សមាគមសម្ព័ន្ធអ្នកសារព័ត៌មានកម្ពុជា

តុលាការក្រុងភ្នំពេញសម្រេចឃុំខ្លួនស្ថាបនិកគណបក្សបេះដូងជាតិ

លោក សៀម ភ្លុក ស្ថាបនិកគណបក្សបេះដូងជាតិ ដែលត្រូវបាន សាលាដំបូងរាជធានីភ្នំពេញសម្រេចឃុំខ្លួនកាលពីថ្ងៃទី២៧ ខែមេសា ឆ្នាំ២០២២។ រូបថតយកពីហ្វេសប៊ុក
លោក សៀម ភ្លុក ស្ថាបនិកគណបក្សបេះដូងជាតិ ដែលត្រូវបាន សាលាដំបូងរាជធានីភ្នំពេញសម្រេចឃុំខ្លួនកាលពីថ្ងៃទី២៧ ខែមេសា ឆ្នាំ២០២២។ រូបថតយកពីហ្វេសប៊ុក

សាលាដំបូងរាជធានីភ្នំពេញបានសម្រេចឃុំខ្លួនលោក សៀម ភ្លុក ជាស្ថាបនិកគណ​បក្ស​បេះដូងជាតិ​ ពីបទក្លែងបន្លំនិងប្រើប្រាស់លិខិតក្លែង​ កាលពីថ្ងៃទី២៧ ខែមេសា ឆ្នាំ២០២២។

លោក អ៊ី  រិន អ្នកនាំពាក្យសាលាដំបូងរាជធានីភ្នំពេញ បានមានប្រសាសន៍ថា សាលាដំបូង​រាជធានីភ្នំពេញ​ បានសម្រេចឃុំខ្លួនស្ថាបនិកគណ​បក្សបេះដូងជាតិ លោក​ សៀម ភ្លុក នៅ​ពន្ធនាគារ​ព្រៃស កាលពី​ថ្ងៃពុធរួចហើយ។  

លោក អ៊ី រិន ថ្លែងថា៖«លោក សៀម  ភ្លុក  ត្រូវបានចៅក្រមស៊ើបសួរសម្រេចឃុំខ្លួន​បណ្ដោះ​អាសន្ន​នៅមណ្ឌល​អប់រំកែប្រែទី១(ម១) ពីបទក្លែងបន្លំនិងប្រើប្រាស់លិខិតក្លែង បទល្មើស​មានចែង និងផ្ដន្ទាទោសតាមមាត្រា៦២៦ មាត្រា៦២៧និង​មាត្រា៦២៨ក្នុងច្បាប់​ក្រម​ព្រហ្មទណ្ឌនៃព្រះរាជាណាចក្រកម្ពុជា»

យោងតាមមាត្រានៃច្បាប់ក្រមព្រហ្មទណ្ឌ លោក សៀម ភ្លុក នឹងប្រឈមមុខនឹងការ​ជាប់​ពន្ធនាគារនៃបទនីមួយៗពី​១ឆ្នាំទៅ៣ឆ្នាំ និងពិន័យជាប្រាក់ចន្លោះពី២លានរៀលទៅ​៦លាន​រៀល។

ក្នុងដីកាបង្គាប់​របស់ លិ ​សុខា ចៅក្រមស៊ើបសួរសាលាដំបូងរាជធានីភ្នំពេញ បានបញ្ជាក់​ថា​ ករណីឃាត់ខ្លួនស្ថាបនិកគណបក្សបេះដូងជាតិ ទី១ ឲ្យភ្នាក់ងារមានសមត្ថកិច្ច​នៃកងកម្លាំង​សាធារណៈ ធ្វើការនាំខ្លួនជនត្រូវបានចោទដែលមានឈ្មោះ  សៀម  ភ្លុក ភេទប្រុស អាយុ​៥២ឆ្នាំ ទៅមណ្ឌលអប់រំកែប្រែទី១(ម១) ដោយអនុវត្តឲ្យបានត្រឹមត្រូវតាមច្បាប់។

ក្នុងដីកាដដែលក៏បានបន្ថែមថា ដាក់ឲ្យស្ថិតនៅក្រោមការពិនិត្យពីបទ« ក្លែងបន្លំនិង​ប្រើប្រាស់​លិខិតក្លែង ប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០២១ បទល្មើសដែលមានចែង​តាម​មាត្រា៦២៦​​  មាត្រា៦២៧​និង មាត្រា៦២៨​នៃក្រមព្រហ្មទណ្ឌ។​

ជាមួយគ្នានេះដែរ លោក សាន សុខសីហា អ្នកនាំពាក្យស្នងការដ្ឋាននគរបាល​រាជធានី​ភ្នំពេញ  បានអះអាងថា ការចាប់ខ្លួនលោក សៀម​ ភ្លុក គឺតាមដីកាបង្គាប់ឲ្យ​នាំខ្លួនរបស់​ចៅក្រម​ស៊ើបសួរ។ សមត្ថកិច្ចប៉ូលិសបានឃាត់ខ្លួនគាត់កាលពីម្សិលមិញ​និងបានបញ្ចូនគាត់ទៅ​សាលាដំបូង​រាជធានី​ភ្នំពេញ ដើម្បីអនុវត្តន៍តាមដីកានិងនីតិវិធីតាមផ្លូវច្បាប់។

លោក សីហាបន្ថែមថា៖«ខ្ញុំដឹងតែឃាត់ម្សិលមិញនិងបញ្ចូនទៅតុលាការរួចហើយ»

លោក  ជូង ​ជូងី ជាមេធាវីការពារក្ដីឲ្យលោក សៀម ​ភ្លុក បានឲ្យដឹងថា លោកនឹងពិភាក្សា​ជាមួយ​កូនក្ដីពីការប្ដឹងតវ៉ាពាក់ព័ន្ធនិងការឃុំខ្លួនគាត់ ជាពិសេសលោកបាន​ដាក់ពាក្យ​ស្នើសុំ​ថតសំណុំរឿងប៉ុន្ដែតុលាការមិនទាន់បានថតឲ្យគាត់  ដូច្នេះលោកមិនទាន់ច្បាស់ទេ​ពាក់ព័ន្ធ​នឹងករណីហ្នឹង។

លោកបានបន្ថែមថា៖«ខ្ញុំទៅជួបកូនក្ដីខ្ញុំសិន ទើបដឹងថាត្រូវធ្វើអ្វីបន្ដទៀត»

ចំណែកឯលោក  សឹង សែនករុណា  អ្នកនាំពាក្យសមាគមការពារសិទ្ធិមនុស្ស​នៃអង្គការ​អាដហុក  បានចាត់ទុកករណីនេះថា វាជាការបង្ហាញអំពីការរឹតត្បិតទៅលើសកម្មភាព​របស់​សកម្មជននយោបាយនិងការធ្លាក់ចុះស្ថានភាពនយោបាយមួយកម្រិតទៀត​ តាមរយៈនៃ​ការ​ប្រើប្រាស់ប្រព័ន្ធតុលាការក្នុងការចាត់វិធានការទៅលើសកម្មជននយោបាយនៃបក្សជំទាស់និងជាការបន្ថែមលើក្ដីព្រួយបារម្ភស្ថានភាពនិងការគោរពសិទ្ធិមនុស្សរបស់ប្រទេសកម្ពុជាយើង​មួយកម្រិតទៀត។

លោក សែនករុណា បានសង្កត់ធ្ងន់ថា៖«ករណីលោក សៀម ភ្លុក គឺជាការប្រើប្រាស់មេដៃ​ស្រប​ច្បាប់ក្នុងការបង្កើតគណបក្សនយោបាយ តែបែរជាមានការចោទប្រកាន់លោក​ក្នុងការ​ដាក់​ពាក្យស្នើសុំដោយមិនមានការសម្របសម្រួល ហើយចំណុចនេះដែលខ្ញុំមើលឃើញថា​ ជាការ​រំលោភសិទ្ធិក្នុងការចូលរួមសកម្មភាពនយោបាយ​របស់ប្រជាពលរដ្ឋ​កម្ពុជាក្នុងការ​ប្រកួត​ប្រជែងតាមបែបលិទ្ធិប្រជាធិបតេយ្យ»

លោក សៀម ភ្លុក ត្រូវបានសាលាដំបូងរាជធានីភ្នំពេញ​​ ចេញដីកាកោះហៅឱ្យចូលខ្លួនទៅ​ឆ្លើយ​បំភ្លឺ​ម្ដងរួចមកហើយ កាលពីថ្ងៃទី២២ ខែមីនា ឆ្នាំ២០២២ ពាក់ព័ន្ធនឹងរឿងក្លែងបន្លំ​ស្នាម​មេដៃសមាជិកដើម្បីបង្កើតគណបក្សនយោបាយ ប៉ុន្តែនៅថ្ងៃទី២២ ខែមីនានោះ លោកមិនបាន​ចូលទៅបំភ្លឺទេ ដោយថាមិនបានទទួលដីកាពីតុលាការ។

ក្រោយពីលោកមិនបានចូលបំភ្លឺនោះ ចៅក្រមស៊ើបសួរសាលាដំបូងរាជធានីភ្នំពេញ​ក៏បាន​ចេញដីកាបង្គាប់ឱ្យសមត្ថកិច្ចនាំខ្លួនលោកនៅថ្ងៃទី៤ ខែមេសា ឆ្នាំ២០២២  ដោយឱ្យ​លោកទៅ បំភ្លឺនៅតុលាការឱ្យបានមុនថ្ងៃទី២៥ ខែមេសា ឆ្នាំ២០២២ ប៉ុន្តែលោកនៅតែពុំបានចូលខ្លួនបំភ្លឺ​ទៅ​តាមដីកាកោះហៅនោះទេ ខណៈដែរលោកអះអាងថា មិនទទួលបានដីកានោះទេ ។

កាលពីថ្ងៃទី២០ ខែមេសា​ លោក សៀម ភ្លុក បានចេញសេចក្ដីប្រកាសព័ត៌មានថា លោកនឹង​ចូលខ្លួនទៅឆ្លើយបំភ្លឺតាមការកោះហៅរបស់តុលាការ ដោយមិនមានចេតនាគេចវេះ​ដូចការ​ផ្សព្វផ្សាយពាក្យចចាមអារ៉ាមតាមបណ្ដាញសង្គមនិងសារព័ត៌មានខ្លះនោះឡើយ។

គណបក្សបេះដូងជាតិ ត្រូវបានអាជ្ញាធរសង្ស័យថាមានលោក សម រង្ស៊ី ស្ថិតនៅ​​ពីក្រោយ​​នៃការ​បង្កើត​​​គណ​​បក្សនេះ ត្រូវបានក្រសួងមហាផ្ទៃចោទប្រកាន់ថា បានក្លែងស្នាមមេដៃ និងមាន​ចេតនា​ទុច្ចរិត។

កាលពីចុងឆ្នាំ២០២១ ក្រសួងមហាផ្ទៃបានបដិសេធសំណើសុំចុះឈ្មោះ​ក្នុងបញ្ជី​បង្កើត​គណបក្សនយោបាយ​របស់ស្ថាបនិកគណបក្សបេះដូងជាតិ​​​។ ដោយមិនសុខចិត្តទៅ​នឹងការ​សម្រេចនោះ នៅចុងខែវិច្ឆិកា ឆ្នាំ២០២១ លោក សៀម ភ្លុក ក៏បានដាក់ពាក្យបណ្ដឹងទៅ​តុលាការកំពូលដើម្បីតវ៉ា ប៉ុន្តែ​បណ្តឹងនោះត្រូវបានតុលាការកំពូល​ច្រានចោល​៕

1,066 views

ព័ត៌មានថ្មី

អត្ថបទពេញនិយម