉ុន្តែសាមញ្ញ ងាយស្រួលប្រើក្នុងការប្រាស្រ័យ ទំនាក់ទំនងនូវកង្វល់ និងតម្រូវការរបស់ពួកគាត់ជាមួយនឹងអ្នកផ្តល់សេវាសាធារណៈ ដែលនឹងនាំឱ្យមានភាពប្រសើរឡើងនៃអភិបាលកិច្ចល្អ និងការផ្តល់សេវាសាធារណៈកាន់តែឆាប់រហ័ស និងប្រកបដោយគណនេយ្យភាពនៅក្នុងប្រទេស»។
គួរជម្រាបជូនថា កម្មវិធីទូរសព្ទដៃ «មតិយើង» ត្រូវបានសហការផលិតឡើងដោយក្រសួងមហាផ្ទៃ អង្គការតម្លាភាពកម្ពុជា និងអង្គការអាក់សិនអេតកម្ពុជា ចាប់តាំងពីខែមករា ឆ្នាំ២០២០ តាមរយៈការគាំទ្រហិរញ្ញវត្ថុពីសហភាពអឺរ៉ុប(EU) និងទីភ្នាក់ងារសហប្រតិបត្តិការអភិវឌ្ឍន៍អន្តរជាតិស៊ុយអែត(Sida) ។
ក្រុមការងារបច្ចេកទេសរបស់នាយកដ្ឋានមុខងារ និងធនធាននៃក្រសួងមហាផ្ទៃ អង្គការតម្លាភាពកម្ពុជា និងអង្គការអាក់សិនអេតកម្ពុជាបានសហការគ្នាផលិតកម្មវិធីទូរសព្ទ «មតិយើង» ដែលមានទាំងការរៀបចំកិច្ចប្រជុំពិគ្រោះយោបល់ជាច្រើនលើកជាមួយភាគីពាក់ព័ន្ធ ទាំងថ្នាក់ជាតិ និងថ្នាក់ក្រោមជាតិដើម្បីប្រមូលធាតុចូលទៅលើកម្មវិធីទូរសព្ទដៃនេះ៕
