សមាគមសម្ព័ន្ធអ្នកសារព័ត៌មានកម្ពុជា

ឪពុកម្ដាយមានកូនអូទីហ្សឹមកំពុងជួបការលំបាកជាមួយនឹងឥទ្ធិពលនៃការប្រើប្រាស់ទូរសព្ទដៃ

កុមារីម្នាក់កំពុងប្រើប្រាស់ទូរសព្ទដៃទំនើបក្នុងរាធានីភ្នំពេញ ថ្ងៃទី១៣ ខែឧសភា ឆ្នាំ២០២២។ ខេមបូចា/ព្រីង សំរាំង
កុមារីម្នាក់កំពុងប្រើប្រាស់ទូរសព្ទដៃទំនើបក្នុងរាធានីភ្នំពេញ ថ្ងៃទី១៣ ខែឧសភា ឆ្នាំ២០២២។ ខេមបូចា/ព្រីង សំរាំង

អ្នកស្រី ស៊ន សុខឃៀង វ័យ​ ២៩​ឆ្នាំ ជា​អ្នក​ផលិត​​វីដេអូ រស់​នៅ​ក្នុង​សង្កាត់​ទឹក​ថ្លា ខណ្ឌ​សែន​សុខ។ អ្នក​ស្រី​មាន​ការ​ព្រួយ​បារម្ភ និង​ពិបា​ក​ចិត្ត​ជា​ខ្លាំង​នៅ​ពេល​កត់​សម្គាល់​ឃើញ​ថា​កូនប្រុស​របស់​​អ្នក​ស្រី​មានការយឺតយ៉ាវក្នុងការចេះ​និយាយ។ រហូត​ដល់​អាយុ​បី​ឆ្នាំ កូន​អ្នក​ស្រី​ពេល​ខ្លះ​​និយាយ​បាន​តែ​ពាក្យ «ប៉ា» និង​ «ម៉ាក់» ក្នុង​មួយ​ថ្ងៃ​ពេញ។ នៅ​ពេល​ជួប​ប្រឹក្សា​ជាមួយ​អ្នក​ជំនាញ ទើប​អ្នក​ស្រី​ដឹង​ថា​កូន​មាន​​អូទីហ្សឹម​។​

រាល់​ថ្ងៃ​ចុង​សប្ដាហ៍ អ្នកស្រី​ និង​ស្វាមី បិទទូរសព្ទតែម្ដងដើម្បីចំណាយពេលវេលា និងថវិកានៅជាមួយនឹងកូន។ កូន​អ្នកស្រី បច្ចុប្បន្ន​មាន​វ័យ​ប្រាំ​ឆ្នាំ​ហើយ​។ យ៉ាង​ណា​កូនប្រុស​អ្នក​ស្រី​នៅពេលនេះ​ក៏​មិនត្រូវ​បាន​កាត់​ផ្ដាច់​ទាំងស្រុង​ពីគ្រឿងអេឡិចត្រូនិចដែរ​។ អ្នកស្រីបាន​ឲ្យ​ដឹង​ថា៖ «ជួនកាល យើងចង់ឱ្យគាត់រីករាយ យើងចាក់ភ្លេងឱ្យគាត់រាំ ឱ្យគាត់ស្ដាប់ ដោយកុំព្យូទ័រដែរ ប៉ុន្តែយើងធ្វើជាលក្ខណៈប្រយោល យើងមិនឱ្យគាត់ប៉ះផ្ទាល់ទេ»។

លោក ហឿ សេធុល  ប្រធានសមាគមអ្នកប្រឹក្សាយោបល់និងអ្នកចិត្តសាស្រ្តនៅកម្ពុជា​ មាន​ប្រសាសន៍​ថាទោះ​ជាមានការ​និយាយ​តៗគ្នា​ជា​ច្រើន​ក្ដី តែ​ទូរសព្ទ​តែ​មួយ​មុខ​មិន​បង្ក​ឲ្យ​កុមារ​មាន​​អូទីហ្សឹម​នោះ​ទេ​។ លោក​បន្តថា បើ​តាមសៀវភៅ DSM 5 ដែលចងក្រងដោយ​សមាគម​ចិត្តសាស្ត្រ​អាមេរិក (American Psychiatric Association)​ អូទីហ្សឹម​មាន​ពី​កំណើត​ គឺកុមារចាប់កំណើតមក គឺមានអូទីហ្សឹមរួចហើយតែម្ដង។​

យ៉ាងណា លោកថា កុមារ​ដែល​ប្រើ​ប្រាស់​ទូរសព្ទ​ដៃ​ច្រើន​ក៏​អាច​ប៉ះពាល់​ដល់​ការ​លូតលាស់​ផង​ដែរ​ មិន​ថា​ក្មេង​នោះ​មាន​​អូទីហ្សឹម ឬ​ក៏អត់​នោះទេ​។​ លោក​ពន្យល់​ថា​ ការ​ប្រើ​ប្រាស់​ទូរសព្ទ​ដៃ ជា​សកម្មភាព​ផ្លាស់​ប្ដូរ​បែប​អកម្ម​មាន​ការ​ឆ្លើយ​តប​តែម្ខាង មិន​ដូច​ការ​ប្រាស្រ័យ​ទាក់​ទង​គ្នា​ទល់​មុខ​ដែល​មាន​ទៅ​មាន​មក​នោះទេ​។ ដោយសារ​តែហេតុ​នេះ​ហើយ លោក​ថា​ក្មេង​ខ្លះ​មាន​ការ​អភិវឌ្ឍយឺតយ៉ាវ​ខាង​ផ្នែក​ទំនាក់​ទំនង ចរិតឫកពា និង​សកម្មភាព​រាង​កាយ​ផ្សេងៗ​។​

លោក​ឲ្យ​ដឹង​ទៀត​ថា៖ «​បច្ចេក​វិទ្យា​រួម​ចំណែក​ជួយ​ដល់​ការ​អភិវឌ្ឍ​របស់​កុមារ តែ​បើ​ប្រើ​ច្រើន​ពេក​វា​អាច​ជា​បញ្ហា​ទៅវិញ»។ លោក​បន្ថែម​ថា គួរ​តែ​មាន​ការ​កំណត់​ម៉ោង​​ពេល​ច្បាស់​លាស់​ឲ្យ​កុមារ​ប្រើ​ទូរសព្ទដៃ និង​ប្រភេទ​វីដេអូ​ដែល​ពួកគេ​មើល​។​ លោក​ឲ្យ​ដឹង​ដែរថា ការ​អប់​រំ និង​ការ​ព្យាបាល​អាច​ជួយ​ឲ្យ​ក្មេង​រីក​ចម្រើន​បាន ទោះ​បីជា​គេ​មាន​​អូទីហ្សឹម​ក៏​ដោយ​។​

អ្នកស្រី សុខឃៀង នៅ​តែ​គិត​ថា​កូន​អ្នក​ស្រី​មានអូទីហ្សឹម​ ក៏​អាច​មកពី​អ្នកស្រី និង​ស្វាមី ដែល​រវល់​នឹង​ការងារ​ពេក ដោយ​ចំណាយ​ពេល​នៅ​ជាមួយ​ការងារ​ច្រើន​ជាង​នៅ​ជាមួយ​កូន​ប្រុស​។ អ្នកស្រី និង​ស្វាមី តែង​ទុក​កូន​ឲ្យ​នៅ​ជាមួយ​ជីដូន ពេល​អ្នក​ទាំង​ពីរ​ចេញ​ទៅ​ធ្វើ​ការ​នៅ​ពេល​ថ្ងៃ​។​

ដោយ​មើល​ឃើញ​ពី​ការ​លំបាក​របស់​កូន អ្នកស្រី និង​ស្វាមី បាន​សម្រេច​ចិត្ត​ចុះ​ឈ្មោះ​ឲ្យ​កូន​រៀន​នៅ​សាលា​ឃីង ឃីដ មាន​ទី​តាំង​នៅ​សង្កាត់​ភ្នំពេញ​ថ្មី ក្នុង​ខណ្ឌ​សែន​សុខ​ ដែល​សាលា​នេះ​មាន​បទពិសោធ​ច្រើន​ក្នុង​ការថែទាំ​កុមារ​មាន​អូទីហ្សឹម​។​

អ្នកស្រី​បន្ថែម​ថា៖ «​គ្រូ​នៅ​សាលា​​បង្រៀន​កូន​របស់​ខ្ញុំ​ពី​របៀប​ស្លៀក​ពាក់ បង្រៀន​ឲ្យ​ចង់​ទៅ​រៀន និង​បង្រៀន​ឲ្យ​ចេះ​ស្រឡាញ់​ខ្លួន​ឯង មិត្ត​រួម​ថ្នាក់ និង​គ្រូ​របស់​គេ…ក្មេង​ដែល​ត្រូវ​ការ​ការថែទាំ​ពិសេស​បែប​នេះ​ គាត់​ត្រូវ​ការ​ចុះ​ឈ្មោះ​ចូល​រៀន​ឲ្យ​បាន​លឿន ប៉ុន្តែ​ពួក​យើង​មិន​បាន​ដឹង​ពី​រឿង​នេះ ទាល់​តែ​គាត់​អាយុបី​ឆ្នាំ​ទៅហើយ»។

កូន​អ្នកស្រី ស៊ន សុខឃៀង កំពុងអនុវត្ត​មេរៀន​សាលា​របស់​ខ្លួន កាលពីខែឧសភា ឆ្នាំ​២០២២។ រូបភាព​ផ្ដល់​ឲ្យ

លោក សេធុល ឲ្យ​ដឹង​ថា៖ «​​អូទីហ្សឹម​ភាគច្រើន​កើត​ចេញពី​ការ​លូតលាស់​មិន​ប្រក្រតី​របស់​ប្រព័ន្ធ​ប្រសាទ​ក្មេង» ហើយ​មិន​ដូច​គ្នា​ទៅ​នឹង​ជំងឺ​នោះ​ទេ​។ លោក​ថា​ ក្មេង​អូទីហ្សឹម​ ១០​នាក់​អាច​មាន​អាកប្បកិរិយាខុស​គ្នា​ទាំង​១០ ហើយ​ការ​ពិភាក្សាជាមួយ​អ្នក​ជំនាញ​ឲ្យ​បាន​ច្បាស់​គឺ​ជា​រឿង​ចាំ​បាច់ ដើម្បី​កំណត់​ថា​កូន​មាន​អូទីហ្សឹមឬ​អត់​។​

លោក​ពន្យល់​ថា ​អូទីហ្សឹម​ជា​បញ្ហា​សុខភាព​មួយ​ដែល​មាន​លក្ខណៈ​ទូលំទូលាយ​។ លោក​បន្ត​ថា​ក្មេង​មាន​អូទីហ្សឹម​​អាច​មាន​បញ្ហា​ផ្នែក​ភាសា ជំនាញ​សង្គម និង​ធ្វើ​សកម្មភាព​ដដែលៗ​។ លោក​ឲ្យ​ដឹង​ទៀត​ថា វិញ្ញាណ​ទាំង​ប្រាំ​របស់​ពួកគេ​មាន​ភ្នែក ត្រចៀក ច្រមុះ អណ្ដាត និង​រាង​កាយ អាច​មាន​ការ​លូត​លាស់មិនប្រក្រតី​។​​

លោក​បន្ថែម​ទៀត​ថា៖ «​កុំព្យាយាមធ្វើការសន្និដ្ឋាន ពីព្រោះការសន្និដ្ឋានថា ក្មេងមួយណាមានអូទីស្សឹម គឺដូចដាក់បន្ទុកឱ្យគាត់ និងឪពុកម្ដាយ។ វាមានផលប៉ះពាល់លើទឹកចិត្តរបស់ឪពុកម្ដាយ អារម្មណ៍របស់ក្មេង និងអាចឱ្យមនុស្សជុំវិញខ្លួនមើលគាត់ទៅក្នុងផ្លូវផ្សេង ដូចជាការទទួលរងនូវការមើលងាយពីសង្គម»។​

ចំណែក​អ្នកស្រី ប៊ុត សុខហេង ជាម្ដា​យ​ម្នាក់​ទៀង​មាន​កូនប្រុស​​អូទីហ្សឹម​ដែរ ក៏បាន​ផលិត​វីដេអី​ពី​អូទីហ្សឹម​នៅ​លើ​ហ្វេសប៊ុក​ផេក​របស់​អ្នកស្រី​ដែរ​។ អ្នកស្រី ក៏​ធ្វើ​ការ​ជា​គ្រូបង្រៀន​ក្មេងៗ​ដែល​ត្រូវ​ការ​ការ​ថែទាំ​ជាពិសេស​បែប​នេះ​នៅ​ក្នុង​ខណ្ឌ​ឫស្សី​កែវ​ដែរ​។​

​អ្នកស្រី​មាន​ប្រសាសន៍​ថា ​ផ្អែក​តាម​បទពិសោធ​ដែល​អ្នកស្រី​ជួប​ជាមួយ​កូន ក្មេង​មាន​​អូទីហ្សឹម​ហាក់​​បង្ហាញ​ពី​ការ​មិនមានការសម្លឹងភ្នែក មិនមានភាសា មិនចេះទំនាក់ទំនងឬលេងជាមួយអ្នកដទៃ លេងម្នាក់ឯង លេងដដែលៗ ចូលចិត្តលេងតម្រៀបជួរ រលាស់ចុងដៃ លោត បង្វិលខ្លួនចុះឡើងជាដើម។

កូន​ប្រុស អ្នកស្រី ប៊ុត សុខហេង​ កំពុង​រៀន​ជាមួយ​ប្អូន​ប្រុស​របស់​គេ​នៅ​ក្នុង​ផ្ទះ​​កាលពី​ថ្ងៃទី​១១ ខែឧសភា ឆ្នាំ​២០២២។ រូបភាព​ផ្ដល់​ឲ្យ​

អ្នកស្រី​សង្កេត​ឃើញ​ថា ឪ​ពុក​ម្ដាយ​ដែល​រវល់​នឹង​ការ​ងារ​ច្រើន ​​តែង​តែ​ឲ្យ​កូន​លេង​ទូរសព្ទ​ ឬឧបករណ៏​អេឡិចត្រូនិក​ផ្សេង​ៗ​ទៀត ដែល​នេះ​ជា​រនាំ​ង​បាំង​ការ​ទទួល​បាន​ចំណេះ​ដឹង​ពីស្ថានភាព​សង្គម​ជាក់​ស្តែង​។ ការណ៍​នេះ​ហើយ អ្នកស្រី​ថា​ ធ្វើ​ឲ្យ​ក្មេងខ្សោយ និង​យឺតយ៉ាវ​ក្នុង​ការបង្កើត​ទំនាក់​ទំនង និង​ជំនាញភាសា​តាំងពី​វ័យ​ក្មេង ក៏​ដូច​ជា​មិន​សូវ​ចេះ​អត់ធ្មត់ ឆេវឆាវ និង​មួម៉ៅ​ច្រើន​។​

​អ្នកស្រីថា តាំងពី​កើត​មក​កូនប្រុស​អ្នក​ស្រី សក្កដា មិន​ដែល​យំ​ទេ​។ ពេល​អ្នក​ស្រី​បំបៅ​ដោះ កូន​អ្នកស្រី​មិន​សូវ​មាន​សកម្មភាព​អ្វី​ដែរ ហើយ​ក៏​មិន​សូវ​និយាយ​អ្វី​ដែរ​រហូត​ដល់​អាយុ​ជិត​បួន​ឆ្នាំ​ហើយ​ក្ដី​។​

អ្នកស្រី​បន្ត​ថា៖ «​ក្នុងនាមជាម្តាយមួយរូប ដែលមានកូនអូទីហ្សឹមខ្ញុំ សូមលើកទឹកចិត្តដល់ឪពុកម្តាយផ្សេងទៀត ដែលមានបញ្ហានេះដែរ សូមកុំអស់សង្ឃឹម។ ពិតណាស់អូទីហ្សឹម មិនអាចព្យាបាលឲ្យជាបានទេ ប៉ុន្តែកូនរបស់អ្នកនឹងមានភាពល្អប្រសើរឡើងតាមរយៈការបង្រៀនបែបរចនាសម្ព័ន្ធជាក់លាក់ពីអ្នកជំនាញ»។

សព្វ​ថ្ងៃនេះ សក្កដា មាន​ស្ថានភាព​ល្អប្រសើរ​ជាមុន​ ដោយ​អាច​ទាក់​ទង​ជាមួយ​អ្នក​ផ្សេង និង​អាច​បង្ហាញ​ពី​ចំណង់​របស់​ខ្លួន ក៏​ដូច​ជា​អាច​ធ្វើ​រឿង​ជា​ច្រើន​ផ្សេង​ទៀត​បាន​ដោយ​ខ្លួន​ឯង​ ដូ​ច​ជា​ពាក់​ស្បែក​ជើង ងូត​ទឹក ស្លៀក​ពាក់ ដុសធ្មេញ និង​ញ៉ាំ​អាហារ​ ជាដើម។

អ្នកស្រី ប៊ុត សុខហេង កំពុង​អង្គុយ​ជាមួយ​កូនសិស្ស​នៅ​រមនីយដ្ឋាន​វត្ត​ភ្នំ កាលពី​ខែឧសភា ឆ្នាំ​២០២២។ រូបភាព​ផ្ដល់​ឲ្យ​

លោក ចាន់ សារិន នាយក​វិទ្យាល័យ​អប់​រំពិសេស​ក្រុង​តាខ្មៅ និង​ជាប្រធានបណ្ដាញ​​អូទីហ្សឹម​កម្ពុជា មាន​ប្រសាសន៍ថា ឪពុក​ម្ដាយ​គួរតែ​ព្យាយាម​ស្វែង​យល់​ពី​រោគ​សញ្ញាអូទីហ្សឹម​លើ​កូន​តាំងពី​កូន​មាន​វ័យ​ ១៨​ខែ ទៅ​២៤​ខែ​។

លោក​បន្ត​ថា ក្មេងៗ​ទាំង​នោះ​អាច​ជួប​ការ​លំបាក​ផ្នែក​ទំនាក់​ទំនងសង្គម ខណៈ​ដែល​ក្មេង​ផ្សេង​ទៀត​មិន​មាន​បញ្ហា​អ្វី​នោះទេ​។ ក្មេង​ទាំង​នេះ​អាច​មិន​សូវ​និយាយ​ស្ដី ឬ​បង្ហាញ​អារម្មណ៍​ ឬ​ក៏​មិន​សូវ​ឆ្លើយ​តប​ទៅ​នឹងការ​សួរនាំ​ផ្សេងៗ ដែល​នេះ​ក៏​អាច​ដោយសារតែ​ពួកគេ​មាន​សមត្ថភាព​ខាង​ភាសា​មាន​កម្រិត​។ ពួកគេ​ក៏​អាច​មិន​សម្លឹង​អ្ន​ក​ផ្សេង​ដោយ​ចំមុខ ឬ​ចែក​រំលែង​អារម្មណ៍​ផ្ទាល់​ខ្លួន​ជាមួយ​អ្នក​ផ្សេង​ដែរ ហើយ​ក្មេង​មាន​អូទីហ្សឹម​ជា​ច្រើន​ទៀត​មិន​យល់​អារម្មណ៍​របស់​មនុស្ស​ដែល​គេ​កំពុង​និយាយ​ជាមួយ​ផង​ដែរ​។​​

បច្ចុប្បន្ន​​មាន​សិស្ស​មាន​អូទីហ្សឹម​ចំនួន​ ២១៥​នាក់ ក្នុង​នោះ​មាន​សិស្ស​ស្រី​ចំនួន​ ៥៦​នាក់ កំពុង​សិក្សា​នៅ​ក្នុងវិទ្យាល័យ​អប់​រំពិសេស​ក្រុង​តាខ្មៅ ក្នុង​ខេត្ត​កណ្ដាល​។​

សិស្ស​មាន​​អូទីហ្សឹម​​ជា​ច្រើន​បាន​ចុះ​ឈ្មោះ​ចូល​រៀន ដែល​ភាគ​ច្រើន​មាន​អាយុ​ចន្លោះពីបីទៅ​ប្រាំពី​រ​ឆ្នាំ  ស្រប​ទៅ​តាម​គោលនយោបាយរបស់ក្រសួងអប់រំ យុវជន និងកីឡា ស្តីពីគោលនយោបាយអប់រំបរិយាបន្ន​។

យ៉ាងណា លោកថា​នៅ​មាន​សិស្ស​ជាង​ ២០០​នាក់​ផ្សេង​ទៀត​កំពុង​រង់ចាំ​ចុះឈ្មោះ​ចូល​រៀន ​ព្រោះ​តែ​ពេល​នេះ​សាលាខ្វះខាត​អគារ និង​គ្រូបង្រៀន។ លោក​ឲ្យ​ដឹងដែរ​ថាអគា​ថ្មី​នឹង​ត្រូវ​សង់​បន្ថែម​ ដោយ​មាន​ទាំង​អគាស្នាក់​នៅ និង​អគា​សិក្សា ដោយមានការ​គាំទ្រ​ពី​ក្រ​សួង​។​​

លោក រស់ សុវាចា អ្នកនាំពាក្យ​ក្រសួង​អប់​រំ ប្រាប់​ខេមបូចាថា ក្រសួងអប់រំបានបន្តពង្រីកវិសាលភាពការអប់រំពិសេសទៅតាមលទ្ធភាព និងធនធានជាក់ស្តែងស្របតាមតម្រូវការសិក្សា ដោយឲ្យត្រូវទៅនឹងផែនការយុទ្ធសាស្រ្តវិស័យអប់រំ ២០១៩-២០២៣។

លោក យៀប ម៉ាលីណូ ប្រធាន​នាយកដ្ឋានសុខុមាលភាព​ជនពិការ ឲ្យ​ដឹង​ថា​តាមការ​ប៉ាន់​ស្មាន​អ្នកមាន​អូទីហ្សឹម​មាន​ចំនួន​ ១ ៣១៣​នាក់ នៅ​ក្នុង​ខេត្តក្រុង​ចំនូន១៨ ទូទាំង​ប្រទេស ហើយ​ក្នុងនោះ​ភេទប្រុសមាន​ ៩៤១​នាក់ និង​ភេទស្រី​មាន​ ៣៧២​នាក់។ ការ​សិក្សា​ស្រាវ​ជ្រាវ​នៅ​ខេត្ត​ចំនួន​ប្រាំពីរ​​ទៀត​កំពុង​បន្ត​ធ្វើនៅ​ឡើយ​។​

លោក សុវាចា មាន​ប្រសាសន៍​បន្ថែម​ថា ការ​អប់រំពិសេស​ដើរ​តួ​យ៉ាង​សំខាន់​ក្នុង​ការ​អបរំ​សិស្ស​ជាមួយ​នឹង​តម្រូវការ​ការ​សិក្សា​ពិសេស​ ដើម្បី​អាច​ចូល​ខ្លួន​ទៅ​ក្នុង​ការអភិវឌ្ឍ​សេដ្ឋកិច្ច​កម្ពុជា​នាពេល​អនាគត​។ លោក​លើក​ឡើងថា​ វិទ្យាល័យអប់រំពិសេសក្រុងតាខ្មៅ ចូលរួមលើកកម្ពស់ការអប់រំពិសេសដោយចូលរួមកាត់បន្ថយភាពក្រីក្ររបស់ប្រជាពលរដ្ឋដែលមានកូនមានពិការភាព ដែលស្របនឹងគោលដៅអភិវឌ្ឍន៍ប្រកបដោយចីរភាពស្តីពីការអប់រំឆ្នាំ២០៣០៕

ប្រែសម្រួលពីអត្ថបទភាសាអង់គ្លេស៖ Parents of children with autism struggle with the effects of mobile phone usage

401 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម