សមាគមសម្ព័ន្ធអ្នកសារព័ត៌មានកម្ពុជា

លោកនាយករដ្ឋមន្រ្តីបញ្ជាឱ្យអាជ្ញាធរខេត្តបាត់ដំបងចុះដោះស្រាយ​ជូនប្រជាពលរដ្ឋរឿងដីធ្លីនៅចំណុចអាងភាសបន្ទាប់ពីមានការតវ៉ា

គ្រឿងចក្រកំពុងស្ថិតនៅលើដីស្រែប្រជាពលរដ្ឋចំណុចអាងភាស ស្រុកឯកភ្នំ ខេត្តបាត់ដំបង ដោយផ្អាកធ្វើសកម្មភាពក្រោយពលរដ្ឋតវ៉ា។ រូបថតថ្ងៃទី១៧ ខែសីហា ឆ្នាំ២០២២។ ខេមបូចា/ សុខសាវី
គ្រឿងចក្រកំពុងស្ថិតនៅលើដីស្រែប្រជាពលរដ្ឋចំណុចអាងភាស ស្រុកឯកភ្នំ ខេត្តបាត់ដំបង ដោយផ្អាកធ្វើសកម្មភាពក្រោយពលរដ្ឋតវ៉ា។ រូបថតថ្ងៃទី១៧ ខែសីហា ឆ្នាំ២០២២។ ខេមបូចា/ សុខសាវី

អាជ្ញាធរខេត្តបាត់ដំបងបានចុះពិនិត្យនិងដោះស្រាយជូនប្រជាពលរដ្ឋដែលអាស្រ័យផលជាក់​ស្តែងនៅចំណុចអាងភាសជាទីកន្លែងដែលពលរដ្ឋជិត១០០នាក់ផ្ទុះការតវ៉ាបញ្ឈប់គ្រឿងចក្រ កាយដីស្រែពួកគាត់កាលពីថ្ងៃទី១៦ ខែសីហា។

លោក ម៉ឹល សុផល អភិបាលស្រុកឯកភ្នំខេត្តបាត់ដំបងបានឱ្យដឹងថា អាជ្ញាធរឃុំស្រុកកំពុង​ញាប់ដៃញាប់ជើងចុះពិនិត្យនិងស្រង់ទិន្នន័យដីស្រែប្រជាពលរដ្ឋដែលតវ៉ាថា ពួកគាត់បាន​អាស្រ័យផលជាក់ស្តែងធ្វើរបាយការណ៍ជូនថ្នាក់ខេត្ត ដើម្បីមានមូលដ្ឋានរាយការណ៍ជូន ប្រមុខរាជរដ្ឋាភិបាលស្នើសុំគោលការណ៍ដោះស្រាយជូនពួកគាត់។​

លោកអភិបាលស្រុកបានបន្ថែមថា កន្លងទៅអាជ្ញាធរមិនទាន់មានការសិក្សាច្បាស់នៅឡើយ ថាតើមានប្រជាពលរដ្ឋប៉ុន្មានគ្រួសារដែលអាស្រ័យផល​ជាក់ស្តែងនិងយូរនៅ​អាងភាសនេះ​នៅឡើយទេ។ កន្លងមកធ្លាប់តែជួបសម្របសម្រួលជាមួយប្រជាពលរដ្ឋ២៣គ្រួសារដែលអះ​អាង​ថា​បានអាស្រ័យផលជាប់រហូតតាំងពីឆ្នាំ១៩៨៣ មកដល់បច្ចុប្បន្ននេះ លើផ្ទៃដី៣១ហិកតា ។ លោកបន្ថែមថា អាជ្ញាធរកំពុងបន្តចុះពិនិត្យនិងស្រាវជ្រាវចំពោះប្រជាពលរដ្ឋផ្សេង​ទៀត​ដែលអាស្រ័យផលជាក់ស្តែងក្នុងអាងភាសនេះ ។

លោក សុផល​ ថ្លែងថា៖ «យើងបានចុះពិនិត្យមើលអ្នកណាដែលមានការតវ៉ាចុះទៅបង្ហាញ​ព្រំដី​របស់គាត់ អ្នកដែលមានដីធំហ្នឹងមុន! ហើយធ្វើរបាយការណ៍លម្អិតជូនខេត្តដើម្បីមាន​មូលដ្ឋាន​ជម្រាបជូនសម្តេច»

កាលពីព្រឹកថ្ងៃពុធនេះក្នុងឱកាសអញ្ជើញប្រគល់សញ្ញាបត្រជូននិស្សិតសកលវិទ្យាល័យ ពុទ្ធិសាស្រ្ត លោកនាយករដ្ឋមន្រ្តី ហ៊ុន សែន បានបញ្ជាឱ្យអាជ្ញាធរខេត្តបាត់ដំបង ធ្វើការ​ដោះស្រាយដីធ្លីនៅតំបន់អាងភាស ជូនប្រជាពលរដ្ឋដែលរស់នៅនិងអាស្រ័យផលយូរមក​ហើយ។

លោកនាយករដ្ឋមន្ត្រីមានប្រសាសន៍៖ «ដីអាងភាសនេះជាដីដែលប្រជាជនរស់នៅច្រើនជំនាន់​ហើយ ផ្នែកធនធានទឹករបស់យើងទៅធ្វើទំនប់ធ្វើអីណា កាយកប់ត្រឡប់ជាន់នៅអី បាត់ដំបង! ខ្ញុំក៏ដោនឡូតអាហ្នឹងបញ្ជូនទៅរដ្ឋមន្រ្តីធនធានទឹក លឹម គានហោ បញ្ជូនទៅឱ្យ សុខ លូ អភិបាលខេត្តបាត់ដំបង»។ លោក ហ៊ុន សែន បន្តថា៖ «តិច[ផ្ញើសារ]ទៅ សុខ លូ ថា អាហ្នឹងជាអាំងវ៉ង់ទែ! គាត់ប្រើពាក្យអាំងវ៉ង់ទ័រ របស់ក្រសួងធនធានទឹក។ ខ្ញុំប្រាប់ទៅវិញថា ទទួលអំណាចពីនាយករដ្ឋមន្រ្តីដោះស្រាយជាមួយប្រជាជនទៅ បើដីហ្នឹងជាដីរបស់រដ្ឋ ធ្វើទៅវាលិច យើងកុំធ្វើទៅ យើងធ្វើជាមួយប្រជាជនទៅ ជួបទៅ! »

លោកនាយករដ្ឋមន្រ្តីបន្ថែមថា៖ «តាមការបកស្រាយរបស់អតីតវ័យចំណាស់ម្នាក់ គេរស់នៅ​ច្រើនជំនាន់ហើយ ចូលដល់រយឆ្នាំហើយ យើងនៅថាចាត់ទុក​ប្រជាពលរដ្ឋ​មកទន្រ្ទាន​កាន់កាប់! ទន្រ្ទានកាន់កាប់!  ចុះទៅមើលដោះវាឱ្យចេញ»

ក្រោយពីប្រសាសន៍របស់ប្រមុខរាជរដ្ឋាភិបាល មកទល់ម៉ោងជាង៣រសៀលថ្ងៃពុធ ឃើញ​មាន​ក្រុមគ្រឿងចក្រកាយដី និងរថយន្តដឹកដីជាច្រើនគ្រឿងនៅលើទីតាំងដី ស្រែប្រជាពលរដ្ឋ​ក្នុងតំបន់អាងភាស ស្ថិតនៅភូមិគោកដូង ឃុំពាមឯក ស្រុកឯកភ្នំ ខេត្តបាត់ដំបង នៅឡើយ តែមិនឃើញមានសកម្មភាពកាយដីនោះទេ ដោយពលរដ្ឋអះអាងថាគ្រឿងចក្រទើបតែឈប់ កាយដោយម្ចាស់ស្រែមកហាមប៉ុណ្ណោះ ។

នៅទីនោះមិនមានភាពអ៊ូអរដូចការតវ៉ារបស់ប្រជាពលរដ្ឋកាលពីថ្ងៃអង្គារ៍នោះទេ គឺមាន​ប្រជាពលរដ្ឋប្រមាណជាង១០នាក់ក្នុងក្រុម២៣គ្រួសារ ដែលមានដីស្រែ៣១ហិកតា​ដែល​ពួកគាត់អះអាងថា បានអាស្រ័យផលតាំងពីឆ្នាំ១៩៨៣ ក្នុងអាងភាសនេះ បាន​ប្រមូល​ផ្តុំគ្នា​អង្គុយក្រោមដើមឈើក្បែរនោះ និងឃើញមានអាជ្ញាធរស្រុកឯកភ្នំមួយក្រុមកំពុង​ជួប​ជាមួយ​ម្ចាស់ដីស្រែធំៗដែលតវ៉ា ដើម្បីពិនិត្យនិងឱ្យចង្អុលបង្ហាញព្រំដីរបស់ខ្លួន ។

នៅពេលដែលអ្នកព័ត៌មាន ខេមបូចា ដើរចូលសំដៅទៅទីកន្លែងនោះ អាជ្ញាធរស្រុកជួបជា​មួយ​ប្រជាពលរដ្ឋដែលមានដីស្រែច្រើនជាកន្លែងគ្រឿងចក្រធ្វើសកម្មភាពកាយដីនោះ ស្រាប់តែ​ក្រុម​មន្រ្តីដែលដឹកនាំដោយអភិបាលរងស្រុកម្នាក់ និងសមត្ថកិច្ចប៉ូលិសបួនប្រាំនាក់នៅទីនោះ បានឡើងរថយន្តនិងម៉ូតូចាកចេញទៅដែរ នៅសល់តែម្ចាស់ស្រែមួយគ្រួសារដែលរៀបនឹង​ចេញ​​តាម​ក្រោយទៀត។

គ្រឿងចក្រនិងរថយន្តដឹកដីផ្អាកសកម្មភាព ក្រោយម្ចាស់ស្រែមកហាមឃាត់ កុំឱ្យបន្តកាយ​លើដីស្រៃរបស់គាត់ទៀត។ រូបថតថ្ងៃទី១៧ ខែសីហា ឆ្នាំ២០២២។ ខេមបូចា/ សុខ សាវី

លោក វឌ្ឍនា​ ជាពលរដ្ឋម្នាក់ដែលមិនទាន់ចាកចេញពីកន្លែងនោះ បានប្រាប់ថា គ្រួសារ​របស់ គាត់មានដីស្រែ១១៧ហិកតាដែលទិញតពីប្រជាពលរដ្ឋតាំងពីឆ្នាំ១៩៩១-១៩៩២ មកម៉្លេះ ក្រុមហ៊ុនបានប្រើគ្រឿងចក្រកាយដីស្រែរបស់គាត់ជាច្រើនថ្ងៃមកហើយ។ លោកបញ្ជាក់ថា ដីស្រែជាង១០០ហិកតានេះ ឪពុករបស់លោកឈ្មោះ ច្រាយ សុន បានចែកឱ្យកូនៗ​ដែលមាន​គ្រួសារហើយ ចំនួន៨នាក់ ក្នុងម្នាក់ៗជាង១០ ហិកតា ហើយត្រូវបានអាជ្ញាធរស្រុកចុះពិនិត្យ និងឱ្យចង្អុលបង្ហាញអស់ហើយដែរ។

លោក វឌ្ឍនា បញ្ជាក់ថា៖ «អាជ្ញាធរស្រុកគ្រាន់តែចុះមកចង់ដឹងទិន្នន័យថា ម្ចាស់ស្រែហ្នឹងពិត​ប្រាកដ​អត់ ហើយមានដីប៉ុន្មានហត្ថប៉ុណ្ណឹងទេ អត់ទាន់មានដោះស្រាយអីជាក់លាក់ទេ»

ចំណែកប្រជាពលរដ្ឋក្នុងក្រុម២៣គ្រួសារដែលអង្គុយចម្ងាយប្រហែល៣០០ម៉ែត្រពីគ្រឿងចក្រ នៅពេលដែលអ្នកព័ត៌មានដើរសំដៅទៅជួបសម្ភាស ពួកគាត់ហាក់មិនចង់ផ្តល់ព័ត៌មាន ដោយ​បាននិយាយយ៉ាងខ្លីថា៖ «ខ្ញុំអរគុណច្រើនហើយ ដែលសម្តេចជួយដោះស្រាយឱ្យ!»  រួចក៏នាំគ្នាដើរចេញទៅជ្រកក្រោមដើមឈើផ្សេង។

សូមបញ្ជាក់ថា កាលពីព្រឹកថ្ងៃអង្គារ៍ទី១៦ ខែសីហា​ ឆ្នាំ២០២២ ប្រជាពលរដ្ឋក្រោម១០០នាក់ ដែលអះអាងតំណាងជាង២០០គ្រួសារ បានលើកគ្នាមកជួយតវ៉ាឱ្យគ្រឿងចក្របញ្ឈប់ការ​កាយ​យកអាចម៌ដីពីស្រែរបស់ពួកគាត់នៅចំណុចអាងភាសនេះ ដោយពួកគាត់​ស្នើសុំឱ្យកាត់​ឆ្វៀលដីបានកាន់កាប់ស្របច្បាប់ ដែលពួកគាត់អាស្រ័យផលយូរឆ្នាំមកហើយ ដែលខ្លះ​អះ​អាង​ថាតាំងពីឆ្នាំ១៩៨៣មកម្លេះ។

លោក សុខ លូ អភិបាលខេត្តបាត់ដំបងមានប្រសាសន៍ថា លោកបានដឹកនាំមន្រ្តី​ចុះទៅ​ពិនិត្យ​មើលទីតាំងនោះផ្ទាល់ហើយ តាមគោលការណ៍ បើប្រជាពលរដ្ឋអាស្រ័យផលពិតប្រាកដ និង​យូរ​ជាង១០ឆ្នាំ អាជ្ញាធរនឹងប្រជុំពិភាក្សាធ្វើការដោះស្រាយជូន ចំណែកបងប្អូនខ្លះ​មិនបាន​ធ្វើ​អី​នៅហ្នឹងទេ ហើយអាជ្ញាធរស្រាវជ្រាវទៅពួកគាត់មកតវ៉ាតាមគេតាមឯង គឺមិនដោះស្រាយ​ជូនទេ។ លោកបន្តថាចំណែកអ្នកដែលមានដីធំៗ ដែលអះអាងថា ទិញតៗគ្នានោះ ហើយមិន​ដែល​អាស្រ័យផលនោះ គឺមិនមានគោលការណ៍ដោះស្រាយជូនទេ តែអាជ្ញាធរនឹងប្រជុំ​គណៈកម្មការគ្រប់គ្រងដីរដ្ឋដើម្បីស្នើសុំគោលការណ៍ពីរាជរដ្ឋាភិបាលគឺធ្វើដោយម៉ត់ចត់និងប្រុងប្រយ័ត្ន។

លោក សុខ លូ បន្តថា៖ «ជាគោលការណ៍យើងការពារប្រយោជន៍របស់ប្រជាជនស្របច្បាប់ ដែលអាស្រ័យផលយូរហើយ តែយើងមិនភ្លេចប្រយោជន៍រដ្ឋ មិនភ្លេចប្រយោជន៍រួមទេ យើង​ធ្វើ​ដោយម៉ត់ចត់ និងប្រុងប្រយ័ត្ន»

លោក អភិបាលខេត្តបញ្ជាក់ថា អាងភាសនេះមាន ២០០០ហិកតា អាចផ្ទុកទឹកបាន១៦លាន​ម៉ែត្រគូប ក្នុងរដូវវស្សាមានលទ្ធភាពស្រោចស្រពដីស្រែបាន ៣២០០ហិកតា នៅរដូវប្រាំង បានជាង២ ០០០ហិកតា ហើយបច្ចុប្បន្ននេះមានការពង្រីកថែមទៀត អាចស្រោចស្រពដីស្រែ​រដូវប្រាំងដល់៥០០០ហិកតា ។

លោក សុខ លូ បន្ថែមថា៖ «ពលរដ្ឋខ្លះទាមទារតវ៉ាឱ្យលប់អាងភាសហ្នឹង បើលុប​ទៅ​ប្រជាពលរដ្ឋដែលយកទឹកហ្នឹងប្រើ យកទៅទុកឯណា? យើងដោះស្រាយដោយថ្លឹងថ្លែង ច្បាស់លាស់ប្រយោជន៍បងប្អូនមិនឱ្យបាត់ យើងត្រូវសហការគ្នាដែរ ប្រយោជន៍រួម​របស់​បងប្អូនប្រជាពលរដ្ឋដែលអាស្រ័យផលលើអាងភាសហ្នឹងក៏គិតដែរ»

ទោះបីយ៉ាងណា លោក យិន ម៉េងលី មន្រ្តីសម្របសម្រួលសមាគមអាដហុកខេត្តបាត់ដំបង និង ប៉ៃលិន បានកត់សម្គាល់ថា អាជ្ញាធរនៅមូលដ្ឋាននេះបើមានបញ្ហាធំៗ​គាត់មានការ​ប្រុង​ប្រយ័ត្នក្នុងការសម្រេចចិត្ត ដែលវាអាចប៉ះពាល់ដល់តួនាទី រឺតំណែងរបស់គាត់ ព្រោះបញ្ហាដី​អាងភាសនេះជាដីសារធារណៈរបស់រដ្ឋ វាពាក់ព័ន្ធខាងក្រសួងធនធានទឹក វាពាក់ព័ន្ធ​នឹង​រដ្ឋមន្រ្តី អ៊ីចឹងគាត់ចាំមើលភ្លើងខៀវពីលើមកដែរ។

លោកបន្តថា មិនថាតែរឿងដីធ្លី រឺបញ្ហាអ្វីក៏ដោយ ឱ្យតែសម្តេចនាយកមានប្រសាសន៍មក​ហើយ គឺអាជ្ញាធរនៅថ្នាក់ជាតិក្តីនៅថ្នាក់ក្រោមជាតិក្តី ពួកគាត់នាំគ្នាខ្លាចដោយនាំគ្នាស្វះស្វែង រកដំណោះស្រាយហើយ។

លោក ម៉េងលី បន្ថែមថា៖ «ពួកគាត់ហាក់ធ្វើអ្វីៗរង់ចាំតែការសម្រេចពីថ្នាក់លើមក ចុះបើ​សិន​ជាសម្តេចនាយកមិនមានប្រសាសន៍ ប្រជាពលរដ្ឋមិនរងគ្រោះហើយទេ នេះជាចំណុចមួយ​គួរគប្បីឱ្យមានការកែទម្រង់ឡើងវិញ ដើម្បីឱ្យអាជ្ញាធរថ្នាក់ក្រោមជាតិគាត់ហ៊ាន​សម្រេចខ្លះ​ទៅ ពីព្រោះយើងបានធ្វើវិមជ្ឍការមួយចំនួនឱ្យថ្នាក់ក្រោមជាតិហើយ»។

លោក ម៉េង លី ក៏បានស្នើឱ្យអាជ្ញាធរមានការដោះស្រាយបញ្ហាដីធ្លី នៅចំណុចអាងភាស​នេះ​ដោយមានការប្រុងប្រយ័ត្ន ព្រោះតាមលោកដឹង តំបន់នេះក៏មានអស់លោកខ្លះ មានដីដល់រាប់​រយហិកតា ដែលខ្លះទើបតែចូលទៅទិញរឺកាន់កាប់ថ្មីៗដែរ មិនមានកាន់កាប់រាប់តំណដូច​ប្រជាពលរដ្ឋដែលសម្តេចលើកឡើងទេ ដោយចៀសវាងកន្ទេលធំប្រឡំដេក រឺ ត្រីងៀតឆ្លៀត​ពង។

លោក ម៉េងលី បន្ថែមទៀតថា៖ «ដូចពាក្យចាស់ពោលថា កន្ទៀលធំប្រឡំដេក រឺក៏ត្រីងៀត​ឆ្លៀត​ពង ឧទាហរណ៍ កាត់ដីឱ្យប្រជាពលរដ្ឋអស់តែ១០០ រឺ២០០ហិកតាទេ ដល់ពេលមាន​អស់លោកធំៗ រឺមានត្រីងៀតឆ្លៀតពងហ្នឹង ! វាអស់លើសអ្វីដែលឱ្យប្រជាពលរដ្ឋទៀត!  អ៊ីចឹងយើងធ្វើការពិនិត្យដោយប្រុងប្រយ័ត្នដើម្បីកុំឱ្យបាត់បង់នូវ ទ្រព្យសម្បត្តិដីសារធារណៈ​របស់រដ្ឋ គឺប្រជាពលរដ្ឋក៏អាចទទួលបានដីសម្រាប់ចិញ្ចឹមជីវិត ហើយការអភិវឌ្ឍក៏អាចដំណើរ​ការបានដែរ យើងចង់ឱ្យមានដំណើរការទន្ទឹមគ្នា»

400 views

ព័ត៌មានថ្មីៗ

អត្ថបទពេញនិយម