សាលាដំបូងរាជធានីភ្នំពេញ នៅរសៀលថ្ងៃទី១១ ខែវិច្ឆកា សម្រេចចោទប្រកាន់មន្ត្រីនគរបាលជាន់ខ្ពស់ លោក មួង ឃីម និងឧកញ៉ា អ៊ុត ធី ពីបទជំនួញឥទ្ធិពលអកម្ម និងជំនួញឥទ្ធិពលសកម្មនៃច្បាប់ស្តីពីការប្រឆាំងអំពើពុករលួយ។
លោក ប្លង់ សុផល អ្នកនាំពាក្យសាលាដំបូងរាជធានីភ្នំពេញបានថ្លែងថា តំណាងអយ្យការ បានសម្រេចចោទប្រកាន់ លោក អ៊ុត ធី ពីបទជំនួញសកម្ម តាមបញ្ញត្តិមាត្រា៦០៦នៃក្រមព្រហ្មទណ្ឌ និងមាត្រា៣២នៃច្បាប់ស្តីពីការប្រឆាំងអំពើពុករលួយ។
លោក មួង ឃីម និង ដួង តារា ពីបទជំនួញឥទ្ធិពលអកម្ម តាមបញ្ញត្តិមាត្រា៥៩៥ មាត្រា៥៩៦ នៃក្រមព្រហ្មទណ្ឌ និងមាត្រា៣២នៃច្បាប់ស្តីពីការប្រឆាំងអំពើពុករលួយ ។
ខណៈ លោក លី សាម៉េត ពីបទសមគំនិតក្នុងបទជំនួញឥទ្ធិពលអកម្ម តាមបញ្ញត្តិមាត្រា២៩ មាត្រា៥៩៥ មាត្រា៥៩៦នៃក្រមព្រហ្មទណ្ឌ និងមាត្រា៣២នៃច្បាប់ស្តីពីការប្រឆាំងអំពើពុករលួយ ។
អ្នកនាំពាក្យអង្គភាពប្រឆាំងអំពើពុករលួយ លោក សយ ច័ន្ទវិចិត្រ បានបញ្ជាក់ថា អង្គភាពប្រឆាំងអំពើពុករលួយ បានឃាត់ខ្លួនអតីតមន្ត្រីនគរបាលជាតិ ជាអនុប្រធាននាយកដ្ឋានកណ្តាលយុត្តិធម៌ និងលោក ឧញ៉ា អ៊ុត ធី កាលពីថ្ងៃទី៩ ខែវិច្ឆកា ឆ្នាំ២០២៤ និងបានបញ្ជូនអ្នកទាំងពីរទៅអយ្យការអមសាលាដំបូងរាជធានីភ្នំពេញការពីថ្ងៃទី១០ ខែវិច្ឆិកា ឆ្នាំ២០២៤។
លោក ច័ន្ទវិចិត្រ ថ្លែងថា៖ «អង្គភាពបានឃាត់ខ្លួនគាត់កាលពី២ថ្ងៃមុន និងបានបញ្ជូនអ្នកទាំងពីរទៅអយ្យការអមសាលាដំបូងរាជធានីភ្នំពេញការពីព្រឹកម៉ិញ។ ព័ត៌មានបន្ថែមដែលអាចចែករំលែកបាន ខ្ញុំនឹងជម្រាបជូនបងបន្ទាប់ពីបញ្ចប់នីតិវិធីរបស់តំណាងអយ្យការ»។
យោងតាមពត៌មានក្នុងស្រុកចុះផ្សាយថា ការឃាត់ខ្លួនអ្នកទាំងពីរធ្វើទ្បើងក្រោយបែកធ្លាយឯកសារមួយដែលបង្ហាញថាជាប់ពាក់ព័ន្ធនឹងសំណុំរឿង លោក លី សាម៉េត អតីតទីប្រឹក្សាប្រធានព្រឹទ្ធសភា លោក ហ៊ុន សែន ដែលត្រូវបានតុលាការសម្រេចឃុំខ្លួននៅមណ្ឌលអប់រំកែប្រែទី(ម១) កាលពីថ្ងៃទី៥ ខែវិច្ឆកា។
ដោយទ្បែក លោក ដួង ដារា អតីតជំនួយការរបស់អតីតលោកនាយករដ្ឋមន្ត្រី ហ៊ុន សែន ក៏ត្រូវបានតុលាការសម្រេចឃុំខ្លួនក្នុងសំណុំរឿងឆបោកដូចគ្នាដែរ។
លោក ឆាយ គឹមឃឿន អ្នកនាំពាក្យនអគ្គស្នងការនគរបាលជាតិ មិនអាចទាក់ទងសុំការអត្ថាធិប្បាយបានទេ៕
