សាលាដំបូងរាជធានីភ្នំពេញបានបន្តសវនាការលើសំណុំរឿងក្បត់ជាតិរបស់លោក កឹម សុខា អតីតមេបក្សប្រឆាំងនៅថ្ងៃពុធនេះ បន្ទាប់ពីពន្យាពេលជិតពីរឆ្នាំក្នុងរយៈពេលមានការរីករាលដាលនៃជំងឺកូវីដ-១៩។
លោក កឹម សុខា បានទៅដល់សាលាដំបូងរាជធានីភ្នំពេញនៅម៉ោងប្រហែលជិត៨ព្រឹក ដើមចូលរួមសវនាការ។ គាត់ត្រូវបានចោទប្រកាន់កាលពីឆ្នាំ២០១៧ពីបទសមគំនិតជាមួយបរទេស ដែលតាមចោទថា សហការជាមួយសហរដ្ឋអាមេរិកប៉ុនប៉ងធ្វើបដិវត្តន៍ពណ៌ ដើម្បីផ្តួលរំលំរដ្ឋាភិបាល នៃគណបក្សប្រជាជនកម្ពុជាដែលកំពុងកាន់អំណាច។ យោងតាមអ្នកយកព័ត៌មានរបស់ខេមបូចាពីសាលាដំបូងរាជធានីភ្នំពេញ។
លោក កឹម សុខា បានមានប្រសាសន៍ទៅកាន់អ្នកសារព័ត៌មាននៅគេហដ្ឋានរបស់លោកមុន ពេលទៅ ចូល សវនាការនៅព្រឹកថ្ងៃពុធនេះ ថា៖ «ខ្ញុំសង្ឃឹមថា ថ្ងៃនេះតុលាការនឹងសម្រេចទម្លាក់ចោលការចោទប្រកាន់មកលើខ្ញុំ ដើម្បីកម្ពុជាយើងបោះជំហានទៅរកការផ្សះផ្សាបង្រួបបង្រួមជាតិ ហើយយើងមានសាមគ្គីជាតិ ដើម្បីអភិវឌ្ឍប្រទេសជាតិយើងទាំងអស់គ្នាតទៀត»។
សំណុំរឿងនេះត្រូវបានផ្អាកតាំងពីខែមីនា ឆ្នាំ២០២០ ចំពេលមានការរីករាលដាលនៃជំងឺកូវីដ-១៩។ ទោះជាយ៉ាងណាក៏ដោយ តុលាការបានបន្តដំណើរការជាធម្មតាឡើងវិញ អស់ជាច្រើនខែមកហើយ រួមទាំងការចាប់ផ្តើមសវនាការថ្មីលើសកម្មជនសិទ្ធិមនុស្ស និងសមាជិកគណបក្សសង្គ្រោះជាតិដែលត្រូវរំលាយចោលរួចហើយនោះ។
ក្រុមសង្គមស៊ីវិលលើកឡើងថា ការបន្តសវនាការលើសំណុំរឿងរបស់លោក កឹម សុខា ឡើងវិញភ្លាមៗនេះ គឺដោយសារសម្ពាធអន្តរជាតិ។
លោក កឹម សុខា ដែលជាអតីតប្រធានគណបក្សសង្គ្រោះជាតិ ត្រូវបានចាប់ខ្លួនកាល ពីថ្ងៃ ទី០៣ ខែកញ្ញា ឆ្នាំ២០១៧ និងត្រូវបានចោទប្រកាន់ពីបទសមគំនិតជាមួយបរទេស ដែលតាមចោទថា សហការជាមួយសហរដ្ឋអាមេរិកប៉ុនប៉ងធ្វើបដិវត្តន៍ពណ៌ ដើម្បីផ្តួលរំលំរដ្ឋាភិបាល នៃគណបក្សប្រជាជនកម្ពុជាដែលកំពុងកាន់អំណាច។
លោក កឹម សុខា បានអះអាងថា លោកធ្វើសកម្មភាពដោយស្របច្បាប់និងប្រកបដោយតម្លាភាពក្នុងការព្យាយាមយកឈ្នះការបោះឆ្នោត។
គណបក្សសង្គ្រោះជាតិត្រូវបានតុលាការកំពូលរំលាយកាលពីឆ្នាំ២០១៧ ហើយសមាជិកគណបក្សជាច្រើននាក់ត្រូវបានចាប់ខ្លួនជុំវិញអ្វីដែលគេជឿជាទូទៅថា ជាការចោទប្រកាន់ពាក់ព័ន្ធរឿងនយោបាយ។ មេដឹកនាំកំពូលៗរបស់គណបក្សនេះបាននិរទេសខ្លួន ហើយ សមាជិកជាន់ខ្ពស់ជាង១០០នាក់ត្រូវបានហាមឃាត់មិនឲ្យធ្វើសកម្មភាពនយោបាយរយៈពេល៥ឆ្នាំ។
ការពន្យារពេលលើសំណុំរឿងរបស់លោក កឹម សុខា ធ្វើឲ្យមានក្តីបារម្ភក្នុងចំណោមក្រុមសង្គមស៊ីវិល និងអ្នកវិភាគនយោបាយ ដែលអះអាងថា ជម្លោះផ្លូវច្បាប់នេះ គឺជាផ្នែកមួយនៃយុទ្ធសាស្ត្រជំរុញឲ្យការបែកបាក់ក្នុងចំណោមមេដឹកនាំគណបក្សសង្គ្រោះជាតិកាន់តែធ្ងន់ធ្ងរឡើង។
កាលពីដើមខែធ្នូ សាលាដំបូងរាជធានីភ្នំពេញបានបន្តសវនាការលើអតីតសមាជិក និងសកម្មជនគណបក្សសង្រ្គោះជាតិជាង១៣០នាក់ ដែលត្រូវបានចោទប្រកាន់ពីបទរួមគំនិតក្បត់និងញុះញង់បង្កឲ្យមានភាពវឹកវរក្នុងសង្គមពាក់ព័ន្ធការព្យាយាមមិនបានសម្រេចរបស់លោក សម រង្ស៊ី មេដឹកនាំគណបក្សប្រឆាំងក្នុងការវិលត្រឡប់មកកម្ពុជាវិញកាលពីថ្ងៃទី៩ ខែវិច្ឆិកា ឆ្នាំ២០១៩។
សវនាការដែលមានមនុស្សដ៏ច្រើននេះក៏ត្រូវបានពន្យារពេលជាច្រើនខែផងដែរដោយសារការរីករាលដាលជំងឺកូវីដ-១៩។