សមាគមសម្ព័ន្ធអ្នកសារព័ត៌មានកម្ពុជា

ព្រៃសហគមន៍ភ្នំសេះរងការកាប់ទន្រ្ទានយ៉ាងធ្ងន់ធ្ងរ ខណៈពលរដ្ឋអះអាងថា អាជ្ញាធរមិនអើពើក្នុងការទប់ស្កាត់

ដីព្រៃសហគមន៍ភ្នំសេះ ដែលរងការកាប់ឆ្ការយកធ្វើជាដីចម្ការ និងដាក់លក់ ស្ថិតក្នុងភូមិអូរព្រះ ឃុំអូរកណ្ដៀសែនជ័យ ស្រុកសំបូរ ខេត្តក្រចេះ រូបថតក្នុងឆ្នាំ២០២១។ រូបថតផ្ដល់ឱ្យ
ដីព្រៃសហគមន៍ភ្នំសេះ ដែលរងការកាប់ឆ្ការយកធ្វើជាដីចម្ការ និងដាក់លក់ ស្ថិតក្នុងភូមិអូរព្រះ ឃុំអូរកណ្ដៀសែនជ័យ ស្រុកសំបូរ ខេត្តក្រចេះ រូបថតក្នុងឆ្នាំ២០២១។ រូបថតផ្ដល់ឱ្យ

ពលរដ្ឋសហគមន៍ភ្នំសេះ អះអាងថាដីព្រៃសហគមន៍ប្រមាណ៣ពាន់ហិកតា ស្ទើរតែបាត់បង់​ទាំងស្រុងហើយមកទល់បច្ចុប្បន្ននេះ ដោយសារតែអ្នកមានអំណាចមួយចំនួន​ជួលពលរដ្ឋ​កាប់​ទន្រ្ទានដីព្រៃធ្វើជាកម្មសិទ្ធិផ្ទាល់ខ្លួន និងដោយសារតែភាពអសកម្មរបស់អាជ្ញាធរ​ក្នុងការ​បង្រ្កាបបទល្មើសទាំងនោះ។

ព្រៃសហគមន៍ភ្នំសេះ មានចម្ងាយប្រមាណ៩០គីឡូម៉ែត្រពីខេត្តក្រចេះ ស្ថិត​ក្នុងភូមិអូរព្រះ ​ឃុំ​អូរ​គ្រៀ​ង​ ​ស្រុក​សំបូរ​ គឺ​ជា​តំបន់​អាស្រ័យផល​យ៉ាង​សំខាន់រ​បស់​ជនជាតិ​ដើម​ភាគ​តិចពូនង​ជិត​ ២០០​គ្រួសារ។

ប្រជា​សហគមន៍​លើកឡើងថា ព្រៃ​សហគមន៍​ភ្នំ​សេះ​សំបូរ​ដើមឈើ​មាន​តម្លៃ​ធំៗ ដូច​ជា បេង ធ្នង់ នាងនួន សុក្រំ និង​ឈើទាល​ជា​ដើម តែ​នៅ​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ ឈើ​កម្រ​ទាំង​នេះ ត្រូវ​បាន​ជន​ល្មើស​លួច​កាប់​អស់​ស្ទើរ​ទាំង​ស្រុង។ ព្រៃ​នេះ​មាន​សត្វព្រៃ​កម្រ​ជា​ច្រើន​ប្រភេទកំពុង​រស់នៅ​រួម​មាន ស្វា ក្ងោក ជ្រូក​ព្រៃ មាន់ និង​ឈ្លូស​ជា​ដើម។

បើតាមលោក ហ៊ា សំអឿន ប្រធានសហគមន៍ភ្នំសេះ ប្រាប់ឱ្យដឹងថា ​ ​ពលរដ្ឋ​ចំណូលស្រុក​ថ្មី​បាន​មក​ទិញ​ដី​ ​និង​កាប់​ទ​ន្រ្ទា​ន​ដី​ព្រៃ​កាន់កាប់​ជា​កម្មសិទ្ធិ​​សម្រាប់​ដាំដំណាំ​ក​សិ​ឧស្សាហកម្ម​  ​ហើយក៏​មាន​អ្នកភូមិ​ខ្លះ​កាប់​រាន​ទ​ន្រ្ទា​ន​ដី​ព្រៃ​ ​ដើម្បី​ពង្រីក​ដី​ចម្ការ​របស់​ខ្លួន​កាន់កាប់​ជា​កម្មសិទ្ធិ​​ដោយ​ខុសច្បាប់​ ​ក្នុង​បំណង​ដាំដំណាំ​ផ្សេងៗ​ដូចជា​ ​ស្វាយចន្ទី​ ​និង​ដំឡូងមី​ជាដើម​។ លោក សំអឿន ចាត់ទុកថា សកម្មភាព​កាប់​រានទន្ទ្រាន​នេះ​ ​ជា​ទង្វើ​ខុសច្បាប់​ភូមិបាល​ ​និង​ ​ច្បាប់​ស្តីពី​ព្រៃឈើ​។

លោកបន្តថា អាជ្ញាធរមិនមានភាពសកម្មក្នុងការចុះអន្តរាគមន៍ ចំពោះការកាប់ទន្រ្ទាន​របស់​ពលរដ្ឋ ដែលលោកសង្ស័យថាមានអ្នកមានអំណាចនៅពីក្រោយ។

លោកលើកឡើងថា៖ «តាមខ្ញុំសិក្សាមើលទៅអ្នកដែលកាប់ហ្នឹងអ្នកចំណូលថ្មីនឹងឯង កាប់​ហើយ​រកថៅកែលក់តែម្ដង មានអ្នកមានអំណាចនៅពីក្រោយ។ ខ្ញុំសំណូមពរឱ្យស្ថាប័ន ឬ​ជំនាញពាក់ព័ន្ធជួយសហគមន៍ភ្នំសេះកំពុងតែទៅមុខហើយ អត់មានទៅក្រោយទេ បើមិន​ចឹងអស់ហើយព្រៃសហគមន៍ភ្នំសេះនេះ »។

លោកបន្តថា៖ «ឆ្នាំនេះអត់ទាន់បានអន្តរាគមន៍ម្ដងទេ(អាជ្ញាធរ) ព្រឹកមិញខ្ញុំបានជួប គាត់ថា​ឱ្យធ្វើលិខិតដាក់ទៅភូមិទៅឃុំទៅណា ខ្ញុំចង់អស់ទឹកចិត្ត ដាក់លិខិតទៅដដែលៗ ខ្ញុំមិនដឹង​និយាយថាម៉េច ដើមជ័រដើមអី»។

លោក សំអឿន បន្តថា ចាប់តាំងពីមានការកាប់ទន្រ្ទានដីព្រៃសហគមន៍ភ្នំសេះមក ពលរដ្ឋ​មានការលំបាកក្នុងការអាស្រ័យផលព្រៃឈើ ដូចជាមុខរបរដងជ័រទឹកក៏ត្រូវបាន​ថមថយ ដោយ​សារតែព្រៃស្រោងត្រូវបានកាប់ឆ្ការ ជំនួសមកវិញដោយចំការស្វាយចន្ទីរ និងដំណាំ​ដំឡូងមី។

លោកបញ្ជាក់ទៀតថា៖ «ដងជ័រទឹកយ៉ាងម៉េចបើគេកាប់ព្រៃត្រឡប់ត្រឡិនចូលមិនចុះផង និយាយពីថាគេនិយមកាប់ព្រៃសហគមន៍លក់ សុទ្ធតែអ្នកចំណូលថ្មីសុទ្ធហ្មង៎គេដាំចន្ទីរ និងដំឡូង»។

លោកបន្ថែមថា សកម្មភាពដែលមានការកាប់ទន្រ្ទានខ្លាំងគឺចាប់ពីឆ្នាំ២០១៨មក ហើយឆ្នាំ​២០២២​នេះ ទំនងជាអ្នកកាប់ព្រៃទាំងនោះបំណងកាប់ព្រៃឱ្យ​អស់តែម្ដង។ លោកបង្ហាញ​ការ​ខកចិត្តចំពោះអាជ្ញាធរមូលដ្ឋាន​ ដែលមិនអាចដោះស្រាយបញ្ហា​ដ៏រាំរៃនេះជូនពលរដ្ឋ​សហគមន៍ ខណៈដីសហគមន៍ភ្នំសេះនេះ ត្រូវបានទទួលស្គាល់ដោយក្រសួង រុក្ខាប្រមាញ់ និងនេសាទនៅឆ្នាំ២០១៨។

លោកថា៖«ខ្ញុំខកចិត្ត និងសោកស្ដាយជាខ្លាំង ដោយសារយើងធ្វើហ្នឹងមិនមែនអត់ច្បាប់​ឯណា មានច្បាប់គ្រប់គ្រាន់ ការអនុវត្តច្បាប់វានៅមានកម្រិត បើគ្មានអ្នកធំនៅពីក្រោយ​វាមិនហ៊ាន​ធ្វើទេ»។

ចំណែកលោក ងាន់ សុខា អាយុ៣២ឆ្នាំ ជាគណៈកម្មការសហគមន៍ លើកឡើងស្រដៀង​គ្នា​ថា ការកាប់រានទន្រ្ទានដីនៅតំបន់ភ្នំសេះកាន់តែធ្ងន់ធរទៅពីមួយថ្ងៃទៅមួយថ្ងៃ ដោយសារ​តែ​មិនមានការទប់ស្កាត់ពីអាជ្ញាធរមានសមត្ថកិច្ច។

លោក សុខា ឱ្យដឹងថា៖ «ព្រៃច្បោះដែលបងប្អូនអាស្រ័យផលនោះ អស់ប្រហែល៧០ភាគរយ​ដែរហើយ វាធ្ងន់មិនមែនថាស្រាលទេ អ្នកការពារវិញចង់អស់ដៃអស់ជើងដែរ ដូចជាតាំងពី​អាជ្ញាធរ​សហការមក បានតែពីរសារចោលតែម្ដង»។

លោកបន្តថា ពលរដ្ឋដែលកាប់ព្រៃយកដីលក់នោះជាបុគ្គលដដែលៗ ហើយដាក់លក់ក្នុងតម្លៃ​ឡៃឡុងមួយប្លង់ក្បាលដី២០០ ទៅ៣០០ម៉ែត្រតម្លៃ ១ពាន់ដុល្លារ ទៅ២ពាន់ដុល្លារ។

លោកបញ្ជាក់ថា៖ «អាអ្នកទិញហ្នឹងអ្នកចំណូលថ្មី តែអាអ្នកលក់ហ្នឹងអ្នកចាស់ហ្នឹងទេ»

លោកអះអាងថា ប្រសិនបើអាជ្ញាធរមិនមកអន្តរាគមន៍ទេ អនាគតនៃសហគមន៍ភ្នំសេះ​នឹង​បាត់​បង់​នាពេលឆាប់ៗនេះ ដោយសារតែខ្វះការចូលរួមពីមន្រ្តីពាក់ព័ន្ធ។

បើតាមមេភូមិអូរព្រះ លោក អ៊ុំ សារ៉ាវី ដែលទើបឡើងកាន់តំណែងថ្មី ប្រាប់ឱ្យដឹងថា លោក​មិន​ទាន់បានដឹង​លម្អិតពីបញ្ហាកាប់រានដីព្រៃសហគមន៍ភ្នំសេះឡើយ ដោយសារតែលោកទើប​នឹង​ជាប់ជា​មេភូមិថ្មី បើចង់ដឹងច្បាស់អាចសួរមេភូមិចាស់បាន។

លោក សារ៉ាវី ថ្លែងថា៖«ខ្ញុំអត់ដឹងដែរ ខ្ញុំមេភូមិអូរព្រះទើបឡើងប្រហែល១ខែទេ ទាល់តែ​ទំនាក់ទំនងទៅមេភូមិចាស់ និងសហគមន៍គេ»។

ដីព្រៃសហគមន៍ត្រូវបានកាប់ទន្ទ្រានយកជាកម្មសិទ្ធិ និងមានការតាំងទីលំនៅផងដែរ ស្ថិតក្នុងភូមិអូរព្រះ ឃុំអូរកណ្ដៀសែនជ័យ ស្រុកសំបូរ ខេត្តក្រចេះ រូបថតក្នុងឆ្នាំ២០២១។ រូបភាពផ្ដល់ឱ្យ

ចំណេកមេឃុំអូរកណ្ដៀសែនជ័យដែលទើបនឹងកាន់តំណែងថ្មី គឺលោក តៀន នឿន អះអាង​ថា​ លោកមិនទាន់អាចដោះស្រាយបញ្ហានៅសហគមន៍ភ្នំសេះបានទេ ប្រសិនបើអាជ្ញាធរ​ពាក់ព័ន្ធ​ខាងលើមិនចុះមកអន្តរាគមន៍ ឬផ្ដល់ជាកញ្ចប់ថវិកាក្នុងការចុះទប់ស្កាត់។

លោក នឿន ថ្លែងថា៖«សហគមន៍ហ្នឹងមិនដឹងជាយ៉ាងម៉េចដែរ បើមន្រ្តីពាក់ព័ន្ធដីធ្លីព្រៃឈើ​ហ្នឹង មិនដែលទាក់ទងមកយើង ឱ្យខ្ញុំទៅគ្រប់គ្រងម៉េចបើខ្ញុំជាឃុំ​ទើបកាន់តំណែងថ្មី​បាន២​ខែ​ហ្នឹង»។

លោកមេឃុំអូរកណ្ដៀសែនជ័យ អះអាងថា លុះត្រាតែមន្រ្តីជំនាញថ្នាក់លើចុះមកសហការ​ជាមួយអាជ្ញាធរមូលដ្ឋានទើបអាចដោះស្រាយបញ្ហាដ៏រ៉ាំរៃនេះបាន។

បើតាមរបាយការណ៍​របស់​សមាគម​បណ្តាញ​យុវជន​កម្ពុជា​ដែលចេញផ្សាយកន្លងទៅ ​បង្ហាញ​ថា​ ការ​កាប់​រានទន្ទ្រាន​កាន់កាប់ដីព្រៃ ​បាន​គំរាមកំហែង​ដល់​ជីវភាពរស់នៅ​របស់​ប្រជា​សហគមន៍​​មូលដ្ឋាន​ ​ជនជាតិ​ដើម​ភាគតិច​ពូនង​ ​ដែលតែងទទួលផលពី​អនុផល​ព្រៃឈើ​  ​បម្រើ​ជីវភាព​ជាច្រើន​ទសវត្សរ៍​មក​ហើយ​។​ ទន្ទឹមនឹងនោះ ​អ្នកភូមិជនជាតិដើមភាគតិច ​ប្រឈម​​បាត់បង់​ទីកន្លែង​ជំនឿ​​ដែល​ហៅថា ​«​ទី​ជំនឿ​ភ្នំ​សេះ​»។​

អតីតមេឃុំអូរគ្រៀង​លោក​ ​កែវ​ ​បុប្ផា អះអាងថា កាលពីលោកជាមេឃុំចាស់ លោកធ្លាប់បាន​ធ្វើ​កិច្ចសន្យា និងអប់រំទៅដល់អ្នកដែលមកកាប់ឆ្ការព្រៃសហគមន៍ ប៉ុន្តែតាំងពីលោកផ្លាស់​តួនាទី​មក លោកមិនបានដឹងពីស្ថានភាពនៅសហគមន៍ភ្នំសេះយ៉ាងណាទេ។

លោកថា៖«យើងបោះឆ្នោតខែ៦ បែងចែកឃុំមក យើងអត់បានទៅជិតទេ ខ្ញុំអត់​ដឹងអី​ទាំងអស់។ ពីមុនមកយើងដាក់ឈ្មោះមានកិច្ចសន្យា ដាក់ទៅតុលាការ»។

​លោក​ ​គង់ មេត្តា ​ អភិបាលស្រុក​សំបូរ​ ដែលទើបកាន់តួនាទីថ្មី បានឱ្យដឹងថា ខ្ញុំទទួលបាន​ព័ត៌មាន​នឹងពីម្សិលមិញដែរ ហើយខ្ញុំបានដាក់កម្លាំងទៅ និងបានដកហូតម៉ាស៊ីន​អាឈើរួច​ផងដែរ។

លោកថ្លែងយ៉ាងដូច្នេះថា៖ «ព័ត៌មានហ្នឹងខ្ញុំទទួលបានកាលពីម្សិលហើយដែរ អ៊ីចឹងទៅណា៎ បានដាក់កម្លាំងដាក់អីចូលទៅ បានដកហូរអាណាដកអីខ្ទេចអស់ហើយតាស៎»

 ចំណែកអភិបាល​ខេត្ត​ក្រចេះ​ ​លោក​ ​វ៉ា​ ​ថន​ ​មិនលើកទូរសព្ទឡើយ ថ្វីបើទាក់ទងទៅ០២ថ្ងៃ​ជាប់​គ្នា​ក៏ដោយ។​ ​ចំណែក​នាយ​ខណ្ឌ​រដ្ឋបាល​ព្រៃឈើ​ខេត្ត​ក្រចេះ​ ​លោក​ ​ទ្រី​ ​សុភ័ក្រ មិនអាច​ទាក់ទងបានឡើយ។

ជុំវិញបញ្ហានេះ លោកអូត ឡាទីន មន្រ្តីសម្របសម្រួលគម្រោងសមាគមបណ្ដាញ​យុវជនកម្ពុជា (CYN) ​លើកឡើងថា ដីនៅសហគមន៍ភ្នំសេះនឹងបាត់បង់នៅពេលខាងមុខ ប្រសិនបើអាជ្ញាធរពាក់ព័ន្ធក្នុងមូលដ្ឋានមិនចុះមកអន្តរាគមន៍ទេនោះ ។

លោក ឡាទីន លើកឡើងថា៖ «បើសិនជាអាជ្ញាធរដែលនៅជិតបំផុត សង្កាត់រដ្ឋបាលព្រៃឈើ​គាត់អត់ដោះស្រាយបញ្ហានឹងទេ សហគមន៍ភ្នំសេះនឹងរលាយហើយ»

លោក ឡាទីន បន្ថែមថា តាមការសិក្សាកាលពីឆ្នាំ២០២០ ព្រៃសហគមន៍ភ្នំសេះ រងការកាប់​បំផ្លាញ​អស់ពាក់កណ្ដាលទៅហើយ ខណៈបច្ចុប្បន្ននៅតែមានការកាប់បន្ថែមទៀត។ លោក​ចង់​ឃើញអាជ្ញាធរមូលដ្ឋានប្រើប្រាស់សិទ្ធិអំណាចដែលមាន ដើម្បីដោះស្រាយបញ្ហា​ជូន​ប្រជាជនដែលរងគ្រោះ និងដកហូតដីទាំងនោះប្រគល់មកឱ្យសហគមន៍វិញ។

លោក បន្ថែមថា៖ «មានករណីខ្លះទៀតយើងទទួលបានព័ត៌មានថា អាជ្ញាធរមូលដ្ឋានពាក់ព័ន្ធ​នឹងជនល្មើសហ្នឹងទៅទៀត មានស៊ីញ៉េផ្ដល់ឱ្យជនល្មើសហ្នឹងចូលទៅកាប់ អានេះ​គឺជា​បញ្ហា»

គួររំលឹកថា ព្រៃ​សហគមន៍​ភ្នំ​សេះ មាន​ផ្ទៃ​ដីជាង ៣ពាន់(៣ ០៨១)ហិកតា មាន​ពលរដ្ឋ​មូលដ្ឋាន​​រួមគ្នា​ថែរក្សា​តាំងពី​ឆ្នាំ២០០៩ រហូត​ដល់​ឆ្នាំ២០១៨ ទើប​ក្រសួង​កសិកម្ម​ចុះបញ្ជី​ជា​ព្រៃ​សហគមន៍​ការពារ​ធម្មជាតិ​ស្រប​ច្បាប់។

កាល​ពី​ថ្ងៃ​ទី​២៣ ​ខែ​មីនា​កន្លងទៅ លោក​នាយក​រដ្ឋមន្រ្តី ​ហ៊ុន សែន​ បាន​ចេញ​បញ្ជា​ជា​ថ្មី​ឱ្យ​បង្កើន​​ការ​បង្រ្កាប​បទ​ល្មើស​នេសាទ​និង​ព្រៃឈើ​ដែល​មាន​លក្ខណៈ​ទ្រង់​ទ្រាយ​ធំ​ដោយ​លោកថ្លែងថា ​ការ​បង្រ្កាប​បទ​ល្មើស​កាល​ពីពេល​កន្លង​ទៅ​ គឺ​ជា​បទ​ល្មើស​តូច​តាច​តែ​ប៉ុណ្ណោះ។

បើទោះបីជាមានសេចក្ដីប្រកាសជាច្រើនលើកពីរដ្ឋបាលខេត្ត និងរដ្ឋបាលស្រុកសំបូរ កាលពី​ឆ្នាំ​​២​០​១​៩ ក្ដីក៏ប៉ុន្តែសកម្មភាពនៃការកាប់ទន្រ្ទានកាប់ព្រៃ​ខុសច្បាប់លើទីតាំងនៃដីព្រៃ​សហគមន៍​ភ្នំសេះ ដែលរួមមាន ការទន្រ្ទានដីព្រៃ ការសង់ខ្ទម ឬរោងចម្ការ និងការ​ដំណាំ​ស្វាយចន្ទី នៅតែបន្តរហូតមកដល់បច្ចុប្បន្ន និងកាន់តែមានលក្ខណៈធ្ងន់ធ្ងរទៅៗ​។

យោងតាមលទ្ធផលនៃការស៊ើបអង្កេតនិងស្រាវជ្រាវរបស់ CYN នៅដើមឆ្នាំ២០២១ បានរកឃើញថា ព្រៃសហគមន៍ភ្នំសេះបាននឹងកំពុងទទួលរង​នូវការទន្រ្ទានកាន់កាប់ដីព្រៃ​ស្ទើរតែទាំងស្រុង និងបានធ្វើឱ្យប៉ះពាល់ធ្ងន់ធ្ងរដល់និរន្តរភាពព្រៃសហគមន៍ និងបរិស្ថាន។ ក្នុងទំហំផ្ទៃដីព្រៃសហគមន៍ភ្នំសេះសរុប ៣ ០៨១ហិកតា ត្រូវគេរកឃើញថាបានបាត់បង់​ដី​ប្រមាណ ១ ៣០៣ហិកតា ខណៈដីទំហំប្រមាណ ៤​ ៦០៨ហិកតា​នឹងបាត់បង់នៅពេល​ខាង​មុខ។

ទន្ទឹមនឹងនេះ របាយការណ៍ដដែល បានរកឃើញមានលំនៅដ្ឋានខុសច្បាប់​ដែលបានសាង​សង់​លើ​ដី​ដែលបានកាប់រានទន្រ្ទាន នៅលើដីព្រៃសហគមន៍ភ្នំសេះចន្លោះពី ៨០ទៅ ៨៥ខ្នង ដែលភាគច្រើនបានសង់ខ្ទមក្នុងទម្រង់ជារោងចាំចម្ការ និងផ្ទះបណ្ដោះអាសន្ននៅលើក្បាលដី​របស់ពួកគេ ដោយភាគច្រើនមិនមានមនុស្សស្នាក់នៅជាប្រចាំឡើយ៕

328 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម