សាលាដំបូងរាជធានីភ្នំពេញ នៅថ្ងៃពុធនេះបានផ្តន្ទាទោស អនុប្រធានគណកប្សភ្លើងទៀន លោក ថាច់ សេដ្ឋា ដាក់ពន្ធនាគាររយៈពេល៣ឆ្នាំពីបទញុះញង់បង្កឱ្យមានភាពវឹកវរក្នុងសង្គម កាលពីខែមករា ឆ្នាំ២០២៣ ដែលនេះជាករណីផ្សេងទៀតក្រៅពីរឿងសែកស្អុយ។
ចៅក្រមជំនុំជម្រះសាលាដំបូងរាជធានីភ្នំពេញ លោកស្រី ឈុន ដាវី បានប្រកាសសាលក្រម នៅថ្ងៃទី១៨ ខែតុលា ថា៖ «តុលាការសម្រេចផ្តន្ទាទោសជនជាប់ចោទឈ្មោះ ថាច់ សេដ្ឋា ដាក់ពន្ធនាគារ៣ឆ្នាំ និងពិន័យប្រាក់៤លានរៀល»។
លោកស្រីចៅក្រមបន្ថែមថា លោក ថាច់ សេដ្ឋា ត្រូវបានផ្តន្ទាទោសពីបទញុះញង់ឱ្យប្រព្រឹត្តបទឧក្រិដ្ឋ ជាអាទិ៍ និងបទញុះញង់ឱ្យមានការរើសអើង តាមមាត្រា៤៩៤ ៤៩៥ និង៤៩៦។
លោក ថាច់ សេដ្ឋា ត្រូវបានចាប់ខ្លួនកាលពីខែមករា ពាក់ព័ន្ធនឹងករណីផ្សេងជាករណីទី១ ដែលចោទថា ដោយសារចេញសែកគ្មានសាច់ប្រាក់ចំនួន៥ កាលពីឆ្នាំ២០១៩ តាមមាត្រា២៣២១នៃច្បាប់ស្តីពីឧបករណ៍អាចជួញដូរបាន និងប្រតិបត្តិការទូទាត់សងប្រាក់ និងខកខានមិនបានបង្ហាញខ្លួននៅចំពោះមុខចៅក្រមស៊ើបសួរក្នុងឆ្នាំ២០២១ ដើម្បីដោះស្រាយបណ្តឹង ដែលប្តឹងដោយឈ្មោះ ហាយ វណ្ណរិន ជាម្ចាស់ហាងបញ្ចាំ រិន ឆាយ។
លោក ថាច់ សេដ្ឋា បានថ្លែងយ៉ាងខ្លីបន្ទាប់ពីចៅក្រមបានប្រកាសសាលក្រមថា សូមអង្គទូតទាំងអស់ជួយមើលលទ្ធិប្រជាធិបតេយ្យក្នុងប្រទេសខ្មែរផង។
ភរិយាលោក ថាច់ សេដ្ឋា អ្នកស្រី ថាច់ សុខ បូរ៉ានី បានឱ្យដឹងក្រោយប្រកាសសាលក្រមថា ការសម្រេចរបស់តុលាការ គឺអយុត្តិធម៌ណាស់សម្រាប់ប្តីគាត់ ព្រោះ
អ្នកស្រី បូរ៉ានី ផ្តល់បទសម្ភាសន៍ទាំងស្រក់ទឹកភ្នែកថា៖ «ដាក់បន្ទុកនេះបន្ទុកនោះគ្រប់សព្វបែបយ៉ាងទាំងអស់លើប្តីខ្ញុំ អយុត្តិធម៌ណាស់ ប្តីខ្ញុំអាយុ៧០ឆ្នាំ……ហើយមានជំងឺបេះដូងទៀត» ។
កាលពីជំនុំជម្រះថ្ងៃទី២១ ខែកញ្ញា លោកស្រីចៅក្រម ឈុន ដាវី លើកទ្បើងថា លោក ថាច់ សេដ្ឋា បានប្រព្រឹត្តបទញុះញង់បង្កឱ្យមានភាពវឹកវរក្នុងសង្គម នៅថ្ងៃទី១៣ ខែមករា ឆ្នាំ២០២៣ តាមរយៈបង្ហោះសារវីដេអូលើបណ្តាយសង្គមយូធូប [YouTube] រិះគន់ក្នុងការប្រារពខួប៤៤ឆ្នាំ ថ្ងៃ៧មករា របស់គណបក្សប្រជាជនកម្ពុជា។
នៅថ្ងៃជំនុំជម្រះនោះដែរ លោក សេង ហៀង តំណាងអយ្យការថ្លែងថា ការចោទប្រកាន់នេះព្រោះលោក ថាច់ សេដ្ឋា បានថ្លែងមុនថ្ងៃបោះឆ្នោតថ្នាក់ជាតិ ដែលចោទថាលោកបានចេញសារនយោបាយ និងចង់វាយប្រហារមកលើរាជរដ្ឋាភិបាល និងដើម្បីឱ្យប្រជាជនមានការខឹងសម្បារពេលដែលនឹកដល់ប្រវត្តិសាស្រ្តខ្មែរ និងវៀតណាម។
លោក ហៀង ថ្លែងថា យល់ថាជនជាប់ចោទមានចេតនាទុច្ចរិតឧបាយកលជ្រកក្រោមស្លាកអ្នកនយោបាយឃោសនាញុះញង់បញ្ឆេះកំហឹងពលរដ្ឋឱ្យស្អប់រាជរដ្ឋាភិបាល។ លោក សេង ហៀង បន្ថែមថា ជនជាប់ចោទប្រព្រឹត្តបទញុះញង់បង្កភាបវឹកវរប៉ះពាល់ដល់សន្តិសុខជាតិ និងសណ្តាប់ធ្នាប់សារធាណៈ។
នៅពេលសវនាការ លោក ថាច់ សេដ្ឋា បានឆ្លើយថា លោកគ្រាន់តែនិយាយពីប្រវត្តិសាស្រ្តនៃថ្ងៃ៧មករា និងនិយាយពីដើមកំណើតនៃការបង្កើតគណបក្សប្រជាជនកម្ពុជា ដែលគណបក្សនេះលោកថាគឺត្រូវបានបង្កើតដោយវៀតណាម។
លោកបន្តថា ការនិយាយនេះ គឺមិនមានចេតនាដើម្បីឱ្យបំផុសបំផុលឱ្យមានការរើសអើងពូជសាសន៍ ឬដើម្បីបង្កឱ្យមានស្ថានភាពវឹកវរក្នុងសង្គមទេ គឺក្នុងគោលបំណងដើម្បីឱ្យយុវជនខ្មែរបានយល់ពីប្រវត្តិសាស្រ្តជាពិសេសអំពីស្តូបមិត្តភាពកម្ពុជា វៀតណាម ដែលមានស្ទើរតែពេញក្នុងប្រទេសកម្ពុជា៕
