សាលាដំបូងរាជធានីភ្នំពេញបានពន្យារពេលសវនាការសកម្មជននៃកិច្ចព្រមព្រៀងសន្តិភាពទីក្រុងប៉ារីសលើបទចោទញុះញង់ដោយរង់ចាំសវនាការនៅសាលាឧទ្ធរណ៍នៅថ្ងៃទី២៥ ខែកុម្ភៈ ដែលពួកគេកំពុងប្តឹងឧទ្ធរណ៍ប្រឆាំងនឹងសាលក្រមបំបែកសំណុំរឿងរបស់ពួកគេ។
សកម្មជនទាំងនោះត្រូវបានចោទប្រកាន់ពីបទញុះញង់ធ្វើឱ្យវឹកវ័រដល់សន្តិសុខសង្គមកាលពីខែកក្កដាឆ្នាំមុន បន្ទាប់ពីការផ្សាយបន្តផ្ទាល់ពីតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម (CLV-DTA) នៅលើ Facebook ដែលបង្កឱ្យមានការតវ៉ា និងការរិះគន់តាមអ៊ីនធឺណិត។
ជនជាប់ចោទ៧នាក់ក្នុងចំណោម ៣៧ នាក់ រួមទាំងសកម្មជន ស្រ៊ុន ស្រ៊ន នៃកិច្ចព្រមព្រៀងសន្តិភាពទីក្រុងប៉ារីស ត្រូវបាននាំយកទៅតុលាការសម្រាប់សវនាការកាលពីថ្ងៃអង្គារ ទី១៨ ខែកុម្ភៈ។
លោក ស្រ៊ន ដែលស្លៀកពាក់ឯកសណ្ឋានពន្ធនាគារពណ៌ទឹកក្រូច បានបង្ហាញខ្លួនជាលើកដំបូងនៅក្នុងបន្ទប់សវនាការចាប់តាំងពីការជំនុំជម្រះបានចាប់ផ្តើមកាលពីខែធ្នូឆ្នាំមុន។ គាត់ត្រូវបានអ្នកគាំទ្រដែលបានចូលរួមក្នុងសវនាការឱប។
លោក ស៊្រន បានប្រាប់អ្នកគាំទ្រថា៖ «ខ្ញុំសុខសប្បាយធម្មតា [យើង] ត្រូវតែរក្សាចំណេះដឹងរបស់យើង»។ លោកបានបន្តថា៖ «ប្រសិនបើ [តុលាការ] រកមិនឃើញ [ភស្តុតាងណាមួយនៃ] បទញុះញង់របស់ខ្ញុំ តើកន្លែងណាដែលខ្ញុំអាចដាក់ពាក្យបណ្តឹងអំពីការឃុំខ្លួនខ្ញុំនៅក្នុងពន្ធនាគារពី ៦ ទៅ ៧ ខែ»។
សកម្មជនម្នាក់ទៀត លោក សាន ពិសិដ្ឋ បានលើកជាសំណួរទាក់ទងនឹងការចោទប្រកាន់ពីបទញុះញង់ឱ្យប្រើសេរីភាពក្នុងការបញ្ចេញមតិតាមរយៈហ្វេសប៊ុក។ លោកបានសួរថា៖ «តើខ្ញុំប្រព្រឹត្តបទញុះញង់តាមហ្វេសប៊ុកដោយរបៀបណា?»។
ឆ្លើយតបនឹងពួកគេ ចៅក្រម ញ៉ែម ពិសាល មានប្រសាសន៍ថា សំណុំរឿងរបស់ពួកគេដែលបានប្រព្រឹត្តបទញុះញង់នឹងត្រូវបើកសវនាការនៅថ្ងៃណាមួយទៀត។ លោកបានបន្តថា៖ «យើងកំពុងរង់ចាំការសម្រេចរបស់សាលាឧទ្ធរណ៍»។
មេធាវីការពារក្តីលោក សឺន ជុំជួន មិនបានចូលរួមសវនាការនៅថ្ងៃអង្គារនេះទេ ដោយបញ្ជាក់ថា សាលាឧទ្ធរណ៍បានកំណត់កាលបរិច្ឆេទរួចហើយដើម្បីបើកសវនាការលើបណ្តឹងសាទុក្ខប្រឆាំងនឹងការបំបែកសំណុំរឿងនេះទៅជាប្រាំសវនាការដាច់ដោយឡែកពីគ្នានៅសាលាដំបូងរាជធានីភ្នំពេញ។
ទាក់ទិននឹងការបំបែកសំណុំរឿងនេះ លោក ជុំជួន បានថ្លែងថា វានឹងពន្យារពេលសវនាការ ដូច្នេះប៉ះពាល់ដល់សិទ្ធិរបស់សកម្មជនក្នុងការកាត់ក្តីដោយយុត្តិធម៌។ លោកបានបន្ថែមថា ចុងចោទទាំងអស់ គឺជាផ្នែកនៃសំណុំរឿងតែមួយ ដែលមានការចោទប្រកាន់ដូចគ្នា ដែល «មិនស្មុគស្មាញ» ដូចដែលបានអះអាងដោយព្រះរាជអាជ្ញា។
អ្នកស្រី ទុំ លីដា អ្នកគាំទ្រមកពីខេត្តបាត់ដំបង បាននិយាយថា ប្រជាពលរដ្ឋមានសិទ្ធិព្រួយបារម្ភអំពីអធិបតេយ្យភាពទឹកដី ដែលជាបញ្ហាទាក់ទងនឹង CLV-DTA ដែលជាចំណុចវិជ្ជមាន និងអវិជ្ជមាន ដែលត្រូវបានគូសបញ្ជាក់ដោយ ស្រ៊ុន ស្រ៊ន។
អ្នកស្រីបញ្ជាក់ថា៖ «វាជាសិទ្ធិសេរីភាពក្នុងការបញ្ចេញមតិរបស់ពលរដ្ឋដែលមានចែងក្នុងរដ្ឋធម្មនុញ្ញ»។
មន្ត្រីស៊ើបអង្កេតជាន់ខ្ពស់នៃអង្គការសិទ្ធិមនុស្សអាដហុក លោក យី សុខសាន្ត ដែលបានចូលរួមសវនាការបានជំរុញឱ្យតុលាការដោះលែងសកម្មជនដែលកំពុងអនុវត្តសិទ្ធិសេរីភាពក្នុងការបញ្ចេញមតិលើបញ្ហាក្នុងតំបន់អភិវឌ្ឍន៍។
លោកមានប្រសាសន៍ថា៖ «ពួកគេត្រូវបានគេដាក់ក្នុងការឃុំខ្លួនបណ្តោះអាសន្ននៅកន្លែងផ្សេងគ្នា [ពន្ធនាគារ] ដើម្បីបំបាក់ស្មារតីរបស់ពួកគេ ដែលយើងមើលឃើញថាជា [ទម្រង់នៃ] ការធ្វើទុក្ខបុកម្នេញលើអ្នកដែលហ៊ានបញ្ចេញមតិ»។
លោក សុខសាន្ត បានបន្តថា សេរីភាពនៃការបញ្ចេញមតិមានសារៈសំខាន់ណាស់សម្រាប់ការលើកតម្កើងលទ្ធិប្រជាធិបតេយ្យក្នុងប្រទេសដូចកម្ពុជា ព្រោះវាឆ្លុះបញ្ចាំងពីសង្គមដែលកំពុងអភិវឌ្ឍ។
មនុស្សប្រហែល ១០០ នាក់ត្រូវបានចាប់ខ្លួនចាប់តាំងពីចុងខែកក្កដា ហើយជាមួយនោះមានជាង ៦០ នាក់ដែលត្រូវបានចោទប្រកាន់ និងដាក់ពន្ធនាគារសម្រាប់ការតវ៉ានៅលើប្រព័ន្ធផ្សព្វផ្សាយសង្គម ផែនការប្រមូលផ្តុំ ឬបង្ហាញពីអារម្មណ៍របស់ពួកគេអំពីការជាប់ពាក់ព័ន្ធនៅក្នុងករណី CLV-DTA ។
រដ្ឋាភិបាលបានប្រកាសដកខ្លួនចេញពី CLV-DTA រយៈពេល ២០ឆ្នាំ កាលពីថ្ងៃទី២០ ខែកញ្ញា បន្ទាប់ពីការតវ៉ា និងការរិះគន់តាមអ៊ីនធឺណិត។
CLV-DTA ត្រូវបានបង្កើតឡើងក្នុងឆ្នាំ១៩៩៩ ដើម្បីលើកកម្ពស់ការអភិវឌ្ឍសេដ្ឋកិច្ចសង្គម កិច្ចសហប្រតិបត្តិការសេដ្ឋកិច្ច និងទំនាក់ទំនងកាន់តែជិតស្និទ្ធជាមួយប្រមុខរដ្ឋាភិបាលនៃប្រទេសទាំងបី។ នៅក្នុងប្រទេសកម្ពុជា រួមមាន ខេត្តជាប់ព្រំដែន ស្ទឹងត្រែង រតនគិរី មណ្ឌលគិរី និងក្រចេះ ត្រូវបានចាត់តាំងដំបូងដើម្បីទទួលបានអត្ថប្រយោជន៍ពីកិច្ចព្រមព្រៀង៕
ប្រែសម្រួលពីអត្ថបទភាសាអង់គ្លេស៖ Phnom Penh Municipal Court Delays CLV-DTA Trial Pending Appeal Court Decision
