សាលាដំបូងរាជធានីភ្នំពេញនៅថ្ងៃចន្ទនេះ បានសម្រេចផ្តន្ទាទោសទីប្រឹក្សាជាន់ខ្ពស់គណបក្សកម្លាំងជាតិ លោក រ៉ុង ឈុន ដាក់ពន្ធនាគារចំនួន៤ឆ្នាំ ពីបទញុះញង់បង្កភាពវឹកវរក្នុងសង្គម និងបទមិនរាងចាល ដែលលោកបានអត្ថាធិប្បាយអំពីបញ្ហាព្រំដែនរវាងប្រទេសកម្ពុជា និងវៀតណាម។
ជាមួយគ្នានេះដែរ លោក រ៉ុង ឈុន ក៏ត្រូវបានតុលាការសម្រេចដកហូតសិទ្ធិពលរដ្ឋក្នុងការបោះឆ្នោត និងឈរឈ្មោះឱ្យគេបោះឆ្នោតឱ្យ និងពិន័យជាប្រាក់៤លានរៀលចូលជាសម្បត្តិរដ្ឋ។
នៅក្នុងពេលប្រកាសសាលក្រម លោកចៅក្រម លិ សុខា មិនបានប្រកាសថា តុលាការចេញដីកាបង្គាប់ឱ្យចាប់ខ្លួន លោក រ៉ុង ឈុន នោះទេ។
ករណី លោក រ៉ុង ឈុន ត្រូវបានសាលាដំបូងរាជធានីភ្នំពេញ បើកការជំនុំជម្រះ កាលពីថ្ងៃទី២៣ ខែមេសា ហើយចៅក្រមជំនុំជម្រះ លោក លិ សុខា បានសម្រេចប្រកាសសាលក្រមនៅថ្ងៃទី៥ ខែឧសភានេះ។
បទចោទនេះ កើតឡើងពីវីដេអូឃ្លីបរបស់លោកមួយដែលថតកាលពីខែកក្កដា នៅស្រុកកោះធំ ខេត្តកណ្ដាល ជាទីដែលលោកបានថ្លែងទៅកាន់សមាជិកគណបក្សកម្លាំងជាតិ និងបានរិះគន់រដ្ឋាភិបាលថាមិនបានយកចិត្តទុកដាក់លើបញ្ហាសិទ្ធិមនុស្ស និងប្រជាធិបតេយ្យ។ ក្នុងវីដេអូឃ្លីបនោះ លោកបានលើកឡើងថាកម្ពុជា «ជាប់ចំណាត់ថ្នាក់លេខមួយខាងឆបោក ឧក្រិដ្ឋជន បទល្មើសអនឡាញ និងចាប់ជំរិត»។
លោកក៏បានផ្ដល់បទសម្ភាសន៍ដល់វិទ្យុអាស៊ីសេរី ទាក់ទងនឹងដំណើរទស្សនកិច្ចរបស់លោកនាយករដ្ឋមន្ត្រី ហ៊ុន ម៉ាណែត ទៅកាន់តំបន់ព្រំដែនកម្ពុជា-វៀតណាម។ ក្នុងបទសម្ភាសន៍ លោកបានលើកឡើងថាមាន «ភាពមិនប្រក្រតី» ក្នុងចំណោមបង្គោលព្រំដែនដែលបានបោះរួច៨៤% រវាងប្រទេសទាំងពីរ។
លោក រ៉ុង ឈុន ជាមេដឹកនាំសហជីព និងជាអ្នកនយោបាយលេចធ្លោមួយរូប ហើយកន្លងមកលោកក៏ធ្លាប់ជាប្រធានសមាគមគ្រូបង្រៀនឯករាជ្យកម្ពុជាផងដែរ។ ក្រៅពីនេះ លោកក៏ធ្លាប់បំពេញការងារជាសមាជិកគណៈកម្មាធិការជាតិរៀបចំការបោះឆ្នោតផងដែរ។
កាលពីឆ្នាំ២០១៨ លោក រ៉ុង ឈុន ជាថ្នាក់ដឹកនាំសហជីពម្នាក់ ក្នុងចំណោមប្រាំមួយនាក់ដែលត្រូវកាត់ទោសឲ្យជាប់ពន្ទនាគារពីរឆ្នាំកន្លះ ទាក់ទងបទចោទ «អំពើហិង្សាដោយចេតនាមានស្ថានទម្ងន់ទោស»។ បទចោទនេះ កើតចេញពីការចោទប្រកាន់ថាលោកបានដឹកនាំការតវ៉ាដោយហិង្សានៅតាមបណ្ដោយផ្លូវវេងស្រេងក្នុងរាជធានីភ្នំពេញ៕
